LIWAISI 22
¿Dej̈ua beitsimü netsipaebinej̈a pej̈aniajailiwaisi Dioso yabara?
Neyapütaej̈ae pej̈aniajailiwaisi Bibliabaj̈utota j̈amü meta jamatabüjumaitsimü: “¡Daj̈itajiwi beyapütane bajarapaliwaisi!”. J̈aniajamü, daj̈itajiwi beyapütane. Itsiata meta jamatabükueneauramü tsipae netsipaebinej̈a itsamonaejawabelia j̈ua yapütaneme Bibliabaj̈utota. Yapütaenatsi nej̈ata pakuenia bekopatame nejunawijawa, nej̈ata jamatabükuenebarüyamü tsane netsipaebij̈ae pej̈aniajailiwaisi Bibliabaj̈uto yabara itsamonaejawabelia.
1. ¿Depakuenia betsipaebame neyapütaewijawabelia?
Jesús pijajiwi jumaitsi: ‘Acuenebi cajena patacopatsijava jivi patatsipaebaponaejava xua pataniji, palivaisi ata pajumetanijiʼ (Hechos 4:20). Bajarapamonae bitso asiwa pej̈aniajailiwaisi, bajaraj̈ua nej̈ata tsipaeba itsamonaejawabelia. ¿Bajarajamatabüitsimü j̈amü ata? Nej̈ata yaiyataeyakuenia tsipaebare nijamonaejawabelia, nijaamigowijawabelia ata j̈ua yapütanenajetarukame (lebare Colosenses 4:6).
Jumaitsimü tsipae pakueniaje
Itsa barükuaikuaijamü nijamonaejiwiyo, jumaitsimüre pakueniaje: “Mapasemanataje nayapütaniji penamatamotsiliwaisi”.
Itsa nijaamigojiwiyo romaebatsi, itsajume, jamatabükuenebüjai itsakuene yabara, tolebare pej̈anialiwaisi Bibliabaj̈utota nejamatabükuenebarüyayaej̈anaenej̈a.
Itsa panenajuanakuenebiwi kayanijoba j̈ua itsimü sábado, domingo matakabitabeje, tsipaebare j̈ua yapütanenajetarukame Bibliabaj̈utota, itsa jume, tsipaebare j̈ua yapütaneme nenakaetuatsibojawata.
Tsitajüre nijaamigowi Internet-jawata jw.org.
Junare neyapütaewi panenajuayapütaenej̈a Bibliabaj̈uto yabara, itsa jume, tsitajüre bajarapamonae Internet-jawata jw.org Dioso Pejumeliwaisi pekujarubinej̈atsi.
2. ¿Dej̈uajitsia Jehová petotsipaebaponaewita benaponame nenatsipaebinej̈a Dioso Pejumeliwaisi?
Jesús pijajiwi apobarükuaikuaijai saya baja üpeyapütaewijawabelia pej̈aniajailiwaisi. Biji rajane “Jesús itoroba anijanëbeje tsaponae Jesús pevajënaeya Dioso pejumelivaisi jivi petsipaebanajetarubenaenexa. Itoroba petsipaebanajetarubenaenexa daxita tomaranëjava” (Lucas 10:1). Nej̈ata papetsipaebikueneje yawenona jiwimonae peyapütaenej̈a pej̈aniajailiwaisi. Jesús pijajiwi jamatabükuenebarüya penajuatsipaebij̈ae Dioso Pejumeliwaisi (Lucas 10:17). ¿J̈amü ata meta katsitaj̈anepanaejitsipa netsipaebinej̈a Dioso Pejumeliwaisi Jehová pijajiwita?
KANAÜJÜTSIANATSI
Yapütaenatsi j̈ua kajamatabükueneyawenonaena barüyayakuenia netsipaebinej̈a itsamonaejawabelia Dioso Pejumeliwaisi.
3. Jehová kayajawa tsane
Itsamonae jitsipa Dioso Pejumeliwaisi penatsipaebinej̈a, itsiata junawa petsipaebijawa tsipaji jamatabüjumaitsi: “Nebijataejitsipa, itsa jume, nekapokaponaejitsipa”, jamatabüjai.
¿Jika j̈amü? Itsa barükuaikuaijamü itsamonae j̈ua yapütanenajetarukame, ¿junawabiabame? ¿Dej̈uajitsia?
Pataema VIDEOJAWA, panetaekujinae panabarükuaikuaijamü tsane paliwaisi yabaraje:
¿Depakuenia tsipaebanajetarubena ajunawijibia pewüjüawi, pejanawi yajawa?
Palebare Isaías 41:10, panelebikujinae panabarükuaikuaijamü tsane paliwaisi yabaraje:
¿Dej̈uajitsia benawajütame Jehovájawabelia itsa junawame netsipaebinej̈a?
¿Yapütaneme baja?
Pakujinae itsamonae abaj̈ü nakujaruba Dioso Pejumeliwaisi, kaeto ata aponajamatabüj̈ainae petsipaebinej̈a j̈ua yapütane itsamonaejawabelia. Bajarapakuenia Sergeywününü. Bajaraponü nataebiaba peamatamobinükuenia, nej̈ata tsitaayapübejetsi pebarükuaikuaijainej̈a itsamonaejawabelia. Itsiata j̈uakujinae taj̈uj̈uaba penakujarubinej̈a Bibliabaj̈uto. Bajaraponü jumaitsi: “Junawi atanü, najamatabüsaütajü tabarükuaikuaijainej̈a itsamonae j̈ua yapütaenajetarukajü Dioso yabara. Bajaraj̈ua nej̈ata nejamatabükuenebarüyayaej̈ana, neyawenonanua Dioso Pejumeliwaisi tanakofünütsiyaniwa”, jai.
4. Yaiyataeya kuaikuaijamüre
Nebarükuaikuaijaiwajünaeya itsajiwiyo, bekanaüjütame j̈ua jumaitsijitsiamü, bekanaüjütamenua pakuenia jumaitsijitsiamü. Palebare 2 Timoteo 2:24; 1 Pedro 3:15, panelebikujinae panabarükuaikuaijamü tsane paliwaisianü yabaraje:
¿Depakuenia jumekowünütsipame bajarapaliwaisije Dioso Pejumeliwaisi itsa tsipaebame itsamonaejawabelia?
Nijamonae, nijaamigowi ata meta apotsitaj̈anepanaetsi j̈ua jumekowünütame, ¿debeitsimü?, itsa jume, ¿dej̈ua apobeitsimü?
¿Dej̈uajitsia nej̈ata j̈anepana yaiyataeya wajabarükuaikuaijawa?, ¿dej̈uajitsia apobeitorobitsi j̈ua bajarapamonae apojumekowünütsiwanapae?
5. Dioso Pejumeliwaisi itsa tsipaebatsi jamatabükuenebarüyatsi
Jehová itoroba Jesús petsipaebinej̈a pej̈anialiwaisi itsamonaejawabelia. ¿Depakuenia Jesús siwajamatabüitsi bajaraj̈ua? Palebare Juan 4:34, panelebikujinae panabarükuaikuaijamü tsane paliwaisibeje yabaraje:
Pej̈aniapej̈aejawanü j̈anetsi wajaasaütsawanapaenej̈a barüyayanua wajajinawanapaenej̈a. ¿Dej̈uajitsia nej̈ata Jesús jumaitsi comparaciónkuenia Dioso Pejumeliwaisi itsa tsipaebatsi bepej̈aniapej̈aejawa, jai?
¿Dej̈uajitsia barüyaya ponaponaejitsipame itsa tsipaebame Dioso Pejumeliwaisi?
J̈uajawanü itsimü tsipae
Penakaetuatsisemanata yapütaename pakuenia wajamonae tsipaebijitsia Dioso Pejumeliwaisi.
Yanijobare Dioso Pejumeliwaisi pekakujarubijiwiyojawabelia nenapitsapaenej̈atsia Dioso Pejumeliwaisi netsipaebinej̈a itsatestigojiwiyo yajawa penakaetuatsijawa. Bajarapakuenia nej̈ata beaj̈ayokuenia yapütaeponaename Dioso Pejumeliwaisi netsipaebinej̈a itsamonaejawabelia.
Kanaüjüre “Itsamonae bajumaitsi”, itsa jume, “J̈ua itsamonae nayanijoba” pejaisecciónjawata, j̈aniawaetsiakuenia nejumepitsinej̈a itsamonae itsa kayanijoba.
ITSAMONAE BAYANIJOBA: “¿Jika j̈amü, deitsimü?”, jai.
Itsa bajarapakuenia kayanijoba, ¿depakuenia jumekanawiatsipame netsipaebinej̈a Dioso Pejumeliwaisi yabara?
PALIWAISI BAJA YAPÜTANETSI
Wajatsipaebijawa Dioso Pejumeliwaisi nakajamatabükuenebarüyayaej̈anaena. Katoyapüj̈anepanaena netsipaebinej̈a itsamonaejawabelia.
Najamatabünapire
¿Dej̈ua kajamatabüitorobijitsipa netsipaebinej̈a Dioso Pejumeliwaisi?
¿Depakuenia yaiyataeya kuaikuaijamü tsipae?
¿Depakuenia kopatsipame nejunawijawa?
YAPÜTAENAME ITSALIWAISI
Taema cuatro paliwaisibeje netsipaebinej̈a pebaj̈utoyojawata jw.org yabara.
Yapütaema cuatro pakuenebeje kayawenonaena netsipaebinej̈a Dioso Pejumeliwaisi.
“¿Jejamü tsipae netsipaebinej̈a Dioso Pejumeliwaisi?” (Peyajiwitaebo, septiembre de 2020)
Taename pakuenia paliwaisi rubena Bibliabaj̈utota kayawenonaena netsipaebinej̈a ajunawijibinejewa pewüjüato atamü, itsa jume, pejanawa atamü.
Lebare pakuenia nijamonaejawabelia barükuaikuaijamü tsipae itsa bajarapamonae abaj̈ü apoyapütae Jehová Pejumeliwaisi.