Rutpa Noemípa

Israelsrø parø atrupen, kan ishuk israelita Noemí taik, nui kekpa nui pakatø nurskaløpa Moab pirøsrø warøntrap ampik køn. Inchen nui kek kuapen nui pakatø nurskaløpe moabitasmerapa kasharaik køn, Rutpa Orpápa munchi tailø. Inchentø latrø isumtik puik køn kakentø yanayupe nui pakatø nurskaløkucha kuaikkutri.

Yantø Israelsrø parø chikaakui Noemí wam mørape katøle trusrømay intrap pasramisrik køn. Inchen Rutpa Orpápa nøpa ampup køpen Noemípe trentaik køn: “Ñimpe latrø tap sralø køp, latrø tap yernasmera kuikkutri katøle Moabsrømay ampa kasharay cha”, inchen nømpe trencha løtik køn: “Nampe ñun latrø nu untaktøka pøntraikkutri, ñuntø køtrømarø kømøtan cha”. Noemípe chu urastøkucha ampay chipen, srapepe Orpápe yaik køn. Inchen Rutpe køtrømisren Noemípe trentaik køn: “Orpápe nui yamaypa nui tiusmeraisrømay katøle llirawa yan ñikucha intrø cha”, inchentø Rutpe trentaik køn: “Ñune elachimømuntrun kakentø ñui yaweløpe nai yawelø køntrun inchen ñui Tiuspe nai Tius køntrun cha”. ¿Trenchipen Noemípe maik mørørai intik kera?

Israelsrø cebada tulisamik pølpasrin køpen, Rutpa Noemípa trusrø puik køn. Kan kualøm Rutpe Rahabwai nurskai Boaz taikwai tulsrø cebada tulishintrap ipen, Boazpe nepua asik køn tru Rutpe kan moabita kui incha Noemíwan elachimø nøpa køtrømisrik kui, treekkutri nui kuallipelan trentaik køn: “Katøkuchi cebada waraik cha Rut atrua tulishintrai”.

Tru yem Noemípe Rutwan paík køn: “¿Møimpe chu kuallip uñku cha?”. Inchen nøpe trentaik køn: “Boazwai tulsrøn cha”. Nohemí trentaik køn: “Boazpe nui kekwai kan yawik køn, truyu ka kuallip intrø, katøkan ishumpurmerapa tap uñchun cha”.

Cebada tulisamik patsamnekatik Rutpe kuallip unik køn, inchen Boazpe kuenta penik køn, tru Rutpe latrø kuallip kui. Tru urassrømpe kan møk chi urekkeik kuapene, kan yawikpe tru piudapa kasharamik kuik køn. Treekkutri Boazpe Rutpa kasharawa kan unø tøkamisrik køn Obed munchi taik. Yanasrømpe Obedpe rey Davidwai awelu misrik køn. Nohemíwai tap linchipeløpe latrø kasrak trentaik køn: “Jeupape ñun untarapik Rutwan trana, møimpe kan awelu-unø tranan, treekkutri Jeupawan latrø nu unkua unkua chikun cha”.