Ángel Gabrielpe Marían ashchap puik køn

Kan srusrø María taik Elisabetwai yawik, Galileasrø kan pueblo Nazaret taiksrø tsupik, tsiktøka chikøpentø marøpik José munchi taikpa kasharantrap kuik køn. Elisabet trattrø kan pøl kuantrik uñen ángel Gabrielpe Marían kenamisra trentaik køn: “¡Ka watirru! cha. ¡Tius mayanguen tab indig!” Inchen Maríape chi termap isupen Gabrielpe trenchipik køn: “Ñipe kuantrik køtrømisra kan nusrkai tøkamisrtrun, incha Jesús munchi pasrtrik nøpe rey køntrun inchen Nø Aship Karup Waikpe manaken patsamøntrun cha”.

Inchen Maríape: “¿Na mu møøbagucha kimíigwane øyeebe chincha purainrrab kø?— cha, payene”, ángelpe trenchipik køn: “Jeupawaimpe chitøkucha kaimantikpe kaapik køn, espíritu santope ñuim pala køtraatrupen, ñipe kuantrik køtrømisrtrap køn, ñui yawik Elisabetkucha kuantrik køn cha”. Inchen Maríape trenchipik køn: “Nape Jeupa maik karuikwan marøp mekapik kur. Ñi maik taik treek køntrun cha”.

Maríape Elisabetwan kan ciudasrø ashchap ya, trusrø puptø Maríape Elisabetwan ka untitru chipen, unøpe patsø umpu wapikpe kønaptinchen nøpe espíritu santo netsaik køtrømisra trenchipik køn: “Jeupape ñune latrø nu tapik tranin køn, nape latrø kasrak war nai Señorwai usri nan ashchap atrikkutri”. Maríape trenchipik køn: “Nai mantrøpe Jeupawan maya nuken tapik wamintan cha”. Nøpe, Elisabetpa pøn pølpurap køtrømisra katøle Nazaretsrømay yaik køn.

Maríape kuantrik kui José wammørape, nøpa yantø kasharamøntrap isupen, kan ángel piainuk kenamisra trentaik køn: “Marían ñui srain køntrai utamikwan kørik kui inchimøta, kakentø nøpe chikucha kalø marmøn cha”. Josépe Maríapa kasharawa nui yamay pera yaik køn.