Jeupa Josuéwan wesruik køn

Moiséspe israelitasmeran latrø yam pilamera metrap pera ip pasraikkutri yantø nui øsik unikpe patsap atrik køn, inchen Jeupape trentaik køn: “Pirø Trantrap Misriksrø israelitasmeran perep imuintøkucha pirøwane ashchap køn cha”. Moiséspe tru israelitasmeran metrap pera ip pasrøntrapik lawa wesruntrai miaik køn, inchen Jeupape trentaik køn: “Josuéwan lawa wesruik køn cha”.

Moiséspe israelitasmeran tørtø eshkaik køn, yana kømuatø nøpe kuantrap kui inchentø Pirø Trantrap Misriksrømay sruaintrapikpe Jeupape Josuéwan lawa wesruik køncha, Moiséspe Josuéwan trentaik køn: “Kørik kui inchimøta Jeupape ñun purukuntrun cha”. Trukutri Moiséspe Nebo tunsrø nepipen Jeupape kenamarik køn tru Abrahán, Isaac, Jacobwan Pirø Trantrap Misrikwan. Moiséspe 120 pilamera tøkaik misra kuaik køn.

Jeupape Josuéwan trentaik køn: “Tru Jordán pi taiksrø puraya Canaánsrø kepintrø cha. Moiséswan purukup lataitøwai ñunkucha purukutrumøn incha na maik martrai karuilan kualømmørik lentrik, kørik kui inchimø, mur pasrøntrik, na maik karuilan kutike møra marøp”.

Josuépe par trupatø ashipelan Jericósrømay ørik køn, inchawai katøkan kusremiku más nepua ashchun truyu chi purayaikwan. Pakatø trupatø ashipelø Jericósrø katøle puape trentaik køn: “Canaánsrø yantø kepampamtik køn cha”. Katø kualømpe, Josuépe israelitasmeran karuik køn tru campamenton kusruntrai, srøtøpe sacerdotesmeran ørik køn tru cofren sruampupelan. Inchen pi nuraik wapen tru sacerdotesmeran nømui srøpmeratøka piu kepunøpentø pipe kølik køn. Inchen sacerdotesmerape truwan puraampa tøpøtaksrø puape muniraik køn, tru maya israelitasmera katøkantarøsrø puraampamne, ik marampurap marikwan ashape, Pikø maryu Jeupa chi marikwan isuik kuintrun.

Latrø yam pilamera puraipen israelitasmerape Pirø Trantrap Misriksrø yantø kepampik køn, møimpe sí yamera marøp, uvasmera wap, chikøpentø ellkuailø tøkakøntrap kuik køn, ø pirøpe sí latrø tapik kuik køn kakentø pitsø køpen, miel køpen tøkakuikkutri.