Israelitasmera chi martrap misrikwan marmuik køn

Jeupa Moiséswan trentaik køn: “Tun palasrø nepamø cha truyu israelitasmeran martrai karuilan sruk tampalmerayu pøra trantrumøn cha”. Inchen Moiséspe trusrø nepia 40 yem kualømmerakatik køtrømisren Jeupa diez mandamientoswan chap pøra Moiséswan tranik køn.

Moisés tunyu nepiaik yanayutø, israelitasmerape nømuntø køtrømarik kui isup menta Aarónwan trentaik køn: “¡Kan metrap pera intrapik palai pøntrer! ¡Kan tius martra cha!”. Inchen Aarónpe trencha løtik køn: “Trupe oro tøkakuilan srua amtruy cha”. Inchen, tru oron pirana kan wara-unø mara pasren misakmera trupurap trenchipelø køn: “Ik wara-unø namui tius køn Egiptosrønkutri wesrapik”. Incha wara-unan adorantrap kan fiesta marøp mentik køn. Øyeek marikpe latrø kalø kuik køn, kakentø nømtøwai tru Jeupawan martrap misrikwan wentøpasrøp pøntraikkutri.

Øyeek purep pasraikwan Jeupa ashape Moiséswan trentaik køn: “Yu tunyukutri køtraintrø, kakentø israelitasmerape nø karuikwan møra marmø pek tiuswantø tømpasrøpkøn cha”. Moiséspe tunyukutri tru pa sruk tampalmeran srua køtraatrupik køn.

Moisés tunyukutri yantø køtraatrua nepua mørik køn, tru israelitasmera kasrak miirap kui. Inchen yantø truyu pua ashene, tru orotøka marik wara-unai pøtøpurap trutru pailap køpen Moisés treekwan asha køtrø nama, pa sruk tampalmeran pitis peta, tru urastø Moiséspe orotøka wara-unø marikwan pitis mara Aarónwan paipik køn: “¿Ñipe chintimpa øyeekwan marinkarukucha?”. Inchen Aarónpe trencha løtapik køn: “Napa namømøta, nøm maik kuikwan ñipe ashipikik køn cha, nøm kan tius tøkakøntrap intikkutri na oron naku kekuchene, øyeek wara-unø wepatruptintan”. Aarón øyeek marikpe latrø kalø kuik køn. Moisés katøle tunsrø nepia Jeupawan miapik køn israelitasmera kalø marikwan ulø paymø pesannatra cha.

Israelitasmera nun møra martrap inchipelane Jeupa ulø paymø pesannaik køn. Chu urastøkucha Jeupawan, Moiséswankucha møra maramik kuik køn.