Israelsrø srøtø rey køntrapik

Jeupape israelitasmeran metrap tap pera amtrapelø møkelø traninkucha, nømpe Samuelwan kan rey tøkakøntrap miawa trentaik køn: “Katøkan pirausrø lataitøwai kan rey tøkakømik palan cha”. Samuelwane treekpe tap kømui møra, Jeupawan miapen nune trentaik køn: “Chi isumøta, ñun wentøpasrmø nan wentøpasrøp pøntran cha, nømun trenchintrik tru nøm rey tøkakuikpe chikøpen miantrun cha”. Inchen nømpe trencha løtapelø køn: “¡Chi kømøntrun treekwan ka martrap cha!”.

Treekkutri, Jeupa Samuelwan trentaik køn: “Srøtø rey køntrapik kan møk Saúl munchi køn cha”. Inchen Saúlpe Samuelwan ashchap ipen, nøpe nui turyu aceite itølusik køn tru yantø rey køncha nepua ashchai.

Treekkutri, Samuel maya israelitasmeran tuluntsunin karuik køn, tru srø rey køntrapikwan nepua ashchai. Inchen nømun kenamartrap wamøpen, Saúlwan kal-lawa nun lantrap ampupelø køn, kakentø nøpe chikøpen tumpasrik utu trupin køpen. Yantø nun wetøtrawape maya misakwai metrap pasren, nøpe katøkanelø lataik kømø, nuik køp, más tap møk kuik køn. Samuelpe nømun trenchipik køn: “Asay Jeupa mun lawa wesruik kui ñimui rey køntrai”. Inchen misakmerape trencha trashipelø køn: “¡Ik reype latrø yana øsik uñchain cha!”.

Srøtøpe Saúl Samuelwan kementa, Jeupa chi taikwan møra marøpik kua, yanayupe nui isupikwan yunømarik køn. Kan kualøm Jeupawan keta tranamik pupen, Samuel nun munirantrai taik køn treekwan martrap. Inchen Saúl nui tasiku øyeek maramikwan pasrømupentø muniramøtø treekwan nøtø marik køn. Inchakutri Samuel nun trentaik køn: “Jeupa karuikwan treek maramik kuik køn cha, inchen ñipe treekwan marmøn”. ¿Saúlpe Jeupawan møra maramik kuik kusreik kø chintera?

Saúlpe møra marmíik misrik køn, kakentø tru amalequitasmerapa kuayantrap yainuk Samuel mayelan patsøkamik køn tainkucha, nøpe rey Agagwan øsikik køtrømarik køn. Inchakutri Jeupa Samuelwan trentaik køn: “Saúlpe nan wentøpasra yantø mørmøtan cha”. Samuelpe isuintik pasrainkucha Saúlwan trentaik køn: “Ñi mørmuikkutri Jeupa katøkan rey wesruntrap køn cha”. Samuel yantø llirawa intrainchen, Saúlpe Samuel kewa kuinuk mekamisra kølsrøpen, Samuel trentraik køn: “Na kewa kuikwan øyeek kølsrøp lataitøwai, ñi rey kømikwan Jeupa ñun ketrantrun cha”. Trenchippe, Jeupa katøkan nun møra marøpikwantø rey kømikwan trantrun taik køn.