Asiwayakuenia taema nijamonae congregaciónjawata

Pakujinae yajawajinawanapatsi wajamonae congregaciónjawata, bitso barüyatsi pakuenia David peyanakuaewetsinü jumaitsi: “Bitso kajena j̈anepana wajataejawa wajamonae congregaciónjawata penajamatabükuenejüpaejawa” (Salmo 133:1). Itsiata benajamatabükuenesaütatsi j̈aniawaetsiakuenia wajanajuajinawanapaenej̈a.

1. ¿Dej̈ua yabara Dioso pijajiwi nakatsitapej̈aniakuene?

J̈amü meta itsanakuajawata itsa nasiwaj̈ainaejitsipame congregaciónjawa, bajarapamonae meta apojumeyapütaemü tsipae; itsiata j̈amü benijamonaekuenia taejitsipame. ¿Dej̈uajitsia? Tsipaji, daj̈itanakuajawa, padaj̈itanü Jehová patatotsipaebaponaewi kaeliwaisibaj̈uto panakujarubajü. Panajamatabükuenesaütajü patanaasiwajawa. Daj̈itanakuajawa, paj̈anü Jehová pawünüyaiyataniji, bajaraponü kaenü patonajuanakuenebajü (Sofonías 3:9).

2. ¿Deitsimü asiwayakuenia netaenej̈a nijamonae congregaciónjawata?

“Bajarapacuenia asaëyata namataenetsia bepanaasivamë tsavanapae daxita panejamatabëëthëtovetsina” (1 Pedro 1:​22). J̈amü nej̈ata, ¿deitsimü tsipae? Itsamonae apobekuenekanaüjübimü j̈ua itsi, juya yapütaema j̈ua pej̈aniakuene itsi. Pütsa saya yajawaponaponame pekakuenejüpaewita, juya yapütaemanua itsanakuapijiwi yajawa, itsawiriajume pekuaikuaijaiwi. Najamatabükuenesaüre netaenej̈a najüpaeya daj̈itajiwi nejamatabüütjütojawawetsina (lebare 1 Pedro 2:​17).a

3. ¿Deitsimü nijamonaejiwiyo congregaciónjawata itsa kaeliwaisi apoj̈ainaemü?

Pibisiajamatabükuene wajaj̈ainaej̈ae itsajawata najamatabükuenebijianabiabatsi. Bajaraj̈uata Dioso Pejumeliwaisita jumaitsi: “Itsa pakaitsakueniaba itsajiwi, bajarapajiwijawabelia panajamatabükuenekataire, panaitaj̈utobejiobiataemanua jamatabükuenej̈anepanaeya, namataenetsia bajaraj̈ua panaitsimüre. Jehová paj̈amü pakaitaj̈utobejiobiatane jamatabükuenej̈anepanaeya, bajarapakuenia ata paitsimüre” (lebare Colosenses 3:​13, TNM). Jehová pitabarata pibisiakuene ej̈anae atatsi, itsiata Jehová nakabarajamatabükuenej̈anepana. Bajaraj̈uata wajamonae congregaciónjawata bebarajamatabükuenej̈anepanatsi. Itsa itsakueniabame itsajiwiyo, bepijiayo barükuaikuaijamüre pekaitaj̈utotsoniataenej̈a (lebare Mateo 5:​23, 24).b

KANAÜJÜTSIANATSI

4. Daj̈itajiwi najüpaeya betaneme

Waj̈aitsi biasiwatsi wajamonae congregaciónjawata. Itsiata meta aponakatoyapüj̈anepanae asiwaya wajataenej̈a apowajanakakuenejüpaewita. ¿Debeitsitsi nej̈ata? Palebare Hechos 10:​34, 35, panelebikujinae panabarükuaikuaijamü tsane paliwaisibeje yabaraje:

• Jehová naimoj̈oyota daj̈itawiriajumewi pijajiwinej̈a, ¿deitsimü tsipae itsa itsamonae apokakuenejüpae?

• ¿J̈amü meta jota ponaponame, jiwi najüpaeya natane? ¿Dej̈uajitsia j̈amü bajarapamonae apobekuenejüpaemü?

Palebare 2 Corintios 6:​11-​13, panelebikujinae panabarükuaikuaijamü tsane paliwaisi yabaraje:

• ¿Deitsimü tsipae bebeliayo niasiwanej̈a nijacongregaciónpijiwi?

5. Itsamonae j̈aniawaetsiakuenia barajamatabükuenej̈anepanare

Waj̈aitsi kaeto ata apobarajamatabükuenej̈anepanaenatsi Jehová, bajaraponü itsiata bitso nakabarajamatabükuenej̈anepana. Palebare Hebreos 8:​12, panelebikujinae panabarükuaikuaijamü tsane paliwaisianü yabaraje:

• ¿Dej̈ua nakayapütaeyaej̈ana paliwaisi Jehová pitaj̈utotsoniataejawa yabara?

• ¿Bitso katsitapej̈aniakuene Jehová pekabarajamatabükuenej̈anepanaejawa? ¿Dej̈uajitsia?

• ¿Dej̈uajitsia itsajawata aponakatsitayapüj̈anepanae itsamonae j̈aniawaetsiakuenia wajanataenej̈a?

Jehová itsa kuenejüpatsi wajamonae yajawa asiwaya nataenatsi, ¿debeitsitsi nej̈ata? Palebare Proverbios 19:​11, panelebikujinae panabarükuaikuaijamü tsane paliwaisianü yabaraje:

• Itsajiwiyo nej̈ata itsa kaitsakueniaba, ¿deitsimü tsipae bajarapajiwiyo nebarajamatabükuenej̈anepanaenej̈a?

Itsajawata waj̈aitsi akuenebejetsi itsamonaejawabelia. ¿Debeitsitsi nej̈ata? Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: Bitso j̈anepana itsa nabarajamatabükuenej̈anepanatsi (6:01)

• ¿Deitsi nej̈ata wajamonaewa, pebarajamatabükuenej̈anepanaenej̈a itsawa?

6. J̈aniawaetsiakuenia nijamonae congregaciónjawata kueneyapütaema

J̈aniawaetsiakuenia wajamonae itsa kueneyapütanetsi congregaciónjawata, jamatabükueneyapütanetsi itsa akuenebeje, itsa kuenej̈anepana ata. ¿Debeitsitsi nej̈ata wajataenej̈a üpekuenej̈anepanaejawa? Pataema VIDEOJAWA, panetaekujinae panabarükuaikuaijamü tsane paliwaisi yabaraje:

VIDEOJAWA: ¡Bejamatabükuenej̈anepanatsi! (5:​10)

• ¿Depakuenia pej̈aniajamatabükuene yapütaename nijacongregaciónpijiwi?

Jehová saya itajitsipa wajapej̈aniajamatabükuenejawanü. Palebare 2 Crónicas 16:9​a, panelebikujinae panabarükuaikuaijamü tsane paliwaisi yabaraje:

• ¿Dejamatabükueneitsimü nej̈ata Jehová pekayapütaej̈ae pej̈aniajamatabükuene nej̈ainaejawa?

PALIWAISI BAJA YAPÜTANETSI

J̈amü daj̈ita itsa barajamatabükuenej̈anepaname, nej̈ata najamatabükueneitajütame niasiwajawa congregaciónjawata. Bajarapakuenia nej̈ata daj̈itatsi najuajinawanapaenatsi.

Najamatabünapire

• ¿Debeitsimü nej̈ata j̈amü itsamonae najüpaeya netaenej̈a?

• ¿Deitsimü tsipae j̈amü congregaciónjawata itsa kaeliwaisi apopaj̈ainaemübeje?

• ¿J̈amü barajamatabükuenej̈anepanaejitsipame pakuenia Jehová jitsipa? ¿Dej̈uajitsia?

YAPÜTAENAME ITSALIWAISI

Jesús nakayapütaeyaej̈ana comparaciónkuenia najüpaeya wajataenej̈a itsamonae. Taema video neyapütaenej̈a.

Itsamonae pütsa bitso kueneitaj̈utuajiname (6:56)

Jamatabüjai atatsi: “apoitsakueniabajü”, jai atatsi. ¿Itsiata bebarükuaikuaijaitsi bajarapajiwiyo wajanakaitaj̈utotsoniataenej̈a?

“J̈anepana itsa naitaj̈utotsoniatanetsi” (Peyajiwitaebo, 1 de noviembre, 2002)

Taema j̈ua itsamonae ­jamatabükueneyawenonatsi asiwaya petaenej̈a itsamonae aponakuenejüpae ata.

Asiwayakuenia nataenatsi, aponakuenejüpae atatsi (5:06)

Yapütaema pakuenia beitsimü aliwaisijibinejewa wajanajuajinawanapaenej̈a, kaeliwaisi apoj̈ainae atatsi.

“Asiwaya benabarajamatabükuenej̈anepanatsi” (Peyajiwitaebo, mayo de 2016)