Tabernáculobo Dioso pijakuenejawanü pej̈anaenej̈a

Pakujinae Moisés nuka Sinaí ibotsutojumajawata, Jehová itoroba penakuenebinej̈a tabernáculobo. Bajarapatabernáculobojawata israelitawi ej̈anaejitsipa Dioso pijakuenejawanü. Yajawa kaponaejitsipa bajarapatabernáculobo itsabelia matakaponatsi.

Jehová jumaitsi Moisésjawabelia: “Wajüre israelitawijawabelia pekobekowü perajutsinej̈a bajarapakuenia penakuenebinej̈a tabernáculobo”. Israelitawi nej̈ata kapona oronanitojawa, platananitojawa, cobrenanitojawa, pej̈aniaibotoj̈i, penaitabütsijawanü ata. Bajarapijinia rajuta lanapananü, linopanajawanü, dajubi pebokotonü, itsakuenejawanü ata. Bajarapamonae barüyaya rajuta pekobekowüjawanü, bajaraj̈uata Moisés jumaitsi bajarapamonaejawabelia: “Ayaijawa baja j̈ainatsi. Pütsa baja panerajutame”.

Pebijiwi, petiriawimonae pekuenekaüjüpaewitsi yawenona penakuenebinej̈a tabernáculobo. Jehová yapütaeyaej̈anatsi pakuenia nakuenebijitsia bajarapatabernáculobo j̈aniawaetsia penakuenebinej̈a. Israelitawiyajuwünüwi j̈uetabiaba pejukaenej̈a pemaütonü, itsamonae jorokabiaba itsakuenejawa, itabüta pepanajumatanua. Itsamonae pijinia nakuenebabiaba oronanitonüta, kaukubabiaba ibojawanü, najumajebabiaba ata, itsamonae nakuenebabiaba naejawakuenejawanüta yajawa.

Bajarapamonae nej̈ata nakueneba tabernáculobo pakuenia Jehová itorobatsi. Itsi pej̈aniapanajawa peyatuukutsinej̈a anijaünübeje bajarapatabernáculobojawata, wünüruta: Santojawa yajawa Santísimojawa. Santísimojawata nuka Jehová pijapenamatamotsibaulajawa, bajarapapenamatamotsibaulajawa nakuenebabuatatsi acacianaejawata yajawa oronanitojumaepanatsi. Santojawata pijinia nuka candelabrowünüjawa oronanitojawa, kaemesayo, altarjawatanua itsajota tajuitabiaba inciensojawanü. Panabojawata eka pinijiwaj̈ij̈aneto cobrejawa yajawa nuka ayaialtarj̈aneto. Israelitawi najumekapanepaeya jumaitsi Jehovájawabelia pejumekowünütabiabinej̈a. Jehová pijapenamatamotsibaulajawa najamatabünapitsiayaej̈anatsi israelitawi penajumeliwaisirajutsijawa Jehovájawabelia pejumekowünütabiabinej̈a.

Jehová itapeta Aarón, pej̈i ata sacerdotewinej̈a, penakuenebinej̈anua tabernáculobojawata. Bajarapamonae beeweta tabernáculobo, beitsinua ofrendajawanü Jehovánej̈a altarjawata. Saya Aarón, sumo sacerdotewi pematakaponaenü kuenekaüjüpatsi pejonenej̈a Santísimojawabelia. Kaewai kanakujitsia Aarón kajoneyabiaba dajubi pejana petsikabinej̈a altarjumajawabelia pijanekoni yabara bajaraponü, pijamonae yajawa daj̈ita israelitawimi.

Israelitawi nakuenebawereta tabernáculobo kaewaikujinae pewekuapitsapaekujinae Egipto nakua. Matapania baja j̈aina itsajota Jehová pijakuenejawanü ej̈anaejitsipa.

Jehová tsitajüta petsitaj̈anepanaejawatsi bajarapatabernáculobo bajaraj̈uata pijapiapiapajubo mataakata. Bajarapakuenia najamatabükueneitajüta pebarüyajawa. Itsa bajarapapajubo nayotabiaba bajarapabowekua, nej̈ata bajarapamonae sarakabiaba pej̈aniawaetsinej̈a bajarapatabernáculobo pekaponaenej̈a itsajawabelia. Nej̈ata bajarapapajubo pünaponabiaba itsiata itsa bajarapapiapiapajubo aponayotabiabi nej̈ata bajarapamonae abajü jinawanapabiaba bajarajota.