LIWAISI 21
¿Depakuenia natsipaebanajetaruka Dioso Pejumeliwaisi, pej̈anialiwaisi?
J̈uajawanü jiwi bejiobiaej̈anatsi bepijia Jehová ajibiaej̈anaena Pematakaitorobijawata. ¡Bajarapaliwaisi pej̈anialiwaisi, bajaraj̈uata itsamonae betsipaebatsi! Jesús jitsipa bajarapapej̈anialiwaisi penatsipaebinej̈a daj̈itajiwijawabelia (Mateo 28:19, 20). ¿Dej̈ua itsi Jehová petotsipaebaponaewi pejumekowünütsinej̈a bajarapaliwaisije?
1. ¿Depakuenia najumekapanepanajetaruka Mateo 24:14?
Jesús tajüwelia wajunupaeba pakueniaje: “Itsamonae tsipaebaponaena daj̈itanakuapijiwi peyapütaenej̈a pej̈anialiwaisi Dioso Pematakaitorobijawa yabara daj̈itanakuajawa” (Mateo 24:14, TNM). Jehová patatotsipaebaponaewi panetsitaj̈anepana patakujarubinej̈a Dioso Pejumeliwaisi. Patsipaebanajetarubenajü Dioso Pejumeliwaisi daj̈itanakuajawata 1.000 pajumenütabeje. Bajaraj̈uata panajamatabüsaütanajetarubenajü j̈aniawaetsiakuenia patatsipaebinej̈a. Panetsitaayapübeje ata, Jehová paneyawenonabiaba.
2. ¿Depaitsinü tsabiabi jiwi patakujarubinej̈a?
Patsipaebanajetarubenajü daj̈itanakuapijiwije. Pakuenia bajayata cristianowi baitsi, bajarapijinia paj̈anü ata patsipaebanajetarubenajü kaebo kanakujitsia (Hechos 5:42). Bajarapakuenia jiwi ayaibitsaütomonae kaewai kanakujitsia bayapütane Dioso Pejumeliwaisi. Itsiata baitsi jane, itsamonae pijabota apoenabiabi, bajaraj̈uata patsipaebabiabajü j̈uajawa jiwi nubena najenajaebaya. Kaematakabi kanakujitsia pajamatabüjitsipajü patatsipaebinej̈a itsamonaejawabelia Jehová Pejumeliwaisi.
3. ¿Depamonae betsipaeba Dioso Pejumeliwaisi?
Daj̈ita pepo cristianowi betsipaebanajetarubena Dioso Pejumeliwaisi. Paj̈anünej̈a bitso pepo panetoj̈anepanae patatsipaebaponaejawa. Bajaraj̈uata panajamatabükuenesaütajü patatsipaebinej̈a tsipaji bajarapakuenia jiwi payawenonajü penakapanepaenej̈a (lebare 1 Timoteo 4:16). Amoneya jiwi patsipaebaponajü Dioso Pejumeliwaisi, tsipaji Bibliabaj̈uto jumaitsi: “Amoneya raja [...] paneexanaponaenexa” (Mateo 10:7, 8). Daj̈itajiwi apopanenamuj̈unaewetsi ata, patsipaebanajetarubenajü Dioso Pejumeliwaisi patajumekowünütsij̈ae Jehová, patabarüyayaej̈anaenej̈anua.
KANAÜJÜTSIANATSI
Taenatsi pakuenia itsi tsabiabi Jehová petotsipaebaponaewi petsipaebinej̈a daj̈itanakuajawa, pakuenianua Jehová yawenonabiabatsi.
Daj̈itanakuajawa patsipaebanajetarubenajü: A) Costa Rica nakua; B) Estados Unidos nakua; D) Benín nakua; E) Tailandia nakua; F) Yap (Micronesia) nakua; I) Suecia nakua.
4. Panajamatabükuenesaütajü patatsipaebinej̈a daj̈itajiwijawabelia
Jehová patatotsipaebaponaewi pajaitajü daj̈itajiwi patayapütaeyaej̈anaenej̈a Dioso Pejumeliwaisi daj̈itanakuajawa. Pataema VIDEOJAWA, panetaekujinae panabarükuaikuaijamü tsane paliwaisi yabaraje:
¿Dej̈ua katsitaj̈anepana pekujarubikuene yabara Jehová petotsipaebaponaewi?
Palebare Mateo 22:39; 1 Tesalonicenses 2:4, panelebikujinae panabarükuaikuaijamü tsane paliwaisibeje yabaraje:
¿Depakuenia panajamatabükueneitajübajü pataasiwajawa itsamonae pakujinae patsipaebabiabajü Dioso Pejumeliwaisi?
¿Jehová dejamatabüitsi petotsipaebaponaewijawabeliatsi?
5. Payajawanakuenebajü Dioso
Kaeliwaisi nakayapütaeyaej̈ana pakuenia Jehová matakapona pijajiwi petsipaebinej̈a. Nueva Zelanda nakuajawata, itsamatakabi bajayakunua kaepetiriwa nawajüta Jehová pewünüta itsajiwiyo peyawenonaenej̈atsi peyapütaenej̈a Dioso. Nej̈ata Jehová petotsipaebaponaenü Paulwününü, tsipaebanajetaruka kaebo kanakujitsia, nej̈ata bajarapowa namataüj̈ünatsi. Penawajütsiweretsikujinae, akueyabi pahorabejekujinae saya, namataüjünatsi. Bajarapakuenia ata ajenata Jehová pijajiwi barünakueneba.
Palebare 1 Corintios 3:9, panelebikujinae panabarükuaikuaijamü tsane paliwaisi yabaraje:
¿Depakuenia nej̈ata Jehová matakanajetaruka pijajiwi petotsipaebaponaenej̈atsi?
Palebare Hechos 1:8, panelebikujinae panabarükuaikuaijamü tsane paliwaisi yabaraje:
¿Dej̈uajitsia namatawenonatsi Jehová wajanakayawenonaejawa wajatsipaebijawata Pejumeliwaisi?
¿Yapütaneme baja?
Kaesemana kanakujitsia panekujarubabiaba Dioso Pejumeliwaisi patatsipaebinej̈a itsamonaejawabelia. Itsa j̈amü baja naponame patanakaetuanaejawabelia, ¿dekatsitaitsi pakuenia panekujarubabiaba?
6. Patsipaebajü Dioso Pejumeliwaisi patajumekowünütsij̈ae bajaraponü
Bajayatami, pekueyawi Jesús pijajiwi, apojitsipae petsipaebinej̈a Dioso Pejumeliwaisi. Nej̈ata bajarapacristianowi nayajiwikuaikuaijai pematakaponaewi pitabarata petsipaebinej̈a Dioso Pejumeliwaisi (Filipenses 1:7). Ajena pamatakabijawa bajarapakuenia paej̈anajü Jehová patatotsipaebaponaewi.a
Palebare Hechos 5:27-42, panelebikujinae panabarükuaikuaijamü tsane paliwaisi yabaraje:
¿Dej̈uajitsia apokopatsi tsanetsi wajatsipaebinej̈a Dioso Pejumeliwaisi itsamonaejawabelia? (Pataema tsikiriitanetoyo 29, 38, 39).
ITSAMONAE BAYANIJOBA: “¿Dej̈uajitsia Jehová petotsipaebaponaewi siwaj̈ainabiaba kaebo kanakujitsia?”, jai.
¿Dejumaitsimü tsipae?
PALIWAISI BAJA YAPÜTANETSI
Jesús itoroba pijajiwi petsipaebinej̈a pej̈anialiwaisi daj̈itanakuapijiwijawabelia. Jehová pijajiwi yawenona petotsipaebaponaenej̈atsi itsamonaejawabelia.
Najamatabünapire
¿Depakuenia patsipaebanajetarubenajü Dioso Pejumeliwaisi daj̈itanakuajawa?
¿Depakuenia panajamatabükueneitajübajü pataasiwajawa itsamonaejawabelia patatsipaebij̈ae Dioso Pejumeliwaisi?
¿J̈aniajai meta wajatsipaebijawa nakajamatabükuenebarüyayaej̈ana? ¿Dej̈uajitsia?
YAPÜTAENAME ITSALIWAISI
Taema pakuenia Jehová petotsipaebaponaewi tsipaebanajetarubena ayaitomaraj̈anetojawa.
¿Depakuenia Jehová petotsipaebaponaewi yawenona perüküpekaewi pijanakuawekua?
Pajamatabükueneyawenonajü Dioso Pejumeliwaisita perüküpekaewi pijanakuawekua (5:59)
Taema pakuenia petsipaebiwa Dioso Pejumeliwaisi barüyaya ponapona.
Yapütaema pakuenia panayajiwikuaikuaijanü juezmonae pitabarata patatsipaebinej̈a Dioso Pejumeliwaisi.
a Dioso kajena paneitoroba patatsipaebinej̈a Pejumeliwaisi itsamonaejawabelia. Bajaraj̈uata Jehová patatotsipaebaponaewi patsipaebanajetarubenajü Dioso Pejumeliwaisi, panakua pematakaitorobiwi apojitsipae ata.