5. J̈aniawaetsia benabarükuaikuaijai

¿DEJ̈UA BEYAPÜTANETSI BAJARAPALIWAISI YABARA?

Pebarükuaikuaijainej̈a pej̈i, bebarünaliwaisita pakuenia najamatabüj̈aina kaejiwiyo kanakujitsia.

¿DEJ̈UAJITSIA META PENAMATAMOTSILIWAISI?

Pebarükuaikuaijainej̈a pewüjüawi, pejanawi yajawa itsajawata ayapübeje. Pabaj̈uto Tú no me escuchas, yo no te entiendo, yapütaeyaej̈ana pakuenia pej̈i pej̈ainaewi najamatabüj̈aina: “Kopiaya yapüj̈anepana wajabarükuaikuaijaijawa wajaj̈ijiwi, j̈uakujinae ajena pamatakabi ayapübeje”, bajarapabaj̈utota nakajumaitsi bajarapaliwaisi. Itsiata baitsi jane, j̈ania tsipaji nej̈ünato kanamatawenona pekabarükuaikuaijainej̈a.

¿DEBEITSIMÜ TSIPAE?

Jumeyapütaema nej̈ünato. Barünaliwaisire kaniwiyojawabelia, merawijawabelia ata.

Lisa jumaitsi: “Itsajawata jamatabüjumaitsinü: ‘Daj̈ita matakabi najuaponaponatsibeje, ¿matapania aekonoj̈ae nebarükuaikuaijamüjitsia?’, jamatabüjanü. Itsiata baitsi jane, itsa bajarapajiwi nebarükuaikuaijaijitsia apobejamatabüjitsibinü, ¿bajaraj̈ua nej̈ata daj̈ita pej̈i pej̈ainaewi aponamatawenonaetsi?”, bajarapowa jai.

Herbert jumaitsi: “Jitsipajü tamajitabiabijawa kaekaniwia, itsiata itsajawata merawituatuajüta taj̈i barükuaikuaijanü tsabiabi, bajarapakuenia nej̈ata j̈aniawaetsia barünaliwaisitabiabajü”, bajaraponü jai.

BIBLIABAJ̈UTO JUMAITSI: “Pëtsa jamatabëjumaitsimë: “¿De tsaeta xua natoexanaenajë, xua ëxanënexa netoxanepanaejitsia?” pajamatabëjamë pëtsa. Biji rajane pajamatabëjumaitsimëre. “¿De tsaeta xua toexanaenajë, xua itsamonaenexa toxanepananaejitsiatsi?” pajamatabëjamëre” (1 Corintios 10:24).

Pütsa itsajawalia panajamatabürutame. Itsanü pej̈i pej̈ainaenü jumaitsi: “Itsa pakujinae taj̈i nebarükuaikuaijai, itsajawata itsajawalia najamatabüj̈ainajü, itsiata bajarapamonae nejamatabükueneyapütaebiaba”, jai.

Itsa j̈amü bajarapaliwaisikuenia nataneme, itaj̈ubare nijatelevisión, j̈aniawaere nijacelular. Namuj̈unaewere j̈ua nej̈ünato kajumaitsi, bajarapakuenia nakueneitajütsianame neyawenonaejawa nej̈ünato ayaikuenejawalia, itsa jume, tsikirikuenejawaj̈ijawalia ata.

Miranda jumaitsi: “Wajaj̈i beyapütane pekuene wajasiwabüjaijawa. Itsa wajaj̈i apojamatabükueneyawenonaetsi, nej̈ata bajarapamonae itsajawabelia jaitsiana peyawenonaenej̈atsi”, bajarapowa jai.

Anthony jumaitsi: “Anaepaname pütsa naj̈atsiayokuene nej̈ünato katsipaebi ata pibisiakuenejawa yabara”, bajaraponü jai.

BIBLIABAJ̈UTO JUMAITSI: “Itsamonae ata itsa pacatsipaebiana, bajarapamonae ata pajumecanaëjëtsianame papecatsipaebilivaisi” (Lucas 8:18).

Barükuaikuaijamüre itaj̈utojema matakabi. Itsajawata pejewaj̈i tsitaj̈anepanatsi pebarükuaikuaijainej̈a jamatejemaya itsa jinawanapa.

Nicole jumaitsi: “Pabarükuaikuaijanü pataj̈i itsa carrota panajetarubenajü. Taj̈i pitabarata apoekaenü, biji rajane pemuj̈uneneta naekajü j̈aniawaetsia patanabarükuaikuaijainej̈a”, bajarapowa jai.

Wajaj̈aeepatota yajawa j̈anepana wajaj̈i wajabarükuaikuaijaijawa.

Robin jumaitsi: “Pej̈aejawa itsa paj̈aniji panabarükuaikuaijanü j̈ua paitsinü matakabijebi. Bajarapakuene panenajamatabünapitsiaej̈ana pakuenia payasipitsapanajetarubenajü paliwaisi panetokopiapatsi ata tsipaji panajamatabüjüpajü”, bajaraponü jai.

BIBLIABAJ̈UTO JUMAITSI: “Daj̈itajiwi j̈aniawaetsia benamuj̈unaeweta, apobekuaikuaijai abaj̈ü” (Santiago 1:19, TNM).