Kɔ’ɔn Tara Pupeelum Ho San Bisera Nɛra

1-2. La ani Yehowa la wani la sɛba n biseri ba nɛreba la? (Magaha 19:17) (Bisɛ fɔɔra la.)

Mabia ayima n ze’ele Korea ti a yu’urɛ dɛna Jin-yeol yeti, “Mam n di n pɔɣa yuun 32 n wana. Yuuma anuu n wana ti mam bisera en. Bãyaalega n yuun nyɔkɛ en ti a puɣum kan ta’an isige. Mam nɔŋɛ n pɔɣa mɛ. Mam puurɛ me pee mɛ la mam n biseri en la. Yu’uŋɔ woo la ni dɛna la a gã’arɛ bã’ara gɔregɔ zuo. Mam ni gã’arɛ lɛm en mɛ ge ti to gĩ taaba nu’usi.”

² Hon dela mina n biseri nɛra, maɣesɛ wuu ho dɔɣera, ho luɣerɛ kpɛ’a, ho bia bii ho zɔ? La san dɛna bala, ho puurɛ pee mɛ la hon nɔŋɛ en ge soŋera en se’em la. Hon biseri ho nɛra la, ho iti pa’ala ti ho tari la nɔŋerɛ bɔ’ɔra Yehowa. (1 Tim. 5:​4, 8; Yam. 1:27) Ge to mi ti la daɣɛ naana ti ho bisera ho nɛra la. Saŋa ase’a, la ta’an ni kpe’em bo ho mɛ ge ti nɛra ka mina. Tɛm busebo ho ta’an ni ti’isa ti hon ma’a n nameseri. Nɛreba ni nyɛ ho ti ho la’ara la mɔsi mɔsi ge ba ka mi ti saŋa ase’a, ho suure n ni sa’am. (Ym. 6:6) La boi bim ti nɛreba ka nyɛti yelese’a n paari ho la ge Yehowa nyɛti. (Dekɛ makɛ Yɛhega 3:7.) Hon kuuri homea ge ti ho nintam sigera la dela tuulum bɔ’ɔra Yehowa. (Ym. 56:8; 126:5) A nyɛti hon tiregeri ita yelese’a woo ti ho soŋɛ ho nɛra la mɛ. Yehowa yeti, ho san bisera ho nɛra, ho iti la som bɔ’ɔra eŋa ge ti a me wan kã bo ho.—Kaalɛ Magaha 19:17.

3. Beni n sɔi ti la yuun wan ta’an kpe’em bo Abraham la Sarah ti ba bisera Tera?

³ Baabule la tɔɣɛ la nɛreba zo’e zo’e n yuun biseri ba nɛreba se’em. Makerɛ dela Abraham la Sarah. Ban yuun yese Ur tiŋa la, ba sɔ Tera yuun dela yuun 200. La boi bim ti Tera yuun kuregɛ mɛ ge a yuun doose ba mɛ keŋɛ. Ba yuun keŋɛ paɛ wuu kilometer 960 (mɛɛla 600) ta paɛ Haran. (Pin. 11:​31, 32) Nɔkpe’ene kai ti Abraham la Sarah yuun nɔŋɛ Tera mɛ ge ti’isɛ bisɛ ban yuun boi sore zuo la, lan yuun wan kpe’em se’em bo ba ti ba bisera buranya’aŋa wa. Daanse’ere ba yuun bã la yuɣema bii bosi. Wana wa yuun ta’an basɛ ti la kpe’em bo Tera n kuregɛ la mɛ. Ba yuun ta’an ni taregɛ mɛ saŋa ase’a hali ta bãlɛ za’a. La yeen dɛna se’em, Yehowa yuun bo ba la pansɛka ti ba ɛɛra. Wuu Yehowa n yuun soŋɛ Abraham la Sarah se’em la, a me wan soŋɛ hɔ ti ho tara paŋa ta’an bisera ho nɛra la.—Ym. 55:22.

4. To wan sɔsɛ la bem zaseŋɔ wa poan?

⁴ Ho san tara pupeelum, la kan kpe’em bɔ’ɔra hɔ ti ho kelum bisera ho nɛra la. (Mag. 15:13) Ho wan ta’an kelum tara pupeelum hali bɔŋa la san kpe’em bo ho. (Yam. 1:​2, 3) Ho wan eŋɛ la wani ta’an kelum tara pupeelum? Sore deyima dela ho dekɛ homea delum Yehowa ge zusɛ en ti a soŋɛ hɔ ti ho tara putɛsonɛ. Yɛla ase’a me n boi ti ho san ita, ho wan kelum tara pupeelum. Zaseŋɔ wa poan to wan sɔsɛ yele ana. Yia la, basɛ ya ti to sɔsɛ ya sɛba n bisera ba nɛreba la n wan eŋɛ se’em kelum tara pupeelum la yelese’a n wan ta’an sa’am ba pupeelum la.

LA TA’AN KPE’EM BO HO TI HO TARA PUPEELUM HO SAN BISERA NƐRA

5. Beni n sɔi ti sɛba n biseri ba nɛreba la nara ti ba kelum tara pupeelum?

⁵ To san bisera nɛra ge ka tara pupeelum, bala ta’an basɛ ti tɔregɔ paɛ tɔ. (Mag. 24:10) To me san taregɛ, la ta’an kpe’em bo to ti to soŋera ba wuu ton puɣum ita se’em la. Bem yɛla n wan ta’an sa’am sɛba n biseri ba nɛreba la pupeelum?

6. Beni n sɔi ti tɔregɔ ni paɛ sɛba n biseri ba nɛreba la?

⁶ Tɔregɔ. Mabipɔka ayima yu’urɛ n de Leah yeti: “Ho san bisera ho nɛra, la ni basɛ ti tɔregɔ n paara hɔ, hali dabeserɛ la san puɣum ana soŋa. Dabeserɛ la ba’asegɔ poan, mam ni ka le tara paŋa. Nɛra san tɛɣesɛ sɛla bo mam, saŋa ase’a mam ni ka tara paŋa ti n me tɛɣesɛ bo en.” La ni kpe’em bo basɛba mɛ ti ba gisa soŋa bii ba vɔ’ɔsa. Mabipɔka ayima yu’urɛ n de Inés yeti: “Mam ka ta’an gĩsera zɔ’ɔra. Mam ni isigera la awa ayi woo yu’uŋɔ bisera n danyaama. Yuuma zo’e zo’e n wana ti mam la mam sira ka ta’an keŋɛ zɛ’an.” Ba san ni beem basɛba ti ba wa’ana de’em bii ba bo ba la Tiokrasi tuuma, ba ni zaɣesɛ mɛ ban biseri ba nɛra la zuo. Bala la, ba ta’an ti’isa ti ba boi la ba ma’a, ka tara ŋmɛregerɛ zɛ’an.

7. Beni n sɔi ti nɛresɛba n biseri ba nɛreba la suure ni ta’an sa’am?

⁷ Sɛba n biseri ba nɛreba la suure ta’an sa’am. Mabipɔka Jessica yeti: “Mam ni bɔta la n tum zo’e ta’an bisera n sɔ. Bala la, mam suure n ni sa’am la mam n ni vo’ose fii la.” Basɛba ta’an ti’isa ti bamam ka ta’an tuna zɔ’ɔra soŋera sɛba ti ba bisera la. Saŋa ase’a me ba ta’an ti’isa ti bamam kan ta’an le bisera nɛra la. Ba san taregɛ, ba ta’an tɔɣɛ bii eŋɛ sɛla n ka nari. Yele ana za’a ta’an ni basɛ ti ba suure sa’am. (Yam. 3:2) Basɛba me suure ni sa’am mɛ ba san baŋɛ ti ba nɛra la ti ba bisera la, teere ka boi. Mabipɔka ayima yu’urɛ n de Barbara yeti: “Mam suure ni sa’am mɛ, mam san baŋɛ ti nɛra la ti mam bisera la bã’a la kɔ’ɔn gaŋera la nu’usi daarewoo.”

8. La ni ana sɛba n biseri nɛreba la wani nɛreba san pɛ̃ɣɛ ba la ban soŋeri ba se’em la.

⁸ Basɛba ti’isɛ ti nɛreba puurɛ ka pee la ba tuunɛ la. Bem zuo? Sɛla n sɔi la nɛreba zo’e zo’e ka pɛ̃ɣeri ba bii pu’usa ba la ban kuuri bamea tuna se’em la. Nɛra san yele sɛla pɛ̃ɣɛ hɔ, la ni kpemese la ho giila. (1 Tes. 5:18) Mabipɔka ayima yu’urɛ n de Melissa yeti: “Saŋa ase’a mam giila n ni kɔ’ɔsɛ ti mam kaasa. Ge mam n biseri sɛba la ni san yele mam yeti, ‘Mam pu’usɛ ya la hon eŋɛ sɛla bo mam la,’ mam inya n ni kpeŋe! Ba san yele mam bala, mam ni gã’arɛ isige la kain, kɔ’ɔn le bɔta ti n tum n tuuma leyɛ’ɛsa.” Mabia Ahmadu tɔɣɛ pa’alɛ nɛreba n ni pɛ̃ɣera en ti la ana en se’em. Eŋa la a pɔɣa n biseri ba suɔ bipugela n luti kinki’ire. A yeti: “La boi bim ti a ka bɔkɛ tomam n kuuri tomea se’em bisera en la ge eŋa n ni yeti a nɔŋɛ to mɛ la ni basɛ ti mam puurɛ pee mɛ paa.”

TON WAN EŊƐ SE’EM KELUM TARA PUPEELUM

9. Se’em n biseri nɛra wan eŋɛ la wani pa’alɛ ti a mi a tɔregɔ beene?

⁹ Mina ho tɔregɔ beene. (Mag. 11:2) To za’a ka tari tɛm bii paŋa zo’e zo’e. Bala la, la nari ti ho kɔ’ɛ ho puti’irɛ doose la hon wan ta’an yelese’a eŋɛ. Saŋa ase’a me ho kan ta’an tum sɛla woo ti nɛreba bɔta ti ho tum la. Bɔkerɛ boi bim! La pa’alɛ ti ho mi la ho tɔregɔ beene. Nɛreba san yeti ba soŋɛ hɔ, bo ba yɔ’ɔ ti ba soŋɛ hɔ. Mabia ayima yu’urɛ n de Jay yeti: “To kan nyaŋɛ tum sɛla woo buyina. Ho san mina ho tɔregɔ beene ge ka tum zɔɛ ho paŋa, ho wan tara pupeelum.”

10. Beni n sɔi ti la yele pakɛ ti sɛba n biseri nɛreba la tara bɔkerɛ? (Magaha 19:11)

¹⁰ Tara bɔkerɛ. (Kaalɛ Magaha 19:11.) Ho san bɔkera yɛla soŋa, bala wan soŋɛ hɔ ti ho ta’an nyɔkera homea ti ho sunsɔa kan nyiira atɔtɔ. Nɛra n bɔkeri yɛla ni ti’isɛ baŋɛ la sɛla n sɔi ti nɛra ita yɛla ase’a. La dela yelemɛŋɛrɛ ti bã’asi ase’a ta’an basɛ ti nɛra ita yɛla ti to ka bɔkera. (Pa. 7:7) Makerɛ, nɛra n mi guŋerɛ ge tara itisoŋɔ nyaa ta’an ŋmɛ̃’ɛra nɔkpe’ene. Bii a ta’an dɛna se’em n nyaa nyɔni nɛreba ti a sunsɔa ka yaɣeseri ge nyiira. Ho san bisera nɛra n bɛ̃’ɛri paa, la wan ana soŋa ti ho mina bã’a la n ani se’em. Ho san baŋɛ a bã’a la n ani se’em, ho wan bɔkɛ sɛla n sɔi ti nɛra la ana bala.—Mag. 14:29.

11. Sɛba n biseri ba nɛreba la nari ti ba tuna la bem ninmu’urɛ tuuma dabeserɛ woo poan? (Yooma 132:​4, 5)

¹¹ Nyɛta nɛŋa ta’an basɛ ti hon la Yehowa bɔŋa la kpe’em. Saŋa ase’a la ni nara ti ho dekɛ yɛla ase’a basɛ ta’an tuna ‘ninmu’urɛ tuuma’ la. (Flp. 1:10) Ninmu’urɛ tuuma la ayima dela hon wan basɛ ti hon la Yehowa bɔŋa la kpe’em. Naba David yuun basɛ ti Yehowa pu’usegɔ dɛna la ninmu’urɛ bɔ’ɔra en. (Yooma 132:​4, 5.) Bala la, la yele pakɛ mɛ ti ho nyɛta nɛŋa dabeserɛ woo poan kaala Baabule la ge zusa. Mabipɔka ayima yu’urɛ n de Elisha yeti: “Mam san zusɛ Yehowa, kaalɛ yooma gɔŋɔ la ge ti’isa taɣesa mam kaalɛ sɛla la, bala ni basɛ ti mam puurɛ pee mɛ ge ti la ana mam mama. Zusega dela sɛla n kɔ’ɔn soŋera mam paa. Mam ni kɔ’ɔn zusa tabela mɛ dabeserɛ la poan, bala n soŋɛ ti la ana mam mama.”

12. Beni n sɔi ti sɛba n biseri ba nɛreba la nara ti ba nyɛta nɛŋa bisera ba imma’asum yɛla?

¹² Nyɛta nɛŋan bisera ho imma’asum yɛla. La ta’an kpe’em bo sɛba n biseri ba nɛreba la ti ba dita dinɔ’ɔma se’ere n sɔi la ba ka nyɛti nɛŋa n wan keŋɛ ta da zɛma’asa duɣɛ dia soŋa. Ba san dita dinɔ’ɔma ge kpɛmesa ba giila, bala wan basɛ ti ba tara imma’asum soŋa. Bala la, la boi bim ti ho ka tari saŋa ge tiregɛ dita dinɔ’ɔma ge me kpɛmesa ho giila daarewoo. (Ep. 5:​15, 16) Leyɛ’ɛsa, tiregɛ gisa soŋa soŋa. (Pa. 4:6) Gɔnmi’ileba n zamesɛ zuputo la n tuni se’em la yeti, gɔɔm soŋeri mɛ ti zuputo la malum maala ge tuna soŋa. Asibitin gɔŋɔ ayima yeti, nɛra san gisera soŋa soŋa, a kan ba’ɛ fabela ge me wan ana bãalam yeletooro poan. La me nari ti ho nyɛta saŋa dɛ’ɛna. (Pa. 8:15) Mabipɔka ayima tɔɣɛ pa’alɛ sɛla n basɛ ti a kelum tara pupeelum. A yeti: “Mam san bisɛ ti weather la pilige ya ti la ana soŋa, mam ni yese la yiŋa ta ɛɛra kaara. Mam me ni dekɛ la daanyinɛ ŋmarega woo poan ta naɛ la n zɔ ti to keŋɛ ta de’em.”

13. Beni n sɔi ti la yele pakɛ ti to la’ara? (Magaha 17:22)

¹³ Ita yelese’a n wan basɛ ti ho la’ara. (Kaalɛ Magaha 17:22; Pa. 3:​1, 4) Ho san la’ara, la basɛ ti ho tara la imma’asum. Ho san bisera nɛra, daɣɛ saŋa woo ti yɛla wan kɔ’ɔn kena ma’a ma’a bɔ’ɔra hɔ. Ge ho san dekɛ dɛ ti la dɛna yelɔ’ɔrɔ, bala kan basɛ ti ho suure ba’ɛ sa’am. Ho san ita yelese’a n wan basɛ ti hon la se’em ti ho bisera la la’ara, bala wan basɛ ti ya zɔtɔ nyɔka la kpe’em.

14. Ho san tɔɣɛ bo ho zɔsonkɔ, la wan soŋɛ ho la wani?

¹⁴ Tɔɣɛ bo ho zɔsonkɔ. Ho san puɣum tiregera ti ho tara pupeelum, saŋa ase’a ho suure ta’an ni sa’am. La san ana ho bala, ho ta’an tɔɣɛ bo ho zɔsonkɔ n wan kelese ho ge kan zɛregɛ hɔ. (Mag. 17:17) Eŋa n wan kelese ho ge tɔɣɛ sɛla la ta’an kpemese ho giila ti ho le tara pupeelum.—Mag. 12:25.

15. Ho san ti’isa beere sa’am puti’irɛ la yele, la wan basɛ ti ho tara pupeelum la wani?

¹⁵ Ti’isɛ bisɛ ho vom n wan ana se’em Paradiisi poan. Tɛ̃ra ti hon biseri ho nɛra la, la kan ana bala wuusa. Yehowa yuun ka boti asaala tuna tuun-ana taaba. (2 Ko. 4:​16-18) “Vom sebo n ka [tari] ba’ahegɔ” la wan ta bɔna beere sa’am. (1 Tim. 6:19) Ho puurɛ me wan pee ho san naɛ la ho nɛra la sɔsera yan wan ta ita sɛla paradiisi poan. (Isa. 33:24; 65:21) Mabipɔka ayima yu’urɛ n de Heather yeti: “Mam ni yɛta sɛba ti mam bisera la ti to wan ta laɣum ɛɛra dɛ’ɛna, pɛ’ɛra ge me bã’ara keekee. To wan duɣera ge maala boroboro bɔ’ɔra to nɛresɛba ti ba wan isige ba la. To ni laɣum pu’usɛ la Yehowa la ton tari beere sa’am puti’irɛ la.”

NƐREBA N WAN TA’AN SOŊƐ HO SE’EM

16. To wan ta’an soŋɛ sɛba n biseri ba nɛreba la wani? (Bisɛ foote la.)

¹⁶ Soŋɛ sɛba n biseri ba nɛreba la ti ba nyɛta nɛŋa vɔ’ɔsa. Mabiisi ta’an soe bisera ho nɛra la bɔ’ɔra hɔ. To san ita bala, la wan soŋɛ ti ba nyɛta nɛŋa vɔ’ɔsa ge me ita yelese’a n pakɛ ba. (Ga. 6:2) Mabiisi basɛba ni gulesɛ la dabese’a ti mabiisi wan nyaŋɛ soŋɛ ba bakwai woo poan biŋe. Mabipɔka Natalya n biseri a sira n ka ta’an kena yeti: “Mabia ayima n boi to tansugere la poan ni dekɛ la daayinɛ bii dabesa ayi bakwai la poan wa’ana bisera mam sira. Ba ni laɣum mɔɔla mɛ, sɔsera ge me bisera sinii. Ban ni naɛ taaba ita yelese’a la ni basɛ ti mam sira puurɛ pee mɛ ge me ni bo mam yɔ’ɔ ti n ta’an vo’ose ge me ita yelese’a n pakɛ mam.” Mabiisi basɛba me ta’an eŋɛ maaseŋɔ ta tee soe bisera nɛra la yu’uŋɔ la wan eŋɛ se’em ti mabia la ta’an gise soŋa.

17. To wan ta’an soŋɛ sɛba n biseri ba nɛreba la wani tansugere zamesegɔ poan?

¹⁷ Soŋɛ sɛba n biseri ba nɛreba la tansugere zamesegɔ poan. Sɛba n biseri ba nɛreba la ka nyɛti nyuurɔ zo’e zo’e tansugere zamesegɔ, gingilega laɣesegɔ la tinkãtɛ laɣesegɔ poan sɛla n sɔi la ba mu’ɛ la nini bisera ba nɛra la. Mabiisi ta’an zĩ’ire lɛm mina n biseri a nɛra la laɣum soŋera en tansugere zamesegɔ bii laɣesegɔ ase’a poan. La san dɛna ti se’em ti ba bisera la kan ta’an keŋɛ ge bɔna la yire, ho ta’an keŋɛ ta soe mina n biseri nɛra la ti eŋa me keŋɛ zamesegɔ ge ti ho kɔnɛktɛ zamesegɔ la ti hon la mina n boi yire la kɛlesa.

18. To wan ta’an le eŋɛ la bem soŋɛ sɛba n biseri ba nɛreba la?

¹⁸ Pɛ̃ɣɛ sɛba n biseri ba nɛreba la ge zusɛ bo ba. Keendoma la ta’an kena kaara sɛba n biseri ba nɛreba la tabela. (Mag. 27:23) La ka pakɛ la to bɔŋa la n ani se’em, to za’a waabi wan ta’an pɛ̃ɣɛ sɛba n biseri ba nɛreba la. To wan ta’an zusɛ Yehowa ti a kelum bɔ’ɔra ba paŋa ge me soŋera ba ti ba kɔ’ɔn tara pupeelum.—2 Ko. 1:11.

19. To wan ta nyɛ la bem beere sa’am?

¹⁹ La kan yue, Yehowa wan duuse to nintam basɛ ge ti induma kan le bɔna. Bã’asi la kum kan le bɔna. (Lil. 21:​3, 4) “Wɔbehe nama wan tɛɛn te ba ɛngera kiha wo walega la.” (Isa. 35:​5, 6) To san ni bisera to nɛra n kuregɛ bii n bɛ̃’ɛri, la ni dɛna la tɔregɔ bɔ’ɔra tɔ ge sankaŋa la, to “kan le tɛnra yele kɛgehe la yele.” (Isa. 65:17) Hali la nananawa ti to nan gura tinpaalega la, to mi ti Yehowa kan malum basɛ tɔ. To san kelum dekɛ tomea delum en ti a bɔ’ɔra to paŋa, a wan soŋɛ tɔ ti to “ta’an din’inha suunre ŋmebera yele woo poan . . . [ge] me wan tara popeelom.”—Kol. 1:11.