Kalø maren isua mørtrai waminchen chi martrap

CHI PUREP PASRAIK

“Mukøpen kalu ketappe kalø marikkutri trenchipelø køn, munkucha kustamíik køn kalø marikwan kalø køn chintrai” (Amanda, 17 añosi).a

¿Ñune mur køntrauta ñui møskalø, kusrennøpelø kape køllik misakmera kui ñun mur wamøpen chikøpen kalø mariløyu? Treek mørørapene, ik pørin kilka ñun nu purukuntrun.

CHI NEPUA ASAMIK KØ

Mutøkucha søl martrai wamintamik palailø ker.

“Nambe mayeeløba chiyugøben kalø marøb pellibelø ker” (Santiago 3:2).

“Nam kalø maren kalu ketøpene kørimatømøta” (Jessica).

Ñun kalø marikwan waminchene chiwantøkucha kalø maran cha kømø wamintan.

Jeupab trenchipik køn: “Mayeelan na undaarailane øyeeg marmøta chib nabe namab, katø ichaguchib inchibig kur, søl martrai” (Apocalipsis 3:19).

“Mukøpen nan kalu ketøpene ikpurap isuntrap inchipik kur. Napa wamintamik murik kuitamap isumik køn, kakentø untak køp namun wamintintrun” (Tamara).

Ñun søl uñchai wamintikpe ñiasiktøwai más tammisramik purukuntrun.

“Søl martrai waminchen møray ñimasiktøwai latrø kusrepelø køntrappe” (Proverbios 8:33).

“Sølkantø kølirantrappe, kanelø sølkantø martrai purukumik palapik køn. Sølkantø martrai wamintikpe katøkanelø nan maik ashipelø kui, naasiktøwai kalømeran tør nepua asamtik køn” (Diana).

CHI MARTRAP

Tsøntatø tap isu. ¿Chi marøpsruku kalømeran søl martrai waminchen ñun namik køp mentøpen? Tsøntatø isu, incha namik køpikwan kanatramamøta. Ñiken isu, ñi marikwan lataitøwai katøkan nun søl martrai waminchip pasrøwa lataik, inchippape ñui wentø nuchakwan, ¿møimpe sí ñiasiktøwai tør nepua ashtitru chincha kalu lasruik? Møimpe ñiken isu, søl uñchai waminchip pasrapik maik isup pasraik (Biblia manchipik kui: Santiago 1:19).

“Ñun kalu ketøpen kanmaype namik kui pasraik køppe, purukup pasraikwan nepua ashmøntrun. Inchentø, tap isupene purukuntrap marøpelø køn” (Teresa).

Køtrømay ku. Pellipik kuikkutrintø nuik kurmap isua tap wammera ketikwan wentøpasrmøta. Treekkutri, mentra isui inchimøta køtrøtik kuinkatipe ikpe puraimøntrun. Ñiken isu, ñun wam ketik más pusrkuankarupikpe truik más purukuntrapik kuintrun. Ñi mørmø kaashape ñiasiktøwai ñi más tap isup køliramikwan kaaship pasrøntrun (Biblia manchipik kui: Proverbios 16:18).

“Kalu keta wam tranikpe nu purukuntrapik køn, utømuape yanayupe kalø puntrun” (Lena).

Chu urastøkucha unkua chi. Kørøsrailan utamik ñun pusrkuaintøkucha, kørøsrøpikwan unkua tamik tapik køntrun, ñun wam ketøpikpe ñitøwai kasrak uñchai isupik køn (Biblia manchipik kui: Gálatas 6:1).

“Wam ketikwan unkua chipene ñuimpurap kalø isumøntrun. Inchippape, treek wamwan ñi palaik pasraik kuintrun treek kømuintøkucha unkua chi, kakentø ñipa wamintamik fácil kømuik kuintrun” (Carla).