Jeupa Jesúswan purømisrik køn

Israel pirausrø møilø misakmerape kørepelø kuik køn, estrellasmera nøm chumay amtrap kuikwan eshkapelø kui. Kan yem, møkelø orientesreelø ampup køpen srømpalasrø kan latrø tør estrella ip pasrøpen asha tru wentautø ampik køn. Tru “estrellape” Jerusalénsrønkatik ipen møkeløpe trusrømay ampa paya mørik køn: “¿Tru judíosmerai rey køntrapik unøpe chu tsu? Kakentø nun kørikpala tapik waminchap amtruer cha”.

Rey Herodespe trentaikwan mørape ni mumayken kømui inchip sacerdotesmeran paipik køn: “¿Cristope chu kal-lantrapik kø cha?”. Nømpe trenchipelø køn: “Judea pirau Belénsrø, kakentø Tius maik karuikwan eshkapik øyah pørik køn cha”. Herodespe tru Orientesreelø møkelan wama trenchipik køn: “Belénsrømay ampa unan lantrikay, incha wetøtrawape eshkatruntrikay nakucha kørikpala tapik waminchap intrap cha”. Inchentø isatø trenchip pasraik køn.

“Estrellape” katøle ip mentøpen, tru møkeløpe Belénsrønkatik wentautø ampen tru estrellape kan ya pala pasramisrøpik køn. Tru møkeløpe yau kepampape, Jesúswanpa nui usri Maríanpa ashape, tømpønsra, oro køpen, incienso køpen, mirra køpen ketøpelø køn. Inchentø tru Jesús tsuiksrønkatik, ¿ik møkelan Jeupa ørik kø chintera? Kak, treek kømuik køn.

Tru yem, Jeupape Joséwan kan piainuk kenamisra trentaik køn: “Herodespe Jesúswan kuetchap lantrap køn. Inchawai ñui srawanpa, ñui unanpa Egiptosrømay pera intrø, truyu køtrømisra trømpøik puntrapik chap puraipen katøle attrai eshkatrumøn”. Inchen tru yemtøwai Josépe nui unanpa, Maríanpa, Egiptosrømay pera yaik køn.

Jeupape tru Orientesrø møkelan Herodeswaisrømaype ammøntrai merøpen, Herodespe trunun wammøra latrø trømpøik namapik køn, incha Jesúswan wetøtrantrap kaima, Belénsrø maya urekmeran Jesúswai edad tøkarwan ketrikupa kuetchain karuik køn. Inchene Jesúswane chikucha puraimíik køn Egiptosrømay srua ampikkutri.

Yana puraipen, Herodes kuapen Jeupape Joséwan trentaik køn: “Yantø unan kuetchapikpe mukaakøn katøle amtruy cha”. Inchen Josépa, Maríapa, Jesúspa katøle Israelsrømay amtrua Nazaret ciudasrø warøntrap ampik køn.