N Basɛ Loore Tukere?

Ba me fabeli ho loore tukere yele mɛ? La san dɛna bala, bem n wan soŋɛ hɔ ti ho ta’an kɔ’ɛ ho puti’irɛ soŋa loore tukere poan?

Tisi ase’a poan, dɔlebadoma san paɛ yuuma ase’a, la ni dɛna la ba keŋɛ dɔgeta zɛ’an ti a bo ba gɔŋɔ n pa’alɛ ti ba wan ta’an kelum tukera loore. Kristakɔma san kɛ̃’ɛra tin-ana poan, la nari ti ba nana tiŋa la kpɛ’ɛndoma. (Arom 13:1) Hali ho tiŋa la san ka tara lɔɔ kaŋa taaba, ho ta’an dekɛ pa’alegɔ ase’a bisɛ nyaa la nari ti ho kelum tukera.

MALUM BISƐ HON TUKERI SE’EM LA

Wuu National Institute on Aging (NIA) n boi United States intanɛt tuuma zɛ’an n pa’alɛ se’em la, ho ta’an soke homea soke ana wa:

• La kpe’em bo mam mɛ ti n kaalɛ road signs bii n ka nyɛti soŋa yu’uŋɔ?

• Mam kelum ta’an ŋmɛresa bisera loore la biseŋadoma la?

• Mam ni ta’an eŋɛ kalam tɛ̃ra accelerator, la brake n boi zɛ’an?

• Mam ba’ɛ tukera la bãla bãla ti la giŋera lɔa zo’e zo’e?

• Mam ni gee fii la n dekɛ n loore la ta ŋmɛ sɛla, bii mam tabelɛ dekɛ n loore la ta ŋmɛ la sɛla ti la ŋmɛɣelɛ ge me kɔ̃ kɔ̃?

• Puliŋa tabelɛ gu mam la mam n tukeri se’em la zuo?

• Mam tabelɛ zɔɣera ge tukera?

• Mam nyuuri tiim n wan ta’an daam mam n loore tukere la poan?

• Mam yidoma la mam zɔdoma fabeli mam yele la mam n tukere la?

Sokere wa ayima bii bayi san dɛna ɛɛ, la wan nara ti ho eŋɛ teere ase’a. Makerɛ, ho ta’an tukera maɣesa, yele yele wuu yu’uŋɔ. Saŋa woo ni ma’ɛ homea bisɛ hon tukeri se’em la. Ho ta’an yele ho yidoma bii ho zɔdoma ti ba pa’alɛ hɔ bamam n ti’isɛ se’em ho loore tukeri la poan. Ho me ta’an keŋɛ sukuu ta zamesɛ ban tukeri se’em pa’asɛ. Ge sokere wa zo’e zo’e san dɛna ɛɛ, la wan ana soŋa ti ho basɛ loore tukere.a

TARA BAABULE NARESUM YƐLA TUNA TUUMA

To ta’an kan baŋɛ ti to ka le mina loore tukere soŋa soŋa. La ta’an kpe’em bo to mɛ ti to basɛ loore tukere. Ge bem Baabule naresum yɛla n wan ta’an soŋɛ hɔ ti ho bisɛ yele la soŋa ge kɔ’ɛ ho puti’irɛ? To geele ya yɛla ayi wa.

Kelum siregera homea. (Mag. 11:2) To san kuregera, to nini ka le nyɛta soŋa, to toba ka le wuna soŋa, ti to paŋa me ba’asera. Makerɛ, nɛreba zo’e zo’e ni basɛ de’eŋo ase’a mɛ se’ere n sɔi la, ban kuregɛ la zuo ba ka yaɣeseri ge pɔɣelena. To ta’an dekɛ putɛdena mea nɔɔ tum tuuma loore tukere poan. Nɛra ta’an bisɛ ti lan paɛ beense’ere la, a wan basɛ loore tukere amea som zuo. (Mag. 22:3) Nɛreba me san yele en ban nyɛ sɛla a loore tukere la poan, a wan sirege amea sakɛ.—Dekɛ makɛ 2 Samuel 21:​15-17.

Da tara taalɛ. (Tɛɛ. 22:8) Nɛra san ka mina loore tukere soŋa, a wan ta’an pɔɣelum amea bii ku nɛra. Nɛra san ka ta’an tukera soŋa ge kelum tukera, eŋa la nɛreba vom boi la dɛŋa poan. Ho me san ku nɛra, ho tari taalɛ.

Da ti’isa ti nɛreba kan le bɔ’ɔra ho gilema ho san basɛ loore tukere. Yehowa nɔŋɛ ho mɛ ge ti a puurɛ me wan pee a san baŋɛ ti ho mi ho tɔregɔ beene, ho siregeri homea ge me ti’isa nɛreba vom yele. A yeti a wan soŋɛ hɔ ge buɣelɛ ho suure. (Isa. 46:4) A kan malum basɛ hɔ. Bala la, zusɛ en ti a bo ho yɛm la bɔkerɛ ti ho ta’an baŋɛ nyaa ho basɛ loore tukere bii ho da basɛ.