¿Kërai pa yamboete Tumpa yamboyerovia vaerä?

Ïru yemboe pe yayemboe ma, mbaetɨi opaete religión reta oyapo Tumpa oipota vae. Ërei yandepuere ko yamboete yandeApoa jae oipota rami jare yamboyerovia. ¿Kërai pa yamboete kavi Tumpa? Jare ¿kia nunga religión pa oyapo Tumpa oipota vae? (Santiago 1:27). Yayemboe Biblia omboe vae.

1. ¿Mbae pa yandemboe yamboete kavi vaerä Tumpa?

Biblia yandemboe yamboete kavi Tumpa. Jesús jei Tumpa pe: “Neñee ko jae añete vae” (Juan 17:17). Amogüe religión reta mbaetɨ omboe añetete Biblia pe oï vae, jaeño oyapo reta opaete kia reta oyapo rami. Jehová pe mbaetɨ ikavi kia reta oyapoä jae jei rami vae (emongeta Marcos 7:9). Ërei yande yamboyerovia Tumpa yayapo yave yemboarakuaa reta Biblia pe oï vae.

2. ¿Kërai pa yamboete kavi Jehová?

Jehová ko yandeApoa, chupeño ñamee yemboete (Apocalipsis 4:11). Jehováño ko yamboeteta jare yaaɨuta, jare agüɨyeta yaiporu ídolo ani imagen reta (emongeta Isaías 42:8).

Yamboete vaerä Tumpa, Biblia jei “peñeñono tee chupe, jae omboyerovia vae” (Romanos 12:1). Jáeramo ikavi ko yaiko ara ñavo yemboarakuaa reta Biblia pe jei rami. Jehová oaɨu vae reta iñeereendu iporookuai reta jei vae menda re. Agüɨyeta osingaro, oichuu coca, oiporu droga jare ikause.a

3. ¿Maera pa yamboeteta Jehová jembiokuai reta ndive?

Semana ñavo yandepuere opaete yandepɨa ndive yamboete Jehová “jupi vae reta oyemboatɨ vae ndive” (Salmo 111:1, 2). Yamboete Jehová tairari rupi (emongeta Salmo 104:33). Jehová oipota yayemboatɨ yamboete vaerä, echa yanderaɨu yae jare kuae yemboatɨ reta yandemborɨ yaiko kavi vaerä yerovia reve añave jare kuri. Yayemboatɨ yave yandehermano reta ndive yandepuere ñañemokɨ̈reɨ päve.

YAIKUAA KATU VAERÄ

4. Mbaetɨ ikavi yaiporu imagen reta yamboete vaerä Tumpa

VIDEO: ¿Quiere Dios que usemos imágenes para adorarlo? (3:26)

• ¿Mbae pa oasa israelita reta ndive oiporu yave imagen omboete vaerä Jehová?

Amogüe kia reta oyemongeta oiporu yave imagen reta omboete vaerä oyemboya Tumpa re. Ërei ¿omboya jese ani ombosɨrɨ ra? Pemongeta Éxodo 20:4-6 jare Salmo 106:35, 36, jare peyemongeta jese:

• ¿Mbae mbae pa oiporu kia reta omboete vaerä?

• ¿Kërai pa Jehová oecha kia oiporu yave imagen reta?

• ¿Kërai pa ndeve oyeporu yave imagen reta omboete vaerä?

5. Yamboete yave Jehová, yayeyora religión raanga reta omboe vae güi

VIDEO: Libre gracias a la verdad (5:16)

Pemongeta Salmo 91:14 jare peyemongeta jese:

• Yaaɨu Jehová jare jaeño yamboete yave, ¿mbae pa oyapota yanderé?

6. Yamboete Jehová yayemboatɨ yave congregación ndive

Yamboete Jehová yatairari jare yayapo yave comentario reta congregación pe, jökorai ñañemokɨ̈reɨ päve yandehermano reta ndive. Pemongeta Salmo 22:22 jare peyemongeta jese:

• ¿Ndemboyerovia pa comentario reta yemboatɨa pe?

• ¿Reipota pa remocomenta yemboatɨa pe?

7. Jehová pe ikavi yae ñanemiari ïru reta ndive yayemboe ñaï vae re

Opaete yandepuere ñanemiari ïru reta pe Biblia omboe vae re. Pemongeta Salmo 9:1 jare 34:1, jare peyemongeta jese:

• Reyemboe Biblia pe vae, ¿mbae re pa reipota nemiari ïru reta pe?

YAYEMBOE MA VAE

Jaeño yamboyerovia yandeApoa yamboete yave, jaenunga vi yamboete Jehová yatairari jare ñamocomenta yave yemboatɨa pe, jare ñanemiari yave ïru reta pe Biblia re yayemboe vae.

Emoësaka

• ¿Mbae pa yandemboe yamboete kavi vaerä Tumpa?

• ¿Maera pa Jehováño ko yamboeteta?

• ¿Maera pa yamboeteta Jehová jembiokuai reta ndive?

EEKA KUAE

Lea en la biografía “Ya no soy esclava de los fetiches” cómo una mujer se liberó de la idolatría.

“La Biblia les cambió la vida” (La Atalaya, 1 de julio de 2011)

Descubra algunas ideas para ofrecer comentarios en las reuniones.

“Alabemos a Jehová en la congregación” (La Atalaya, enero de 2019)

Vea cómo las reuniones le ayudaron a un joven aunque se le hacía difícil asistir a ellas.

Jehová se interesa por mí (3:07)

Mucha gente relaciona la cruz con el cristianismo, ¿pero deberíamos usarla en nuestra adoración?

“¿Por qué no usan la cruz los testigos de Jehová?” (Artículo de jw.org)