5 ABRAHAM
A Yuun Eŋɛ La Sɛla N Kpe’em Paa
ABRAHAM yuun keni la fii fii yɛ’ɛsa Yehowa n pa’alɛ en zɛ’an la. A yuun kɔ’ɔn lu la a suure ti a paɛ bim. Abraham yuun keŋɛ zɛ’ɛsi n zaaɛ kurum mɛ. Zɛ’an ti a nyaa yɛ’ɛsa wa ka ba’ɛ zaaɛ ge la kpe’em bo en mɛ paa.
A yuun kɔ’ɔn ti’isa la Yehowa n yele en ti a eŋɛ sɛla la. Yehowa yuun yele en yeti: “Tare ho dayɔa la, ho dayɔa kayena Isaak la, ho dayɔsɛka n de ho tile la keŋɛ Moria teŋa poan ta dekɛ ka kaanbɛ zoore zuo te n yeti n pa’alɛ hɔ bo mam.” Yehowa yuun mi ti Abraham nɔŋɛ Isaak me paa. Bala la, beni n sɔi ti Yehowa yuun yeti a dekɛ Isaak kãabɛ? Abraham wan eŋɛ la wani nyɛ sakerɛ la sukpe’ene ta’an eŋɛ Yehowa n yele en sɛla la?
Baabule la yeti Abraham dela “sɛba woo n [tari sakerɛ]” sɔ. (Arom 4:11) Abraham yuun puɣum tara sakerɛ mɛ ge ti Yehowa nyaa yele en yeti a kãabɛ a bia la. Yehowa me n yuun soŋɛ Abraham ti a sakerɛ kpe’em. Makerɛ, yuuma zo’e zo’e n tole la, Yehowa yuun yele Abraham ti a wan sa’am Sodom la Gomora ba tunfɛ̃’ɛsa la zuo. Abraham suure yuun sa’am mɛ ti a soke Yehowa nyaa a wan sa’am nɛrebɛ’ɛsi, la nɛresondoma laɣum taaba. Yehowa yuun ma’ɛ la amea pa’alɛ Abraham ti tontɔɔdoma fii san bɔna Sodom la Gomora poan, eŋa kan sa’am tisi la. (Pin. 18:16-33) Abraham yuun bɔkɛ ti Yehowa zoti la nɛreba nimbũ’ɔ ge me gãkera tontɔɔ.
Se’em ma’a ti Yehowa yuun yele Abraham ti a ku a bia la, bem n yuun soŋɛ en ti a nyɛ sukpe’ene ta’an nam Yehowa?
Bala pooren la, Yehowa yuun tum la yelekirega bo Abraham la Sarah. La boi bim ti Sarah yuun dela yuun 90 ti Abraham me dɛna yuun 100 ge Yehowa yuun basɛ ti ba nyaŋɛ dɔɣɛ la budibila, ti a yu’urɛ dɛna Isaak! Abraham yuun baŋɛ ti Yehowa ta’an basɛ ti nɛra n kuregɛ zɔɛ dɔka ta’an dɔɣɛ. Bala yuun basɛ ti a bɔkɛ ti sɛla ka boi n kpe’em bo Yehowa. (Arom 4:18, 19) Abraham yuun kɔ’ɔn tɛ̃ra yele wa mɛ a puti’iren, la a suuren.
Yuun 25 pooren, Abraham yuun kɔ’ɔn ti’isa yele ana wa mɛ se’em ma’a ti a yuun yɛ’ɛsa Moria la. Abraham yuun tari puti’irɛ ti Isaak san puɣum ki, Yehowa wan ta’an isige en! (Heb. 11:19) Abraham n yuun tari putɛdena wa la n yuun soŋɛ en ti a nyɛ sukpe’ene ta’an keŋɛ eŋa n yuun ye zɛ’an la.
Se’em ma’a ti Abraham yuun ta pɔ̃ra zɛsɛka ti Yehowa pa’alɛ en la, a yuun yele a yamesi la ti ba ze’a bilam ge ti eŋa la Isaak zom zoore la ta eŋɛ kãabegɔ ge lebena. Abraham yuun tari sakerɛ ti eŋa la Isaak wan lebena. Abraham la Isaak ma’a n yuun nyaa boi. Saŋa la yuun paɛ ya ti a kãabɛ Isaak. Isaak yuun sirege la amea gã’arɛ kãabegɔ bimbine la zuo ge sakɛ ti a sɔ la n kuregɛ la bobe a nu’usi la a nama. Abraham yuun maasum ti a eŋɛ la sɛla ti sɔ n nɔŋɛ a bia kan makɛ ti’isɛ ti a eŋɛ. A yuun zɛkɛ la su’a ti a ku Isaak. Naayinɛ maleka n yuun nyaa yi en ge yele en yeti: “Da dekɛ ho nu’o kalom bia la.” Bala n yuun basɛ ti Abraham ka le ku a bia la.
Abraham yuun tari la sakerɛ ge me nana Yehowa. Bala yuun basɛ ti Naayinɛ pɛ̃ɣɛ en mɛ. Yehowa yuun le yele Abraham ti a wan kã bo en, basɛ ti a yaasi wi’ɛ ge basɛ ti ‘tisi la za’a’ nyɛ kã’a. Abraham n yuun sakɛ eŋɛ sɛla la zuo ti tisi la za’a wan nyɛ kã’a.
Yehowa n yuun pu’ulum biŋe ti a eŋɛ sɛla bo Abraham la kelum tuna tuuma mɛ zina beere wa. La wan ta basɛ ti nɛreba zo’e zo’e nyɛ kã’a wuusa. Abraham la Isaak yele la basɛ ti to bɔkɛ la Yehowa soŋa. Yehowa n yuun basɛ ti Abraham eŋɛ sɛla la yuun dela makerɛ n pa’alɛ eŋa Yehowa n me wan ŋmibe se’em ta’an faaɛ nɛresaaleba woo n tari sakerɛ la basɛ. Abraham yuun sakɛ kãabɛ la a dayua ti a nɔŋɛ. Bala basɛ ti to baŋɛ ti Yehowa me n yuun basɛ ti a Dayɔyiŋa wa’ana ki bo to la pa’alɛ ti a nɔŋɛ to mɛ. (Yon 3:16) Bala la, to san zamesa Abraham n yuun sakɛ ti a kãabɛ amea bia la yele, la wan soŋɛ tɔ ti to bɔkɛ Yehowa n nɔŋɛ to se’em.
To san ti’isa taɣesa Yehowa n eŋɛ sɛla kurum, la eŋa n wan eŋɛ sɛla beere sa’am, la wan soŋɛ tɔ ti to sakerɛ kpe’em wuu Abraham la. To sakerɛ me san kpe’em, la wan basɛ ti to tara sukpe’ene malum pa’asɛ. La ka nari ti to fabela ti Naayinɛ wan yele tomam me ti to eŋɛ sɛla ti a yuun yele Abraham ti a eŋɛ la. Yehowa ka le makɛ yele nɛra ti a ku a bia. Ge to mi soŋa soŋa ti la ka pakɛ la Naayinɛ n yeti to eŋɛ sɛla, to san tara sakerɛ bɔ’ɔra en, to wan nyɛ sukpe’ene ta’an nana en. To me san nana Naayinɛ, to wan nyɛ kã’a zo’e zo’e, ti la ka tara makerɛ!
Kaalɛ Baabule zɛ’ɛsi wa:
Sɔsɛ ya sokere wa:
Abraham yuun le eŋɛ la wani pa’alɛ ti a tari sukpe’ene?
Viisɛ Pa’asɛ
1. Bem yɛla n pa’alɛ ti Abraham yuun sirum boi mɛ? (g-E 5/12 18, daka; Yon 8:31-40) Bisɛ foote A
Foote A: Diimi gulesegɔ n tɔɣeri ‘Abram Samanɛ’ yele ti ba gulesɛ eŋɛ lalega poan Karnak tiŋa, n boi Egypt
2. Abraham yuun ta’an zamesɛ Yehowa Naayinɛ yɛla la bɛ? (ia-E 26 ¶4-5)
3. Bem n yuun basɛ ti Yehowa to’e Abraham pu’usegɔ? (rr-E 20 ¶18)
4. Pin’ileŋɔ 22:17 pa’alɛ la Yehowa n yuun pu’ulum ti a eŋɛ sɛla bo Abraham. Sodeni poan ti yele wa pa’alɛ ti Baabule la n tɔɣɛ naaŋɔ lɔɣɔrɔ yele se’em la di la mi’a? (g88-E 4/8 25) Bisɛ foote B
B
Foote B
Ti’isɛ Hon Wan Dekɛ Tum Tuuma Se’em
Abraham yuun tari la beere sa’am puti’irɛ. Sodeni poan ti bala yuun soŋɛ en ti a tara sukpe’ene? To san ti’isa to beere sa’am puti’irɛ la yele, la wan soŋɛ to la wani ti to tara sukpe’ene? Bisɛ foote D
Foote D
To wan eŋɛ la wani ta’an tɔɣesa Abraham sukpe’ene la ge tiregɛ . . .
mɔɔlɛ bo nɛra, yɔ’ɔ san bɔna? (Heb. 13:15)
kɔ’ɛ to puti’irɛ soŋa la ton tari to innaanɛ lɔɣɔrɔ tuna se’em? (Mag. 3:9)
eŋɛ sɛla to san baŋɛ ti to mabia n eeri soŋerɛ? (Flp. 4:18)
Ho wan eŋɛ la wani ta’an tɔɣesa Abraham sukpe’ene la?
Ti’isɛ Taɣesɛ Yehowa Yele
Abraham yele wa pa’alɛ mam ti Yehowa ani la wani?
Abraham yele wa makɛ la Yehowa puti’irɛ la wani?
Yehowa san ta isige Abraham la Isaak kum poan, mam wan soke ba la bem?
Zamesɛ Yɛla Pa’asɛ
Bisɛ vidiyo wa n pa’ali zaseŋɔ wa yɛla se’em.
Abraham yuun eŋɛ la wani ta’an dɛna Yehowa zɔsonkɔ? Ho me wan eŋɛ la wani ta’an basɛ ti hon la Yehowa zɔtɔ nyɔka la kpe’em?