Jesúspe Saulon lawa wesruik køn

Saulope, Romasrik kuintøkucha, Tarsosrø kal-lawai kuik køn incha kan fariseo kua, judíosmerai maik martrai karuilan tør nepua ashipik kuik køn. Cristoi wentautø ampupelane latrø tsalik kua, nømui yaukutri møkelø køntrun, ishumpurmera køntrun pishirai yausrømay, srua ipik kuik køn. Incha Jesús nui kusrenanøp pera unik Esteban taikwan, sruktøka sølkucha kuetchip køpen aship pasraik kuik køn.

Inchentø Saulope Jerusalénsrøntø kømøtø, sacerdotemeran metrap karup pasrapikwan eshkaik køn, Damascosrønkucha Cristoi wentautø ampupelan pasrartrap intrap cha. Treekkutri, yantø ciudasrø pup ipen, srømpalakutri kan tørkekualmapik atrua, nui pøtøkatan piløpen, Saulope pirau peña tsua, kan wam trentaik mørøpik køn: “¿Saulo, Saulo chindimbarre nane kaig marøb lliragu cha?”. Saulope trentaik køn: “¿Señor, ñipe mu guku?”. Nøpe trentaik køn: “Jesús […], truig kur cha. Kurrab, Damasco ciudayu kebinrrø chibig køn. Truyube ñi chi maramigwan ñune eshkanrrun— cha”. Inchen Saulope piraukutri kutrape, chikucha ashchap kaimapen, kualyu kemøra, Damascosrømay srua ampik køn.

Damascosrø kan Cristoi wentautø uñipik Ananías taikwan, Jesús kan asønaiku kenamisra trentaik køn: “Kurra, ‘ølkantø’ cha wamin callewan pureb intrø”. Judáswai yau puape Saulon lantrik cha, inchen Ananíaspe trentaik køn: “I møweimburappe, mugøben wamindi wammøra kur cha, ñui misaameran Jerusalénsrø chitø, chitø kaig marøb uniilan”. Jesúspe trenchipik køn: “Nuisrømay intrø, kakentø na lawa wesruik køn, chutøkucha tap srø wamwan waminchip intrai”.

Ananíaspe, Saulowaisrømay ya trentaik køn: “Nai nunek Saulo, Jesúspe ñi katøle ashipik køntrai nan ørtan cha”. Tru urastø Saulo ashipik misra Jesúswaimpurap kusrep, nui wentautø uñipik misra, piu umpu ulsra, judíosmera tuluntsunik yausrø nui linchipeløpa, Tiuswaimpurap kusrenanøp yaik køn. Ñiken isu, judíosmerape kuara asik kuintrun, Saulo Jesúswaimpurap misakmeran kusrenanøp uñen. Inchawai nømpe paya mørøpelø kuik køn: “¿Ik møk kømmørkøppe, Jesúswai kusrenanøp pera unilan pinishintrap inchipik?”.

Saulope Damascosrø pøn pila Jesúswaimpurap misakmeran kusrenanøp uñen, judíosmerape latrø trømpøik tsalø incha kuetchap isuik køn. Inchen nui linchipeløpe wammøra, truyukutri wepia intrai, ciuda pøtøkatan sruk pantriku trap pasrapyu kan canastayu waya køtrøørøpelø køn.

Saulo Jerusalénsrø Jesús kusrenanøp pera unilan ashchap ipen, nømpe kørik kui intik køn. Inchentø Jesús kan kusrenanøp pera unik, Bernabé taik, Saulon tru Cristo nøaship karua ørilaimay pera ya cierton yunømarik kui eshkapen, Saulope Jerusalén kungrekasiunyu tuluntsuna nømpa kørmøtø Tiuswai tap wamwan eshkap yaik køn. Yanayupe misakmerape Pablo cha wamik køn.