LIWAISI 16
¿Deitsi Jesús pakujinae irata ponapona?
Jesús jiwi tsitekaeya tane penakuetonüyokuenia, itsamonae taeyabiaba beprofetanükuenia. Itsamonae pijinia yapütane petüpaejawa. Itsiata, itsa nakujarubatsi bebeliayo Jesús peliwaisi pakujinae irata ponapona, nej̈ata j̈aniawaetsia yapütaenatsi. Paliwaisijawataje yapütaenatsi penamatamotsiliwaisianü Jesús yabara, yapütaenatsinua pakuenia bajarapaliwaisi kajamatabükueneyawenonaena.
1. ¿Dej̈uanej̈a Dioso itorobika Jesús irabetsika?
Jesús irabetsika pata petsipaebinej̈a pej̈anialiwaisi Dioso Pematakaitorobijawa yabara itsamonaejawabelia (lebare Lucas 4:43). Pej̈aniajailiwaisi tsipaebanajetaruka pakuenia Dioso Pematakaitorobijawata j̈aniawaetsijitsia daj̈itapibisiakuenejawanü.a Bejamatabükuene akueyabi pawaibeje Jesús tsipaebanajetaruka bajarapapej̈aniajailiwaisianü (Mateo 9:35).
2. ¿Dej̈ua nakayapütaeyaej̈ana paayaikuenejawanü Jesús itsi?
Bibliabaj̈uto nakayapütaeyaej̈ana pakuenia “Jesús [...] Dioso pesaëta pinijicuene pexanaejava exanapona [...]. Nexata Jesús pacayapëtaeyaexana Dioso ayaicuene pexanaejava pecaëjëpaenëcuenetsi” (Hechos 2:22). Dioso pesaü pej̈ainaej̈ae Jesús wainae ekaeyaej̈ana mene, rajutanua pej̈aejawa jiwimonae, jumeyaba piawitanewi, asaüyaej̈ananua ikatsia petüpaewimi (Mateo 8:23-27; 14:15-21; Marcos 6:56; Lucas 7:11-17). Bajarapaayaikuenejawanü nakayapütaeyaej̈ana Dioso pitorobikueniatsi irabetsika. Nakatsitajütanua pakuenia Dioso pesaü j̈aina piajibiaej̈anaenej̈a daj̈ita pibisialiwaisijawanü nakatokopiapata.
3. ¿Dej̈ua nakayapütaeyaej̈ana pakuenia Jesús baponapona pairataje?
Jesús jumekowünütabiaba Jehová (lebare Juan 8:29). Jumekowünüta Paj̈a ata petüpaejawabelia. Itsi j̈ua Paj̈a itorobatsi itsamonae apojitsipae ata. Bajaraj̈ua nakayapütaeyaej̈ana pakuenia waj̈aitsi betonakuenebawanapatsi Dioso nakatokopiapatsi ata piayapübejejawanü. Bajarapakuenia Jesús pijajiwi yapütaeyaej̈ana pekuenejüpaenej̈atsi (1 Pedro 2:21, TNM).
KANAÜJÜTSIANATSI
Yapütaenatsi pakuenia Jesús tsipaebanajetaruka pej̈aniajailiwaisi, pakuenia ej̈ananua ayaikuenejawanü.
4. Jesús tsipaeba pej̈anialiwaisijawanü
Jesús najetaruka piapianamutoj̈anetonüjawa piayapübejejawa petsipaebinej̈a pej̈anialiwaisi jiwijawabelia. Palebare Lucas 8:1, panelebikujinae panabarükuaikuaijamü tsane paliwaisibeje yabaraje:
¿Jesús batsipaebabiaba üpamonae baimoj̈oyotatsi?
¿Deitsi Jesús pekaj̈itajarabinej̈a jiwimonae?
Dioso tajüwelia wajunupaeba pakuenia Pitapetsinü tsipaebijitsipa pej̈anialiwaisi. Palebare Lucas 4:17-19, panelebikujinae panabarükuaikuaijamü tsane paliwaisibeje yabaraje:
¿Depakuenia jumekapanepa Jesús bajarapaliwaisi?
¿Jiwi meta ajena pamatakabi namatawenona penamuj̈unaewetsinej̈a bajarapapej̈anialiwaisi?
5. Jesús kujaruba penamatamotsiliwaisianü
Jesús kujaruba pej̈anialiwaisi Dioso Pematakaitorobijawa yabara, pej̈aniapemuj̈ujiobiliwaisianü. Taenatsi paliwaisianü tsipaeba petsutoyenepanajawata. Palebare Mateo 6:14, 34; 7:12, panelebikujinae panabarükuaikuaijamü tsane paliwaisibeje yabaraje:
¿Depapej̈aniapemuj̈ujiobiliwaisianü tsipaeba Jesús?
¿Bajarapapej̈aniapemuj̈ujiobiliwaisianü ajena pamatakabi jiwi jamatabükueneyawenonaejitsipatsi?
6. Jesús ayaikuenejawanü itsi
Jehová nasaü rajuta Jesúsjawabelia ayaikuenejawanü pej̈anaenej̈a. Paneyapütaenej̈a palebare Marcos 5:25-34, itsa jume, pataema VIDEOJAWA. Panetaekujinae panabarükuaikuaijamü tsane paliwaisibeje yabaraje:
Pakuenia videojawata taneme, ¿dej̈ua yapütane piawitanewa Jesús yabara?
¿Dekatsitaitsi paayaikuenejawa Jesús itsi?
Palebare Juan 5:34-36, panelebikujinae panabarükuaikuaijamü tsane paliwaisi yabaraje:
¿Dej̈ua nakayapütaeyaej̈ana paayaikuenejawanü Jesús itsi?
¿Yapütaneme baja?
Paliwaisianü yapütanetsi Jesús yabara, rubena cuatro evangeliobaj̈utobeje Bibliajawata. Peyakinaewi paevangeliobaj̈utonü: Mateo, Marcos, Lucas, Juan ata. Cuatro paevangeliobaj̈utobeje nakayapütaeyaej̈ana pej̈aniajailiwaisianü Jesús yabara.
MATEO
yakina kopiayata evangeliobaj̈utoyajuwünü. Pabaj̈utoje yapütaeyaej̈ana j̈ua Jesús kujaruba Dioso Pematakaitorobijawa yabara, itsaliwaisianü ata.
MARCOS
yakina kaeliwaisiyobeje Jesús yabara, itsiata pej̈anialiwaisi.
LUCAS
yakina penawajükaejawa yabara. Yakinanua pakuenia Jesús yaiyatane petiriawi.
JUAN
yakina papej̈aniajamatabükuene j̈aina Jesús, tsipaji nakayapütaeyaej̈ana pakuenia Jesús barükuaikuaijai pijaamigowi, itsamonae ata.
ITSAMONAE BAJUMAITSI: “Jesús raja pepo Diosonü”, jai.
¿Dejumaitsimü tsipae?
PALIWAISI BAJA YAPÜTANETSI
Jesús tsipaeba Dioso Pematakaitorobijawa yabara, itsi ayaikuenejawanü, jumekowünütabiabanua Jehová.
Najamatabünapire
¿Dej̈uanej̈a Dioso itorobika Jesús irajawabetsika?
Paayaikuenejawanü Jesús itsi, ¿dej̈ua nakayapütaeyaej̈ana?
¿Depapej̈aniapemuj̈ujiobiliwaisi kujaruba Jesús wajaitsinej̈a?
YAPÜTAENAME ITSALIWAISI
¿Depaliwaisi yabara tsipaebabiaba Jesús?
Yapütaename paayaikuenejawanü itsi Jesús pepo pej̈aniajaijawa.
“¿Dej̈ua nakayapütaeyaej̈ana paayaikuenejawanü Jesús itsi?” (Peyajiwitaebo, 15 de julio, 2004)
Pakujinae itsanü yapütane Jesús peliwaisi, nej̈ata najamatabükuenepünüyorota Diosojawabelia.
“Bajayata üj̈anü nasiwajamatabüenabiabajü” (Peyajiwitaebo, 1 de octubre, 2014)
Taema pakuenia Jesús ponaponami pairataje.
“Jesús peponaponaekuenejawa pairataje” (La Biblia. Traducción del Nuevo Mundo, apéndice A7)
a Paliwaisijawanüta 31-33 jawabelia nakayapütaeyaej̈anaena Dioso Pematakaitorobijawa yabara.