Esdraspe israelitasmeran Tius maik karuilan kusrenanik køn

Israelitasmera katøle Jerusalénsrømay ampik 70 pilamera purayainuk, møiløpe Persa pirausrø warapelø kuik køn. Tru utu kan israelita Esdras munchi taik, kan sacerdote Jeupa maik karuilan kusrenanøpik wam mørik køn, tru Jerusalénsrø misakmerape Jeupa maik karuilan møra marøk kømui, inchawai trusrømay purukuntrap intrap isupen, Persiasrik rey Artajerjespe trentaik køn: “Tiuspe nø maik karuilan ñi kusrenantrai maran, inchawai møilø ñipa amtrap isupelan pera intrø cha”. Esdraspe katøle Jerusalénsrømay amtrapeløpa tuluntsuna Jeupawan miaik køn, tru mayu tap ampamik køntrai.

Pip pølmerasrø Jerusalénsrø pupen, príncipesmerape Esdraswan trentaik køn: “Israelitasmerape Jeupawan møra marmøtø, ishumpurmera taska marik tiusmeran adorapeløpa kasharan cha”. ¿Esdraspe chi marik kø? Maya misakwai metrap tømpasra Jeupawan trentaik køn: “Ñipe namuimpurø latrø tapelø maren, namkutrimpe latrø trømpøik kalø marer cha”. Misakmerape isua mørøp lataik inchentø katøkucha kalø marøp ampik køn. Esdraspe metrap pera pøntrapelan, tap pera aship amtrapelan trupurap tør ashchai wesruikkutri, pøn pølyu Jeupawan adorantrap inchimelan wepusrik køn.

Doce pilamera puraipen, Jerusalénsrø pøtøpørap nøtrø sruk pantrikmeran katøle chap marin pasramisren, Esdraspe maya misakwan plazayu tuluntsunin karuik køn, Tius martrai karuik pørikwan lentrap, inchen mayeløpa pøntramisrik køn. Esdraspe Jeupawan trupa tapik waminchen israelitasmerape maik taikwan treek martrap isua tasik kusruik køn. Esdraspe Tius maik karuilan lewa tørtø eshkapen, misakmerape trunun møra tør nepua asik køn, tru Jeupawainukkutri katøle tarømisrik kui incha kiship mentik køn. Katø kualøm Esdraspe katøkucha Tius maik karuilan lepen, israelitasmerape kuenta køtrik køn pestø tru Cabañasmeran Marøp Jeupawan Kasraktø Unkua Chip maramik kui. Treekkutri, tru urastø tamarøp mentik køn.

Siete kualøm ørøpa latrø kasrak pøntrøwa Jeupawan mamik srøtrimpurø unkua taik køn, kakentø Josué kuainukkutri Cabañasmeran Marøp Jeupawan Kasraktø Unkua Chip marmuikkutri. Chap patsøpen, mayeløpa tuluntsuna Jeupawan trentaik køn: “Ñipe namun latrø mur kuallipyukutri wesrup, mamikmera tranøp, ik tap pirøchikwan tranen nampe yam piejes møra marmuikkutri, ñipe latrø yam Jeupawaiwan eshkapelø waminchai øren nam møra marmuinkucha, ñipe tsøntatø tammay munirawa, Abrahánwan chi martrap misrikwan manaken pesannamuik køn. Treekkutri, møimpe nam ñi maik karuikwan martrap pøntrer cha”. Maya misak martrap misrikwan pøren príncipesmera, levitasmera, sacerdotesmerapape kan sellutøka firmawa tratrik køn.