Nøtrø kusrepelø eshkap køn lamøchiktø palai Pirø patsamik—¿Bibliape trupurap chi eshkapik kø?

24 de enero 2023waisrø nøtrø kusrepelø relojwana mas malsraik køn yem tøpøtakwayasik, ¿chi chintrentera truiktøka? Pøs lutautø pasraik Pirø patsamik.

• ‘Reloj Pirø patsøntrapikwan eshkapik’ ¿trenchippe mantera? Ucraniasrø purep pasraikkutri, bombas nuclearestøka mekampuntrap chip eshkaik pøntraikkutrinkucha, Pirøkucha minchip pasraikkutri lutautø pasraik eshkap pasran Pirø patsamik”. AFP International Text Wire eshkan.

• “24 de enero kualøm nøtrø kusrepelø eshkaik køn tru Reloj Pirø patsøntrapikwan eshkapik 90 segundos mas malik yem tøpøtak pumik. Manaken yan puluchik pøntrømuik misakmera Armagedón purayaik asamik”. ABC News eshkan.

• “Nøtrø kusrepelø møilø trenchip køn møya kutike pinisaik kømik lutautø pasraik”. The Guardian eshkan.

¿Cierton Pirø patsamik lutau pasra chintera? ¿Wentøsrø puraintrapikwan kørik kui intamik kø chintera? ¿Bibliape trupurap chi eshkapik kø?

¿Wentøsrø chi puraintrera?

Bibliayupe eshkapik køn Pirøpe manaken patsøntrapik kømøn cha incha sølkantø marøpeløpe truyu manakatik øsik warøntrapelø køncha (Eclesiastés 1:4; Salmo 37:29). Trekkutri misakmera Pirøwan pinishintrap kaimantrun.

Inchentø Bibliape eshkaik køn “Pirøbe, katø truyu chigurrimbunø chull indiiløbañau patsab” intrap kuik køncha (1 Juan 2:17, Tius Namun Waminchip, Wycliffe Inc.).

• Bibliayu chincha srape kualømwaimpurap eshkapik kuikwan mas nepua ashchappe ik pørin kilkayu kepintrø lentrik “¿Se acerca el fin del mundo? ¿Qué es el apocalipsis?”.

• Pirø ørøpa puraip pøntrailan mas nepua ashchappe ik pørin kilkayu kepintrø lentrik “¿Cuándo será el fin del mundo?”.

Tapeløtø puntrapik kuikwan isu

Chikøpen purep pøntraintøkucha Bibliape purukupik køn mentra isumø uñchap, ¿trepe mantø kera?

• Chitø maramikwan eshkapik køn Bibliape (2 Timoteo 3:16, 17). Ik pørin kilkayu kepintrø “Qué puedo hacer para no preocuparme tanto”. Truyu ashchun Biblia mantø eshkapik kuikwan tapelantø muniramikwan trukutri chi maramikwan metraptø ampamik chi puintøkucha.

• Bibliapesi tapeløtø trantrap kui eshkapik køn wentøsrøwayasik (Romanos 15:4). Møiwai lata wentøsrøwayasik lata chi muniramikwan tør marøpik køn. Truikpe namun purukuntrun tapelantø muniramikwan chi purayaintøkucha.

Biblian mas nepua ashchappe yantø Biblian kusrentrap pølpasrtrap inchi.