¿Mbaepa oipota Tumpa opaete peguarä?

1. ¿Mbaepa oipota Tumpa yandeveguarä?

TUMPA oipota vae ikavi yaeko opaete peguarä. Jae oyapo kuimbae jare kuña tenondegua, Adán jare Eva, oiko vaerä ɨvɨ ipöra vaepe. Jae oipotatëiko jae reta güɨnoi iñemuña reta, oyapo reta opaete ɨvɨ metei paraíso jare oyangareko mɨmba retare (Génesis 1:28; 2:8, 9, 15; emae nota 6).

2. a) ¿Këraipa yaikuaa Tumpa oyapota jae oipota vae? b) ¿Kia retapa yogüɨrekota ɨvɨpe jare, mbovɨ tiempopa yogüɨrekota?

² ¿Reroviapa yaiko vaerä metei paraísope? Jehová jei yandeve: “Jae vae, ayapota ko, ayemongeta ayapo vaerä vae, ambopota ko” (Isaías 46:9-11; 55:11). Jökoraiko, jae oipota vae oyapotako, ngaraa kia ave omombɨta. Jehová oikuaa maera oyapo ɨvɨ. Jae “mbaetɨ oyapoiño” (Isaías 45:18). Jae oipotako kia reta oiko opaete ɨvɨ rupi. ¿Kërai jeko vae retapa oipota Tumpa oiko vaerä jokope, jare kërai reguapa? Biblia jei: “Jupi vae reta güɨnoita imbaerä ɨvɨ, jare yogüɨreko aveita jókuae ɨvɨ pe” (Salmo 37:29; Apocalipsis 21:3, 4).

3. Kia reta imbaerasɨ jare omano yave, ¿mbaepa reparandu kuae regua?

³ Ërei añave rupi kia reta imbaerasɨ jare omano. Oipotagüe rupi, oñeraro jare oyeyuka reta. Ërei, kuae mbaetɨko Tumpa oipota. Jayave, ¿mbaepa oasa jare maera ramo? Jaeño Biblia ipuere omboyevɨ.

TUMPA JOVAICHO

4, 5. a) Jardín Edénpe, ¿kiapa oiporu mboi imiari vaerä Eva ndive? b) ¿Këraipa kia jeko kavi vae imonda oyeapo?

⁴ Biblia omombeu Tumpa güɨnoi metei tovaicho “aña guasu Satanás jee vae”. Jardín Edénpe, Satanás oiporu mboi omomiari vaerä Eva ndive (Apocalipsis 12:9; Génesis 3:1). Jae güɨroviaka chupe mboiko imiari oï vae (emae nota 7).

⁵ Jayave, ¿oyapopa Tumpa Aña guasu Satanás? ¡Mbaetɨko! Tumpa oyapo ɨvɨ Adán jare Eva peguarä yave, metei ángel arape oiko vae ipɨa ambue jare jökorai oyeapo Aña (Job 38:4, 7). ¿Këraipa oasa jókuae? ¿Këraipa metei kia jeko kavi vae imonda oyeapo? Jae mbaetɨko oa güive imonda. Ërei, jae oipota iyeupeguarä jae imbaeä vae, jare jekuaeño ipɨayemongeta jese yave oipota yae jókuae. Jayave, jëgua chupe yave oñomi. Jökorai imonda oyeapo (emongeta Santiago 1:13-15; emae nota 8).

6. ¿Këraipa metei ángel oyeapo Tumpa jovaicho?

⁶ Jökorai oasa jókuae ángel ndive. Jehová oyapo Adán jare Eva yave, jaɨkue rupi jei chupe reta peñemuña jare “pemotɨnɨe” ɨvɨ (Génesis 1:27, 28). Jókuae ángel ipuereko ipɨape jei: “¡Opaete kia reta ipuereko chemboete Tumpa ipoepɨkape!”. Jekuaeño ipɨayemongeta jókuaere yave oipota yae Jehovápeño oñemee vae. Jókuae ángel oipota kia reta omboete chupe. Jáeramo iyapu Evape jare ombotavɨ (emongeta Génesis 3:1-5). Jókuae ramo oyeapo Satanás Aña guasu, Tumpa jovaicho.

7. a) ¿Maerapa omano Adán jare Eva? b) ¿Maerapa yandendechi jare ñamano?

⁷ Adán jare Eva iñeereenduä Tumpape jare jou reta ɨvɨra ia (Génesis 2:17; 3:6). Jae reta iyoa Jehová kotɨ jaɨkue rupi omano reta, oyembopo Jehová jei rami oasata vae (Génesis 3:17-19). Adán jare Eva iñemuña reta iyoavi, jáeramo omano reta (emongeta Romanos 5:12). Yaikuaa kavi vaerä maera Adán jare Eva iñemuña reta jaenungavi iyoa, yayemongeta kuae mbaembojaangare. Nde reyapo mbɨyape yave reiporu mbaerɨru ichokua vae. Jókuae mbɨyape oë mbaerɨru ichokua rami. Adán iñeereenduä Tumpape yave iyoako. Yandeko jae Adán iñemuña reta, jáeramo opaeteko yandeyoavi jae rami. Jare opaete yandeyoa ramo, yandendechi jare ñamano (Romanos 3:23; emae nota 9).

8, 9. a) ¿Mbaepa oipota Satanás güɨroviaka Adán jare Evape? b) ¿Maerapa Jehová mbaetɨ omokañɨ voi oñemopüa reta yave ikotɨ?

⁸ Satanás oyavɨuka Adán jare Evape agüɨye oendu vaerä Tumpape. Jökorai Satanás omboɨpɨ oñemopüa Jehová kotɨ. Jae oipota Adán jare Eva güɨrovia iyapuko Jehová, mburuvicha pochɨ mbaetɨ oipota ikavi vae chupe reta peguarä. Satanás jei kia reta mbaetɨ omonecesita Tumpa jei vae oyapo vaerä jare jeivi Adán jare Evape ipuere oiparavo mbae ikavi ani ikaviä vae. Jayave, ¿mbaera oyapota Jehová? Jae ipuereko omboai oñemopüa ikotɨ vae reta, jökorai opata okañɨ ipɨapochɨ vae reta. Ërei ¿ipuerepa oechauka kuae rupi Satanás jaeko iyapu vae? Ngaraako.

⁹ Jehová mbaetɨ omokañɨ jókuae ara voi oñemopüa reta ikotɨ vae. Jehová omaeño kuimbae reta oñemogobierna vaerä michi peguaño. Kuae oechauka Satanás iyapuko, ërei Jehová oikuaa mbaeko ikaviete opaete peguarä. Yaikuaa katuta kuae regua yemboe 11 pe. Ërei ¿mbaepa rere Adán jare Eva oyapo vaere? ¿Ikavira güɨrovia Satanáspe jare mbaetɨ iñeereendu Tumpape? Jehová omee Adán jare Evape opaete mbaembae güɨnoi vae. Omee chupe reta tekove sɨmbi vae, kiape ipöra oiko vaerä jare mbaravɨkɨ ikavi vae. Ërei Satanás mbaetɨi oyapo ikavi vae chupe reta peguarä. Reï jokope yave, ¿mbaepa reyapo?

10. ¿Kiapa yandepuere yaiparavo yandeRuvicharä?

¹⁰ Añave rupi, metei ñavo yandepuerevi yaiparavo mbae yayapota, jare yanderekove oï jókuae yaiparavo vae rupi. Yandepuere yaiparavo Jehová yandeRuvicharä ñaneñeereendu yave, jökorai yaechauka Satanás jaeko iyapu vae. Ani yandepuere yaiparavo Satanás ñanemogobierna vaerä (Salmo 73:28; emongeta Proverbios 27:11). Añave rupi mbovɨ kia reta iñeereendu Tumpape. Jae mbaetɨko omogobierna kuae ɨvɨpe. Ërei Tumpaä yave, ¿kiapako?

¿KIAPA KUAE ƗVƗ JUVICHA?

11, 12. a) Satanás oipota omee gobierno reta Jesúspe, ¿mbaepa yandemboe jókuae? b) ¿Bibliape mbae textopa oechauka Satanás jaeko kuae ɨvɨ juvicha?

¹¹ Jesús oikuaa kiako jae ɨvɨ juvicha. Metei ara, Satanás “oechauka chupe opaete ɨvɨ pegua mborookuaía reta, iyemboetea reve reve”. Javoi Satanás jei Jesúspe: “Tamee ndeve opaete kuae, reyetavatɨka chemboete yave” (Mateo 4:8, 9; Lucas 4:5, 6). Eyemongeta kuaere: “Jókuae gobierno reta Satanás jaeko iya jáeramo oipota omee Jesúspe”. Opaete gobierno reta Satanás jaeko iya.

¹² Ipuereko reparandu ndeyeupe: “Jehová Tumpa imbaepuere yae ete vae jaeko ɨvɨ iyapoa, jayave, ¿maerapa Satanás omogobierna kuae ɨvɨ?” (Apocalipsis 4:11). Jesús jei “Aña, kuae ɨvɨ juvicha” (Juan 12:31; 14:30; 16:11). Apóstol Pablo jei Satanás Aña guasu jaeko “kuae ɨvɨ pegua tumpa” (2 Corintios 4:3, 4). Jare apóstol Juan oikuatía “aña guasu güɨnoi mbaepuere opaete ɨvɨ re” (1 Juan 5:19).

¿KËRAIPA OÑEMOKAÑƗTA SATANÁS IGOBIERNO?

13. ¿Maerapa ikaviko Tumpa omboai vaerä ikaviä vae?

¹³ Kuae ɨvɨpe yavaete yaema. Yaecha yandeɨpɨ rupi ñeraro reta, oporombotavɨ vae reta, iyapu vae reta, iyarasɨ rai vae reta. Yepetëi kuimbae reta jeta oñemomɨ̈rata, mbaetɨ ipuere omboai yemboavai reta. Ërei, michiñoma oata Tumpa opa omboai vaerä Satanás igobierno ñeraro guasu Armagedónpe, javoi oipoepɨta metei gobierno jupi vae ndive (Apocalipsis 16:14-16; emae nota 10).

14. a) ¿Kiapa Tumpa oiparavo igobiernope Mburuvicharä? b) ¿Mbaepa omoërakua Biblia Jesús regua?

¹⁴ Jehová oiparavo Jesucristo Mburuvicharä omogobierna vaerä igobiernope ani iReinope. Arakae güive voima Biblia omoërakua Jesús “mburuvicha mbɨakatu pegua” omogobiernata jare igobierno ngaraa iyapɨ (Isaías 9:6, 7). Jesús omboe jemimboe retape oyerure vaerä jókuae gobiernore jei yave: “Tou ndeporookuaía. Nderemimbota ara pe oyeapo oï rami, toyeapo vi kuae ɨvɨ pe” (Mateo 6:10). Yemboe 8 pe, yaikuaata kërai Tumpa oñonota igobierno kuimbae igobierno jendagüepe (emongeta Daniel 2:44). Javoi Tumpa igobierno oyapota ɨvɨ metei paraíso ipöra yae vae (emae nota 11).

¡TUMPA IGOBIERNO KÖIÑOMA OÏ!

15. ¿Mbaepa oipota jei “ɨvɨ ipɨau”?

¹⁵ Biblia jei: “Ñaäro ñaï jae güɨrökuavee vae, ara ipɨau vae jare ɨvɨ ipɨau vae, joko pe oimeta jupi vaeño” (2 Pedro 3:13; Isaías 65:17). Ámope Biblia imiari yave “ɨvɨ regua”, oipota jei kia reta oiko ɨvɨpe vae (Deuteronomio 32:1). Jáeramo “ɨvɨ ipɨau” jaeko opaete kia reta oyapo Tumpa jei vae jare güɨnoi Tumpa ibendición.

16. a) ¿Mbae regalo ikavi vaepa Tumpa omeeta oiko vae reta igobierno pɨaupe? b) ¿Mbaepa yayapota ñanoi vaerä jókuae regalo?

¹⁶ Jesús jei oiko vae reta Tumpa igobierno pɨaupe omeeta chupe reta “tekove opambae vae” (Marcos 10:30). ¿Mbaepa yayapota yaipɨɨ vaerä jókuae regalo? Reväe vaerä mbaemboyevɨ emongetami Juan 3:16 jare 17:3. Añave ñamae Biblia jei vae kërai yaikota kuri ɨvɨ ipöra vaepe.

17, 18. ¿Këraipa yaikuaa opaete ɨvɨ rupi yaikota pɨagüive reve?

¹⁷ Ikavimbae vae, ñeraro, oporoyuka vae jare jeko pochɨ yae vae opata okañɨ. Ngaraama oime kia reta jeko pochɨ vae ɨvɨpe (Salmo 37:10, 11). Tumpa “omombɨta ñeraro opaete ɨvɨ rupi” (Salmo 46:9; Isaías 2:4). Opaete ɨvɨ rupi yogüɨrekota kia reta oaɨu Tumpa jare oyapo jae jei vae. Yogüɨreko aveita pɨakatu reve (Salmo 72:7).

¹⁸ Jehová jembiokuai reta oikota pɨagüive reve. Israel iñemuña reta iara rupi oyapo yave Tumpa jei vae, yogüɨreko pɨagüive reve echa jae oyangareko jese reta (Levítico 25:18, 19). Paraísope, ngaraama yakɨɨye kia avegüi. ¡Yaiko aveita pɨagüive reve! (emongeta Isaías 32:18 jare Miqueas 4:4).

19. ¿Këraipa yaikuaa kavi oimeta jeta yae tembíu paraísope?

¹⁹ Oimeta jeta yae tembíu. Oimeta jeta yae temitɨ ia “ɨvɨ pe, jare ɨvɨtɨ guasu reta rupi” ave (Salmo 72:16). Jehová yandeRu Tumpa omeeta yandeve ibendición jare “ɨvɨ pe oimeta mbaagüɨye” (Salmo 67:6).

20. ¿Këraipa yaikuaa ɨvɨ oyeapota metei paraíso?

²⁰ Opaete ɨvɨ oyeapota metei paraíso. Kia reta güɨnoita tëta ipöra jare temitɨ reta ipotɨ vae (emongeta Isaías 65:21-24; Apocalipsis 11:18). Opaete ɨvɨ ipöra yaeta jardín Edén rami. Jehová omee aveita yandeve opaete ñamonecesita vae. Biblia jei jesegua “ndepo reyora, ndepɨa kavi reve ndeporerekua opaete oikove vae re” (Salmo 145:16).

21. ¿Këraipa yaikuaa yaikota pɨakatu reve mɨmba reta ndive?

²¹ Yaikota pɨakatu reve mɨmba reta ndive. Michia reta oiko pɨagüiveta, yepetëi oï mɨmba reta ipɨtepe añave rupi pochɨ yae vae, jókuae yave mɨmba reta ngaraama maräi yandeapo (emongeta Isaías 11:6-9; 65:25).

22. ¿Mbaepa oyapota Jesús imbaerasɨ vae retare?

²² Ngaraa kia ave imbaerasɨ. Jesús oiko yave ɨvɨpe, jae ombogüera imbaerasɨ vae reta (Mateo 9:35; Marcos 1:40-42; Juan 5:5-9). Ërei, Mburuvicha rami Tumpa igobiernope, Jesús ombogüerata opaetepe. Ngaraayema kia ave jei: “Chembaerasɨ aï” (Isaías 33:24; 35:5, 6).

23. ¿Mbaepa Tumpa oyapota omanogüe vae retare?

²³ Omanogüe reta oikoveyeta. Tumpa jei omoingoveyeta jeta yae omanogüe reta. “Oikove yeta jupi vae reta jare jupimbae vae reta” (Hechos 24:15).

24. ¿Këraipa ndepɨa reikuaa yave reiko aveita paraísope?

²⁴ Opaete yandepuere yaiparavo vaerä. Yandepuere yaiparavo yaikuaa kavi vaerä Jehová regua jare yayapo jae jei vae, ani yandepuere yaiparavo yayapo vaerä yaipota vae. Ërei, yaiparavo yayeokuai vaerä Jehovápe yave, ñanoita tekove ikavi yae vae. Jekuaeño yayemboe Jesucristo regua jare këraita oyapo Tumpa oipota vae.