Jesús pi palawan atrik køn

Jesúspe kuantrø tøkarwan tamarøp, kuapelan katøle kusrup, isikwanpa srewanpa wasrønchik køtrømisrtrai marik køn. Inchen, Jesús tru tunpalasrø nui Møskaimpa chap waminchape, nøpe asik køn tru nøaship karua øriløpe barcoyu tsikmeratøka piyu latrø mur ulsrøp meløpen, latrø trømpøik palai wantrap mur isik ichip pasraikkutri. Inchen nøpe pi palawan katsikkatø nømuimay kemallip ipen, nømpe asha trømpøik kørik kui-inchen Jesúspe trentaik køn: “¡Kørmø, mur isua putray! Na kur cha”.

Inchen Pedro trentaik køn: “Señor, trupe, ñi kuape, nan ñuimay pi palawan: ‘Amø’ chitra cha”. Inchen Jesús trenchipik køn: “Amø pøs cha”. Pedrope barcoyukutri pinaya, pi palawan Jesúswaimay ip mentapik køn. Incha tru mur isik ichipikwan tap asha, kørikmatape asentap mentaptinchen trencha trashipik køn: “¡Señor, wesratra chip!”. Inchen Jesúspe møi møi tasiku kemørape, trentaik køn: “¿Chintimpatre kaimamuitamap isuku cha?”.

Inchen barcoyu nepampup latatø, isikpe wasrøn kantø pasramisrøptinchipik køn. ¿Nøaship karua øriløpe maik mørørai intik kera? Nømpe trentaik køn: “Isa kømø, ñipe Tiuswai Nusrkain køn cha”.

Tru kualømtø kømuik køn øyeek marikpe. Kan kualøm Jesúspa nøaship karua øriløpa barcoyu ampup køpen, Jesúspe kiptinchen, møimpe nu pisuyupe isik ichipik purø trømpøik namap wepatrupen, pipe barcoyu trømpøik mekampup netsap mentøpen, Jesúswan kasrønana trenchipelø køn: “¡Kusrenanøpik, kuamik lataik køntraptik køn! ¡Purukutra! chip”. Inchen Jesúspe kutra, isik ichipikwanpa pi welar trømpøik latøkuship kutrapelanpa pasrampuntrai kantø wamapik køn. Inchen yantø ketriku wasrønchik køtrømisren Jesúspe nui kusrenanøp pera unilan trentaik køn: “¿Ñimui isupikwan nainuktø pasra tøkakuikwane chinchike cha?”. Inchen nømpe trupa kuarilø trenchipelø køn: “¡Isik ichipik lata, pi latøkuship kutrapik lata, nø pasrampunkarupen, nun møran cha!”. Nømpe kusreik køn tru Jesúswainuktø kørewa pøntrøpene chikucha kørik kømøntrap kui.