Yezu Dela Malema Nɛŋadaana N Tari Giile

1-2. (a) Bem zuo ti Yehowa yuun tum a Dayɔa tinparɛ wa zuo na? (b) To wan sɔsɛ la bem zaseŋɔ wa poan? (Hebru 5:​7-9)

LA PAƐ wuu yuun 2,000 n tole ti Yehowa tum a Dayɔba’arɛ tinparɛ wa zuo. Bem zuo? Sɛla n sɔi la a yuun wa’ana ti a faaɛ la asaala be’em la kum poan basɛ ge malum maalɛ sɛla ti Sitaana sa’am la. (Yon 3:16; 1 Yo. 3:8) Yehowa yuun mi ti Yezu n yuun tabelɛ bɔna wuu asaala la dela mina n tari giile ge me dɛna Malema Nɛŋadaana n tari nimbɔzore bɔ’ɔra tɔ. Yezu yuun pɔsɛ dɛna Malema Nɛŋadaana la se’em ma’a ti a yuun muse ko’om yuun 29 Y.B.a

² Zaseŋɔ wa poan, to wan zamesɛ baŋɛ Yezu n yuun boi tinparɛ wa zuo la n soŋɛ en se’em ti a ta’an dɛna Malema Nɛŋadaana n tari giile. La yele pakɛ mɛ ti to bɔkɛ bala soŋa sɛla n sɔi la, to san baŋɛ bala la kan kpe’em bo to ti to zusa Yehowa ge ana du’a du’a la en yele yele wuu to giila san kɔ’ɔsɛ la ton tuuri se’em la.—Kaalɛ Hebru 5:​7-9.

NAAYINƐ DAYƆBA’ARƐ WA’AN TINPARƐ WA ZUO NA

3-4. Yezu yuun eŋɛ la bem teere ge nyaa wa’an tinparɛ wa zuo na?

³ To zo’e zo’e eŋɛ la teere ase’a to vom poan. Makerɛ, to daa basɛ la to yɛa, to yidoma la to zɔdoma ge tee keŋɛ ta bɔna zɛ’an. Teere ana wa ta’an kan dɛna naana. Ge asaala ka tabelɛ eŋɛ teere ti la paɛ Yezu. Eŋa n yuun de maleka sɛka n de nɛŋadaana ge me tara kpe’eŋo gana malesi la woo. Yehowa yuun nɔŋɛ en mɛ paa ge ti a puurɛ me yuun pee sɛla n sɔi la eŋa la a Sɔ la n laɣum tuna. (Ym. 16:11; Mag. 8:30) Ge Filipi 2:7 yeti a yuun yese la a suuren “dekɛ sɛla woo te a tara la bahɛ.” A yuun dekɛ eŋa n tari kpe’eŋo se’em saazuo sa la basɛ mɛ ge wa’an tinparɛ wa zuo na naɛ la asaala n ka di mi’a bɔna.

⁴ Le ti’isɛ bisɛ Yezu vom n yuun pɔsɛ se’em tinparɛ wa zuo. Yezu dɔɣereba yuun dela nasedoma. Ton eŋɛ se’em baŋɛ bala dela a dɔɣereba yuun dekɛ la niisi piɣisi bayi ma’a eŋɛ kaabegɔ ban yuun dɔɣɛ en la. (Mal. 12:8; Lu. 2:24) Naba Herod n yuun baŋɛ ti ba dɔɣɛ Yezu la, a yuun kɔ’ɔn tiregera mɛ ti a ku en. Ban yuun boti ba gu ti Herod da paɛ bia wa la, ba yuun zɔ keŋɛ ta suɣɛ la Egypt saŋa fii poan. (Mt. 2:​13, 15) Yezu vom n yuun ani se’em tinparɛ wa zuo la yuun boi la de to’ore la eŋa n yuun boi saazuo la!

5. Yezu yuun nyɛ la bem tinparɛ wan zuo ge sɛla ti a nyɛ la yuun soŋɛ en la wani ti a ta’an dɛna Malema Nɛŋadaana? (Bisɛ foote la.)

⁵ Yezu n yuun boi tinparɛ wa zuo la, a yuun nyɛ nɛreba zo’e zo’e n nameseri se’em mɛ. Yezu yuun mi nɛra suɔ n ni ki ti la ana en se’em. Se’em ma’a ti a yuun bɔna tinparɛ wa zuo la, nɔkpe’ene kai ti nɛreba zo’e zo’e ti a yuun mina n ki. Yezu na’am mɔɔlegɔ tuuma la poan a yuun nyɛ nɛreba n de fɔɔsi, konkɔma la kɔɔrenɔ, ti sɛba kɔma me yuun ki ti a tara ba giile. (Mt. 9:​2, 6; 15:30; 20:34; Mr. 1:​40, 41; Lu. 7:13) La dela yelemɛŋɛrɛ ti Yezu n yuun boi saazuo sa la, a yuun nyɛti nɛreba n nameseri se’em. Ge eŋa n yuun de asaala bɔna tiŋa wa zuo la, a yuun bɔkɛ lan ani nɛreba se’em ti ba namesa la. (Isa. 53:4) Yelese’a ti Yezu yuun nyɛ la soŋɛ en mɛ ti a bɔkɛ lan ani nɛreba se’em la yeletooro se’a n paari ba ti ba suure ni sa’am la. Wuu asaala la, Yezu me yuun ni taregɛ mɛ ti la wuna en ge ti a suure sa’am.

YEZU YUUN TARI LA NƐREBA GIILE

6. Nɔdɛ’ɛsa Isaiah n yuun dekɛ maɣesa tum tuuma se’em la pa’alɛ ti Yezu tari giile la nimbɔzore la wani? (Isaiah 42:3)

⁶ Yezu na’am mɔɔlegɔ tuuma la poan, a yuun tari la tarendoma giile. Eŋa n yuun iti bala la basɛ ti Baabule yetɔɣebiŋ’a n tum tuuma. Hebru gulesegɔ la poan, ba dekɛ sɛba n tari sakerɛ la makɛ la gaadin n ani mama bii tiisi n wɔɣɛ ge tara paŋa. (Ym. 92:12; Isa. 61:3; Yer. 31:12) Ge dekɛ nasedoma la tarendoma makɛ la mɔseko n ka tari paŋa, la kania bugum n ani lii. Ba za’a ka tari tuunɛ bɔ’ɔra nɛra. (Kaalɛ Isaiah 42:3; Mt. 12:20) Nɔdɛ’ɛsa Isaiah yuun dekɛ maɣesa wa pa’alɛ la Yezu n wan tara nɔŋerɛ la giile bɔ’ɔra sɛba ti nɛreba geele ba ti ba ka tari vuurɛ la.

7-8. Yezu yuun basɛ ti Isaiah yetɔɣebiŋ’a la tum tuuma la wani?

⁷ Matu yuun pa’alɛ ti Yezu yuun basɛ ti Isaiah yetɔɣebiŋere la tum la tuuma. A yuun gulesɛ yeti: “A kan kɔ’ɛ mɔseko n pon nyure bahɛ bii a kiŋɛ bugum sebo n dite finfiinhe bahɛ.” Yezu yuun tum la yelekiresi zo’e zo’e bo sɛba ti ba namesa ge vɛ̃ɣena ba, la sɛba n ka tari beere sa’am puti’irɛ la. Makerɛ, Yezu yuun ta seke la buraa ayima n tari konkom bã’a. Bã’a la zuo a yuun ka lɛni nɛreba. A yuun ka tari puti’irɛ ti a wan nyɛ tibegɔ bii a wan le naɛ la a yidoma la a zɔdoma bɔna. (Lu. 5:​12, 13) Yezu yuun le seke la buraa ayima n ka wuni ge me ka ta’an tɔɣera. Ti’isɛ bisɛ lan wan ana buraa wa se’em, a san nyɛ ti nɛreba sɔsera ge ti a ka bɔkera ban sɔseri sɛla la. (Mr. 7:​32, 33) Ge daɣɛ za’a n bala.

⁸ Yezu saŋa la, Yudadoma zo’e zo’e yuun ti’isɛ ti nɛra san bɛ̃’ɛra la dela amea be’em bii a dɔɣereba be’em n ta’asɛ. (Yon 9:2) Ban tari putɛbe’o wa zuo la, ba nɛ’ɛseri nɛresɛba n bɛ̃’ɛri la mɛ. Bala ni basɛ ti sɛba n bɛ̃’ɛri la suure n sa’am. Ge Yezu yuun tibɛ ba ge basɛ ti ba baŋɛ ti Naayinɛ fabeli ba yele mɛ. Wana wa me basɛ ti to tara suure lua la wani?

9. Hebru 4:​15, 16 tɔɣɛ pa’alɛ ti to saazuo Malema Nɛŋadaana la tari asaaleba giile la wani?

⁹ Kaalɛ Hebru 4:​15, 16. To mi ti Yezu wan kɔ’ɔn tara to giile. Bala vuurɛ? Nɛra n tari giile dela mina n nyɛ ti nɛra namesa ti la vɛ̃kɛ a suure. Greek yelebire la ti ba lerege ti “giile” la, vuurɛ dela nɛra n nyɛ ti la wuna nɛreba ti la daana en. La dela yelesonɛ ti to baŋɛ ti Paul dekɛ la Geek yelebire kaŋa mea nɔɔ tɔɣɛ Hebru 10:34 poan ti, to tara giile bɔ’ɔra sɛba n boi sarega la. To san ni kaalɛ Baabule la nyɛ Yezu n soŋɛ nɛreba se’em la, to ni baŋɛ ti a tari la nɛreba giile. A yuun ka yeen tibɛ nɛreba ge ti’isa ti la nari mɛ. A yuun tuɣum fabela la ba yele ge bɔta ti a soŋɛ ba. Makerɛ, Yezu n yuun tibɛ konkone la, a yuun ta’an ze’ele ni zazaarɛ tibɛ en ge a yuun tuɣum kalum buraa la mɛ. Daanse’ere pɔsega n bala ti nɛra tabelɛ kalum en yuuma zo’e zo’e poan! Yezu n yuun yeti a tibɛ gɔɔŋɔ la, a yuun tari en fɔregɛ la nɛrekuuŋɔ la zɛ’an ge nyaa ta tibɛ en. Pɔka la n yuun basɛ a be’em ge dekɛ a nintam pee Yezu nama la, Fariseedoma la yuun zeem en mɛ ge Yezu yuun tɔɣɛ po’e pɔka la mɛ. (Mt. 8:3; Mr. 7:33; Lu. 7:44) Yezu yuun ka nɛ’ɛseri sɛba n bɛ̃’ɛri la bii sɛba n tum be’em la. Ge a yuun tuɣum bɔta la ba wa’an a zɛ’an na ti a eŋɛ pa’alɛ ti a nɔŋɛ ba. To me tari suure lua ti a tari la to giile.

TƆƔESA TO MALEMA NƐŊADAANA LA ZINA BEERE WA

10. Ba maalɛ la bem zina beere wa ti la ta’an soŋɛ gɔɔnɔ la fɔɔsi? (Bisɛ fɔɔra la.)

¹⁰ Tomam n de Yezu podɔleba la, to tiregeri mɛ ti to tara nɔŋerɛ, nimbɔzore la giile bɔ’ɔra nɛreba. (1 Pe. 2:21; 3:8) La boi bim ti to kan ta’an tibɛ gɔɔŋɔ bii fɔa ge to wan ta’an soŋɛ ba ti ba vurege du Naayinɛ. Makerɛ, ba nyaa maalɛ la Baabule gɔnɔ zo’e zo’e gɔɔnɔ yetɔɣum n gaŋɛ 100 poan. Sɛba n ka nyɛti soŋa, la fɔɔsi me tari ba gɔnɔ n gaŋɛ yetɔɣum 60. Leyɛ’ɛsa, to vidiyodoma la tari kɔ̃a n tɔɣeri pa’ala sɛla n iti vidiyodoma la poan. Yetɔɣum n gaŋɛ 100 n ta’an ita bala. Gɔntuna wa soŋeri gɔɔnɔ la fɔɔsi ti ba ta’an vurege bamea du Yehowa la a Dayɔa la.

11. Yehowa tigere la eŋɛ la bem pa’alɛ ti ba ti’iseri nɛra woo yele wuu Yezu la? (Tooma 2:​5-7, 33) (Bisɛ fɔɔra la.)

¹¹ Yehowa tigere la kɔ’ɔn tiregera ti a soŋɛ la nɛra woo ti ba baŋɛ Yehowa. Tɛ̃ra ti Yezu kum isigeri la pooren, a yuun basɛ ti zilam vo’osum la sige nɛresɛba n yuun boi Pentekost de’eŋo la poan ti ba ta’an wum yelesoma la. Nɛra woo yuun wum ti ba “tɔgɔra la a teŋa yetɔgom.” (Kaalɛ Tooma 2:​5-7, 33.) Yezu n boi to nɛŋa la, a basɛ ti ba maala la Baabule gɔnɔ n gaŋɛ yetɔɣum 1,000. Yetɔɣum wa ase’a nɛreba ka zo’e. Makerɛ yetɔɣum ase’a n boi ti nɛreba fii n kɛ̃’ɛri North la South America tɔɣeri ba ge ba gulesɛ to gɔnɔ la yetɔɣum bana wa poan ti la gaŋɛ 160 ti nɛreba zo’e zo’e ta’an baŋɛ yelesoma la. Ba me gulesɛ to gɔnɔ la ti la bɔna Romany yetɔɣum n gaŋɛ 20 poan. Nɛreba tusa tusa n tɔɣeri yetɔɣum bana wa sakɛ yelemɛŋɛrɛ la mɛ ge nyaa pu’usa Yehowa.

12. Yehowa tigere la le ita la bem ti a soŋɛ nɛreba zina beere wa?

¹² Ton iti sɛla pa’asa ton soŋeri nɛreba ti ba zamesa yelemɛŋɛrɛ la dela, Yehowa tigere la le soŋera la nɛreba yeledi’ima poan. Mabiisi tusa tusa n kɔ’ɔn maasum soŋera mabisɛba ti yeledi’ima paɛ ba la. Tigere la me kɔ’ɔn mɛta la pu’usegɔ zɛ’ɛsi n makɛ ma’a bɔ’ɔra mabiisi ti ba ta’an laɣesa taaba pu’usa Yehowa.

TO MALEMA NƐŊADAANA LA TA’AN SOŊƐ HƆ

13. Yezu doli la sarɔtuni poan soŋera tɔ?

¹³ Yezu n de to dunkeensoŋa la zuo, a basɛ ti to nyɛta yelese’a woo n pakɛ tɔ ti to ta’an ana du’a du’a la Yehowa. (Yon 10:14; Ep. 4:7) Saŋa ase’a yelese’a n paari to la ta’an basɛ ti to giila kɔ’ɔsɛ ti to ana wuu kania bugum n diti fii fii bii mɔseko n nyure. Bã’asi, tomea tuure bii tomam la mabia n tari yele la taaba ta’an basɛ ti to giila kɔ’ɔsɛ. Yelese’a n paari tɔ la ta’an basɛ ti la kpe’em bo to ti to ka le ti’isa to beere sa’am puti’irɛ la yele. Tɛ̃ra ti Yezu nyɛti yelese’a n paari hɔ, a me bɔkeri lan ani ho se’em. Yezu n tari ho giile la zuo, a boti la a soŋɛ hɔ. Makerɛ, a ta’an basɛ ti a zilam vo’osum la bo ho paŋa se’em ma’a ti tɔregɔ paɛ hɔ. (Yon 16:7; Titus 3:6) Leyɛ’ɛsa, Yezu ta’an basɛ ti ‘keendoma’ la mabiisi la kpɛmesa ho giila ge soŋera hɔ.—Ep. 4:8.

14. To giila san kɔ’ɔsɛ to wan ta’an eŋɛ la bem?

¹⁴ Ho giila san kɔ’ɔsɛ, tɛ̃ra ti Yezu n de to Malema Nɛŋadaana. Ti’isɛ taɣesɛ bala vuurɛ n de sɛla bo ho. Tɛ̃ra ti Yehowa ka yeen tum en ti a wa’an tinparɛ wa zuo na ki bo to mɛ ge la tuɣum soŋɛ en ti a ta’an bɔkɛ yeledaaŋɔ se’a n paari asaaleba n ka di mi’a la. To san tum be’em bii to ani la buulegɔ ti to giila kɔ’ɔsɛ, Yezu kɔ’ɔn bɔta la a soŋɛ tɔ “to han ta bɔta soŋorɛ.”—Heb. 4:​15, 16.

15. Bem n soŋɛ nɛra n tabelɛ basɛ Yehowa pu’usegɔ ti a lebe na?

¹⁵ Yezu me le pa’ala a nɛreba ti ba ɛɛra sɛba n buregɛ la ti ba lebe Yehowa zɛ’an na. (Mt. 18:​12, 13) To bisɛ Stefano zi’irego poan yele wa.b Ban yese en tansugere la poan, yuun 12 pooren ti a nyaa keŋɛ zamesegɔ. A yeti, “La yuun daɣɛ naana bɔ’ɔra mam ge mam yuun boti la n le naɛ la mabiisi la pu’usa Yehowa. Keendoma la yuun zĩ’ire la mam mɛ ge basɛ ti la ana mam mama. Saŋa ase’a mam giila ta’an kɔ’ɔsɛ ti mam ni bɔta ti n basɛ Yehowa pu’usegɔ. Ge mabiisi la ni tiɛ mam ti Yehowa la Yezu boti la n ŋmibera. Ban yuun le to’e mam la, tansugere la za’a puurɛ yuun pee mɛ la mam la n yidoma. Pooren, mam pɔɣa yuun sakɛ mɛ ti ba zamesa en Baabule. To za’a nyaa dela mabiisi n pu’useri Yehowa.” To Malema Nɛŋadaana la puurɛ pee mɛ la mabiisi la n soŋeri sɛba n lebe na pu’usa Yehowa la!

16. Bem n basɛ ti ho puurɛ pee la hon tari Malema Nɛŋadaana n tari giile la?

¹⁶ Yezu n yuun boi tinparɛ wa zuo la, a yuun soŋɛ nɛreba zo’e zo’e mɛ sansɛka n nari poan. Zina beere wa, to me tari suure lua ti a wan soŋɛ tɔ se’em ma’a ti to ɛɛra soŋerɛ. Tinpaalega la poan, a wan soŋɛ tɔ ti to ana kasi ge ka le tara be’em. To pu’usɛ Yehowa la eŋa n nɔŋɛ tɔ ge dekɛ a Dayua n de Malema Nɛŋadaana n tari giile bo to la!