Pigera Zontua INTANƐT TUUMA ZƐ'AN GƆNƆ ZAALEŊA
Pigera Zontua
INTANƐT TUUMA ZƐ'AN GƆNƆ ZAALEŊA
Farefare
Ɛ
  • ã
  • ɛ
  • ɛ̃
  • ɣ
  • ŋ
  • ɔ
  • ɔ̃
  • BAABULE
  • GƆNƆ
  • ZAMESEGƆ
  • w24 July gɔn. 20-25
  • Ton Wan Ta’an Zamesɛ Sɛla Israel Nadoma La Zɛ’an

Vidiyo ka boi kalam.

Gaafara, daaŋɔ fii n boi vidiyo la poan.

  • Ton Wan Ta’an Zamesɛ Sɛla Israel Nadoma La Zɛ’an
  • Pigera Zontua N Mɔɔli Yehowa Na’am La (Zamesegɔ)—2024
  • Zupiɣesi
  • Ka Taaba
  • BA YUUN KƆ’ƆN NƆŊƐ YEHOWA MƐ LA BA SUURE ZA’A
  • BA YUUN BASƐ BA BE’EM LA MƐ
  • BA YUUN PU’USERI YEHOWA LA SARƆƆ SƐKA N NARI POAN
  • Burasɛba N Yuun Tari Sakerɛ La Ba’asegɔ Yetɔɣum N Pa’alɛ To Sɛla
    Pigera Zontua N Mɔɔli Yehowa Na’am La (Zamesegɔ)—2024
  • Tɛ̃ra Ti ‘Yehowa Boi’ Mɛ
    Pigera Zontua N Mɔɔli Yehowa Na’am La (Zamesegɔ)—2024
  • Hon Wan Kɔ’ɛ Ho Puti’irɛ Se’em Ti La Pa’alɛ Ti Ho Dekɛ Homea Delum Yehowa
    Tomam Kristakɔma Vom La To Na’am Tuuma—Zamesegɔ Gɔŋɔ—2023
  • Sirege Homea Sakɛ Sɛla Ti Ho Ka Mina
    Pigera Zontua N Mɔɔli Yehowa Na’am La—2025
Bisɛ Ase'a Pa'asɛ
Pigera Zontua N Mɔɔli Yehowa Na’am La (Zamesegɔ)—2024
w24 July gɔn. 20-25

ZASEŊƆ 30

YUUNƐ 36 We Guard Our Hearts (To Gu To Sunya)

Ton Wan Ta’an Zamesɛ Sɛla Israel Nadoma La Zɛ’an

‘Ya wan le baŋɛ tontɔɔdaana la putodaana n boi tɔka tɔka se’em, la se’em n pu’useri Naayinɛ la se’em n ka pu’useri en n boi tɔka tɔka se’em.’—MA. 3:18.

YELEKPINE

To wan zamesɛ baŋɛ Yehowa n yuun geele Israel nadoma la se’em, la wan eŋɛ se’em ti to bɔkɛ Yehowa n boti a yamesi ita sɛla zina beere wa.

1-2. Baabule la tɔɣɛ Israel nadoma basɛba yele la wani?

BAABULE la pa’alɛ ti nɛreba n gani 40 n yuun ta dɛna nadoma bisera Israel tiŋa.a Baabule la kɔ’ɔn basɛ ti to baŋɛ nadoma basɛba n yuun eŋɛ sɛla mɛ. Makerɛ, hali nadoma basɛba n yuun tum sɛla n ani soŋa la yuun laɣum tum be’em mɛ. Basɛ ya ti to geele Nasonkɔ David yele bisɛ. Yehowa yuun yeti, ‘Mam yameŋa David doli mam nɔɔrɛ la a suure za’a, tuna sɛla n de ma’a mam nini.’ (1 Na. 14:8) Ge David wa yuun gã’arɛ mɛ la nɛra pɔɣa ge le dɔ̃rɛ pɔka wa sira tisɛ ti ba ku en zaberɛ poan.—2 Sa. 11:​4, 14, 15.

2 Nadoma basɛba yuun ka tari yelemɛŋɛrɛ bɔ’ɔra Yehowa ge ba me yuun tum tuunsoma mɛ. To geele ya Arehoboam yele bisɛ. Yehowa yuun tɔɣɛ Arehoboam yele ti ‘a dela naba n tuni be’em.’ (2 Yel. 12:14) Yehowa n yuun yele Arehoboam ti a basɛ ti Israeldoma la loe bamea naba la, a yuun nam mɛ. A me yuun malum mɛ tisi zo’e zo’e n boi a sɔ’ɔlum la poan, ti ba ta’an tɛ’ɛla bamesi.—1 Na. 12:​21-24; 2 Yel. 11:​5-12.

3. Bem ninmu’urɛ sokere n nari ti to soke tomea ge to wan sɔsɛ la bem zaseŋɔ wa poan?

3 Israel nadoma yuun san tuna tuunsoma la tuunbe’ero za’a, Yehowa yuun ni nyɛ la bem ta’an baŋɛ ti naba tari yelemɛŋɛrɛ bɔ’ɔra en? To san nyɛ sokere wa lebesego, la wan soŋɛ tɔ ti to bɔkɛ Yehowa n eeri ti to ita sɛla ti a puurɛ pee. To wan sɔsɛ yɛla atã ti Yehowa yuun ni bisɛ ge ta’an baŋɛ nyaa Israel naba tari yelemɛŋɛrɛ bɔ’ɔra en bii a ka tari. A yuun ni bisɛ la naba la n nɔŋɛ en se’em, naba la san tum be’em eŋa n ni tee se’em, la naba la n kɔ’ɔn mu’ɛ nini pu’usa en sarɔɔ sɛka n nari poan.

BA YUUN KƆ’ƆN NƆŊƐ YEHOWA MƐ LA BA SUURE ZA’A

4. Nadoma sɛba n yuun tari yelemɛŋɛrɛ bɔ’ɔra Yehowa, la nadoma sɛba n yuun ka tari yelemɛŋɛrɛ bɔ’ɔra Yehowa yuun boi tɔka tɔka la wani?

4 Nadoma sɛba n yuun eŋɛ sɛla ti Yehowa puurɛ pee la yuun ni kɔ’ɔn nɔŋɛ Yehowa mɛ la ba suure za’a.b Yehosapat yuun dela Nasonkɔ. A yuun ‘eeri la Naayinɛ la a suure za’a.’ (2 Yel. 22:9) Baabule la tɔɣɛ Yosia yele yeti, ‘Nadoma la woo n daa deŋɛ a nɛŋa la, se’em ka boi n daa ani wuu eŋa n ŋmɛregɛ lebe Yehowa zɛ’an la a suure za’a.’ (2 Na. 23:25) Solomon n yuun ta tuna be’em a kuregerɛ saŋa la, yuun dela nɛrekani taaba? ‘A daa ka dekɛ a suure za’a pu’usa Naayinɛ.’ (1 Na. 11:4) Baabule la tɔɣɛ naba Abiya n yuun ka tari yelemɛŋɛrɛ bɔ’ɔra Yehowa yele yeti, ‘A daa ka dekɛ a suure za’a bo Naayinɛ.’—1 Na. 15:3.

5. Nɛra san nɔŋɛ Yehowa la a suure za’a, bala vuurɛ?

5 La vuurɛ dela bem ti to pu’usa Yehowa la to suure za’a? Nɛra n pu’useri Naayinɛ la a suure za’a ka yeen pu’usa Naayinɛ la pɛ̃regerɛ zuo. Ge eŋa n nɔŋɛ Yehowa ge bɔ’ɔra en gilema la n sɔi ti a pu’usa en.

6. To wan eŋɛ la wani kɔ’ɔn nɔŋɛ Yehowa la to suure za’a? (Magaha 4:23; Matu 5:​29, 30)

6 To wan eŋɛ la wani ta’an tɔɣesɛ nadoma sɛba n yuun nɔŋɛ Yehowa la ba suure za’a la? La nari ti to zaɣesɛ yelese’a n wan basɛ ti to kan tara yelemɛŋɛrɛ bɔ’ɔra Yehowa la. Makerɛ, la nari ti to bisɛ tomea soŋa la yelese’a ti to bisera, la ton tari to vo’osegɔ saŋa ita sɛla. La me nari ti to bisɛ tomea soŋa la to zɔdoma, la wan eŋɛ se’em ti to kan pɔsɛ ti’isa ti ligeri yele n kɔ’ɔn ba’ɛ pakɛ to vom poan. To me san baŋɛ ti yɛla ase’a n basɛ ti nɔŋerɛ se’ere ti to tara bɔ’ɔra Yehowa la ma’ara, la nari ti to eŋɛ teere kalam.—Kaalɛ Magaha 4:23; Matu 5:​29, 30.

7. Bem n sɔi ti la yele pakɛ ti to zaɣesɛ yelese’a woo n ka ani soŋa?

7 La nari ti to pu’usa Yehowa la to suure za’a. To san ka bisɛ tomea soŋa, to ta’an ti’isa ti tomam n mu’ɛ nini pu’usa Yehowa la zuo, to san puɣum tuna tuunbe’ero, daaŋɔ ka boi bim. To makɛ yeti, ɔɔrɔ n tari ho paa ti ho yɛ ɔɔrɔ soote ge sina ge yu’ɛ ho kuleŋa la ho takɔla basɛ, ɔɔrɔ fuo la wan soŋɛ ho yoi? Bala mea, la yeen daɣɛ to tuna tuunsoma ma’a ge la nari ti to zaɣesɛ yelese’a woo n wan ta’an basɛ ti nɔŋerɛ se’ere ti to tara bɔ’ɔra Yehowa la ma’ɛ.—Ep. 2:2.

BA YUUN BASƐ BA BE’EM LA MƐ

8-9. Ban yuun ka’am Naba David la Naba Hezekia la, ba yuun eŋɛ la wani? (Bisɛ foote.)

8 Kaalegɔ sɛka n deŋɛ nɛŋa la pa’alɛ ti Naba David yuun tue me paa. Ge se’em ma’a ti nɔdɛ’ɛsa Natan yuun yele en a be’em la, David yuun sirege amea mɛ ge tee. (2 Sa. 12:13) David yuun yeen ka eŋɛ bala ti a pã’asɛ Natan ti eŋa tee mɛ bii a li’isɛ tubedɔlegerɛ. Ge David yuun sirum tee mɛ. David n gulesɛ sɛla ti la bɔna Yooma 51 la pa’alɛ ti la yuun sirum daam en mɛ la eŋa n eŋɛ sɛla la.—Ym. 51:​3, 4, 17.

9 Naba Hezekia me yuun tue Yehowa mɛ. Baabule la yeti, ‘Pa’alɛ meŋa n kɛ̃ Hezekia ti Naayinɛ sunsɔa nyie la en, la Yuda la Yerusalem tisi.’ (2 Yel. 32:25) Bem n sɔi ti Hezekia yuun zɛkɛ amea? Daanse’ere, la yuun dela a taresum zuo bii eŋa n yuun zabɛ nyaŋɛ Asiriadoma la bii Naayinɛ n yuun doose sarɔɔ kirega poan tibɛ a bã’a la zuo. Daanse’ere zɛkɛ n mea n sɔi ti a yuun dekɛ a taresum la pa’alɛ Babilondoma la. Bala yuun basɛ ti nɔdɛ’ɛsa Isaiah zɛregɛ en mɛ. (2 Na. 20:​12-18) Ge wuu David la, Hezekia me yuun sirege la amea tee a suure. (2 Yel. 32:26) Bala zuo la Yehowa yuun geele Hezekia la wani? A yuun geele en ti a dela naba n tari yelemɛŋɛrɛ ge me ‘kɔ’ɔn tuna sɛla n ani soŋa.’—2 Na. 18:3.

Fɔɔra: 1. Naba David suure n sa’am ti a gorege bisɛ saazuo se’em ma’a ti Natan tɔɣera bɔ’ɔra en la. 2. Naba Hezekia suure n sa’am ti a kukɛ zuo se’em ma’a ti Isaiah tɔɣera bɔ’ɔra en la.

Naba David la Naba Hezekia yuun sirege bamea mɛ basɛ ba be’em, se’em ma’a ti ba yuun yele ba ba be’em la (Bisɛ kaalegɔ zɛ’ɛsi 8-⁠9)


10. Naayinɛ nɔdɛ’ɛsa n yuun ka’am Naba Amazia la, a yuun eŋɛ la wani?

10 Yuda Naba Amazia yuun tum sɛla n ani soŋa mɛ ge a yuun ‘ka tuni la a suure za’a.’ (2 Yel. 25:2) A yuun eŋɛ la bem? Yehowa n yuun soŋɛ Amazia ti a zabɛ nyaŋɛ Edomdoma ba’asɛ la, Amazia yuun pɔsɛ kaabera la Edomdoma la baɣa.c Se’em ma’a ti Yehowa nɔdɛ’ɛsa yuun yele en a be’em la, Naba la yuun ka kelese en ge yuun sa’ɛ en ti a keŋɛ.—2 Yel. 25:​14-16.

11. Wuu 2 Korint 7:​9, 11 n pa’alɛ se’em la, bem n nari ti to eŋɛ ti Yehowa di sugeri bo to? (Bisɛ fɔɔra la.)

11 To wan ta’an zamesɛ la bem nadoma wa yɛla poan? La nari ti to basɛ to be’em ge tiregɛ ti to kan le tum be’em la. To san eŋɛ sɛla ti to bisɛ ti la daɣɛ ninmu’urɛ ge ti keendoma la ka’am tɔ, to wan eŋɛ la wani? To da ti’isa ti Yehowa ka nɔŋɛ tɔ bii to ita sunsɔa la keendoma la. Hali Israel nadoma sɛba n yuun tuni sɛla n ani soŋa la yuun kelum nara ka’aŋɔ mɛ. (Heb. 12:6) Ba san ka’am tɔ, la nari ti (1) to sirege tomea to’e ka’aŋɔ la, (2) to eŋɛ teere se’a n nari ge me (3) pu’usa Yehowa la to suure za’a. To san basɛ to be’em, Yehowa wan di sugeri bo to.—Kaalɛ 2 Korint 7:​9, 11.

Fɔɔra: 1. Mabibudibila n de keema n ka’ani mabia ti mabia la bisa daam n yuɛ zɛ’a. 2. Mabia la dekɛ la Baabule la “Tara Vom Somɔ Daarewoo!” gɔŋɔ la zaseŋɔ 43 ita viisegɔ. 3. Mabibudibila la n de keema la, la mabia la n boi yire la yire na’am mɔɔlegɔ la poan.

Ba san ka’am tɔ, la nari ti (1) to sirege tomea to’e ka’aŋɔ la, (2) to eŋɛ teere se’a n nari ge me (3) pu’usa Yehowa la to suure za’a (Bisɛ kaalegɔ zɛ’an 11)f


BA YUUN PU’USERI YEHOWA LA SARƆƆ SƐKA N NARI POAN

12. Nadoma sɛba n yuun tari yelemɛŋɛrɛ la yuun boi ba to’ore la wani?

12 Nadoma sɛba ti Yehowa yuun geele ba ti ba tari yelemɛŋɛrɛ bɔ’ɔra eŋa la yuun pu’useri en la sarɔɔ sɛka n nari poan. Ba me yuun kpemeseri ba nɛreba la giila mɛ ti ba ita bala. Nadoma wa yuun tuuri mɛ ge ba yuun pu’useri la Yehowa ma’a ge yuun ni sa’am baɣa la n boi tiŋa la poan la.d

13. Beni n sɔi ti Yehowa yuun geele Naba Ahab ti a ka tari yelemɛŋɛrɛ?

13 Beni n sɔi ti Yehowa yuun geele nadoma basɛba ti ba ka tari yelemɛŋɛrɛ bɔ’ɔra en? Nadoma wa yuun ka tuni be’em ma’a saŋa woo. Naba Ahab n de putɔya la n yuun ta baŋɛ ti eŋa zuo ti ba ku Nabot la, la yuun daam en mɛ ge ti a suure sa’am. (1 Na. 21:​27-29) A me yuun mɛ lalesi kaɛ tisi ase’a mɛ ge zabɛ nyaŋɛ Israel dindoma. (1 Na. 20:​21, 29; 22:39) Ge Ahab yuun tum la tuunfɛ’ɛserɛ paa. A pɔɣa n yuun soŋɛ en ti a basɛ ti baɣa kaabegɔ tole nɛŋa tiŋa la poan. A yuun ka makɛ basɛ baɣa kaabegɔ.—1 Na. 21:​25, 26.

14. (a) Beni n sɔi ti Yehowa yuun geele Naba Arehoboam ti a ka tari yelemɛŋɛrɛ bɔ’ɔra en? (b) Nadoma sɛba n yuun ka tari yelemɛŋɛrɛ la yuun iti la bem?

14 To sɔsɛ ya Naba Arehoboam n yuun ka tari yelemɛŋɛrɛ bɔ’ɔra Yehowa la yele. A yuun tum tuunsoma mɛ a na’am bisega la poan. Ge a na’am la n yuun ze’ele ba’asɛ la, a yuun ka le dɔla Yehowa Lɔɔ la. A yuun pɔsɛ kaabera la baɣa. (2 Yel. 12:1) Bala pooren la, saŋa ase’a a yuun ni pu’usa la Yehowa ge ti saŋa ase’a ti a kaabera baɣa. (1 Na. 14:​21-24) La yuun daɣɛ Naba Arehoboam la Naba Ahab ma’a n yuun ka le pu’usa Yehowa sarɔɔ sɛka n nari poan. Nadoma la zo’e zo’e n yuun ka tari yelemɛŋɛrɛ bɔ’ɔra Yehowa la yuun kaaberi la baɣa ge me yuun basɛ ti ba nɛreba la ita bala. Naba sɛka n pu’useri Yehowa yelemɛŋɛrɛ sore poan n wan pa’alɛ ti a dela nasonkɔ.

15. Beni n sɔi ti yelemɛŋɛrɛ pu’usegɔ yele pakɛ Yehowa?

15 Beni n sɔi ti nadoma la n yuun pu’useri Yehowa se’em la yele yuun pakɛ en? Yia, la yuun dela naba la zugbere tuunɛ ti a soŋɛ a nɛreba la ti ba pu’usa Yehowa sarɔɔ sɛka n nari poan. Yi’i, nɛreba san kaabera baɣa, la ni basɛ ti ba tuna la tuunfɛ’ɛsa la ŋmɛlema tuuma. (Ho. 4:​1, 2) N tã’a, nadoma la, la ba nɛreba la yuun dela Yehowa yamesi. Bala la, ba yuun san kaabera baɣa, la ani wuu nɛra n tari sira bii pɔɣa ge tum yalumtuuma. (Yer. 3:​8, 9) Nɛra san tara pɔɣa bii sira ge tum yalumtuuma, a ni sa’am la a luɣerɛ kpɛ’a la suure. Bala mea, nɛra san kã amea bo Yehowa ge ti pooren a ka tara yelemɛŋɛrɛ bɔ’ɔra Yehowa, a ni sa’am la Yehowa suure.e—Tɛɛ. 4:​23, 24.

16. Yehowa zɛ’an, tontɔɔdaana la putodaana boi tɔka tɔka la wani?

16 To wan ta’an zamesɛ la bem, yɛla wa poan? La nari ti to zaɣesɛ pumpɔreŋɔ pu’usegɔ yɛla woo. Ge la nari ti to pu’usa Yehowa sore sɛka n nari poan ge mu’ɛ nini tuna a tuuma la. Nɔdɛ’ɛsa Malaki yuun pa’alɛ nɛresoŋa n boi a to’ore se’em, la se’em n daɣɛ nɛresoŋa. A yuun yeti, ‘Ya wan le baŋɛ tontɔɔdaana la putodaana n boi tɔka tɔka se’em, la se’em n pu’useri Naayinɛ la se’em n ka pu’useri en n boi tɔka tɔka se’em.’ (Ma. 3:18) To boti la Yehowa geele to ti to dela tontɔɔdoma. La nari ti to bisɛ tomea soŋa ti to tuure yɛla da gu to ti to ta basɛ Yehowa pu’usegɔ. To san basɛ Yehowa pu’usegɔ, la dela be’em kãtɛ.

17. Bem n sɔi ti la nara ti to bisɛ tomea soŋa la nɛra sɛka ti to bɔta ti to ele bii di?

17 Ho san bɔna ho ma’a ge ti’isa ti ho ele bii ho di pɔɣa, Malaki n yuun gulesɛ sɛla la ta’an soŋɛ hɔ ti ho ele siresonkɔ bii di pɔɣesonkɔ. Ti’isɛ yele wa bisɛ. Nɛra san tara halesoma ge ka pu’usa yelemɛŋɛrɛ Naayinɛ la, Yehowa wan geele en ti a dela tontɔɔdaana yoi? (2 Ko. 6:14) Ho san ele bii di nɛra la, a wan ta’an soŋɛ hɔ ti ho tara bɔnsoŋa la Yehowa? Naba Solomon n yuun di pɔɣese’esi n kaaberi baɣa la yuun ta’an tara halesoma. Ge ba yuun ka pu’useri Yehowa. Fii fii ti ba yuun burum Solomon puti’irɛ ti a pɔsɛ kaabera baɣa.—1 Na. 11:​1, 4.

18. La nari ti dɔɣereba pa’ala ba kɔma la bem?

18 Dɔɣereba, ya ta’an dekɛ nadoma la yɛla n boi Baabule la poan la soŋɛ ya kɔma ti ba bɔta ti ba pu’usa Yehowa. Soŋɛ ya ba ti ba bɔkɛ ti Yehowa puurɛ yuun pee mɛ la nadoma sɛba n yuun soŋɛ ba nɛreba ti ba laɣum pu’usa en la. Basɛ ti ho yetɔɣum la ho itigɔ pa’alɛ ba ti ba baŋɛ ti Baabule zamesegɔ, zamesegɔ kenɛ la na’am mɔɔlegɔ dela yelese’a n pakɛ paa to vom poan. (Mt. 6:33) Dɔɣereba, ya san ka ita bala, ya kɔma la kan nɔŋɛ Yehowa. Ba wan ti’isɛ ti yamam n de Yehowa Sɛɛradoma la zuo n sɔi ti bamam me pu’usa Yehowa. Bala ta’an basɛ ti ba ka dekɛ Yehowa pu’usegɔ ninmu’urɛ bii ba kɔ’ɔn basɛ Yehowa pu’usegɔ.

19. Nɛra san basɛ Yehowa pu’usegɔ, a wan ta’an le pu’usa Yehowa? (Bisɛ daka la zuo n de “Ho Ta’an Le Wa’ana Pu’usa Yehowa!”)

19 Nɛra san basɛ Yehowa pu’usegɔ, bala pa’alɛ ti a kan ta’an le wa’ana pu’usa Yehowa yoi? Aayi, la daɣɛ bala. A san basɛ a be’em, a ta’an le wa’ana pu’usa Yehowa. Sɛla n wan ta’an soŋɛ en ti a eŋɛ bala dela, a sirege amea ge basɛ ti keendoma la soŋɛ en. (Yam. 5:14) A san bɔta ti a le dɛna Yehowa zɔ, la nari ti a tiregɛ la a paŋa za’a ta’an eŋɛ bala.

Ho Ta’an Le Wa’ana Pu’usa Yehowa!

Geele Naba Manase yele wa bisɛ. A ‘yuun tum la tuunfɛ’ɛsa zo’e zo’e Yehowa nɛŋa.’ A yuun ‘ka’asɛ la nɛreba zo’e zo’e n ka tari taalɛ ziim.’ A yuun tum la kolekpatuuma buuri woo, hali yuun dekɛ a dayɔɔsi kaabɛ bo baɣa! (2 Na. 21:​6, 16) A yuun basɛ ti Yuda tiŋa ‘tuna la be’em n yuun gani tisi la’ n iti sɛla la. (2 Na. 21:9; 2 Yel. 33:​1-6) Ge ban yuun nyɔkɛ Manase keŋɛ Babilon ti a dɛna yameŋa la, a yuun basɛ a be’em la mɛ. Manase n yuun ba’ɛ tum tuungaasa ti la yue la zuo, la yuun daɣɛ ti a yeen zusɛ Yehowa ti a di sugeri bo en. Manase suure yuun sa’am mɛ la eŋa n yuun eŋɛ sɛla la. Bala zuo la, a yuun ‘kɔ’ɔn sirege la amea’ ge me ‘kɔ’ɔn zusa’ Naayinɛ. Bem n yuun ze’ele bim na? ‘Manase zusega la yuun ve’e Yehowa mɛ’. Yehowa yuun di sugeri bo en mɛ ge yuun basɛ ti a lebe Yerusalɛm ta dɛna Naba.—2 Yel. 33:​12, 13.

Nɛra san basɛ Yehowa pu’usegɔ ge tee a puti’irɛ basɛ a be’em, Yehowa wan soŋɛ en yoi? Ɛ̃ɛ, sɛla n sɔi la Isaiah 55:7 yeti, ‘Basɛ ti putɔya la basɛ a sɔya la ti be’emdaana la me tee a puti’irɛ. Basɛ ti a lebe Yehowa zɛ’an, eŋa n wan zɔ a nimbũ’ɔ. A wa’an to Naayinɛ la zɛ’an ge a wan di sugeri bo en ti la gaŋɛ.’ Bala la tiregɛ la ho paŋa za’a ti ho le wa’ana pu’usa Yehowa!

20. To san tɔɣesa nadoma sɛba n yuun tari yelemɛŋɛrɛ bɔ’ɔra Yehowa la, Yehowa wan geele to la wani?

20 To zamesɛ la bem Israel nadoma la zɛ’an? To wan ta’an ana wuu nadoma sɛba n yuun tari yelemɛŋɛrɛ bɔ’ɔra Yehowa la, to san pu’usa Yehowa la to suure za’a. Basɛ ya ti to nyɔɣɛ yɛm to tuure poan, basɛ to be’em ge me ni to’e ka’aŋɔ. Basɛ ya ti to tɛ̃ra ti la yele pakɛ mɛ ti to pu’usa yelemɛŋɛrɛ Naayinɛ la ma’a. Ho san kɔ’ɔn tara yelemɛŋɛrɛ bɔ’ɔra Yehowa, a wan geele ho ti ho dela tontɔɔdaana.

TO WAN EŊƐ LA WANI TA’AN . . .

  • pu’usa Yehowa la to suure za’a?

  • basɛ ti la niɛ peelumi ti to basɛ to be’em?

  • pu’usa Yehowa sore sɛka n nari poan?

YUUNƐ 45 The Meditation of My Heart (Mam N Ti’iseri Sɛla N Suuren)

a Zaseŋɔ wa poan, yelesum la n de “Israel Nadoma” la, dela nadoma la za’a n yuun tabelɛ bisera Yehowa nɛreba la. La ka pakɛ nyaa ba yuun biseri la Yuda buuri bayi sɔ’ɔlum la, bii Israel buuri pia sɔ’ɔlum la, bii buuri pia la bayi sɔ’ɔlum la za’a.

b YELESUM VUURƐ: Baabule la san dekɛ yelebire la n de “suure” tum tuuma, la pa’alɛ la nɛra n ani se’em a suuren sa, maɣesɛ wuu eŋa n boti sɛla, a puti’irɛ, a halɛ, eŋa n wan ta’an eŋɛ sɛla, la eŋa n boti a eŋɛ sɛla.

c Diimi sa la, nadoma sɛba n yuun daɣɛ Israel buuri la yuun san ni zabɛ nyaŋɛ tiŋa, ba yuun ni kaabera la tiŋa la baɣa.

d Naba Asa yuun tum la be’em kãra. (2 Yel. 16:​7, 10) Ge Baabule la yeti, Asa yuun tum la sɛla n ani soŋa Yehowa nɛŋan. Yia la, a yuun ka nam bo ka’aŋɔ ge daanse’ere pooren, a yuun tee a puti’irɛ mɛ. Yele la dela, a yuun tum tuunsoma zo’e zo’e gana a tuunbe’ero mɛ. Asa yuun pu’useri la Yehowa ma’a ge me yuun tiregɛ ti a yese baɣa kaabegɔ a sɔ’ɔlum la poan.—1 Na. 15:​11-13; 2 Yel. 14:​2-5.

e To baŋɛ ti pu’usegɔ yele pakɛ Yehowa mɛ. Bala n sɔi ti Moses Lɔɔ la poan, nɔya ayi la n deŋɛ nɛŋa la yuun pa’alɛ ti ba pu’usa Yehowa ma’a.—Yɛh. 20:​1-6.

f FOOTE LA VUURƐ: Keema n de bunbilepaalega n yele mabia ti a bisɛ amea soŋa la eŋa n nyuuri a daam se’em la. Mabia la sirege amea mɛ to’e ka’aŋɔ la, eŋɛ teere ge kɔ’ɔn pu’usa Yehowa soŋa.

    Frafra Gɔnɔ (2000-2025)
    Yese
    Yu'ɛ
    • Farefare
    • Tɔ̃rɛ
    • Hon boti sɛla
    • Copyright © 2025 Watch Tower Bible and Tract Society of Pennsylvania
    • Yelese'a N Nari Ti Ho Mina
    • Suɣelum Yɛla
    • Privacy Settings
    • JW.ORG
    • Yu'ɛ
    Tɔ̃rɛ