Jesúspe Gólgotasrø kuaik køn

Sacerdotesmerape Jesúswan aship karupik waiksrømay pera ampen, Pilatope trencha paik køn: “¿I møwane ñimbe chitø kalø maran chibrre inchigueh cha?”. Nømpe trencha løtik køn: “¡Kan rey kur tan!”. Inchen Pilatope Jesúswan paik køn: “¿Ñigan tru judíosmerai rey køtirru?”. Jesúspe trencha løtik køn: “Na ashib karub tøgagúig naimbe yu pirauig kømøn cha”.

Trukutri Pilatope Jesúswan Galileasrø aship karupik Herodeswaisrømay ørik køn, truikpe chi kalø marikwan nepua ashchaitamap. Inchentø Herodespe chi kalø marik kømui ashape, katøle Pilatoisrømay øren, nøpe misakwan trentaik køn: “Herodespa napa nepua aser, tru ik møkpe chikucha kalø marik kømui, inchawai intrai elatchen char cha”. Inchentø misakmerape trencha trashipelø køn: “¡Kuetsay!”. Inchawai suldaumerape ichakuchip, illimpi tuchip, kutrakucha kaltikwan corona mara, petsøsra, intsa aship trenchipelø køn: “¡Ka kualmatitru, judíosmerai rey!”. Pilatope katøle misakwan trentaik køn: “Ik møk chi kalø marik kømui nepua asha pasrar”. Inchentø nømpe trencha trasaik køn: “¡Tsiku mesray cha!”. Treekkutri, Pilatope kuetchai tranik køn.

Incha Jesúswan Gólgotasrømay srua ampa, tsiku mesrøpen, Jesúspe Jeupawan trentaik køn: “Møskai, nømun ulø paymø, pesannanrrig cha. Kaguende nømbe chi marermabguen isumøn— cha”. Misakmerape intsa aship trentaik køn: “¡Ñi cierton Tiuswai Nusrkain kuape, tsikukutri pinamø chip!”.

Kan nilik Jesúswaim pulu mesraik mekapik trentaik køn: “Ñi aship karup waiksrø kepiape nankucha isutruntrik cha”. Jesúspe trencha løtapik køn: “Latrø Tap Pirøchik køpen, trusrø ñipe napa pasrøntrap køn cha”. Yantø mawapen, pøn urakatik latrø løstik misrøpik køn. Inchen møiløkøsrøn nøaship karua ørilø aship køtrømisren, tru utu nui usri Maríakucha pasrøpen, Jesúspe Juanwan trentaik køn: “Nai usran ñui usrin kui lataik ashchuntrik cha”.

Srapepe Jesús trenchipik køn: “Yantø chi puraintrapik nemisran cha”. Utsøpasrøppa srape israpik køn. Inchen tru urastø pirø mur kønøpen, templosrømpe tru Santonpa, Santísimonpa purø tap liensuchik piriship mesraik mekapikpe, køtrap kølsrøpik køn. Inchen tru pulu suldau pasrapikpe trenchipik køn: “Ciertonwai ikpe Tiuswai Nusrkain kuin køn cha”.