LIWAISI 51
Itsa kuaikuaijamü pej̈aniakuene Jehová jamatabükuenebarüyayaej̈anaename
Pakujinae Jehová nakaej̈ana, pej̈aniakuene nakarajuta: wajakuaikuaijaijawa. Bajaraj̈uata bajaraponü tsitaj̈anepanatsi pej̈aniakuene wajakuaikuaijaijawa (lebare Santiago 1:26). ¿Depakuenia nej̈ata pej̈aniakuene bekuaikuaijaitsi Jehová wajajamatabükuenebarüyayaej̈anaenej̈a?
1. ¿Depapej̈anialiwaisi bekuaikuaijaitsi?
Bibliabaj̈utota jumaitsi: “Bajaraxuata namataenetsia panajamatabëcueneasaëya exanaponame” (1 Tesalonicenses 5:11). ¿Yapütaneme itsajiwiyo namatawenona piajamatabükuenesaütsinej̈atsi? ¿Dej̈ua nej̈ata bajarapajiwiyo besiwaitsimü pejamatabükuenebarüyanej̈a? Bajarapajiwiyo yapütaeyaej̈anare niasiwajawa. Yajawanua jumaitsimüre pej̈aniajamatabükuene pej̈ainaejawa. ¿Depaliwaisiyo Bibliabaj̈utota tsitajütsipame bajarapajiwiyo niajamatabükuenesaüyaej̈anaenej̈a? Asiwayakuenia tsipaebare bajarapapej̈anialiwaisianü. Apobematajunutsitsi (Proverbios 15:1).
2. ¿Depakuenia meta apobebarükuaikuaijaitsi?
Bibliabaj̈utota jumaitsi: “Pëtsa pacuaicuaijamë pibisialivaisi” (lebare Efesios 4:29). Nej̈ata apobekuaikuaijaitsi pibisialiwaisianü itsamonae wajajamatabükuenebijianaeyaniwa, apobebarakuaikuaijaitsinua itsamonae yabara (lebare Proverbios 16:28).
3. ¿Dej̈ua nakayawenonaejitsipa j̈aniawaetsia wajakuaikuaijainej̈a?
Daj̈itaj̈ua kuaikuaijaitsi wajajamatabüütjütojawawerena pitsapa (Lucas 6:45). Bajaraj̈uata benajamatabüj̈ainabiabatsi üpej̈aniajailiwaisianü, üyaiyataekuene, üpej̈aniakuene wajaitsinej̈anua (Filipenses 4:8). Nej̈ata, j̈aniawaetsia beitapetatsi j̈ua itsijitsiatsi wajakuenesajinaejawata, beitapetatsinua pej̈aniajamatabükuenewi wajanakayajawanej̈a (Proverbios 13:20). Benatsiwajünaekanaüjütatsi wajakuaikuaijaiwajünaeya, tsipaji j̈ua jumaitsi tsipaetsi jamatabükuenebijianaejitsipa itsamonae. “Pajiwiyo apokanaüjütsi pekuaikuaijaiwajünaeya, nej̈ata najüpa pakuenia itsajiwiyo espadata batsapinaupa. Baitsi jane, pamonae natsiwajünaekanaüjüta pekuaikuaijaiwajünaeya, jamatejemayaej̈ana itsamonae” (Proverbios 12:18).
KANAÜJÜTSIANATSI
Yapütaenatsi pakuenia bekuaikuaijaitsi wajajamatabükuenebarüyayaej̈anaenej̈a Jehová, itsamonae ata yajawa.
4. Nayajiwitaeya kuaikuaijamüre
Itsajawata bakuaikuaijaitsi apokanaüjütsinejewatsi, itsiata bajaraj̈uakujinae bajumaitsitsi: “apojumaitsinü tsipae tsaena”, jamatabüjaitsi (Santiago 3:2). Palebare Gálatas 5:22, 23, panelebikujinae panabarükuaikuaijamü tsane paliwaisi yabaraje:
¿Depapej̈aniajamatabükuenejawanü nawajütsipame Jehovájawabelia nayajiwitaeya nekuaikuaijainej̈a? ¿Depakuenia kajamatabükueneyawenonaejitsipa bajarapapej̈aniajamatabükuenejawanü?
Palebare 1 Corintios 15:33, panelebikujinae panabarükuaikuaijamü tsane paliwaisi yabaraje:
J̈ua taebiabame, jumetaebiabame, lebabiabame, pajiwiyo ata kayajawa tsabiabi, ¿kajamatabükueneyawenonaejitsipa j̈aniawaetsia nekuaikuaijaijawa? ¿Dej̈uajitsia?
¿Dej̈uajawanü nejamatabükuenebijianaejitsipa, itsa jume, nejamatabükuenej̈anebijitsipa takuaikuaijaijawa?
Palebare Eclesiastés 3:1, 7, panelebikujinae panabarükuaikuaijamü tsane paliwaisi yabaraje:
¿Dej̈uajitsia itsajawata bemoyatsi, itsajawatanua bekuaikuaijaitsi?
5. Pej̈anialiwaisi tsipaebare itsamonae yabara
¿Dej̈ua nakajamatabükueneyawenonaejitsipa bijiaya wajakuaikuaijaiyaniwa itsamonae? Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:
¿Dej̈uajitsia meta wajamonaenü benajamatabükuenej̈aneta pekuaikuaijaijawa itsamonae yabara?
¿Dej̈ua meta jamatabükueneyawenonatsi?
Palebare Romanos 14:10, TNM, panelebikujinae panabarükuaikuaijamü tsane paliwaisi yabaraje:
¿Dej̈ua benajamatabünapitatsi wajabarakuaikuaijaiyaniwa itsamonae yabara?
Palebare Santiago 3:8, 9; panelebikujinae panabarükuaikuaijamü tsane paliwaisi yabaraje:
Itsajiwiyo itsa kabarakuaikuaijai, ¿bajarapaliwaisi depakuenia kajamatabükueneyawenonaejitsipa nianaepanaeyaniwa? ¿Dej̈uajitsia?
6. Asiwaya barükuaikuaijaimüre nijamonae
Jehová jitsipa asiwayakuenia wajabarükuaikuaijaijawa wajamonae. Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:
¿Dej̈ua kajamatabükueneyawenonaejitsipa asiwaya nebarükuaikuaijainej̈a nijamonae?
Palebare Efesios 4:31, 32, panelebikujinae panabarükuaikuaijamü tsane paliwaisi yabaraje:
¿Depakuenia nej̈ata bebarükuaikuaijaitsi wajamonae barüyaya wajanajuajinawanapaenej̈a?
Jehová jumaitsi tsabiabi j̈ua jamatabüitsi Pej̈unatojawabelia Jesús. Palebare Mateo 17:5, panelebikujinae panabarükuaikuaijamü tsane paliwaisi yabaraje:
¿Depakuenia Jehová kuenejüpaejitsipame itsa barükuaikuaijamü nijamonae?
Barüyataema itsamonae pej̈aniakuene peitsij̈ae.
ITSAMONAE BAJUMAITSI: “J̈anü kuaikuaijanü j̈ua jitsipajü itsamonae apotsitaj̈anepanae atatsi”, jai.
¿Katsitaj̈anepana bajaraj̈ua? ¿Dej̈uajitsia?
PALIWAISI BAJA YAPÜTANETSI
J̈aniawaetsia benatsiwajünaekanaüjütatsi wajakuaikuaijaiwaj̈unaeya, pakujinae jumaitsijitsiatsi, pakuenianua kuaikuaijai tsanetsi.
Najamatabünapire
¿Depakuenia jamatabükueneyawenonaejitsipame itsamonae nekuaikuaijaijawata?
¿Depakuenia apobekuaikuaijaitsi?
¿Dej̈ua nakajamatabükueneyawenonaena j̈aniawaetsia wajakuaikuaijainej̈a?
YAPÜTAENAME ITSALIWAISI
¿Dej̈ua nakajamatabükueneyawenonaena j̈aniawaetsiakuenia wajakuaikuaijainej̈a?
Yapütaema j̈ua kajamatabükueneyawenonaejitsipa pibisiakuenia nekuaikuaijaiyaniwa.
“¿Abeje meta itsa kuaikuaijaitsi pibisialiwaisianü?” (Ruka Internet-jawata jw.org)
Taema pakuenia beitsimü aponebarakuaikuaijaiyaniwa itsamonae yabara.
Lebare pakuenia itsanü Jehová jamatabükueneyawenonatsi pibisiakuenia pekuaikuaijaiyaniwa.
“Kanaüjütajü pakuenia ponaponajü” (Peyajiwitaebo, 1 de agosto, 2013)