6 Kalø ammøntrai tammay waminchip kusrenanan

¿CHI KERA?

Kalø ammøntrai tammay kusrenanøp wamintamik køn urekmera kailøyu kekøtrap pøntrøpen tamartrai wamintamik køn. Katøkanpurappe churastøkucha nømui mantrøyu sølwan tapelantø isua marøp pøntrøntrai purukumik køn, chiyutøkucha isua marøp mur pøntrøntrai nømun peløsrkømøntrai.

¿CHINCHAKUTRI NUIK KØ?

Møin kualømmerawane chupe møskaløkucha kørik kui latailø inchipelø køn urekwan, kalø ammøntrai nakchak umpu waminchip putramikwan kusrenanamik trupik pasrapik køn, trektøwai tap møskaløpe urekwan lutømera pønsra martrai intan incha kusrenanan mørøpelø køntrai.

“Urekmerape chiyutøkucha chukatik maramikwan nemarøp ikwan tørtø tøkakømik køn kakentø kølelø misra newan nørørantrun. Treek kømuinkatikpe namui urekmerape kan barco timónkeik lataik køn piu umpu ampumay imay ip pasraptø yanayupe piu umpu ulsrøpik køn” (Pamela).

¿CHI MARØPSRUKU?

Ka chape kantø tamik køn. Ñui nusrkai mørmupene nø mørmø mariløpe kalø puntrapik køn, ikwan nepua ashchai waminchi. Katøkanpurappe mørene tapchik wamincha unkua unkua taik.

“Møin kualømmerawane urekmerape tre mørmelø køn, inchawai nai urekmera mørene tap wamcheløtøka unkua chipik kur. Øyamay marikpe nømuintø chi murik kømøn nøm kalø mara tap wammera palain pøntrøwape øntø utøntrun” (Christine).

BIBLIA CHI TAIKWAN: “Kan møg nø maig ellmara kørrømariibe katøburø trunundøwei tulishinrrun” (Gálatas 6:7).

Murtø inchimøta. Kalø ammøntrai tammay waminchip kusrenanamik køn unø nurap yainkuintø edadwan asha, chi kalø kuikwan ashipik, nø chukatik kalø marikwan asha wamintamik køn. Katøkanpurappe kalø maren tru maywan immøntrai wamintamik purø nuik køn. Kan ejemplo pasrtrap, ñui nusrkai celularwan chu urastø srua wamikwan mørmupene, celularkeik uñchai køtraik køn søl køntrapik køn yanayu katøle trantraptø. Katøkanpørappe lamøtikwan latrø nuikkucha marmøta.

“Nape chu urastøkucha kuenta peñcha marøpik kur nai nusrkai kalø kui ashentø marøk køp mara kape chi isumø mara. Marøk køp marene murtø wamintamik køn treek marmøntrai, trektøwain kømøn nø pella marene nøtøwai kalø marilan nepua ashchai purukumik” (Wendell).

BIBLIA CHI TAIKWAN: “Møskaløbe, ñimui uregwane purø trømbøig inchib namig kui inchai marmøtay, chine isub kullaarai inchimønrrai” (Colosenses 3:21).

Untaktøka puruku. Ñimui urekmeran kalø maren kalø ammøntrai untaktøka waminchip purukumik køn, nømkucha ikwan nepua asha cierton kalø marermap isua tamartrap pøntrøntrun incha øyeek maramikpe kaløku kusrentrun.

“Namui nusrkai kaløtø ip mentøpen, møyankatik mas tapelø marilan sølkantø pasraikwan latrø kasrak putrai cha waminter. Nampe nune wamintik køn nø kalø marilan tamartrap isupene manakatikwai pesannailø køtrømisrtrun cha, trektøwai nampe nune lelachimø purukuntraptøwai pøntrer” (Daniel).

BIBLIA CHI TAIKWAN: “Undag købiibe chi puindøgucha tammay ka megabig kømig, larrø tab inchibig kømig, treeg køn” (1 Corintios 13:4).