¿Depakuenia nej̈ata beyapütanetsi pepo cristianowikuene?

Jiwibitsaütomonae “pacristianowinü” jai ata, kaeliwaisi aponajuaj̈ainae, aponajüpaenua pitorobiliwaisianü. ¿Depakuenia nej̈ata beyapütanetsi pepo cristianowikuene?

1. ¿Deitsi nej̈ata pepo cristianowi?

Cristianowi raja pekuenejüpaewi Jesucristo (lebare Hechos 11:26). ¿Debeitsi pekuenejüpaenej̈a Jesús? Bajaraponü jumaitsi: “Itsa paxamë tsiteca pajumecovënëtavanapaename patacatsipaebilivaisi, nexata baja pepacuene patajajivimë tsane” (Juan 8:​31). Nej̈ata pepo cristianowi bejumekowünütawanapa Jesús peliwaisi. Pepo cristianowi jumekowünüta paliwaisi rubena Dioso Pejumeliwaisibaj̈utota, pakuenia Jesús itsi (lebare Lucas 24:27).

2. ¿Depakuenia pepo cristianowi najamatabükueneitajüba penaasiwajawa?

Jesús pijajiwi itoroba pakueniaje: “Pacuenia xanë pacaasivatsi, bajara pijinia pacuenia paxamë ata namataenetsia panaasivamë tsavanapae tsane” (Juan 15:12). ¿Depakuenia Jesús najamatabükueneitajüta piasiwajawa pijajiwi? Bajaraponü yajawaponapona, jamatabükuenebabata, yawenona, siwatüpanua bajarapamonae (1 Juan 3:​16). Pepo cristianowi namataenetsia naasiwa Jesúskuenia, saya apoüpejume.

3. ¿Depapenamatamotsikuene pepo cristianowi itsi tsabiabi?

Jesús itoroba pijajiwi: “Patsipaebanajetarubenaename daxitajivijava pacuenia Dioso pijajivi evetsijitsia” (Lucas 9:2). Bajayata pepo cristianowi apotsipaebi saya baja Dioso Pejumeliwaisi üpenakaetuatsibojawata, biji rajane tsipaebanajetarubena Dioso Pejumeliwaisi itsajota jiwibitsaüto nubena najenajaebaya, kaebo kanakujitsia ata (lebare Hechos 5:​42; 17:17). Ajena pamatakabi, pepo cristianowi tsipaebanajetarubena Dioso Pejumeliwaisi daj̈itajiwijawabelia. Piasiwaj̈ae daj̈itajiwimonae, jitsipanua peyapütaeyaej̈anaejawa Dioso Pejumeliwaisi (Marcos 12:31).

KANAÜJÜTSIANATSI

4. Jamatabüyapütane pej̈aniajailiwaisianü j̈ua rubena Bibliabaj̈utota

Itsamonae penacristianoej̈anaewi ata, apoyaiyatae Dioso Pejumeliwaisi. Pataema VIDEOJAWA, nej̈ata panabarükuaikuaijamü tsane paliwaisi yabaraje:

VIDEOJAWA: ¿Depakuenia itsacristianowi Dioso wekuanatsata? (5:​11)

• Itsaiglesiamonaeyajuwünüwi apojitsipae itsajiwi peyapütaenej̈a Jesús peliwaisi, ¿deitsi nej̈ata?

Jesús yapütaeyaej̈ana j̈ua rubena Dioso Pejumeliwaisibaj̈utota. Palebare Juan 18:​37, panelebikujinae panabarükuaikuaijamü tsane paliwaisi yabaraje:

• Pakuenia Jesús jumaitsi, ¿depakuenia beyapütanetsi pepo cristianowikuene pej̈aniajailiwaisi petsipaebiwi?

5. Bibliabaj̈uto yabara pej̈aniajailiwaisi yapütaeyaej̈ana

Jesucristo petsiawajünaeya atjübüabetsia, itoroba pijajiwi petsipaebinej̈a itsamonaejawabelia Dioso Pejumeliwaisi. Ajena pamatakabi tsipaebanajetarubena bajarapaliwaisianü. Palebare Mateo 28:​19, 20; Hechos 1:​8, panelebikujinae panabarükuaikuaijamü tsane paliwaisibeje yabaraje:

• ¿Depakujinae nej̈ata ajibi baja tsane petsipaebijawa Dioso Pejumeliwaisi? ¿Daj̈itanakuajawa meta natsipaebiana Dioso Pejumeliwaisi?

6. Pakuenia kujaruba, bajarapakuenia jinawanapa

¿Dej̈uajitsia Tomwününü yapütane pekaj̈itajarabijawa pepo cristianowi? Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: Tajaiglesiajawami neyamaj̈üitojoroba (5:​20)

• Pakuenia videojawata tanetsi, ¿dej̈uajitsia Tom apojumej̈aniatae iglesiajawa?

• ¿Dej̈uajitsia Tom j̈aniawaetsia yapütane pekaj̈itajarabijawa pej̈aniajailiwaisi?

J̈ua jumaitsitsi, benakueneitajütatsi pej̈aniajaikuene. Palebare Mateo 7:​21, panelebikujinae panabarükuaikuaijamü tsane paliwaisi yabaraje:

• ¿Jesús meta tsitaj̈anepanatsi j̈ua jumaitsitsi, itsa jume, j̈ua ej̈anatsinua?

7. Pepo cristianowi namataenetsia naasiwa

¿Pepo cristianowi meta namataenetsia naeweta penaasiwaj̈ae? Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: Piasiwaj̈ae namataenetsia naeweta beyaj̈uabijitsipae atatsi (2:​55)

• ¿Dej̈uajitsia wajamonaenü Loyd eweta wajamonaenü Yohansson beyaj̈uabijitsipae atatsi?

• ¿Depakuenia wajamonaenü Loyd najamatabükueneitajüta pepo cristianonükuene?

• ¿Depakuenia besiwajamatabükueneitsi pepo cristianowi itsawiriawijawabelia?

• ¿Depakuenia pepo cristianowi najamatabükueneitajüta piasiwajawa pakujinae itsanakuapijiwi nabia?

PALIWAISI BAJA YAPÜTANETSI

Pepo cristianowi jumekowünüta Dioso Pejumeliwaisibaj̈uto, namataenetsia naeweta penaasiwaj̈ae. Tsipaebanajetarubena pej̈aniajailiwaisi Dioso Pejumeliwaisi.

Najamatabünapire

• ¿Pepo cristianowi dejota kaj̈itajarabijitsipa pejumej̈aniataeliwaisianü?

• ¿Depapej̈aniajamatabükuene bitso j̈aina pepo cristianowi?

• ¿Dej̈ua yajawa itsi tsabiabi bajarapamonae?

YAPÜTAENAME ITSALIWAISI

Yapütaema pamonae jitsipa Jesús pekuenejüpaejawa.

¿Dej̈ua itsi tsabiabi Jehová petotsipaebaponaewi? (1:​13)

Lebare pakuenia monjawa kaj̈itajaraba pepo cristianowi. Bepepo pijamonae tane.

“¡Nejumekanawiata daj̈ita tanayanijobabiabijawanü Bibliabaj̈utota!” (Peyajiwitaebo, 1 de abril, 2014)

Taema pakuenia pepo cristianowi namataenetsia penaasiwaj̈ae nayawenonabiaba.

Payawenonajü patajamonaewi pibisiakuene itsa tokopiapatatsi (videoyajuwünüjawa) (3:​57)

Jesús yapütaeyaej̈ana pakuenia pijajiwi jinawanapaejitsia. Taema pakuenia pepo cristianowi jumekowünütawanapa Jesús. Ajena aekoj̈aeta ata tsitekaeya.

“¿Depakuenia yapütaejitsipame pepo cristianowikuene?” (Peyajiwitaebo, 1 de marzo, 2012)