Docelø trupatø ashipelø

Israelitasmerape Sinaí tunyukutri yantø ampa, Parán desiertopurapsrø puraampup ampa Cadéssrø pupen truyu Jeupa Moiséswan trentaik køn: “Doce møkelø asha wesru tru doce tribusyukutri kan kan, Canaánsrø ñimun tranam pirøwan trupatø maik kuikwan ashchap amtrai, incha tru pirøpe ellkuamtik køtashchappa trektøwai misakmera murelø kui kape kullaakelø kui køtashchappa, incha tru misakmera ciudayu kui kape carpas lasrua warapelø køtashchappa”. Docelai ututø Josuépa Calebpa tøka ampik køn Canaán pirausrømay.

Tru trupatø ashchap ampupeløpe 40 kualømmera puraipen katøle amtrua granadas køpen, uvas køpen, higosmera srua pua trenchipelø køn: “Canaánpe latrø tap pirøchik køn, inchentø trusrø warap misakmerape latrø murelø køn nømui ciudamerape latrø pala sruk pantrikmera tøkar køncha”. Inchen Calebpe trenchipik køn: “Nømune kanamtik køn yantø amkun cha”. ¿Caleb chintimpa øyeek trentaik kø? Kakentø Calebpa Josuépape Jeupa purukuntrap kui kørewa pøntrapelø kuik køn, inchen katøkan diezeløpe trentaik køn: “Trusrømay ammukun truyu misakmerape latrø nøtrelø køn, nam nømuim pulu pøntramiksruantøpe ka chapull latailø køntrun cha”.

Israelitasmera kullaaraik møra namappe trentaik køn: “Katøkan metrap pera intrapik wesrakun, Egiptosrømay katøle amtrap. Kakentø Canaánsrømay ampene ka kuetchaintø køntrun cha”. Inchen Josuépa Calebpa trenchipelø køn: “Jeupa maik karuikwan møra markun cha” trenchipen israelitasmerape mørmø alekiainuktø Calebwanpa Josuéwanpa kuetchap intik køn.

Treekkutri, Jeupa Moiséswan trentaik køn: “Israelitasmeraimpurap na latrø yam piejes chikøpentø tapik maren nømpe katøkucha mørmelø køn, treekkutri nømun 40 pilamerasrønkatik yu desiertoyu kuamnekatik køtrømaramøntrun. Yantø katøpurø nømui urekmerapa Josuépa Calebpa tru na pirø trantrap misriksrø truiløpe sí kepamtrun”.