Ho San Tee Tansugere, Ho Wan Eŋɛ La Wani Ta’an Malum Mabiisi La?

Yelese’a n yuun paɛ Nicolas la Céline yuun boi la de to’ore. France tigere yile la yuun bo ba la tuunɛ ti la nara ti ba tee tansugere. Ba yeti, “To puurɛ n yuun pee ge pooren to suure n yuun sa’am la to ka le nyɛta to zɔdoma la. Tomam n yuun tee tansugere sɛka la, to yuun nan ka malum mabiisi la soŋa soŋa.”a Ho san tee tansugere, la ta’an kpe’em bo ho ge ho wan eŋɛ la wani kelum tara pupeelum ge soŋera tansugere la? Ho mabiisi wan eŋɛ la wani ta’an soŋɛ hɔ? Hon me wan eŋɛ la wani ta’an kpemese mabiisi la n boi ho tansugere paalega la poan giila?

NARESUM YƐLA ANAASI N WAN TA’AN SOŊƐ HƆ TI HO MALUM MABIISI LA

1. Dekɛ homea delum Yehowa. (Ym. 37:5) Mabipɔka Kazumi, n ze’ele Japan tiŋa ti ba yuun tee a sira tuuma. Mabipɔka wa yuun basɛ tansugere sɛka ti a yuun bɔna bim ti la paɛ yuun 20 la mɛ. A yuun eŋɛ la wani ‘dekɛ a yele la bo Yehowa’? A yeti, “Mam yuun tɔɣɛ la lan ani mam wuu n boi la n ma’a la, n putɛyiila, la yelese’a n ɛ̃ɣeri n paleŋa bo Yehowa. Mam san ni zusɛ en, a ni bo mam la paŋa.”

Ho wan eŋɛ la wani ta’an dekɛ homea delum Yehowa soŋa soŋa? Wuu tia n ni bɔta ko’om la pɔ̃’ɔsegɔ ti a ta’an zo’e se’em la, bala mea to me san bɔta ti to sakerɛ la kpe’em la nari ti to bisa to sakerɛ la soŋa. Nicolas ti to puɣum tɔɣɛ a yele la, yuun ti’isɛ taɣesɛ la makesonɛ se’a ti Abraham, Yezu la Paul yuun eŋɛ la. Ba yuun dekɛ la ba paŋa za’a tum bo Yehowa. Yele wa yuun soŋɛ Nicolas mɛ ti a tara sakerɛ ti Yehowa me wan soŋɛ en. Ho san zamesa Baabule la saŋa woo ge ti yɛla paara hɔ, la wan soŋɛ hɔ ti ho ta’an ŋmibe. Ho me wan kelum zamesɛ baŋɛ yelese’a ti ho wan tɔɣɛ ti la kpemese ho mabiisi la giila.

2. Da tara ho tansugere kɛka la makerɛ la ho tansugere paalega la. (Pa. 7:10) Jules n yuun basɛ Benin tiŋa ge keŋɛ United States la, a yuun baŋɛ ti nɛreba buuri yɛla tinkaŋa poan ba’ɛ bɔna la de to’ore. A yeti, “La yuun ani mam wuu nɛreba yuun kɔ’ɔn sɔkera mam ti ba baŋɛ la mam yɛla za’a.” Eŋa n yuun ka malum bala la zuo la, a yuun ka le lɛna mabiisi la. Eŋa n yuun ta baŋera a mabiisi la soŋa soŋa la, a yuun tee a puti’irɛ la mɛ. A yeti, “La ka pakɛ la nɛreba n boi to’ore to’ore se’em tingɔŋɔ wa zuo, to za’a dela buyina. To yetɔɣum la to itigɔ n yeen bɔna to’ore to’ore. La nari ti to bɔkɛ ti nɛreba boi la to’ore to’ore.” Da tara ho tansugere kɛka la makera la ho tansugere paalega la. Anne-Lise, n de sore ŋmɛ’adaana la yeti, “Mam tee tansugere ti n ta zamesɛ la yelepaala ge daɣɛ n nyɛta yelese’a ti mam daa puɣum nyɛta n tansugere kɛka la poan la.”

Keendoma me ka nari ti ba tara tansuga seto ti ba yuun bɔna la makera la bamam n nyaa boi tansuga se’a poan la. Mabiisi la san ita yɛla ti la bɔna de to’ore, la ka pa’alɛ ti bamam n iti se’em la ka nari. Yɛm boi bim ti ho baŋɛ mabiisi la n iti ba yɛla se’em ge nyaa ni pa’alɛ ba hon ti’isɛ ti ba eŋɛ sɛla. (Pa. 3:​1, 7b) La ani soŋa ti ho basɛ ti mabiisi la nyɛ ho makesonɛ la tɔɣesɛ hɔ gana ti ho pɛ̃regɛ ba ti ba eŋɛ hon boti sɛla.—2 Ko. 1:24.

3. Tuulegera ho tansugere paalega la poan. (Flp. 1:27) La boi bim ti ho san tee zɛpaalega, la ni daɣena naana ge la nari ti ho tiregɛ eŋɛ kalam pɔsɛ kena tansugere zamesegɔ. La san wan ta’an eŋɛ, da ni doose fon poan eŋɛ zamesegɔ la ge ni kɔ’ɔn keŋɛ na’am pu’usegɔ deo la poan. Sɛla n sɔi la, mabiisi la san ka nyɛta hɔ zamesegɔ zɛ’an, bii ho yibeseri kena mɛ, ba wan eŋɛ la wani ta’an soŋɛ hɔ? Lucinda la a bipugeto bayi n yuun nɔɣɛ keŋɛ tinkatɛ ayima n boi South Africa poan yeti, “Mam zɔdoma yuun ka’am mam yeti n nyɔɣɛ mabiisi la zɔtɔ, n naɛ la ba kena na’am mɔɔlegɔ ge me bɔ’ɔra lebesego zamesegɔ poan. To yuun yele mabiisi la yeti, ba ta’an ni wa’an to yire na eŋɛ na’am mɔɔlegɔ sɔsega.”

To san naɛ la to mabiisi ‘laɣum’ tuna tansugere la tuuma, la wan soŋɛ tɔ ti to ‘sakerɛ’ kpe’em. Anne-Lise, ti to puɣum tɔɣɛ a yele la yeti keendoma la yuun kpemese eŋa giila mɛ ti a tiregɛ naɛ la mabiisi la za’a keŋɛ na’am mɔɔlegɔ. A nyɛ la bem nyuurɔ? A yeti, “Wana n yuun soŋɛ mam ti n ta’an baŋɛ mabiisi la soŋa.” Leyɛ’ɛsa, ho san yese ho suure poan piisa ge maala Na’am Pu’usegɔ Deo la, wana wa wan basɛ ti mabiisi la baŋɛ ti ho laɣum pa’asɛ la ba tansugere la poan. Ho san naɛ la mabiisi la tuna, ya wan malum taaba ge ana wuu deodoma la.

4. Nyɔɣɛ zɔdoma. (2 Ko. 6:​11-13) Ho san basɛ ti mabiisi la baŋɛ ti ho ti’iseri ba yele, bala wan basɛ ti ya nyɔɣɛ taaba zɔtɔ. Ge ti zamesegɔ nyaa pɔsɛ bii ya san ba’asɛ zamesegɔ, ni naɛ la mabiisi la sɔsɛ. Bala wan soŋɛ hɔ ti ho ta’an baŋɛ ba. Tiregɛ la ho tɛ̃ra ba yu’ura. Bala wan dɛna naana bɔ’ɔra ba ti ba naɛ la ho sɔsera. Ba wan baŋɛ ho soŋa ge ti hon la bamam zɔtɔ nyɔka la kpe’em.

Da ita wuu ho boi la ho to’ore la ti mabiisi la yeen nɔŋɛ ho zuo ge basɛ ti mabiisi la baŋɛ hon sirum de nɛresɛka. Tɔɣesɛ Lucinda makesonɛ la. A yeti, “Tomam n daa ni bɛɛna mabiisi ti ba kena to yire la zuo, la basɛ ti to nyaa dɛna la zɔdoma.”

‘TO’OSE YA TAABA SOŊA SOŊA’

Mabiisi basɛba san pɔsɛ keŋɛ Na’am Pu’usegɔ Deo poan ge ka mina mabiisi la n boi bim la dabeem ta’an ni tara ba. Mabiisi san pɔsɛ wa’an ya tansugere na, ho wan eŋɛ la wani ti la ana ba faɣa faɣa? Tuuntuna Paul yuun kpemese to giila ti ‘to’ose ya taaba soŋa soŋa wuu Yezu Krista n to’e ya soŋa soŋa se’em la.’ (Arom 15:7) Keendoma me ta’an tɔɣesɛ Krista ge basɛ ti la ana faɣa faɣa bɔ’ɔra mabisɛba n de saama ba tansugere la poan la. (Bisɛ daka la zuo n de “Ho San Tee Tansugere, Bem Yɛla N Wan Soŋɛ Hɔ.”) Nɛra woo n boi tansugere la poan la, hali la kɔma me ta’an soŋɛ mabisɛba n de saama la ti la ana ba faɣa faɣa.

To san yi mabiisi wa’an to yire, la pa’alɛ ti to to’oseri ba la soŋa. To me ta’an eŋɛ sɛla soŋɛ ba. Makerɛ, mabipɔka ayima daa nyɛ la saŋa doose mabipɔka ayima n de saana keŋɛ da’a ta pa’alɛ en eŋa n wan eŋɛ se’em ta’an ni doose loore bii zireŋa keŋɛ zɛ’an. Mabipɔka wa n de saana wa puurɛ daa pee mɛ la mabipɔka la n soŋɛ en se’em ti a ta’an malum zɛ’an la.

LA DELA YƆ’Ɔ BƆ’ƆRA TƆ TI TO NYƐ NƐŊA TƆLEGA

Sunwa’atɛ san zɔ’ɔra kutɛ, a kelempaɣesi la ni suɛ la sugumnɔɔrɛ zo’e zo’e ta paɛ se’em ma’a ti a kelempaɣesi la ni kpe’em ti a ta’an ɛkɛ. Bala mea, ho me san tee tansugere, la nari ti ho tiregɛ yese ho dabeem la basɛ, la wan eŋɛ se’em ti ho nyɛ paŋa ta’an tuna Yehowa tuuma. Nicolas la Céline yeti, “Ho san tee tansugere, la ni kumesɛ ho mɛ. La nari ti ho tara halesoma ta’an malum nɛreba bii zɛsɛka ti ho bɔna.” Jean-Charles, ti to puɣum tɔɣɛ a yele la pa’alɛ eŋa deodoma n nyɛ nyuurɔ se’em mɛ. A yeti, “Tomam n tee tansugere la basɛ ti to kɔma bi la vo’osum poan ge me basɛ ti ba vurege lɛm Yehowa. Ŋmaresi fii pooren ti to bipugela daa pɔsɛ tuna tuuma tansugere zamesegɔ poan ti to dayɔa la me dɛna na’am mɔɔlegɔdaana n ka muse ko’om.”

Ho bɔŋa zɛ’an san ka bo ho yɔ’ɔ ti ho keŋɛ tansugere sɛka n eeri soŋerɛ, ho wan eŋɛ la wani? Ho ta’an basɛ ti tansugere sɛka ti ho bɔna bim la ana wuu dela zɛpaalega bo ho ge me dekɛ yelese’a ti to zamesɛ zaseŋɔ wa poan la tum tuuma. Dekɛ homea delum Yehowa ge me tiregɛ naɛ la mabiisi la kena na’am mɔɔlegɔ. Ho me ta’an nyɔɣɛ zɔdoma pa’asɛ ge me dɛna zɔsonkɔ. Ya tansugere la poan ho ta’an soŋɛ mabisɛba n de saama bii sɛba n eeri soŋerɛ. Nɔŋerɛ n basɛ ti nɛreba baŋera ti to dela yelemɛŋɛrɛ Kristakɔma. Bala la, to san soŋera nɛreba, la wan basɛ ti to ana du’a du’a la Yehowa. To ta’an tara sakerɛ ti ‘bala dela bo’olum n basɛ ti Naayinɛ puurɛ pɛɛra.’—Heb. 13:16.

La boi bim ti ho san tee tansugere daaŋɔ ta’an ni bɔna bim ge Kristakɔma zo’e zo’e tee tansuga mɛ ge tara pupeelum. Ho me wan ta’an tara pupeelum! Anne-Lise yeti, “Mam n daa tee tansugere la soŋɛ mam mɛ ti mam tara nɔŋerɛ pa’asɛ.” Kazumi nyaa sakɛ yeti, “Ho san tee tansugere, Yehowa ni soŋɛ hɔ la sarɔtɔ zo’e zo’e poan ti ho ka ti’isa de yele.” Jules me yeti, “Mam n yuun tee tansugere ge nyɔɣɛ mabiisi la zɔtɔ la soŋɛ mam mɛ ti la ana mam faɣa faɣa. Mam nyaa malum tansugere la mɛ ge ka bɔta ti n basɛ bim.”