Hell Sirum Boi Mɛ? Baabule La Yeti Bem La Hell?

Baabule la lebesego

Baabula zo’e zo’e n yue, makɛ wuu King James Version la, dekɛ yelebire la n de “hell” tum tuuma mɛ kaalegɔ zɛ’ɛsi zo’e zo’e poan. (Yooma 16:10; Tooma 2:27 a) Wuu foote la n boi gɔŋɔ wa poan la n pa’alɛ se’em la, nɛreba zo’e zo’e sakɛ ti hell dela zɛ’an ti ba nyɔ’ɔra tuunfɛ’ɛsadoma bugum poan daarewoo. Ge Baabule la pa’alɛ la bala yoi?

Zaseŋɔ yele wa poan

Hell dela zɛsɛka ti ba nyɔ’ɔra tuunfɛ’ɛsadoma daarewoo?

Aayi. Ba lerege “hell” diimi Baabule ase’a poan ti (Hebru, “Sheol”; Greek, “Hades”) “Yɔɔ” ti la pa’alɛ la nɛresaaleba yɔɔ. Baabule la pa’alɛ ti nɛresɛba n boi “Yɔɔ poan” la ka le bɔna zɛ’an zɛ’an.

Kum ka mi sɛsɛla ge me ka mina too. “Tuuma bii maaseŋɔ bii yɛm bii mi’ilum ka boi hell poan.” (Pa’ala 9:10, Douay-Rheims Version) Hell daɣɛ zɛ’an ti la wuna nɛreba ti ba kaasa. Ge Baabule la yeti: “Basɛ ti nyanɛ di putɔpa ti ba ana siim yɔɔ poan [hell, Douay-Rheims].”—Yooma 31:17; King James Version (30:18, Douay-Rheims); Yooma 115:17.
Naayinɛ yeti, to be’em yɔɔrɛ dela kum ge daɣɛ namesegɔ n ka ba’asera. Naayinɛ yuun yele yia buraa Adam ti, a san zaɣesɛ a nɔɔrɛ, a yeti a ki mɛ. (Pin’ileŋɔ 2:17) A yuun ka tɔɣɛ tinmɔlega yele. Pooren Adam n yuun tum be’em la, Naayinɛ yuun pa’alɛ sɛla n wan paɛ en mɛ. A yuun yeti: ‘Ho dela tontɔnɔ, tintɔnɔ mea poan ti ho wan lebe.’ (Pin’ileŋɔ 3:19) A kan le vɔna. Naayinɛ san dekɛ Adam eŋɛ ni la tinmɔlega poan, A wan tɔɣɛ ni de yele. Naayinɛ ka tee nɛra n ni tum be’em ti a basɛ ti sɛla paɛ en la. Adam n yuun tum be’em la, yuuma fii pooren, Naayinɛ yuun basɛ ti ba gulesɛ eŋɛ Baabule la poan ti: “Be’em yɔɔrɛ dela kum.” (Arom 6:23) Tubedɔlegerɛ busebo ka le bɔna se’ere n sɔi la, “se’em n ki la, ba basɛ a be’em bo en mɛ.”—Arom 6:7.
Ban pa’alɛ ti ba nyɔ’ɔri nɛreba tinmɔlega poan la ka makɛ la Naayinɛ puti’irɛ. (Yeremia 32:35) Putɛdena wa ka makɛ la Baabule la n pa’alɛ ti ‘Naayinɛ dela nɔŋerɛ la.’ (1 Yon 4:8) A boti la to pu’usa en la nɔŋerɛ ge daɣɛ ban wan nyɔ to bugum poan la zuo.—Matu 22:36-38.
Ba tabelɛ dekɛ nɛresomdoma n ki eŋɛ hell poan mɛ. Baabula se’a n dekɛ yetɔɣebire n de “hell” tum tuuma la pa’alɛ ti, ba dekɛ nɛreba n tari sakerɛ n de Yakob la Yob eŋɛ hell poan mɛ kurum. (Pin’ileŋɔ 37:35; Yob 14:13) Hali ba tɔɣɛ Yezu Krista yele me yeti, ba dekɛ en eŋɛ la hell poan se’em ma’a ti a yuun ki la ta paɛ se’em ma’a ti ba yuun isige en kum poan la. (Tooma 2:31, 32) La niɛ peelum mɛ ti Baabula wa san tɔɣera hell yele, la ni kɔ’ɔn ze’ele bo la Yɔɔ.b

Ge Yezu makerɛ la n tɔɣɛ buntata la, la Lazarus yele la me vuurɛ?

Ba gulesɛ Yezu makerɛ wa ti la bɔna la Luke 16:19-31. Ba tari maɣesa pa’ala la sareŋɔ la vo’osum poan yelemɛŋɛrɛ ti la niɛra. Makerɛ la n pa’alɛ buntata la, la Lazarus yele la daɣɛ sɛla n sirum eŋɛ. (Matu 13:34) Ho san bɔta ti ho zamesɛ baŋɛ yele wa soŋa soŋa, bisɛ zaseŋɔ yele la n de “Buntata La, La Lazarus Dela Nɛrebani?”

**Nɛra san bɔna hell poan, la pa’alɛ ti eŋa la Naayinɛ welege mɛ?**

Aayi. Pa’alegɔ la n de ti, kum mi ti eŋa la Naayinɛ welege la taaba la ka doli Baabule pa’alegɔ la n yeti kum ka mi sɛsɛla la.—Yooma 146:3, 4; Pa’ala 9:5.

**Nɛra tabelɛ ze’ele hell poan yese na?**

Ɛɛ. Baabule la pa’alɛ nɛreba banii ti ba yuun pĩ ba Yɔɔ poan (ba lerege yeti “hell” Baabula ase’a poan) ti ba isige ba kum poanc. Ba yuun san mi ni sɛla n iti yɔɔ la poan ti ba bɔna la, ba yuun wan tɔɣɛ ni bo la nɛreba. Yele pakerɛ la dela, ba za’a waabe poan ayina me ka tɔɣɛ yeti hell la poan, bugum n yuun diti bamam bii sɛla n yuun eŋɛ. Bem zuo ti ba ka yele se’ere? Wuu Baabule la n tɔɣɛ de yele taɣesɛ se’em la, kiindoma ka mi sɛsɛla ti la ana wuu ba puɣum “gise” tole mɛ—Yon 11:11-14; 1 Korint 15:3-6.

a Yɔɔma beere wa Solemiine Baabula ti ba lerege la ka le dekɛ yelebire la n de “hell” tuna tuuma Tooma 2:27 poan. Basɛba tuɣum ni yeti “Yɔɔ,” (New Century Version); “ki’intiŋa” (New International Version); “kum poan” (The Passion Translation). Basɛba me ni kɔ’ɔn basɛ de la Greek poan ti “Hades.”—Holman Christian Standard Bible, NET Bible, New American Standard Bible, English Standard Version.

b Bisɛ daka la n de “Yia yetɔɣum la ti ba dekɛ gulesɛ Baabule la yelebɛa.”

c Bisɛ 1 Nadoma 17:17-24; 2 Nadoma 4:32-37; 13:20, 21; Matu 28:5, 6; Luke 7:11-17; 8:40-56; Yon 11:38-44; Tooma 9:36-42; 20:7-12.

**Baabule zɛse’esi n tɔɣeri hell bii Yɔɔ yele**

Yob 14:13: ‘O Yɔɔ poan [“hell,” Douay-Rheims Version] ti ho wan suɣɛ mam, . . . Ho wan loe saŋa bo mam ge tiɛ n yele!’

Vuurɛ: Yob n de burasɛka n tari sakerɛ wa mi soŋa soŋa ti Naayinɛ wan ta isige en hell bii “Yɔɔ la” poan ge bo en vom.

Yooma 145:20: ‘Yehowa guri sɛba woo n nɔŋɛ en la mɛ, ge a wan saɣum tuunfɛ’ɛsadoma la woo.’

Vuurɛ: Naayinɛ wan sa’am putɔpa la za’a. A kan basɛ ti ba vɔna hell poan la wan eŋɛ se’em ti a nyɔ’ɔra ba la bugum.

Pa’ala 9:10: ‘Tuuma bii maaseŋɔ bii mi’ilum bii yɛm ka boi Yɔɔ poan [“hell,” Douay-Rheims Version], ti ho yɛ’ɛsa la.’

Vuurɛ: Sɛba n boi Yɔɔ poan bii hell la ka mi sɛsɛla, ba ka namesa. Le pa’asɛ, Baabule gulesegɔdaana wa yuun laɣum gulesɛ yele wa bo la nɛresondoma.

Tooma 2:31: ‘Eŋa n yuun nyɛ ti Krista wan isige a kum poan la, a yuun yeti Naayinɛ kan basɛ ti a yee a yɔɔ poan.’—King James Version.

Vuurɛ: Yezu n yuun ki la, ba yuun pĩ en la hell poan (Yɔɔ).

Arom 6:23: ‘Be’em yɔɔrɛ dela kum.’

Vuurɛ: Bala la, be’em yɔɔrɛ dela kum ge daɣɛ ba mɛlesa ho tinmɔlega poan.

Liligere 20:13: ‘Ti kum la hell yuun dekɛ ba ki’indoma tisɛ na.’—King James Version.

Vuurɛ: Sɛba n boi hell poan la ki mɛ. Ba wan le nyɛ vom ba san ta isige ba kum poan.

Liligere 20:14: ‘Ba wan dekɛ kum la hell lobe basɛ bugum kokãtɛ la poan.’—King James Version.

Vuurɛ: Ba san ta isige sɛba n ki la za’a ba’asɛ, ba wan sa’am hell (Yɔɔrɔ la) ti la ana woo ba dekɛ la bugum nyɔ dɛ la. Bala la, Adam be’em la n basɛ ti kum bɔna la, kan le bɔna.—Arom 5:12.

Yia yetɔɣum la ti ba dekɛ gulesɛ Baabule la yelebɛa

Yelebɛa ana wa pa’alɛ ti, Baabule leregeredoma n dekɛ yelebire la n de “hell” ze’ele bo yia yetɔɣum yelebɛa n de tɔka tɔka la basɛ ti bɔkerɛ to’ore to’ore n bɔna. La ani woo ba ni bɔta la ba pa’alɛ nɛreba ti, ba kan sa’am putɔpa la ge ba wan nyɔ’ɔra ba la bugum poan wuusa wuusa.

Sheol (Hebrew שְׁאוֹל), Hades (Greek ᾅδης)

Vuurɛ: Nɛresaaleba yɔɔ.—Yooma 16:10; Tooma 2:31

Ban dekɛ tum tuuma se’em: Yɔɔ, hell, boko (King James Version); ki’intiŋa (New International Version)
Gehena (Greek γέεννα)

Vuurɛ: Sa’aŋɔ za’a za’a.—Matu 5:30

Ban dekɛ tum tuuma se’em: Gehena; hell (King James Version, New International Version)
Tartarus (Greek ταρταρόω)

Vuurɛ: Sa’aŋɔ bɔŋa ti kolekpabɛ’ɛsi la bɔna.—2 Peter 2:4

Ban dekɛ tum tuuma se’em: Tartarus; hell (King James Version, New International Version); hell n ka zã’a (Douay-Rheims Version)
Apoleia (Greek ἀπώλεια)

Vuurɛ: sa’aŋɔ.—Matu 7:13

Ban dekɛ tum tuuma se’em: Sa’aŋɔ; hell (Good News Bible)
Pyr (Greek πῦρ)

Vuurɛ: Bugum mɛnka bii ba dekɛ ze’ele bo la sɛla.—Luke 17:29; Yude 23

Ban dekɛ tum tuuma se’em: bugum; tinmɔlega (God’s Word Translation)

Tinmɔlega pa’alegɔ yɛla la n pɔsɛ se’em

La ze’ele la baɣa yɛla poan: Diimi Egyptdoma yuun sakɛ ti hell boi mɛ. Gɔnsɛka n tɔɣeri kuurɛ yɛla ti ba yi’ira ti Book Ȧm-Ṭuat (Amduat) ti gɔnmi’ileba pa’alɛ ti la yuun boi mɛ yuun kɔbesɛka n pa’asɛ 16 G.Y.B. poan la pa’alɛ ti, sɛba ‘ti ba wan dekɛ ba eŋɛ bugum la poan la kan ta’an le yese bim.’—The Egyptian Heaven and Hell.

Kristakɔma n deŋɛ nɛŋa la yuun ka pa’alɛ bala: “La nari ti to baŋɛ ti N[ew] T[estament] la poan, sɛla ka boi bim n pa’alɛ ti hell bugum yuun pa’asɛ Kristakɔma n deŋɛ nɛŋa la pa’alegɔ poan.”—A Dictionary of Christian Theology.

Greekdoma yuun pa’asɛ bim mɛ: “Kɔ’ɔn pɔsɛ yuun kɔbesɛka n pa’asɛ buyi Y.B. bɔba ti Kristakɔma n kumesɛ Greek pa’alegɔ poan yuun baŋɛ ti la yele pakɛ mɛ ti ba basɛ ti nɛreba baŋɛ ba sakerɛ yɛla . . . Ban yuun boti pa’alegɔ sɛka dela Plato pa’alegɔ.” (Encyclopædia Britannica) Ba pa’alegɔ ayima yuun dela nɛra san ki, ba mɛlesa en la bugum poan. “Greekdoma pa’alegɔ za’a poan la, se’em n ta’an basɛ ti nɛreba tara sakerɛ hell bugum la poan dela Plato.”—Histoire des enfers (The History of Hell).

Tinmɔlega pa’alegɔ la yuun basɛ ti la ana me wuu la ani soŋa ti ba mɛlesa nɛreba: Spanish Inquisition saŋa la, ba yuun ni nyɔ nɛresɛba n ka sakɛ bo church pa’alegɔ la mɛ ge ti’isa ti bala wan basɛ ti “ba baŋɛ hell bugum n wan ta ana se’em,” la wan eŋɛ se’em ti ba ta’an tee ge nyaa ki. (The Spanish Inquisition, by Jean Plaidy) Bala mea nɔɔ ti Queen Mary I n ze’ele England yuun basɛ ti ba nyɔ Protestantdoma 300. Ba yuun ti’isɛ ti “ban wan ta nyɔ sɛba n ka sakɛ bo church pa’alegɔ la hell poan la zuo, la wan ana soŋa ti ba tɔɣesɛ Naayinɛ n wan ta eŋɛ tuunfɛ̃’ɛsadoma la se’em ge me nyɔ ba tinparɛ wa zuo.”—Universal History, by Alexander Tytler.

Ban tee yelese’a yɔɔma beere wa: Pu’usegɔdoma basɛba ka le ba’ɛ tɔɣera hell yele bala. Ge la daɣɛ ti ba sakɛ ti hell pa’alegɔ la dela pumpɔreŋɔ. La ani wuu ba yeen bɔta la ba ita sɛla ti ba nɛreba la bɔta. (2 Timoti 4:3) “Nɛreba boti la Yinɛ sɛka n ka zɛregeri ba . . . Zina beere wa, nɛreba zo’e zo’e ka ba’ɛ tɔɣera be’em yele.”—Professor Jackson W. Carroll.