¿Pachipi mutsamik kalø kø chintera?
Biblia chi taikwan
Pachipiwan netø mutsikpe kalø kømøn. Bibliape trenchipik køn vinone Tius ketik køn cha, inchawai vinon muchape tap kasraktø kømikwan ketik køn (Salmo 104:14, 15; Eclesiastés 3:13; 9:7). Tiuswai Wampe trenchipik køn vino mutsikpe namui asru purukupik kui (1 Timoteo 5:23).
Jesús yu Pirau uña vino mutsik køpik køn (Mateo 26:29; Lucas 7:34). Inchawai kan kasharapyu vino patsøpen piwan vino marik køn (Juan 2:1-10).
Pachipiwan mentra mutsik chi kalø puntrapikwan
Bibliape vinoimpurap tap waminchentø inchen pachipiwan mentra trømpøik mutsikpe kalø køn. Inchippa kan Cristoi wentautø uñipik pachipi muchappe tap ashatø mutsamik køn (1 Timoteo 3:8; Tito 2:2, 3). Bibliape yampalø eshkapik køn chincha tap ashatø mutsamikwan:
Kan mur mutsikikpe tap isuntrap kaimantrun (Proverbios 23:29-35). Tius maik taikwan møra maramik tap chish kantø nui asrwan Tiuswan keta trantrap kaimantrun (Romanos 12:1).
Chu kuinken mørmíik mistrun incha tap maramikwan chishtø pesannantrun (Oseas 4:11; Efesios 5:18).
Chikucha kar incha purø kuantrøtelø køtrømisrtrun (Proverbios 23:21, 31, 32).
Tius latrø tsalø ashipik køn mutsiraikwan (Proverbios 23:20; Gálatas 5:19-21).
¿Maik kø mentra mutsikpe?
Kan misak mentra mutsik kenamarøppe kanelan kape nøasiktøwai kalø maran. Bibliape isumíik misram mutsikwantø eshkamíik køn. Tiuswai Wampe trenchipik køn kan misak chu pasrainken isumíik, tap pasrøntap kaimap, tuntiap, katøkanelan mur waminchip, tør waminchap kaimap inchipikpe, yantø mutsikikken pasran chipik køn (Job 12:25; Salmo 107:27; Proverbios 23:29, 30, 33). Inchippa møikkøpen mutsiramuinkucha inchentø mentra mutsikkutri kullaraik pasrap, chikøpen trømpøik pupsruintrun (Lucas 21:34, 35).
¿Lamøchiktøken mana muchimumik kø?
Bibliape eshkapik køn Cristoi wentautø amøñipeløpe mana muchimumikwan:
Katøkanelan peløsrkømøntrap (Romanos 14:21).
Ñi tsuinuk muchipashmeløyu (Romanos 13:1).
Ñi asiktøwai tap asha muchimíikpe, lamøchiktøken muchimumik køn (Mateo 5:29, 30).