Kelum Tara Pupeelum Ho Kuregerɛ Poan

1-2. Yehowa geele a yamesi sɛba n kuregɛ la wani? (Yooma 92:​12-14; bisɛ foote.)

TINGƆŊƆ wa zɛ’ɛsi ase’a poan, nɛreba basɛba ti’isɛ ti ba san kuregɛ bala wan basɛ ti nɛreba na’asa ba ge basɛba me kɔ’ɔn tiregera mɛ ti ba da kuregɛ. Makerɛ, ba san ni nyɛ zompɛɛla ba zuo poan ba ni vɔ̃segɛ en mɛ. Ge ba san puɣum tiregera la se’em me, bala kan ta’an gu ti ba kan kuregɛ.

² To saazuo Sɔ la geele a yamesi sɛba n kuregɛ la wani? (Mag. 16:31) A dekɛ ba makɛ la tia n wɔni. (Kaalɛ Yooma 92:​12-14.) Bala vuurɛ? Tiisi sɛba n kuregɛ la ni ana la soŋa sɛla n sɔi la ba ni tara la vuurɔ zo’e zo’e. Makerɛ, tia kayima n boi Japan tiŋa ge me yue paa. Tiisi wa ase’a gaŋɛ yuun tusa ge me som. Wuu tiisi wa la, Yehowa yamesi n kuregɛ la me som mɛ paa a ninin. Ba halesoma la dela tuulum bɔ’ɔra Yehowa. Ba dekɛ la yuuma zo’e zo’e pu’usɛ en ge me kɔ’ɔn tara yelemɛŋɛrɛ bɔ’ɔra en hali la biɣi biɣi saŋa poan.

3. Bo makerɛ pa’alɛ Yehowa n dekɛ sɛba n kuregɛ la tum tuuma se’em.

³ Nɛra san kuregɛ la se’em me, a kelum dɛna la tuulum bɔ’ɔra Yehowa.a Yelemɛŋɛrɛ, Yehowa ta’an ni doose sɛba n kuregɛ la poan basɛ ti a puti’irɛ tum. Makerɛ, Sarah yuun kuregɛ mɛ se’em ma’a ti Yehowa yuun yele en ti a wan dɔɣɛ bia la. A bia la buuri la wan ta lebege tinkãtɛ ti Mɛzaaya la me wan ze’ele la a buuri la poan. (Pin. 17:​15-19) Moses yuun kuregɛ mɛ ge ti Yehowa yuun tum en ti a keŋɛ Egypt ta tari Israeldoma la yese bim. (Yɛh. 7:​6, 7) Tuntuna Yon me yuun kuregɛ mɛ se’em ma’a ti Yehowa yuun basɛ ti a gulesɛ Baabule gɔnɔ tunuu la.

4. Wuu Magaha 15:15 n pa’alɛ se’em la, bem n wan soŋɛ sɛba n kuregɛ la ti ba ta’an ŋmibe yeledaaŋɔ poan? (Bisɛ foote la.)

⁴ To san kuregera, bã’asi zo’e zo’e n ni daana tɔ. Bala ni basɛ ti vom kpe’em bo to mɛ. Mabipɔka ayima yeti, “Kuregerɛ daɣɛ naana.” Ge Yehowa wan soŋɛ hɔ ti ho tara pupeelumb la ka pakɛ la yeledaaŋɔ se’a n paari ho la. (Kaalɛ Magaha 15:15.) Zaseŋɔ wa poan, to wan zamesɛ baŋɛ sɛba n kuregɛ la n wan eŋɛ se’em ta’an tara pupeelum. To wan le sɔsɛ baŋɛ mabiisi n wan ta’an soŋɛ sɛba n kuregɛ la se’em. Yia la, basɛ ya ti to bisɛ yelese’a n wan ta’an basɛ ti la kpe’em bo to ti to tara pupeelum to kuregerɛ poan.

LA TA’AN KPE’EM BO TO TI TO TARA PUPEELUM TO KUREGERƐ POAN

5. Bem n wan ta’an basɛ ti sɛba n kuregɛ la giila kɔ’ɔsɛ?

⁵ Bem n wan ta’an basɛ ti to giila kɔ’ɔsɛ? To suure ta’an sa’am se’ere n sɔi la to ka ta’an tuna wuu ton yuun tuni se’em la. Wana ta’an basɛ ti to tiɛ ton yuun de bunbilipaalesi tara paŋa tuna se’em la. (Pa. 7:10) Makerɛ, mabipɔka ayima yu’urɛ n de Ruby yeti: “Mam induma la ni basɛ ti la kpe’em bo mam mɛ ti n yɛ fuo, sɛla n sɔi la mam ka ta’an ŋmɛresa n mea. Sɛla n de naana wuu ho zɛ̃kɛ na’arɛ pire socks dela yele. Mam nu’usi n ni ana zim, bala ni basɛ ti mam ka ta’an tuna soŋa soŋa hali la yelepiɣisi me.” Harold me n tuni Betel yeti: “Saŋa ase’a mam sunsɔa n ni nyie sɛla n sɔi la mam ka ta’an ita yelese’a ti mam yuun ita la. Mam yuun dela bunbilipaalega n tari paŋa ge nɔŋɛ n ŋmɛ̃’ɛra baseball. Nɛreba basɛba yuun ni yeti, ‘Dekɛ boole la bo Harold sɛla n sɔi la a wan ta’an soŋɛ tɔ ti to di.’ Ge nananawa, mam ka ti’isɛ ti mam wan nyaŋɛ lobe boole.”

6. (a) Bem yɛla n wan ta’an basɛ ti sɛba n kuregɛ la giila kɔ’ɔsɛ? (b) Bem n wan soŋɛ sɛba n kuregɛ la ti ba baŋɛ nyaa ba tukera loore bii ba basɛ? (Bisɛ zaseŋɔ la zuo n de “N Basɛ Loore Tukere?” n boi gɔŋɔ wa poan la.)

⁶ Ho giila ta’an kɔ’ɔsɛ la hon ka ta’an ita yelese’a ti ho yuun ni ta’an ita la. Daanse’ere ho boti la ba ita yɛla ase’a bɔ’ɔra hɔ. La san dɛna bala, basɛ ti nɛra wa’ana soŋera hɔ bii ho bɔna la ho kɔma. Hon ka tari paŋa ge ka le nyɛta soŋa la zuo, daanse’ere ho kan ta’an le tuke loore bii keŋɛ zɛ’ɛsi ase’a ho ma’a. Bisɛ lan de susa’aŋɔ se’em! Daanse’ere ho kan ta’an tum tunse’a ti ho yuun ta’an tuna la ge tɛ̃ra ti ho dela tuulum nɛra bɔ’ɔra Yehowa la nɛra woo. Tara suure lua ti Yehowa bɔkeri lan ani ho se’em mɛ. Yehowa mi ton tari nɔŋerɛ se’em bɔ’ɔra en, la to mabiisi la. Bala n basɛ ti to dɛna tuulum nɛreba la.—1 Sa. 16:7.

7. Ho wan ta’an ti’isa la bem yele, ho suure san sa’am ti ho ti’isa ti ho wan ki ge ti Armagedon paɛ?

⁷ Daanse’ere ho suure ta’an sa’am ti ho ti’isa ti ho wan ki ge ti Armagedon nyaa paɛ. La san ana ho bala, bem n wan soŋɛ hɔ? Tɛ̃ra ti Yehowa ma’a n mi sɛla n sɔi ti a di’isa suure ge nan ka sa’am tingɔŋɔ wa. (Isa. 30:18) Ge beni n sɔi ti Yehowa di’isa suure? Yehowa n di’iseri suure la pa’alɛ ti a bo la yɔ’ɔ ti nɛreba zo’e zo’e baŋɛ en ge me pu’usa en. (2 Pe. 3:9) Bala la, ho giila san kɔ’ɔsɛ ti’isɛ bisɛ nɛreba zo’e zo’e n wan nyɛ nyuurɔ se’em Yehowa sudi’isego la poan. Basɛba ta’an dɛna ho yidoma.

8. Sɛba n kuregɛ la san bɛ̃’ɛra, ba ni ita la bem?

⁸ To de bia bii bunkutɛ woo, to san bɛ̃’ɛra to ta’an tɔɣɛ sɛla bii eŋɛ sɛla n ka nari. (Pa. 7:7; Yam. 3:2) Makerɛ, sansɛka ti wuŋerɛ yuun paɛ Yob la, a yuun ‘tɔɣeri ge ka ti’isa.’ (Yob 6:​1-3) Leyɛ’ɛsa, bã’a bii tiim ti sɛba n kuregɛ la ni nyu la zuo, ba ni tɔɣera bii ita la yelese’a n ka nari. To san puɣum dɛna sɛba n kuregɛ bii bɛ̃’ɛra to ka nari ti to dekɛ bala zuo tɔɣera yetɔɣeyooro bii to ti’isa ti la nari ti nɛreba tuna bɔ’ɔra tɔ. To me san baŋɛ ti to tɔɣɛ la sɛla n ka ani soŋa bo nɛra, la nari ti to eŋɛ kalam belum nɛra la.—Mt. 5:​23, 24.

TON WAN EŊƐ SE’EM KELUM TARA PUPEELUM

9. Beni n sɔi ti la nara ti ho basɛ ti nɛreba soŋera hɔ? (Bisɛ fɔɔra la.)

⁹ Basɛ ti nɛreba soŋɛ hɔ. (Ga. 6:2) La ta’an kpe’em bo ho pɔsega la. Mabipɔka ayima yu’urɛ n de Gretl yeti: “Saŋa ase’a la ni kpe’em bo mam mɛ ti n basɛ ti nɛreba soŋɛ mam se’ere n sɔi la mam ka boti n daam nɛra. La yue mɛ ti mam tee n puti’irɛ ge nyaa sirege n mea sakɛ ti ba soŋɛ mam.” Ho san bo yɔ’ɔ ti nɛreba soŋɛ hɔ, ho basɛ ti ba nyɛta la pupeelum la ban soŋeri ho la zuo. (Tm. 20:35) Ho puurɛ me wan pee ho san baŋɛ ti nɛreba nɔŋɛ hɔ ge me fabela ho yele.

10. Beni n sɔi ti la nara ti ho eŋɛ pa’alɛ ti ho puurɛ pee mɛ? (Bisɛ fɔɔra la.)

¹⁰ Eŋɛ pa’alɛ ti ho puurɛ pee ya. (Kol. 3:15; 1 Tes. 5:18) To puurɛ ni pee mɛ nɛreba san eŋɛ som bo to ge saŋa ase’a to ni tamɛ ti to yele ba ti to pu’usɛ ya. To san la mɔsi ge yeti to pu’usɛ ya, la wan basɛ ti ba baŋɛ ti to puurɛ pee ya la ban eŋɛ sɛla bo to la. Mabipɔka Leah dela mina n biseri sɛba n kuregɛ Betel. A yeti: “Mabipɔka ayima ni gulesɛ la gɔŋɔ bo mam ge yeti a pu’usɛ ya. A ni gulesɛ la yɛla fii ge ti la kɛ̃’ɛra suure. Mam nɔŋɛ n kaala eŋa n ni gulesɛ sɛla bo mam la. La ni basɛ ti mam tara la pupeelum la mam n nyɛ ti a puurɛ pee mɛ la mam n soŋeri en la.”

11. Ho wan eŋɛ la wani ta’an soŋɛ nɛreba? (Bisɛ fɔɔra la.)

¹¹ Tiregɛ soŋɛ nɛreba. Ho san ti’isa nɛreba yele ge me tiregera ti ho soŋɛ ba, la wan basɛ ti ho kan ba’ɛ ti’isa homea yeledaaŋɔ la. To wan ta’an dekɛ sɛba n kuregɛ makɛ la gɔnɔ ti yɛm pa’alegɔ bɔna bim. Nɛreba san ka kaalɛ gɔnɔ la, ba kan nyɛ yɛm pa’alegɔ la. Bala mea nɔɔ ti bunbilipaalesi kan ta’an zamesɛ ninmu’urɛ yele yamam sɛba n kuregɛ la zɛ’an, ya san ka tɔɣɛ sɛla ti ya mina la bo ba. Soke ba yɛla ge me ma’ɛ homea kɛlesa ba. Yele ba Yehowa n soŋɛ ho se’em ge basɛ ti ba baŋɛ ti ba san nana Yehowa, la wan basɛ ti ba tara pupeelum.—Ym. 71:18.

12. Wuu Isaiah 46:4 n pa’alɛ se’em la, Yehowa yeti a wan eŋɛ la bem bo sɛba n kuregɛ la? (Bisɛ fɔɔra la.)

¹² Zusɛ Yehowa ti a bo ho paŋa. Saŋa ase’a tɔregɔ ta’an paɛ tɔ ti to ka le tara paŋa. Bala ta’an basɛ ti to giila kɔ’ɔsɛ. Ge tɛ̃ra ti Yehowa dela Paŋa Za’adaana. Baabule la yeti a ‘ka malum taregera bii a bãlɛ.’ (Isa. 40:28) A wan ta’an bo ho pansɛka ti ho ɛɛra la. (Isa. 40:​29-31) A yeti a wan soŋɛ hɔ. (Kaalɛ Isaiah 46:4.) Yehowa san yele sɛla, a ni basɛ ti la tum mɛ. (Yos. 23:14; Isa. 55:​10, 11) Ho san zusɛ Yehowa, a wan soŋɛ hɔ. Ho me san baŋɛ eŋa n nɔŋɛ ho se’em la, ho puurɛ wan pee.

13. Wuu 2 Korint 4:​16-18 n yele se’em la, bem ti la nara ti to tɛ̃ra? (Bisɛ fɔɔra la.)

¹³ Tɛ̃ra ti ho kan ana bala wuusa. La ni dɛna la naana bɔ’ɔra tɔ ti to ta’an ŋmibera to san mina ti la kan yue to yele la wan maalɛ. Baabule la basɛ ti to baŋɛ ti la kan yue kuregerɛ la bã’asi kan le bɔna. (Yob 33:25; Isa. 33:24) Bala la, mina ti ho wan ta tara imma’asum, paŋa ge me som. (Kaalɛ 2 Korint 4:​16-18.) Ge nɛreba me wan ta’an eŋɛ la bem soŋɛ?

NƐREBA N WAN TA’AN SOŊƐ SE’EM

14. Beni n sɔi ti la yele pakɛ ti to kaara ge yi’ira mabisɛba n kuregɛ la?

¹⁴ Kaara ge yi’ira mabisɛba n kuregɛ la tabela. (Heb. 13:16) Sɛba n kuregɛ la ta’an ti’isa ti to tamɛ ba yele mɛ. Mabia ayima yu’urɛ n de Camille n ti’isɛ ti ba tamɛ a yele mɛ yeti: “Saŋa ase’a putɛyiila n ni tara mam ti mam sunsɔa nyiira sɛla n sɔi la, n kan ta’an yese yire ge me ka ta’an ita yɛla ase’a.” To san kaara mabisɛba n kuregɛ la, ba wan baŋɛ ti to nɔŋɛ ba ge ti ba yele me pakɛ tɔ. Daanse’ere to tɛ̃ri ti to tabelɛ yeti to keŋɛ ta kaɛ bii yi mabia n kuregɛ ge tamɛ. To za’a ka tari nɛŋa. Bala la, bem n wan soŋɛ tɔ ti to ta’an ‘tuna ninmu’urɛ tuuma la’ n laɣum dɛna to kaara sɛba n kuregɛ la? (Flp. 1:10) Ho ta’an gulesɛ mabisɛba n kuregɛ yu’ura, la daanse’ere daarɛ ti ho bɔta ti ho yi ba, tɛɣesɛ ba bii keŋɛ ta kaɛ ba. Ho me ta’an maasum ge bisɛ sansɛka ti ho wan keŋɛ ta kaɛ ba. Bala wan soŋɛ hɔ ti ho ta’an tɛ̃ra.

15. Bem ti bunbilipaalesi la sɛba n kuregɛ la wan ta’an naɛ taaba ita?

¹⁵ Ho san dɛna bunbilipaalega, ho ta’an kan mina hon wan tɔɣɛ sɛla bii naɛ la sɛba n kuregɛ la eŋɛ yelese’a ho san ta kaɛ ba. Ge la ka nari ti ho fabela yele ana. Yeen dɛna zɔsonkɔ. (Mag. 17:17) Ni naɛ la sɛba n kuregɛ la sɔsɛ ge ti zamesegɔ la pɔsɛ bii zamesegɔ la san ba’asɛ. Ho ta’an soke ba ti ba yele ho Baabule gulesegɔ seko n soŋɛ ba bii ba yele ho sɛla n tabelɛ eŋɛ ba bunbilimen ti la dɛna pupeelum bɔ’ɔra ba. Ho me ta’an basɛ ti ya laɣum bisɛ JW Broadcasting^® yetɔɣum. Leyɛ’ɛsa, ho ta’an eŋɛ yɛla ase’a me soŋɛ ba. Makerɛ, ho ta’an soŋɛ ba ti ba ve’e zamesegɔ gɔnpaala eŋɛ ba elektronik lɔɣɔrɔ la poan. Mabipɔka ayima yu’urɛ n de Carol yeti: “Naɛ la sɛba n kuregɛ la ita yelese’a n basɛ ti ho puurɛ pee. La boi bim ti mam kuregɛ mɛ ge mam boti la n ita yelese’a n wan basɛ ti n tara pupeelum. Mam boti la n kena da’a da’ara lɔɣɔrɔ, naɛ la n zɔdoma zĩ’a dita ge me kena zɛse’esi n ani soŋa bisera Yehowa naaŋɔ lɔɣɔrɔ.” Mabipɔka ayima yu’urɛ n de Maira yeti: “Mam zɔ ayima dela yuun 90. A gani mam la yuun 57. Ge mam ni tamɛ bala yele mɛ se’ere n sɔi la, to ni la’ara mɛ ge bisera sinii. Yele san paɛ to se’em sa’am, to ni laɣum ka’ana la taaba.”

16. To san naɛ la to mabisɛba n kuregɛ la keŋɛ asibitin, la wan soŋɛ ba la wani?

¹⁶ Naɛ la ba keŋɛ asibitin. Ba san bɛ̃’ɛra ho ta’an tari ba keŋɛ asibitin ge me bisɛ soŋa ti dɔgetadoma bii nɛɛsidoma la tibɛ ba soŋa. (Isa. 1:17) Ho me ta’an gulesɛ yelese’a ti dɔgetadoma la yele la biŋe. Mabipɔka Ruth n kuregɛ yeti: “Mam ma’a san ni keŋɛ asibitin, dɔgetadoma la ni ka mu’ɛ nini bisɛ mam soŋa. Dɔgetadoma la ta’an ni yeti, ‘Ho ka bɛ̃’ɛri. Homea n yeen ti’isa bala.’ Ge nɛra san naɛ la mam keŋɛ, ba ni bisɛ mam la soŋa. Mam puurɛ pee mɛ la mabisɛba n ni naɛ la mam keŋɛ asibitin la.”

17. Sarɔtuni poan ti to wan ta’an naɛ la sɛba n kuregɛ la mɔɔla?

¹⁷ Naɛ la ba keŋɛ na’am mɔɔlegɔ. Sɛba n kuregɛ la basɛba ta’an kan tara paŋa n wan keŋɛ yire la yire na’am mɔɔlegɔ. Ho ta’an beem pɔɣenya’aŋa ayima ti hon la eŋa keŋɛ ta dekɛ to gɔnɔ toroko la mɔɔlɛ. Hali ho ta’an ee kuka bo en ti a zĩ’ire lɛm gɔnɔ toroko la. Bii ho ta’an yele buranya’aŋa ti ya zamesɛ ho Baabule zamesegɔdaana. Hali ya ta’an eŋɛ zamesegɔ la a yire. Keendoma san maasum na’am mɔɔlegɔ sɔsega la ba yire, la wan dɛna naana bɔ’ɔra sɛba n kuregɛ la basɛba ti ba laɣum doose keŋɛ na’am mɔɔlegɔ. Yehowa puurɛ wan pee to san tiregera ita pa’ala sɛba n kuregɛ la ti to tari nɔŋerɛ la gilema bɔ’ɔra ba.—Mag. 3:27; Arom 12:10.

18. To wan sɔsɛ la bem zaseŋɔ seko n taɣelɛ la poan?

¹⁸ To zamesɛ baŋɛ ti Yehowa nɔŋɛ sɛba n kuregɛ la mɛ ge ba me dela tuulum nɛreba bɔ’ɔra en. Mabiisi la me nɔŋɛ ba mɛ paa! Kuregɛ tari yeledaaŋɔ zo’e zo’e ge Yehowa wan soŋɛ hɔ ti ho kelum tara pupeelum. (Ym. 37:25) La dela yelesonɛ la hon mi ti beere sa’am ho wan ta tara pupeelum zo’e zo’e gaŋɛ hon tabelɛ nyɛ sɛla la! Ge mabiisi basɛba yeledaaŋɔ boi la de to’ore. Ba biseri la ba yidoma sɛba n kuregɛ, ba bia bii ba zɔ n bɛ̃’ɛri. Ba wan eŋɛ la wani kelum tara pupeelum? To wan sɔsɛ baŋɛ sokere wa lebesego zaseŋɔ seko n taɣelɛ la poan.