Israelitasmera Jeupawan møra martrap køtrømisrik køn

Egiptokutri wetruik pa pøl puraipen israelitasmerape Sinaí tun pulusrø pua trusrø waramisrik køn, inchen Jeupa Moiséswan tru tunyumay nepintrain karua trentaik køn: “Na israelitasmeran Egiptokutri wesraik køn, nøm nan møra marene nømpe nai misak kui wamilø køntrun cha”. Moisés tunyukutri pinaatrua israelitasmeran Jeupa maik taikwan eshkapen nømpe trencha løtik køn: “Jeupa maik karuikwan nam møra martrer cha”.

Moisés katøle tunyu nepipen Jeupape trentaik køn: “Pøn kualøm puraipen nai misakmerapa waminchap, tru kualøm pumne møikkucha ik tunyumay nepamtrap inchimøtay cha”. Inchen Moisés køtraatrua israelitasmeran trentaik køn: “Jeupa manchitashchap muniray cha”.

Tru pøn kualøm pupen Sinaí tun pala yalø wañi pulap palaik latrø trømpøik trasaik ashipelø køn, inchen palai latrø mur wantrap trashipen trukekøtø wara kikultrawa mur utrik mørøpelø køn, trukutri Jeupa nak pilapiku tun palasrø køtraatrupen, pøtøkatan yalø nakishtø netsap menta pirø mur kønap mentøpen israelitasmerape latrø trømpøik kørik kui inchipelø køn, tru wara kikultrawa más mur utrik mørakucha. Inchen Jeupape trentaik køn: “Na Jeupa kur ñimpe katøkan tiusesmerane tømpasrmumik køn chip”.

Moiséspe katøle tunsrø nepipen, truyu Jeupape nui misakmera mantø amønamikwan, nun mantø adoramikwan eshkapen, Moisés truikwan chap pørape israelitasmeran mayelø mørtrai lepen, nømpe trentaik køn: “Jeupa ketriku karuikwan nam treek martrer cha”. Treekkutri, Tiuswan treek martrap køtrømisrik køn. ¿Treekwan marik kø chintera?