¿Kakuenekaüjüpa baja nenabautisabinej̈a?

Bibliabaj̈uto baja kayapütaeyaej̈ana j̈aniawaetsiakuenia Jehová. Meta baja najamatabükuenej̈anetame pakuenia yapütaneme Bibliabaj̈utota. Itsiata baitsi jane, itsakuenejawayo yabara kajamatabükueneewetsiayaej̈ana nenajamatabükueneweretsiyaniwa Jehovájawabelia, nenabautisabiyaniwanua. Yapütaenatsi j̈ua itsamonae Dioso Pejumeliwaisi penakujarubiwi jamatabükueneyawenonatsi penabautisabinej̈a, pakuenia j̈amü ata kapanepaejitsipame bajarapamonaekuenia.

1. ¿Beyapütaneme daj̈ita Dioso Pejumeliwaisi nenabautisabiwajünaeya?

Nenabautisabinej̈a beyapütaneme j̈aniawaetsia pej̈aniajailiwaisi (1 Timoteo 2:4). Itsiata baitsi jane, nenabautisabiwajünaeya aponamatawenonaemü neyapütaejawa daj̈itapaliwaisi rubena Dioso Pejumeliwaisibaj̈utota. Tsipaji itsacristianowi penabautisabiwi ata, yapütaenajetarubena Dioso Pejumeliwaisi (Colosenses 1:9, 10). Itsiata baitsi jane, beyapütaneme papenamatamotsiliwaisi Bibliabaj̈utota rubena. Ancianowi kanabarünakaetuanaena petaenej̈a itsa jumeyapütaneme bajarapapenamatamotsiliwaisianü.

2. ¿Dej̈ua beitsimü nenabautisabiwajünaeya?

Bibliabaj̈uto jumaitsi: “Pacopabare baja panijaperujujamatabëcuenemi. Panajamatabëcuenepënëyorore baja Diosojavabelia” (lebare Hechos 3:19). Bajaraj̈ua beitsimü nenabautisabiwajünaeya. ¿Dej̈ua yabara jumaitsijitsia? Itsa j̈amü bitso najamatabüj̈ainame pibisiakuene neitsij̈ae, nej̈ata nawajüre Jehovájawabelia pekaitaj̈utobejiobiataenej̈a, najamatabükuenewerere nej̈anaeyaniwa pibisiakuene, najamatabükuenewererenua neponaponaenej̈a pakuenia Dioso tsitaj̈anepanatsi. Nenabautisabiwajünaeya betonakuenebame Jehová pijajiwi yajawa, beyajawanakaetuatame bajarapamonae congregaciónjawata, beyajawatsipaebabiabame bajarapamonae Dioso Pejumeliwaisi.

3. ¿Dej̈uajitsia apobejunawimü nenabautisabinej̈a?

Itsamonae bajunawa penabautisabijawa tsipaji tsitaayapübejetsi petojinawanapaenej̈a üJehovájawabelia. Pakuenia bajayata Jehovápijajiwimi, j̈amü ata meta pibisiakuene ej̈anaejitsipame. Itsiata Jehová yapütane wajaj̈ainaejawa pibisiajamatabükuene (lebare Salmo 103:13, 14). Jehová kayawenonaena, kasiwajamatabükuenebarüya tsanenua itsa najamatabükuenesaütame nejumekowünütsinej̈a. Bajaraj̈uata nakayapütaeyaej̈ana itsakuenejawayo ata aponakanawekuanatsatsiayaej̈anae tsane Dioso wajanakaasiwajawa (lebare Romanos 8:38, 39).

KANAÜJÜTSIANATSI

4. J̈aniawaetsiakuenia yapütaema Jehová

¿Depakuenia beyapütaneme Jehová nenabautisabiwajünaeya? Beyapütaneme Jehová j̈aniawaetsiakuenia niasiwanej̈a, barüyaya nejumekowünütsinej̈anua. Paneyapütaenej̈a pakuenia kapanepa Dioso Pejumeliwaisi penakujarubiwi daj̈itanakuajawa pataema VIDEOJAWA. Panetaekujinae panabarükuaikuaijamü tsane paliwaisi yabaraje:

VIDEOJAWA: J̈ua beitsitsi wajanabautisabinej̈a (3:56)

• Pakuenia tanetsi videojawata, ¿dej̈ua Dioso Pejumeliwaisi penakujarubiwi yawenonatsi penabautisabinej̈a?

Lebare Hechos 17:11, panelebikujinae panabarükuaikuaijamü tsane paliwaisianü yabaraje:

• ¿Jumeliwaisiaebame j̈ua Bibliabaj̈utota rubena? ¿Jehová petotsipaebaponaewi meta pej̈aniajailiwaisi kujaruba?

• Itsa jumeaebame, ¿dej̈ua nej̈ata beitsimü?

5. Ajamatabükuenesaümüre itsa pibisiakuene katokopiapata

Pakujinae najamatabükueneweretatsi üJehová wajatojinawanapaenej̈a, wajanabautisabinej̈anua nakatokopiapatsipa pibisiakuene. Paneyapütaenej̈a itsaliwaisi bajaraj̈ua yabara pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: Netsitaayapübeje ata, jumekowünütajü Jehová taasiwaj̈ae (5:22)

• ¿Dej̈uajitsia Narangerel tsitaayapübejetsi pejumekowünütsinej̈a Jehová?

• ¿Depakuenia yawenonatsi piasiwajawa Jehovájawabelia?

Palebare Proverbios 29:25; 2 Timoteo 1:7, panelebikujinae panabarükuaikuaijamü tsane paliwaisi yabaraje:

• ¿Depatsa meta nakaajamatabükueneasaütsipa wajaajamatabükueneitatsakanej̈a?

6. Jumej̈aniataema Jehová pekayawenonaenej̈a

Jehová kayawenonaena neitsinej̈a j̈ua bajaraponü jitsipa. Pataema VIDEOJAWA, panetaekujinae panabarükuaikuaijamü tsane paliwaisibeje yabaraje:

VIDEOJAWA: Jehová Dioso kayawenonaena (2:50)

• ¿Dej̈uajitsia ponü videojawata tanetsi junawa penabautisabinej̈a?

• ¿Dej̈ua yawenonatsi penajamatabükuenekopatsinej̈a Jehovájawabelia?

Palebare Isaías 41:10, 13; panelebikujinae panabarükuaikuaijamü tsane paliwaisi yabaraje:

• ¿Dej̈uajitsia kakuenekaüjüpaena netoponaponaenej̈a üJehová?

7. Siwajamatabükuenebarüyamüre Jehová pekaasiwaj̈ae

Itsa najamatabüj̈ainame pakuenia Dioso bitso kaasiwa, nej̈ata jamatabükuenebarüyamü tsane bajaraponüjawabelia. Barüyakuenia tonakuenebabiabianame daj̈itamatakabijawabelia. Palebare Salmo 40:5, panelebikujinae panabarükuaikuaijamü tsane paliwaisi yabaraje:

• ¿Daj̈itaj̈uajawanü Jehová karajuta dej̈ua bitso katsitaj̈anepana?

Profetanü Jeremías baasiwa bitso Jehová, Pejumeliwaisi yajawa. Jamatabükuenebarüya penajetarukaej̈ae Dioso pewünüta. Bajaraponü jumaitsi: “Jehová, nijumeliwaisi kajena nejamatabükuenebarüyaej̈ana tsipaji j̈anü newünü kanajetarukajü” (Jeremías 15:16). Aekonoj̈aeta jumepire paliwaisijawanüje:

• ¿Dej̈uajitsia bitso pepo j̈anepanae wajatonakuenebinej̈a Jehová?

• ¿Jamatabünabautisabame Jehová netotsipaebaponaenej̈a?

• ¿Kakuenekaüjüpa meta baja?

• ¿Dej̈ua beitsimü nenabautisabinej̈a?

PALIWAISI BAJA YAPÜTANETSI

Jehová kajamatabükueneyawenonaena nenabautisabinej̈a.

Najamatabünapire

• ¿Beyapütaneme daj̈itapaliwaisianü rubena Dioso Pejumeliwaisibaj̈utota nenabautisabiwajünaeya?

• ¿Dej̈ua beitsimü nenabautisabiwajünaeya?

• Itsa jamatabükuenejunawame, ¿dej̈uajitsia apobenajamatabükuenekopatsimü nenabautisabijawa?

YAPÜTAENAME ITSALIWAISI

Najamatabükuenewerere nenabautisabinej̈a.

“¿Kakuenekaüjüpa baja nenabautisabinej̈a?” (Peyajiwitaebo, marzo de 2020)

Kanaüjüre j̈uajawanü kajamatabükueneewetsiayaej̈ana nenabautisabiyaniwa.

“¿Dej̈uajitsia abaj̈ü aponabautisabinü?” (Peyajiwitaebo, marzo de 2019)

Taema j̈ua jiwitonü itsi penabautisabinej̈a.

¿Dej̈uajitsia abaj̈ü aponajamatabükueneweretsinü tanabautisabinej̈a? (1:10)

Jiwitonü Ataawününü najamatabükueneaeba penabautisabinej̈a. Yapütaema j̈ua jamatabükueneyawenonatsi penabautisabinej̈a.

J̈anepana meta bajarajüa janünej̈a (7:21)