Jesús latrø nu misakmeran mamik srøtrik køn

32 pilasrø Pascua pumuatø Jesús nøaship karua ørilø Tiuswaiwan waminchip amøña, muraarailø pupen Jesúspe kan barcoyu Betsaidasrømay isrøntrap pera yaik køn. Inchentø, pi mentasrø pupen latrø nu misakmera trusrø puaken køpen, Jesúspe nømun latrø nu untaktøka uta, kuantrø tøkarwan tamarøp, chikøpentø latrø nu kusrenanik køn. Inchawai, mawa ørøpa Tius Nø Aship Karup Waikwaimpurap waminchip pasrøpen, mapensrø nøaship karua øriløpe trentaik køn: “Misakmerape parø kuilø kuintrun yantø unkua chi, mamik penøntrap amtrain cha”.

Inchen Jesús trenchipik køn: “Ampamikpe palømøn, ñimasiktøwai mamik srøtray cha”. Inchen nømpe trencha paipelø køn: “Nømuyasik pitrim penøntrap amtrainte cha”. Inchen Felipe trentaik køn: “Latrø nu an tøkakuinkucha ya nu misakwaimpe pitrim penamik nepumøntrun cha”.

Jesúspe paya mørik køn: “¿Mamik mayam pasra cha?”. Inchen Andréspe trentaik køn: “Trattrøkatø pitrimpa pakatø peskaupatø tøkaker cha. Inchentø ya nu misakwaimpe srøik penøntrap ampatøwain køntrun cha”. Jesúspe trentaik køn: “Yu srua amtrutray cha”, incha tru nu misakwan pupilayu 50patø, 100patø putramisrinkarua tru trattrøkatø pitrimeranpa, pakatø peskaumeranpa, tasku muta, srømpalamay neesha, Tiuswan ‘mayanken pay’ chipik køn. Incha pitrimeran pirisha, nui kusrenanøp pera unilan tranen, nømpe misakwan pirishipelø køn. 5.000 mil møkelø truyu putrapeløpa, nøørø ishumpurmera urekmera øska ma køtrømisren, srapepe nøaship karua øriløpe mamik unchipikwan minchimøntrai doce canastas tulishipelø køn. Ik marampurap marikpe køremkeik kuik køn.

Inchen misakmerape kuara asha nømui rey køntrai isupen, Jeupape treek isumuik køn, kakentø katøkucha utø pumuikkutri. Ikwan Jesúspe tør nepua ashipik kuik køn. Inchen yantø Jesúspe nui kusrenanøp pera unilan Galilea pisu ampøkatøsrømay metrap amtrai barcoyu nepampin karua tru nu misakwankucha ‘unkua’ chape nøpe tun palasrømay nøtø nepiaik køn. ¿Chincha? Kakentø maya muraaraik kuintøkucha nui Møskaimpa waminchap utø wesrapik kuikkutri.