Ángelesmera Jesús kal-laikwan eshkapelø køn

Roma maya misakwan aship karup wapik, César Augustope, judíosmera chu kal-laiksrø nømui munchimeran tulishintrain karuik køn. Josépe trusrø kal-laikkutri Maríapa Belénsrømay ampen, Maríape unan tøkamisramik lamøtø palaik køn.

Belénsrø pua, ya kal-lawa kan establotø wetøtraikkutri truyu kal-laik køn Jesúspe. Maríape unan may pula ushamera maik patiayu waik køn.

Belén pulusrø, upisha ashipelø yemsrønkatik warøpen, kan ángel nømun kenamisra Jeupawai tørkekualmapik nømuim pøtøkatan kepiløpen, nømpe trupa kørik kui inchipelø køn. Inchen ángelpe trenchipik køn: “Kørik kui inchimøtay kakentø ñimun tap srø wam srua atrur, Belénsrø tru Mesíaspe kal-lan cha”. Inchen tru urastø katøkan ángelesmera srømpalasrø kenamisra trenchipelø køn: “Srømpalasrømpe Tiuswaimpe purø tapik køn, katø Piraupe misakmera nø mayanken tap kui wamilø køntrun cha”. ¿Ángelesmerape chap ampen upisha ashipeløpe chi marik kera?

Upisha ashipeløpe kan kan asiyawape trenchipelø køn: “Pestø Belénsrømay ashchap amkun cha”. Trusrø pupene, Joséwanpa Maríanpa unø srø kal-laikwanpa establoyu wetøtrapelø køn.

Mayeløpa ángel chi eshkaikwan mørape køtrø kuarøpelø køn. Inchen Maríape ángel chi taikwan isua manaken pesannamuik køn. Upisha ashipeløpe katøle ampuppe, Jeupawan trupa tapik waminchip ampa, nøm chi mørikwan, chi asikwan unkua taik køn.