Juanpe Jesúswai maywan tamarik køn

Juanpe Zacaríaswaimpa, Elisabetwaimpa nusrkain kuik køn. Jeupape nun chi puraintrapikwan eshkapik køntrai lawa wesruikkutri, Mesías attrapikwaimpurap misakmeran eshkaik køn. Nøpe ciudamerayu, judíosmera tuluntsunik yasrøntø kømøtø desiertosrønkucha kusrenanøpik kuikkutri latrø yam misakmera Jerusalénkutri, Judeakutri nun mørtrap ampupelø kuik køn. Tius kasrak wantrai kalø marmumikwan kusrenanikkutri yam misakmera nøm kalø marilan isua møren, Juanpe nømun Jordán piyu piu umpu ulsraik køn.

Juanpe køtrøtik kuikkutri nui kewa kuikpe camello isitøka marik køpen, nui mamikpe nøtrø chapullpa, kaumpu mielpa køpik køn. Treekkutri, misakmerape nuimpurap más nepua ashik kuilø kua, fariseosmera, saduceosmeraken nun ashchap ampen, Juanpe trenchipik køn: “Kalø marikwan isua møra yunømaray. Kakentø ñimpe latrø nøtrelø kermap isupelø køn Abrahánwai nusrkalø ker chiptø, inchentø truikpe Tiuswai nusrkalø kuikpe kenamarmøn cha”.

Latrø yam misakmera trencha paipelø kuik køn: “¿Tius kasrak wantraimpe nampe chi maramø cha?”. Inchen Juanpe trencha løtapik køn: “Møikkøpen pa kewakuilø tøkakuape chikucha karwan kan tranay cha”. ¿Chincha trentaik kera? Kakentø Juanpe Tius kasrak wantrai, nui mentik amøñipelø misakmeran untarantrai isuikkutri.

Incha an utapelan trenchipik køn: “An utøntrai pønsrainuk mentra utøntrai kømø, maya utamikwantø utøntrikay cha”. Trektøwai suldaumerankucha trenchipik køn: “Munkøpen ka isatø chikøpen kemesra kepenøsrkømøwai, ñim chikøpen marøp kuimpurø ñimun maik pakaraiktøkatø kasraaray cha”.

Sacerdotesmerapa, levitasmerapa Juanwan ashchap ampa trenchipelø køn: “Mayeløpa ñi mu kui nepua ashik kuintø pøntran cha”. Inchen Juanpe trenchipik køn: “Kan wam mu misak warap waraimønuk trenchip trashipik, truik kur cha Jeupawai maywan ølkantø kuray chip, tru Tius maik karuikwan eshkapik Isaías maik taik treekke”.

Misakmerape Juan kusrenanikwan latrø tap kui møren, møiløpe tru Juanpe Mesías kuitamap nepua ashchap intikkutri, Juanpe trenchipik køn: “Na lataken kømø, kan møk más poder tøkaik pestø attrap køn. Nape trupurap kømíik kua, nui alpargatisyu tsiwanken pitchapkeik kur. Nape pitøka pi umpu ulsrøpen, nøpe espíritu santotøka pi umpu ulsrøntrapik køn cha”.