Zaɣesɛ Lika Poan Tuuma Ge Kelum Bɔna Nɛɛsum La Poan

1-2. (a) Bɔnkani poan ti Paul yuun gulesɛ gɔŋɔ bo Epesudoma la? (b) To wan sɔsɛ la soke ani?

BAN yuun paɣɛ tuuntuna Paul Rome tiŋa la, a yuun kelum bɔta ti a kpemese a mabiisi la giila mɛ. A yuun ka ta’an keŋɛ ta bisɛ ba, bala n sɔi ti a yuun gulesɛ gɔnɔ la. A yuun gulesɛ gɔntuna wa ayima ta bo Epesudoma la yuun 60 bii 61 Y.B bɔba.—Ep. 1:1; 4:1.

² La paɛ wuu yuun pia ti Paul yuun naɛ la Epesudoma la mɔɔla ge pa’ala yelesoma la. (Tm. 19:1, 8-10; 20:20, 21) A yuun nɔŋɛ mabiisi la mɛ ge me bɔta ti a soŋɛ ba ti ba kelum tara sakerɛ pu’usa Yehowa. Ge bem zuo ti a yuun gulesɛ gɔŋɔ bo loore Kristakɔma la tɔɣera lika la nɛɛsum yɛla? Ge to wan ta’an zamesɛ la bem a ka’aŋɔ wa poan? Basɛ ya ti to bisɛ ya soke ana wa lebesego.

ZE’ELE LIKA POAN TA BƆNA NƐƐSUM POAN

3. Paul yuun dekɛ la maɣesa ani gulesɛ gɔŋɔ bo Epesudoma la?

³ Paul yuun gulesɛ bo Kristakɔma n boi Epesu la ti: ‘Ya daa nan boi la lika poan ge nyaa ta bɔna nɛɛsum poan.’ (Ep. 5:8) Kalam wa, Paul yuun dekɛ lika la nɛɛsum tɔɣɛ pa’alɛ Epesudoma la n yuun tee se’em. Basɛ ya ti to geele ya sɛla n sɔi ti Paul yuun yeti Epesudoma la daa ‘nan boi la lika poan.’

4. Bem n pa’alɛ ti Epesudoma la yuun boi la pumpɔreŋɔ pu’usegɔ poan?

⁴ Pumpɔreŋɔ pu’usegɔ. Epesudoma la ti Paul yuun gulesɛ gɔŋɔ bo ba la yuun boi la pumpɔreŋɔ pu’usegɔ poan, tuna kolekpatuuma ge nyaa ta baŋɛ yelemɛŋɛrɛ la. Epesu tiŋa ti Greek baɣekãtɛ Artemis deo yuun bɔna. Deo wa pa’asɛ la deokãra ayopɔi ti asaala mɛ ti la yuun ka tara makerɛ sankaŋa la. Nɛreba yuun keni deo la poan kaabera la baɣa. Sɛba n mi lɔɣɔrɔ maalegɔ yuun ni tara la Artemis baɣerɛ wa tɔɣesa maala baɣapiɣesi nyɛta ligeri. (Tm. 19:23-27) Leyɛ’ɛsa, tiim tuuma n yuun zo’e tiŋa la poan.—Tm. 19:19.

5. Bem n pa’alɛ ti Epesudoma la yuun tuni la yalumtuuma?

⁵ Yalumtuuma. Epesu tiŋa yuun kɔ’ɔn pirɛ la yalumtuuma ti vi ka tara ba. Nɛreba la yuun kɔ’ɔn tɔɣera la yetɔɣegaasa ba de’eŋo la ba pu’usegɔ zɛ’ɛsi. (Ep. 5:3) ‘Valum yuun ka tari nɛreba la fii me,’ bala pa’alɛ ti ‘ba zuo yuun ku’ɛ mɛ sɛla woo poan.’ (Ep. 4:17-19) Ge ti Epesudoma la zamesɛ baŋɛ Yehowa n geele som la be’em yele se’em la, ba putɛkeeŋa la yuun ka daani ba la ban iti sɛla la. La me yuun ka daani ba la ba itigɔ la n ani Yehowa se’em. Bala n sɔi ti Paul yuun yeti ‘ba puti’ira boi la lika poan ti ba me ka tara Naayinɛ vom’ la.

6. Beni n sɔi ti Paul yuun yele Epesudoma la ti ba ‘nyaa boi la nɛɛsum poan’?

⁶ Epesudoma la basɛba yuun ka yee lika la poan. Paul yuun gulesɛ yeti ba ‘nyaa boi la nɛɛsum la poan naɛ la Daana la bɔna.’ (Ep. 5:8) Ba yuun nyaa vɔi ba vom ti la makɛ la Baabule la ti la nyaa dɛna nɛɛsum bɔ’ɔra ba. (Ym. 119:105) Epesudoma la yuun dekɛ pumpɔreŋɔ pu’usegɔ la yalumtuuma basɛ mɛ. Ba yuun ‘tɔɣeseri la Naayinɛ’ ge tiregɛ pu’usa Yehowa ti a puurɛ pɛɛra.—Ep. 5:1.

7. Sodeni poan ti to bɔŋa la wɔ̃na la Epesudoma la?

⁷ Bala mea nɔɔ ti tomam me yuun bɔna pumpɔreŋɔ pu’usegɔ la yalumtuuma poan ge nyaa baŋɛ yelemɛŋɛrɛ la. Tosɛba yuun de’eni la pumpɔreŋɔ pu’usegɔdoma de’eŋo, ti sɛba me tuna yalumtuuma. Ge ton yuun zamesɛ baŋɛ Yehowa n pa’alɛ som la be’em yele se’em la, to yuun tee mɛ. To nyaa vɔi to vom ti la makɛ la a tontɔɔ pa’alegɔ la. Bala n sɔi ti to nyɛta nyuurɔ zo’e zo’e la. (Isa. 48:17) Ge nananawa, yeledaaŋɔ ase’a n paari tɔ. La nari ti to kɔ’ɔn buri poore basɛ lika tuuma la ge dɛna ‘nɛɛsum la kɔma.’ To wan eŋɛ la wani ta’an eŋɛ bala?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

BASƐ LIKA TUUMA LA

8. Wuu Epesus 5:​3-5 n pa’alɛ se’em la, Epesudoma la yuun nari ti ba basɛ la bem?

⁸ Kaalɛ Epesus 5:3-5. Epesudoma la yuun dela ba kɔ’ɔn zaɣesa yelese’a n wan sa’am Yehowa suure, lan wan eŋɛ se’em ti ba ta’an basɛ yalumtuuma. La daɣɛ yalumtuuma ma’a ge la nari ti ba me basɛ yetɔɣegaasa. Paul yuun tiɛ Epesudoma la ti la nari ti ba basɛ yele ana wa, lan wan eŋɛ se’em ti ba ta’an ‘kɛ̃ Naayinɛ la Krista Na’am la poan.’

9. Beni n sɔi ti la nara ti to zaɣesɛ yelese’a n wan basɛ ti to tum yalumtuuma?

⁹ Tomam me nari ti to ze’a kankaŋi ge da basɛ ti yelese’a n ‘ka tari vuurɛ n de lika poan yɛla gɛ̃rɛ tɔ.’ (Ep. 5:11) La niɛ peelumi ti nɛra san bisera, kɛlesa ge tɔɣera yetɔɣepɔ̃’ɔsa la yalum yɛla, bala ta’an basɛ ti a tum be’em. (Pin. 3:6; Yam. 1:14, 15) Tiŋa ayima poan, mabiisi basɛba daa nyɔɣɛ la taaba “zɔtɔ” social media poan. Pɔsega la, ba zo’e zo’e yuun sɔseri la Baabule yɛla ge pooren ba daa sɔseri la yelese’a n ka peeri Yehowa puurɛ. Ba sɔsega la yuun nyaa ta kɛ̃ la yalumtuuma poan. Pooren, mabiisi wa zo’e zo’e yuun yeti yetɔɣeyooro wa yuun basɛ ti ba tum la yalumtuuma.

10. Sitaana tiregeri la wani ti a pã’asɛ tɔ? (Epesus 5:6)

¹⁰ Sitaana tingɔŋɔ la boti a pã’asɛ to mɛ ti to sakɛ ti Yehowa n pa’alɛ yelese’a n de yalumtuuma la dɛɣɛrɔ tuuma la daɣɛ be’em la fii me. (2 Pe. 2:19) La daɣɛ yelepakerɛ bɔ’ɔra tɔ. Kolekpabɛ’a la kɔ’ɔn tiregera mɛ ti a burum nɛreba puti’irɛ ti ba da ta’an baŋɛ sɛla n de som la be’em! (Isa. 5:20; 2 Ko. 4:4) La daɣɛ pakerɛ bɔ’ɔra tɔ la sinii, tv la intanɛt poan ti ba pa’ala yelese’a n ka makɛ la Yehowa pa’alegɔ la! Sitaana tiregeri pã’asa nɛreba ti ba ti’isa ti yalumtuuma la nɛreba n vɔi ba vom se’em la, yeen ka ana la soŋa ma’a ge la tari la nyɛɛma ti dɛŋa ka bɔna bim.—Kaalɛ Epesus 5:6.

11. Angela yele la pa’alɛ ti yɛm boi bim la wani ti to dekɛ ka’aŋɔ la n boi Epesus 5:7 la tum tuuma? (Bisɛ foote la.)

¹¹ Sitaana boti la to naɛ la nɛresɛba n ka doli Yehowa pa’alegɔ bɔna. Bala n sɔi ti Paul yuun yele Epesudoma la yeti: ‘Da tari ya yelese’ere ti ya eŋɛ la nɛrebana taaba,’ ti la pa’alɛ ti, sɛba n ka tuni sɛla n ani soŋa Naayinɛ nɛŋan la. (Ep. 5:7) Ge la nari ti to bisɛ tomea soŋa gana diimi Epesudoma la, sɛla n sɔi la zina beere wa to ta’an sɔsera la nɛreba social media poan ge me kelum nyɛta ba. Angela,a n kɛ̃’ɛri Asia, tɔɣɛ pa’alɛ dɛŋa n boi social media poan se’em. A yeti: “La ta’an dɛna bɛ̃regɔ n pã’aseri hɔ fii fii ti ho puti’irɛ ta tee. La yuun ka le dɛna daaŋɔ bɔ’ɔra mam ti n nyɔɣɛ zɔtɔ la nɛresɛba n ka tari Baabule naresum yɛla tuna tuuma. Bala la, la yuun ka yue ti mam pɔsɛ ti’isa ti la ani soŋa ti n vɔna vom sebo n ka makɛ la Yehowa pa’alegɔ.’ Yelesonɛ la dela keendoma la yuun soŋɛ Angela mɛ ti a tee. A yeti: “Nananawa mam puti’irɛ nyaa boi la Yehowa yɛla poan gana social media.”

12. Beni n wan soŋɛ tɔ ti to kɔ’ɔn nana Yehowa n pa’alɛ som la be’em yele se’em la?

¹² La nari ti to kɔ’ɔn zaɣesɛ tingɔŋɔ la n ti’isɛ ti yalumtuuma daɣɛ be’em la. Tomam mi ti la dela be’em. (Ep. 4:​19, 20) La nari ti to soke tomea yeti: ‘Mam bisɛ n mea soŋa ka nyɔɣera zɔtɔ yoo yoo tuuma zɛ’an, sukuu poan bii ka naɛ la nɛresɛba n ka nani Yehowa pa’alegɔ bɔna? Mam tari sukpe’ene nana Yehowa pa’alegɔ hali nɛreba san bisɛ ti mam ka sakɛ bamam n yeti sɛla la?’ Wuu 2 Timoti 2:​20-22 n pa’alɛ se’em la, la ta’an nara ti to le bisɛ tomea soŋa la nɛresɛba ti to nyɔɣera ba zɔtɔ tansugere la poan la. To tɛ̃ra ti basɛba kan ta’an soŋɛ tɔ ti to kelum tara sakerɛ pu’usa Yehowa.

KƆ’ƆN DƐNA YA ‘NƐƐSUM LA KƆMA’

13. To kɔ’ɔn dɛna ‘nɛɛsum la kɔma’ vuurɛ? (Epesus 5:​7-9)

¹³ Paul yuun kpemese Epesus Kristakɔma la giila ti daɣɛ ti ba yeen zaɣesɛ lika poan tuuma la ma’a ge ba ‘dɛna nɛɛsum la kɔma.’ (Kaalɛ Epesus 5:7-9.) Bala pa’alɛ la bem? Bala pa’alɛ ti ba ita pa’ala ti ba dela yelemɛŋɛrɛ Kristakɔma saŋa woo. Sore deyima poan ti ho wan ta’an eŋɛ bala dela ho mɔ’ɛ nini kaala ge zamesa Baabule, la Baabule gɔnɔ la saŋa woo. La yele pakɛ mɛ ti to kɔ’ɔn dɔla Yezu Krista n de ‘tingɔŋɔ la nɛɛsum’ la pa’alegɔ la a makesonɛ la—Yon 8:12; Mag. 6:23.

14. Zilam vo’osum la wan ta’an soŋɛ to la wani?

¹⁴ To eeri la Naayinɛ dekɛ a zilam vo’osum la soŋɛ tɔ ti to kɔ’ɔn dɛna ‘nɛɛsum la kɔma.’ Beni n sɔi? Sɛla n sɔi la, la daɣɛ naana ti to kelum ana zilam tingɔŋɔ be’o wa poan. (1 Tes. 4:3-5, 7, 8) Zilam vo’osum la wan soŋɛ tɔ ti to ta’an zaɣesɛ tingɔŋɔ wa puti’irɛ n ka makɛ la Yehowa puti’irɛ la. Zilam vo’osum la ta’an le soŋɛ tɔ ti to ita ‘yelese’a woo n ani soŋa ge dɛna tontɔɔ.’—Ep. 5:9.

15. Sodeni poan ti to wan ta’an nyɛ zilam vo’osum la? (Epesus 5:​19, 20)

¹⁵ La dela to zusera Naayinɛ ta’an nyɛ zilam vo’osum la. Yezu yuun yeti Yehowa wan ‘dekɛ zilam vo’osum la bo sɛba n zuseri ɛɛra ku la.’ (Lu. 11:13) To me san naɛ taaba pɛɣera Yehowa tansugere zamesegɔ poan, to le nyɛta la zilam vo’osum la. (Kaalɛ Epesus 5:​19, 20.) Naayinɛ zilam vo’osum la n wan soŋɛ to se’em la, wan basɛ ti to vɔna vom sebo n wan basɛ ti Naayinɛ puurɛ pee.

16. Bem n wan soŋɛ tɔ ti to ta’an kɔ’ɛ to puti’irɛ soŋa? (Epesus 5:​10, 17)

¹⁶ To san yeti to eŋɛ sɛla n de ninmɔ’ɔrɛ la nari ti to bɔkɛ ‘Yehowa puti’irɛ n de sɛla’ ge nyaa eŋɛ ti la makɛ bala. (Kaalɛ Epesus 5:10, 17.) To san nyɛ Baabule naresum yɛla n wan ta’an maalɛ to yele la, bala pa’alɛ ti to to eeri la Naayinɛ puti’irɛ n de se’em yele la poan. To nyaa san dekɛ Baabule naresum yɛla la tum tuuma, to wan ta’an kɔ’ɛ to puti’irɛ soŋa.

17. To wan eŋɛ la wani ta’an tara to saŋa la tuna soŋa soŋa? (Epesus 5:​15, 16) (Bisɛ foote la.)

¹⁷ Paul yuun ka’am Kristakɔma la n yuun boi Epesus tiŋa la ti ba tara ba saŋa la tuna soŋa soŋa. (Kaalɛ Epesus 5:15, 16.) ‘To dima la’ n de Sitaana la, boti la to kɔ’ɔn mɔ’ɛ nini ɛɛra tingɔŋɔ wa lɔɣɔrɔ ge da nyɛ saŋa tuna Naayinɛ tuuma. (1 Yo. 5:19) La ta’an dɛna naana bɔ’ɔra Kristabia ti a basɛ ti taresum, sukuu kenɛ bii tuuma dɛna yia a vom poan gana Yehowa pu’usegɔ. A san eŋɛ bala, la wan pa’alɛ ti a pɔsɛ ti’isa wuu tingɔŋɔ wa nɛreba la. Yelemɛŋɛrɛ, yele ana wa daɣɛ be’em ge ba ka nari ti ba dɛna yia to vom poan. To san bɔta ti to kena wuu ‘nɛɛsum la kɔma,’ la nari ti to ‘tara to saŋa la tuna soŋa soŋa’ ge kɔ’ɔn bisera ninmɔ’ɔrɛ yɛla la.

18. Donald yuun eŋɛ la bem ta’an dekɛ a saŋa la tum soŋa?

¹⁸ Bisɛ hon wan eŋɛ se’em ta’an dekɛ yɔ’ɔ woo pu’usa Yehowa soŋa soŋa. Donald n ze’ele South Africa yuun eŋɛ la bala. A yeti: “Mam yuun bisɛ la mam bɔŋa n ani se’em ge zusɛ Yehowa ti a soŋɛ mam ti n ta’an mɔ’ɛ nini na’am mɔɔlegɔ tuuma la poan. Mam yuun zusɛ ti a soŋɛ mam ti n nyɛ tuuma n wan bo mam yɔ’ɔ zo’e zo’e ti n mɔɔla. Yehowa yuun soŋɛ mam mɛ ti n nyɛ tuuma la. Mam la n pɔɣa yuun nyaa pɔsɛ tuna la tɛm woo na’am tuuma la.”

19. To wan eŋɛ la wani kɔ’ɔn dɛna ‘nɛɛsum la kɔma’?

¹⁹ Paul n yuun gulesɛ gɔnseko bo Epesudoma la yuun soŋɛ ba mɛ ti ba tara sakerɛ bɔ’ɔra Yehowa. Ka’aŋɔ wa wan soŋɛ tomam me. Wuu ton baŋɛ se’em la, la wan ta’an soŋɛ tɔ ti to loe de’enseko n makɛ ge do’ose yɛm sore poan nyɔɣɛ zɔdoma. La wan kpemese to giila ti to zamesa Baabule la saŋa woo ta’an bɔna yelemɛŋɛrɛ la poan. La me wan basɛ ti to baŋɛ zilam vo’osum la n wan ta’an soŋɛ to se’em ti to tara halesoma. To san tara Paul n gulesɛ sɛla la tuna tuuma, la wan ta’an soŋɛ tɔ ti to kɔ’ɛ to puti’irɛ soŋa ti la makɛ la Yehowa puti’irɛ. To san ita bala, to wan zaɣesɛ lika poan tuuma ge kɔ’ɔn bɔna nɛɛsum la poan!