Jesús katøle øsiraik køn

Yantø Jesús kuapen, kan pua møk José munchi taik Pilaton eshkaik køn, Jesúswai asrwan tsikukutri køtrørtrap cha. Incha Josépe tru Jesúswai asrwan kan chish llensutøka pula, may itrapcheløtøka usra, srø trap lalinuk waya, kan latrø nu srukwan metrana kepampinuk kasra pasrik køn. Sacerdotesmerape Pilaton trentaik køn: “Namun isutan nui kusrenanøp pera unilø Jesúswai asrwan nila, misakmerane katøle øsiran chintrap kuikwan”. Treekkutri, Pilatope trentaik køn: “Sørin wainuk ketrikuwan kasra pasra, suldaumera pera ampa sørin tulyu ashchai pønsray cha”.

Pøn kualøm puraipen, møilø ishumpurmera løtsøchiktø sørin tsuiksrømay ampa nepua asik køn, tru sørikpe kurim pasraik. Inchen umpu ángel wawa trentaik køn: “Kørik kui inchimøtay. Jesúspe katøle øsiran. Nui kusrenanøp pera unilan eshkantrikay Galileasrømay ampa, trusrø nun ashchun cha”.

María Magdalenape, Pedronpa Juanwanpa lantrap yape trentaik køn: “Mukøsrøn Jesúswai asrwan nilin køn cha”. Inchen Pedropa, Juanpa tru sørin tsuiksrønkatik luløp ampa, chikucha kaakuik ashape, yamay katøle ampik køn.

Katøle Maríape sørin tulsrømay yape, tru umpu pakatø ángelesmera putraik asha trentaik køn: “Nai Señorwan chu srua ampik ashmur cha”. Inchen katøkan møkwan ashape tru tulyu ellmarikwan ashipik kuitamap trencha paik køn: “Nai Señorwan, ñi sruayape chu tratrikwan eshkatra cha”. Inchen tru møkpe “¡María!” chipen nøpe Jesús kui kuenta peña trentaik køn: “¡Kusrenanøpik!”. Inchen nøpe karuik køn: “Nai nunelan nan ashar cha eshkantrik”. Tru urastø María luløp wepia, kusrenanøp pera unilan eshkaik køn.

Tru kualømtøwai pakatø kusrenanøp pera unilø Jerusalénkutri Emaúsmay ampup køpen, kan møk atrua, nømpa ip menta trencha paik køn: “¿Chipurap waminchip amke cha?”. Nømpe trentaik køn: “¿Ñikan wam mørmø køtitru? Pøn kualømken køn sacerdotesmera Jesúswan kuetsinkaruik, katø ishumpurmerakucha trenchip køn ‘Jesúspe øsik unan’ cha”. Inchen møkpe paik køn: “¿Tru wentøsrø chi puntrapikwan eshkapelan køremeelø køtitru? Nømpe trentaik køn: ‘Cristope kuawa katøle øsirantrap køn cha’”. Incha Moisés pørilan más tørtø eshkap yaik køn. Emaússrø puape, nømpa køtrømisrinkarua tru map putrapyu pitriwaimpurap Tiuswan miapen, truyu kuenta køtrik køn tru møkpe Jesús kui. Inchen Jesúspe waiktø kenamuptinchipik køn.

Inchen nui pakatø kusrenanøp pera uniløpe, katøle Jerusalénsrømay luløp ampa, tru nøm tuluntsuninuk puape, chi purayaikwan eshkap køpen, katøle Jesúspe kenamisrøptinchen, nømpe tru Jesús kui kørentrap kaimapelø kuik køn. Inchentø Jesúspe trentaik køn: “Nai tasikmeran kemøra asay. Pørim pasraik køn tru Cristope kuapelai utukutri katøle øsirantrap kui”.