21 SAMUEL
Bia N Yuun Dekɛ Sukpe’ene Tɔɣɛ Yehowa Yelesum
SAMUEL yuun ani wuu Samson la Yefta poyua la. Nɛrebana batã wa bɔŋa yuun dela buyina. Ba dɔɣereba yuun eŋɛ la yɛla n yuun tee ba vom paa. Wuu Yefta poyua la, Samuel me yuun dekɛ a vom za’a tuna la tuunɛ n boi de to’ore bɔ’ɔra Yehowa. (1 Sa. 2:11) A me yuun dela Nazar nɛra a vom dabesa za’a wuu Samson la. (Ken. 13:7) Samuel me yuun nari ti a tara sukpe’ene wuu bamam la.
Samuel n yuun ta go’e bĩ’isum la, Hana yuun tari en keŋɛ la Yehowa suɣerɛ la n boi Silo tiŋa la, wuu eŋa n biŋe nɔɔrɛ la Yehowa se’em la. Samuel yuun ta’an dɛna yuuma atã bii a gana bala fii. Yuunɛ woo, Hana yuun ni keŋɛ ta bisɛ a bia la mɛ ge tari lɔɣɔrɔ ta bo en. Samuel yuun naɛ la malema nɛŋadaana Eli bɔna suɣerɛ la poan. Eli yuun dela buranya’aŋa. Daanse’ere pɔɣese’esi n yuun tuni suɣerɛ la poan la n yuun laɣum bisera Samuel.
Nɛreba basɛba yuun tuni la tunbe’ero suɣerɛ la poan ge Eli yuun ka tiregɛ gu ba. A dayɔɔsi Hofni la Finehas yuun dela putɔpa. Ba yuun tuni la yalum tuuma la pɔɣesi n yuun boi Naayinɛ suɣerɛ la poan. Ba yuun ka dekɛ bo’olum la ti nɛreba la ni tari na bo Naayinɛ la yi sɛsɛla. Ba yuun ni basɛ ti suɣerɛ la tuntuneba la n daana nɛresɛba n ni wa’ana ti ba eŋɛ kaabegɔ la. Ba yuun ni basɛ ti tuntuneba la zũ la nɛnɔ soma la bo ba. Nɛnɔ wa yuun dela Yehowa denɛ. Eli yuun mi ti a dayɔɔsi la iti la bala. Ge a yuun ni kɔ’ɔn tɔɣera la bãla bãla ka’ana ba, ti ba me zaɣesa. La ka pakɛ la tunbe’ero seto ti nɛreba yuun tuna suɣerɛ la poan la, Samuel yuun kɔ’ɔn ana la tapilapi la Yehowa, ti nɛreba me nɔŋɛ en. Saŋa la n yuun paɛ ti Yehowa maalɛ yele la, a yuun loe la Samuel ti a dɛna a nɔdɛ’ɛsa.
Daarɛ deyima yu’uŋɔ ti Samuel wum kɔ̃a n tɔɣeri, nyaa isige. Yehowa n yuun yi’iri en! Ge Samuel yuun ti’isɛ ti la dela Eli. Bala la, a yuun zɔ ta soke la malema nɛŋadaana la sɛla ti a bɔta. Eli yuun kuregɛ mɛ ge me ka le nyɛta. A yuun yele Samuel ti a lebe ta gã’arɛ ge eŋa ka yi en. La yuun eŋɛ la bala sugumnɔɔrɛ butã. Eli yuun nyaa baŋɛ sɛla n iti mɛ. Bala la, a yuun yele Samuel ti a lebe ta gã’arɛ ge Yehowa san le yi en, a yeti: “Naa Na’ayenɛ, tɔgɛ ge ho yameŋa wa kelehe.” Samuel me yuun eŋɛ la bala nɔɔ.
Yehowa yuun le yi Samuel la bunaasi poan yeti: “Samuel, Samuel!” Ti a sakɛ yeti: “Naa Na’ayenɛ, tɔgɛ ge ho yameŋa wa kelehe.” Ti Yehowa nyaa tɔɣɛ bo Samuel. Yehowa yuun yele en yeti, Eŋa yeti a maalɛ la yelese’a n iti Silo la. Ge le yeti, a wan dɔ̃legɛ Eli tuberɛ la eŋa n ka ka’am a kɔma la soŋa la. A me wan gãkɛ a dayɔɔsi la, ta ta a yizuo la za’a. Yehowa yuun yele Samuel ti a tɔɣɛ yele ana za’a bo Eli!
Samuel yuun lebe ta gã’arɛ mɛ. Ge Baabule la ka yeti eŋa n lebe ta gã’arɛ la, a gise mɛ. Beere n yilegɛ la, ti a isige yu’ɛ suɣerɛ la nayasi. Samuel yuun tari buurɔ “te dabeem tara en la a dekɛ yelehom wa tɔgɛ pa’alɛ Eli.” Bala ti Eli yi samuel, soke en Naayinɛ n yele en sɛla la. Daanse’ere Eli yuun mi ti dabeem n tari Samuel ti a tɔɣɛ Yehowa n yele en sɛla la. Bala la, Eli yuun yele Samuel yeti: “Da sogɛ dɛ n zen’an.”
La boi bim ti Samuel yuun dela bia ge a yuun nari ti a tɔɣɛ Yehowa gãkerɛ yɛla bo Malema Nɛŋadaana Eli
Yele wa yuun kpe’em bo Samuel mɛ. Daanse’ere a yuun geele Eli ti a dɛna wuu a sɔyaaba, ti a bɔ’ɔra en gilema. La yeen dɛna se’em, Eli n yuun de Israel malema nɛŋadaana la zuo, Samuel yuun bo’ori en la gilema. La bala za’a, Samuel yuun ka sina. Baabule la yeti, “Samuel yele en sɛla woo” mɛ. Eli yuun nyaa mi ti sa’aŋɔ n boi sore. Bala la, a yuun demese a dayɔɔsi bayi la me yoi? Sɛla ka boi n pa’alɛ ti a yuun eŋɛ bala.
Yehowa yuun kã bo Samuel mɛ la eŋa n tari sukpe’ene la. Baabule la yeti: “Na’ayenɛ nu’o [n] paga a zuo.” Samuel yuun nyaa dela Yehowa nɔdɛ’ɛsa, ti “Samuel ka yɛta se’ere te de kan tom.” Samuel n yuun tɔɣɛ Eli, la a dayɔɔsi la yele se’em la yuun tum mɛ. Yehowa yuun nyaa ni doose la Samuel poan pa’ala ge me ka’ana Israeldoma la. Samuel yuun dela Yehowa nɔdɛ’ɛsa, la gãkerɛdaana yuuma zo’e zo’e. A yuun iti pa’ala ti a tari la sukpe’ene ge me kɔ’ɔn tara yelemɛŋɛrɛ pu’usa Yehowa a vom dabesa za’a.
Kaalɛ Baabule zɛ’ɛsi wa:
Sɔsɛ ya sokere wa:
Samuel yuun eŋɛ la wani pa’alɛ ti a tari sukpe’ene?
Viisɛ Pa’asɛ
1. Yehowa suɣerɛ la yuun boi la Silo. Tɔɣɛ pa’alɛ Silo n yuun ani se’em. (w92-E 11/1 8-9)Bisɛ foote A
Todd Bolen/BiblePlaces.com
Foote A: Diimi Silo yuun boi la kalam
2. Samuel vom yuun ani la wani se’em ma’a ti a yuun bɔna suɣerɛ la poan la? (ia-E 60-62 ¶9-13) Bisɛ foote B
Foote B
3. Baabule la n yeti “bala ma’an te Samuel nan ka mi Na’ayenɛ” la, vuurɛ dela bem? (1 Sa. 3:7; w02-E 12/15 8 ¶5-6)
4. Yehowa n yuun tɔɣɛ Eli, la a yizuo yele se’em la yuun tum tuuma la wani? (it-E “Eli, 1” ¶5-7)
Ti’isɛ Hon Wan Dekɛ Tum Tuuma Se’em
Bunbilipaalesi wan eŋɛ la wani ta’an nana bɔ’ɔra wuu Samuel la? (1 Sa. 3:5)
Bunbilipaalesi wan eŋɛ la wani ta’an bɔ’ɔra gilema wuu Samuel la? (1 Sa. 3:6-10)
Bunbilipaalesi wan eŋɛ la wani ti nɛreba ta’an dekɛ bamea delum ba? (1 Sa. 3:15) Bisɛ foote D
Foote D
Wani ma’a ti la yele ta’an pakɛ ti bunbilipaalega dekɛ sukpe’ene tɔɣɛ ge Samuel makesonɛ la wan ta’an soŋɛ en la wani?
Ho wan eŋɛ la wani ta’an tɔɣesa Samuel sukpe’ene la?
Ti’isɛ Taɣesɛ Yehowa Yele
Samuel yele wa pa’alɛ mam ti Yehowa ani la wani?
Samuel yele wa makɛ la Yehowa puti’irɛ la wani?
Yehowa san ta isige Samuel kum poan, mam wan soke en la bem?
Zamesɛ Yɛla Pa’asɛ
Wani ma’a ti la yele ta’an pakɛ ti bunbilipaalesi, la bunkureba dekɛ sukpe’ene tum sɛla n nari?
Nɛresɛba n yuun boi la Samuel yuun ka bo’ori Naayinɛ gilema ge eŋa yuun kɔ’ɔn tuna la sɛla n peeri Naayinɛ puurɛ.