Tius Nø Aship Karup Waikwaimpurap Jesús kusrenanøp pasran

Jesús piu umpu ulsrainukkutri, yanayutø misakmeran kusrenanøp pølpasrik køn: “Srømbalasrø Tius nø ashib karub waibe lutau pasran— cha”. Nui kusrenanøp pera uniløpe Galileasrø, Judeasrø nøpa amøñipelø kuik køn. Jesúspe nui pirau Nazaretsrø pua, judíosmera tuluntsunik yau kepia, Isaías pørikwan mur lep pasramisrik køn: “Jeupawai espíritu santope naim pala pasran Tiuswai tap srø wammeran kusrenantrai”. ¿Mancha trentaik kera? Kaken misakmera Jesús marampurap marilan ashik kuintø kuik køn. Inchentø Tiuswai espíritu santon utappe, truwaintø kømø, masken Tiuswai tap srø wammeran kusrenantrap isua utik køn. Srape mørøp putrapelan trentaik køn: “I Tiuswei wam pøriibe, ñimui merrab møi yandø treeg nebun— cha”.

Jesús Galilea nu pisu mentawan ip pasrøwa, nui kusrenanøp pera unilan Pedron, Andréswan, Santiagon, Juanwan asha trenchipik køn: “Nai mendig amrruy cha. Nabe ñimune misaameran peskabelø kønrrai maramønrrun— cha”. Inchen tru urastø nømpe nømui atarrayasmeran warøp, nøpa ampupelø køn. Trukutri Galilea ørøpa, Jeupawai Aship Karup Waikwan kusrenanøp kuik køn, tru judíos tuluntsunik yamerasrø, penap, yanøp kuiksrø, misakmera puraampup kuinukkucha. Misakmerape Jesús chu ipen, nui wentautø ampupelø kuik køn. Jesús tap srø wammeran kusrenanikpe chukøpen lasrpitsik køn, Siria latrø yapsrønken.

Yanayu, Jesús møilan nui kusrenanøp pera unilan poderwan tranik køn, kuantrelan tamarøp, kuaimantsik tøkarmeran wepetøntrai. Inchen katøkaneløpe ciudamørik, pueblomørik kusrenanøp Jesúswan lincha ampupelø kuik køn. Tru utupe nømun purukupelø ishumpurkucha amønaik køn, María Magdalena, Juana, Susana, katøkaneløkucha.

Trukutri Jesúspe nui kusrenanøp pera unilan tap tamara, Jeupawaiwan waminchip amtrai ørik køn. Inchen Galileasrø ampen, latrø nu misakmera Jesúswai wentautø ampupelø misra, piu umpu ulsraik køn. Yam misakmera nui wentautø ampup kui pøntrøpen, Jesúspe kan ellmarikwan yantø tulisamik lataik pasraik kui kenamarik køn. Inchawai, Jeupawan miaik taik køn, nui ellmarikwan tulishintrapelø ørtrai. Yanayu, Jesúspe 70 nui wentautø ampupelø lawa wesrua parpatø ørik køn, Judeasrø kusrenantrap amtrai. Inchen mayelampa Tius Nø Aship Karup Waikwan chap kusrenana, katøle amtruape, nømun chi purayaikwan Jesúswan eshkantrap latrø kasrak pøntraik køn. Inchawai kuaimantsikpe Jeupawaimpurap kusrenanikwan søtøkatøntrap kaimantrap kuik køn.

Jesús katøle srømpalasrømay imuatø, ikwan tap tamarik køn, nui kusrenanøp pera unilø marøp amtrai. Inchawai trentaik køn: “Pirø mupa kuimpurap Tius Nø Aship Karup Waikwan, Tiuswai Wamwan maya misakmeran kusrenana piu umpu ulsrøntrikay cha”.