12. Najamatabükuenerubare newajünaeyabelianej̈a

¿DEJ̈UA BEYAPÜTANETSI BAJARAPALIWAISI YABARA?

Itsa jamatabüjitsipame nekaj̈itajarabinej̈a j̈ua najamatabükueneweretame neitsinej̈a, j̈aniawaetsia benajamatabüj̈ainame newajünaeyabelia, bekanaüjütame j̈ua katosajina, ayaikuenia benakuenebamenua.

Itsajawata meta benakuenebame kaematakabibeje, juametomonae, waimonae nekapanepaenej̈a j̈ua jamatabükuenejitsipame. Kopiaya beaj̈ayokuenia beitsimü tsikirikuenejawayo nekaj̈itajarabinej̈a j̈ua najamatabürubame newajünaeyabelia.

¿DEJ̈UAJITSIA META PENAMATAMOTSILIWAISI?

Itsa katokopiapata baja j̈ua jitsipame newajünaeyabelianej̈a, bajaraj̈ua kayawenonaena nenajamatabükueneweretsinej̈a, nej̈ata itsamonae j̈aniawaetsia kayajawajinawanapaena, barüyamü tsanenua.

Nenajamatabükueneweretabiabijawa j̈aniawaetsia: Itsa siwanakuenebame nekapanepaenej̈a j̈ua najamatabürubame, tsikirikuenejawayo ata, najamatabükuenesaütsianame nekapanepaenej̈anua ayaikuenejawa. Itsa kakapokapona aponekuenejüpaej̈ae panakuapijiwije, itsa ayailiwaisi katokopiapatanua, yasipitsapanajetarukaename.

Najamatabükueneimoj̈oyotsianame neyapütaewijawabelia: Daj̈ita jiwi jitsipatsi wajanajuajinawanapaenej̈a pamonae basiwanakueneba pekapanepaenej̈a j̈ua jitsipa. Nej̈ata wajanajamatabükueneimoj̈oyotsinej̈a wajayapütaewijawabelia kaejamatabükuenia benakuenebatsi.

Bitso barüyamü tsane: Itsa kapanepame pakuenia najamatabükueneweretame, nej̈ata jamatabükuenebarüyamü tsane.

Christopher jumaitsi: “Netsitapej̈aniakuene tasiwanajamatabürubijawanü tawajünaeyabelianej̈a, tsipaji nekueneenanajetaruka, niajamatabükuenesaüyaej̈ananua. Itsa kapanepajü j̈ua najamatabükueneweretajü taitsinej̈a, barüyanü bitso”, bajaraponü jai.

BIBLIABAJ̈UTO JUMAITSI: “Peubinü itsa ewetanuka üjowibo apoubi tsane. Pajiwi saya taenuka üpajubo nej̈ata aponotsi tsipae peubijawa” (Eclesiastés 11:4).

¿DEBEITSIMÜ TSIPAE?

Pekatokopiapatsinej̈a pakuenia jamatabüjitsipame newajünaeyabelia, ej̈anare pakueniaje:

Itapere j̈ua jamatabüitsimü. Yakinare daj̈ita j̈ua najamatabüj̈ainame, j̈uakujinae itapere kopiaya j̈ua jamatabüitsimü.

Natsiwajünaekanaüjüre pakuenia beitsimü. Ej̈anare pakueniaje:

• Kaüjüre pamatakabi weretsijitsiamü.

• Yakinare pakuenia itsimü tsane.

• Natsiwajünaekanaüjüre j̈ua katsitaayapübeje tsipae newajünaeyabelianej̈a, pakuenia beitsimü yajawa bajaraj̈ua pekatoyakaranatsiyaniwa.

Nakuenebare pakuenia kanaüjütame. Itsa abaj̈ü katosajina itsakuene netaj̈uj̈uabinej̈a jamatajemamüre. Biji rajane nayanijobare: “¿Dej̈ua beitsinü kopiaya takapanepaenej̈a pakuenia jamatabüjitsipajü?” Nej̈ata neyapütaekujinae ej̈anare bajarapakuenia. Najamatabükanaüjütabiabare pakuenia itsijitsiamü.

BIBLIABAJ̈UTO JUMAITSI: “J̈aniawaetsia penakuenebinü pakuenia natsiwajünaekanaüjüta pej̈aniakuene tokopiapatsianatsi” (Proverbios 21:5).