Dekɛ Homea Delum ‘Tiŋa Wa Za’a Gãkerɛdaana’ N Tari Nimbɔzore La!

1. Yehowa n yuun pa’alɛ Abraham sɛla la buɣelɛ to suure la wani?

ABRAHAM yuun kan malum tamɛ yele wa. Naayinɛ yuun doose la maleka poan yele Abraham ti a wan sa’am Sodom la Gomora tisi la. Abraham suure n yuun sa’am ti a soke yeti: ‘Ho wan sirum piisɛ tontɔɔdoma ta la yelebe’erodoma? Tiŋa wa za’a gãkerɛdaana la kan tum sɛla n de tontɔɔ?’ Yehowa n yuun di’ise suure pa’alɛ Abraham sɛla la, wan soŋɛ ge buɣelɛ to suure. Naayinɛ kan makɛ sa’am tontɔɔdoma.—Pin. 18:​23-33.

2. Bem n basɛ ti to tara suure lua ti Yehowa ni gãkɛ nɛreba la tontɔɔ sore poan ge me tara nimbɔzore?

² To eŋɛ la wani baŋɛ ti Yehowa ni gãkɛ nɛreba la tontɔɔ sore poan ge me tara nimbɔzore? To mi ti ‘Yehowa biseri la nɛreba suuren.’ (1 Sa. 16:7) Yelemɛŋɛrɛ, a mi ‘asaala woo suuren mɛ.’ (1 Na. 8:39; 1 Yel. 28:9) Yele wa kɛ̃’ɛri la suure. Yehowa yɛm la n ka tari makerɛ la zuo, saŋa ase’a to ta’an kan bɔkɛ sɛla n sɔi ti a kɔ’ɛ a puti’irɛ bala. Bala n sɔi ti tuuntuna Paul yuun tɔɣɛ Naayinɛ yele ti: ‘Ani n wan ta’an bɔkɛ Naayinɛ puti’irɛ?’—Arom 11:33.

3-4. Saŋa ase’a, soke ani ti to ni soke ge to wan zamesɛ la bem zaseŋɔ wa poan? (Yon 5:​28, 29)

³ Ge saŋa ase’a, tomam me ta’an ni soke sokese’a ti Abraham yuun soke Yehowa la. To ta’an ti’isa nyaa, ‘Yehowa wan isige nɛresɛba ti a yuun sa’am la, maɣesɛ wuu Sodom la Gomora nɛreba la? Basɛba wan laɣum pa’asɛ sɛba n daɣɛ tontɔɔdoma la poan isige kum poan?’—Tm. 24:15.

⁴ Basɛ ya ti to bisɛ ya ton bɔkɛ kum isigeri la yele se’em. La ka yue ti to demese ton bɔkɛ ‘sɛba n wan ta isige ge vɔna,’ la ‘sɛba n wan ta isige ge nyɛ gãkerɛ la’ vuurɛ.a (Kaalɛ Yon 5:​28, 29.) Wana wa basɛ ti to le bɔkɛ la yɛla ase’a me pa’asɛ ti to wan sɔsɛ de yele zaseŋɔ wa, la zaseŋɔ seko n taɣelɛ la poan. To san sɔsera Yehowa n gãkeri yɛla tontɔɔ se’em la, to wan baŋɛ ton mi sɛla la ton ka mi sɛla.

TON KA MI SƐLA

5. To gɔnɔ yuun tɔɣɛ nɛresɛba ti ba yuun sa’am ba Sodom la Gomora tisi poan la yele la wani?

⁵ Yuunse’a n tole la, to gɔnɔ la pa’alɛ to la sɛla n wan paɛ nɛresɛba ti Yehowa wan gãkɛ ti ba daɣɛ tontɔɔdoma la. To yuun yeti, nɛresɛba ti ba yuun sa’am ba Sodom la Gomora tisi la kan isige kum poan. Ge ton zamesɛ Baabule la ge zusɛ Yehowa de poan la basɛ ti to baŋɛ ti to kan ta’an yele bala. Beni n sɔi?

6. Bo makerɛ pa’alɛ Yehowa n yuun gãkɛ nɛreba basɛba ti ba daɣɛ tontɔɔdoma se’em ge bem ti to ka mina?

⁶ Geele yele ana wa bisɛ. Yɛla zo’e zo’e boi Baabule la poan n pa’alɛ Yehowa n yuun gãkɛ sɛba n daɣɛ tontɔɔdoma la se’em. Makerɛ, Noah dabesa la poan, Yehowa yuun sa’am nɛreba la za’a mɛ ge basɛ Noah la a deodoma ma’a. Leyɛ’ɛsa, Yehowa yuun basɛ ti Israeldoma la ku nɛresɛba n yuun kɛ̃’ɛri Pu’ulumbiŋere Tiŋa la mɛ. A yuun le basɛ ti maleka ku Asiria soogɛpa 185,000 yu’uŋɔ yiŋɔ. (Pin. 7:23; Tɛɛ. 7:​1-3; Isa. 37:​36, 37) Yele ana wa za’a poan, Baabule la ka tɔɣɛ mɔpi ti Yehowa kɔ’ɔn gãkɛ nɛrebana wa mɛ ti a kan isige ba kum poan. Beni n sɔi ti to wan ta’an yele bala?

7. Bem ti to ka mina la nɛresɛba n yuun ki Noah Kokemɔ la poan, la sɛba ti Israeldoma la yuun ku Kanaan tiŋa poan la? (Bisɛ foote.)

⁷ To ka mi Yehowa n yuun gãkɛ nɛrebana wa se’em. To me ka mi nyaa nɛreba wa yuun nyɛ yɔ’ɔ zamesɛ Yehowa yɛla ta’an tee. Kokemɔ saŋa la, Baabule la yuun tɔɣɛ Noah yele ti a yuun dela se’em n yuun ‘mɔɔlɛ yelemɛŋɛrɛ yɛla.’ (2 Pe. 2:5) Ge Baabule la ka yeti, Noah n yuun kpa’ari ɔɔreŋɔ kãtɛ la, a yuun nyɛ yɔ’ɔ mɛ mɔɔlɛ bo nɛra woo tingɔŋɔ la zuo. Bala mea nɔɔ ti to ka mi nyaa nɛrebɛ’ɛsi la n yuun boi Kanaan tisi poan la yuun nyɛ yɔ’ɔ zamesɛ Yehowa yɛla ge eŋɛ teere ba vom poan.

8. Bem yɛla ti to ka mina doose Sodom la Gomora nɛreba la?

⁸ Ge nɛresɛba n yuun ki Sodom la Gomora sa’aŋɔ la poan la me? Tontɔɔ nɛra Lot yuun kɛ̃’ɛri la Sodom. Ge to wan ta’an yeti Lot yuun mɔɔlɛ bo nɛrebana wa za’a me yoi? Aayi. Ba yuun dela be’emdoma ge ba za’a yuun mi be’em la som me yoi? Tɛ̃ra ti tiŋa la buraasi zo’e zo’e yuun boti la ba gã’arɛ Lot saama la. Baabule la yeti, buraasi la yuun dela ‘bunkureba la bunbilipaalesi.’ (Pin. 19:4; 2 Pe. 2:7) To wan ta’an yeti, Yehowa Naayinɛ n tari nimbɔzore la gãkɛ nɛrebana wa za’a mɛ ti a kan isige ba kum poan? Aayi, to kan ta’an yele bala. Yehowa yuun yele Abraham ti hali tontɔɔ nɛreba pia puɣum ka bɔna tiŋa la poan. (Pin. 18:32) Ba yuun daɣɛ tontɔɔ nɛreba n sɔi ti Yehowa yuun sa’am ba la. Bala, to wan ta’an yeti ba se’em sa’am kan pa’asɛ sɛba n ‘daɣɛ tontɔɔ nɛreba ti ba wan ta isige’ ba la poan yoi? Aayi, to kan ta’an yele bala!

9. Bem ti to ka mina Solomon yele la poan?

⁹ Leyɛ’ɛsa, Baabule la tɔɣɛ nɛreba basɛba n yuun de tontɔɔdoma ge nyaa yuun ka le dɛna tontɔɔdoma yele. Naba Solomon dela ayima. A sɔ yuun pa’alɛ en Naayinɛ yɛla mɛ ti Yehowa me yuun kã bo en soŋa soŋa; ge pooren, a yuun nyaa ta kaabera la baɣa. Wana wa yuun basɛ ti Yehowa sunsɔa nyie mɛ ti a basɛ ti daaŋɔ paɛ eŋa la Israeldoma la yuuma zo’e zo’e. Yelemɛŋɛrɛ, Baabule la yeti ba yuun ‘laaɛ Solomon la a sɔyaabedoma yɔɔrɔ poan,’ wuu ban yuun laaɛ Naba David se’em la. (1 Na. 11:​5-9, 43; 2 Na. 23:13) Ge ban yuun laaɛ en zɛ’an la pa’alɛ ti a wan ta isige kum poan yoi? Baabule la ka tɔɣɛ de yele. Basɛba ta’an ti’isɛ ti, ‘se’em n ki la ba basɛ a be’em bo en mɛ’ (Arom 6:7) Bala dela yelemɛŋɛrɛ ge la ka pa’alɛ ti se’em woo n ki wan ta isige kum poan ti la ana wuu la dela pɛregerɛ ti ba isige en. Kum isigere puti’irɛ la dela bo’olum n ze’ele Naayinɛ zɛ’an. A dekɛ bɔ’ɔra la sɛba ti a bɔta ti ba le nyɛ yɔ’ɔ pu’usa en daarewoo. (Yob 14:​13, 14; Yon 6:44) Solomon wan nyɛ bo’olum wa? Yehowa ma’a n mi; tomam ka mi. Tomam n mi sɛla dela Yehowa wan tum sɛla n ani soŋa.

TON MI SƐLA

10. La ni ana Yehowa la wani a san yeti a sa’am nɛreba? (Ezekiel 33:11) (Bisɛ foote la.)

¹⁰ Kaalɛ Ezekiel 33:11. Yehowa basɛ ti to baŋɛ lan ni ana en se’em a san gãkera nɛreba. Vo’osum la yuun basɛ ti tuuntuna Peter taɣesɛ la nɔdɛ’ɛsa Ezekiel n yuun gulesɛ sɛla la ti, ‘Yehowa ka boti nɛreba nyɛ sa’aŋɔ.’ (2 Pe. 3:9) Yele wa buɣelɛ la to suure ti to mina ti Yehowa kan sa’am nɛra, san daɣena la a bisɛ ti la nari mɛ ti a eŋɛ bala. A nimbɔzore la ka tari makerɛ. La me san nara a ni zɔ nɛreba nimbũ’ɔ mɛ.

11. Bani n kan isige kum poan ge to eŋɛ la wani baŋɛ bala?

¹¹ To mi la bem la nɛresɛba ti ba kan isige ba kum poan la? Baabule la tɔɣɛ la ba poan fii yele.b Yezu yuun yeti, Yudas Iskariot kan isige kum poan. (Mr. 14:21; le bisɛ Yon 17:12 la zaseŋɔ yelesum la.) Yudas yuun kɔ’ɔn mina la fii ge zaɣesɛ Yehowa Naayinɛ, la A Dayɔa la. (Bisɛ Mr. 3:29 la zaseŋɔ yelesum la.) Bala mea nɔɔ ti Yezu yuun yele pu’usegɔ nɛŋadoma sɛba n yuun giiseri en la ti, ba san ki ba kan isige kum poan. (Mt. 23:33; bisɛ Yon 19:11 la “the man” zaseŋɔ yelesum la.) Tuuntuna Paul me yuun kaɣɛ a yelege n meadoma sɛba n yuun ka tee la ti ba kan isige kum poan.—Heb. 6:​4-8; 10:29.

12. To mi Yehowa nimbɔzore la yele la wani? Bo makerɛ.

¹² To baŋɛ ti Yehowa tari la nimbɔzore ti la ka tara makerɛ. A me ‘ka boti nɛreba nyɛ sa’aŋɔ.’ Yehowa yuun zɔ nɛresɛba n yuun tum be’em la nimbũ’ɔ la wani? Naba David yuun sa’am la pɔɣedire ge me ku nɛra. Ge David n yuun tee la, Yehowa yuun zɔ la a nimbũ’ɔ ge di sugeri bo en. (2 Sa. 12:​1-13) Naba Manase yuun tum la yelegaasa zo’e zo’e. Hali la bala za’a, Yehowa yuun zɔ buraa wa n tee la nimbũ’ɔ mɛ ge di sugeri bo en. (2 Yel. 33:​9-16) Yele ana wa basɛ ti to baŋɛ ti Yehowa san bisɛ ti la nari, a ni zɔ nɛra nimbũ’ɔ mɛ. Nɛrebana wa n yuun baŋɛ ti ba tum la be’em ge tee la zuo, a wan isige ba kum poan.

13. (a) Beni n sɔi ti Yehowa yuun zɔ Nineveh nɛreba la nimbũ’ɔ? (b) Yezu yuun tɔɣɛ Nineveh nɛreba wa yele la wani?

¹³ To me mi ti Yehowa yuun zɔ Nineveh nɛreba la nimbũ’ɔ mɛ. Naayinɛ yele Yona ti: ‘Mam nyɛ ba putotuuma la mɛ.’ Ge ban yuun basɛ ba be’em la, Yehowa yuun di la sugeri bo ba. Yehowa yuun tari la nimbɔzore gana Yona. La boi bim ti Yona sunsɔa n yuun nyie ge Naayinɛ yuun basɛ ti a baŋɛ ti Nineveh nɛreba la yuun ‘ka mi be’em la som.’ (Yna 1:​1, 2; 3:10; 4:​9-11) Pooren, Yezu yuun dekɛ yele wa tɔɣɛ pa’alɛ la Yehowa n tari nimbɔzore se’em a gãkerɛ poan. Yezu yuun yeti, Nineveh nɛreba wa wan ta ‘isige ge nyɛ gãkerɛ.’—Mt. 12:41.

14. Ban wan ta isige Nineveh nɛreba la ti ba ‘nyɛ gãkerɛ’ la vuurɛ?

¹⁴ Nineveh nɛreba la n wan ta ‘isige’ ge nyɛ ‘gãkerɛ’ la vuurɛ? Yezu yuun yeti beere sa’am, nɛreba wan ‘isige ge nyɛ gãkerɛ.’ (Yon 5:29) A yuun tɔɣeri la a Yuun Tusere Na’am Bisega la yele, sansɛka ti a wan isige ‘tontɔɔdoma la sɛba n daɣɛ tontɔɔdoma’ kum poan la. (Tm. 24:15) Sɛba n daɣɛ tontɔɔdoma la wan ‘isige ge nyɛ gãkerɛ.’ Bala pa’alɛ ti ba san ta isige, Yehowa la Yezu wan bisɛ nyaa nɛrebana wa nani ge tara sɛla ti ba zamesa la tuna tuuma ba vom poan. Ba san ta isige Nineveh nɛra ti a zaɣesɛ ti a kan pu’usɛ Naayinɛ, Yehowa wan sa’am en. (Isa. 65:20) Ge ba wan ta gãkɛ sɛba n pu’useri Yehowa yelemɛŋɛrɛ sore poan la soŋa ti ba ta vɔna daarewoo!—Da. 12:2.

15. (a) Beni n sɔi ti la ka nara ti to yeti Sodom la Gomora nɛreba la kan isige kum poan? (b) To wan bɔkɛ yelese’a n boi Yude 7 la wani? (Bisɛ daka la zuo n de “Yude Yuun Boti A Yeti Bem?”)

¹⁵ Yezu n yuun tɔɣeri Sodom la Gomora nɛreba la yele la, a yuun yeti ‘Gãkerɛ Daarɛ la,’ la wan ta ana naana bɔ’ɔra ba gana nɛresɛba n zaɣesɛ eŋa Yezu la a pa’alegɔ la. (Mt. 10:​14, 15; 11:​23, 24; Lu. 10:12) Yezu yuun boti a yeti bem? To ta’an ti’isa ti a yuun boti a yeti eŋa saŋa la nɛreba la yuun tum be’em gaŋɛ Sodom la Gomora mɛ ge Yezu yuun tɔɣɛ la wana mɔpi. Yezu n yuun yeti Nineveh nɛreba wan ta isige ge nyɛ gãkerɛ la, a yuun tɔɣɛ la yele la n de se’em wana mɔpi. Daanse’ere, Yezu yuun tɔɣɛ Sodom la Gomora yele la bala mea nɔɔ. ‘Gãkerɛ Daarɛ’ seko ti Yezu yuun tɔɣɛ de yele la dela ‘Gãkerɛ Daarɛ’ seko mea nɔɔ ti a yeti Nineveh nɛreba wan nyɛ la. Sodom la Gomora nɛreba la yuun tum la yelegaasa wuu Nineveh nɛreba la. Nineveh nɛreba la yuun nyɛ la yɔ’ɔ tee. Leyɛ’ɛsa, tɛ̃ra Yezu n yuun tɔɣɛ sɛba n wan ta isige ge nyɛ gãkerɛ la yele se’em. Sɛba n tum tuunbe’ero laɣum pa’asɛ bim mɛ. (Yon 5:29) Bala la, daanse’ere Sodom la Gomora nɛreba la ta’an tara beere sa’am kum isigere puti’irɛ. Daanse’ere nɛrebana wa basɛba wan ta isige kum poan. Tomam me ta’an nyɛ yɔ’ɔ ti to pa’alɛ ba Yehowa la Yezu Krista yɛla.

16. To mi la bem la Yehowa n wan isige nɛreba se’em kum poan la? (Yeremia 17:10)

¹⁶ Kaalɛ Yeremia 17:10. Kaalegɔ zɛ’an wa basɛ ti to baŋɛ la ton mi sɛla: Yehowa n ‘maɣesɛ nɛreba puti’irɛ bisa ge mina sɛla n boi ba suuren.’ La san dɛna beere sa’am kum isigere la yele, a wan ‘yɔ nɛra woo la a itigɔ’ wuu eŋa n ni puɣum ita se’em la. La san nara, Yehowa wan zɔ nɛreba nimbũ’ɔ ge a kan eŋɛ kɔɔl. Bala la, la ka nari ti to yeti nɛra kan isige kum poan san daɣena la Baabule la n yele bala!

‘TIŊA WA ZA’A GÃKERƐDAANA LA WAN EŊƐ SƐLA N DE TONTƆƆ’

17. Nɛresɛba n ki la wan ta nyɛ la bem?

¹⁷ Adam la Hawa n yuun naɛ la Sitaana ti ba eŋɛ kpenkpasi la Yehowa la zuo, nɛreba tustuse tusa n ki. Kum sirum dela to ‘dima!’ (1 Ko. 15:26) Nɛresɛba n ki la wan ta nyɛ la bem? Ba wan ta isige nɛreba 144,000 ti ba naɛ la Krista bɔna saazuo, vɔna wuusa. (Lil. 14:1) Ba me wan isige nɛreba zo’e zo’e n nɔŋɛ Yehowa ti ba pa’asɛ sɛba n de ‘tontɔɔdoma’ la poan. Ba san kelum dɛna tontɔɔdoma Krista Yuun Tusere Na’am Bisega la, la ki’i gurebisɛ la poan, ba wan bɔna daarewoo tingɔŋɔ wa zuo. (Da. 12:13; Heb. 12:1) Lɛyɛ’ɛsa, Yuun Tusere Na’am Bisega la poan, sɛba n yuun ka pu’usɛ Yehowa ge me ‘tuna tuunbe’ero’ la wan nyɛ yɔ’ɔ ti ba tee pu’usa Yehowa la yelemɛŋɛrɛ. (Lu. 23:​42, 43) Ge nɛreba basɛba yuun tuni la tuungaasa, kɔ’ɔn zaɣesɛ Yehowa ge me yuun ka ita eŋa n boti sɛla. Nɛrebana wa ti Yehowa kɔ’ɛ a puti’irɛ ti a kan isige ba la.—Lu. 12:​4, 5.

18-19. (a) Beni n sɔi ti to wan ta’an dekɛ tomea delum Yehowa la eŋa wan ta gãkɛ sɛba n ki la se’em la? (Isaiah 55:​8, 9) (b) To wan sɔsɛ la bem zaseŋɔ seko n taɣelɛ la poan?

¹⁸ To wan ta’an yeti, Yehowa ni kɔ’ɔn gãkɛ nɛreba la tontɔɔ sore poan? Ɛɛ! Wuu Abraham n yuun baŋɛ se’em la Yehowa ani la kasi, tara yɛm ge me dɛna ‘tiŋa wa za’a gãkerɛdaana’ n tari nimbɔzore. A kumesɛ a Dayɔa la mɛ ge yele en ti a gãkɛ nɛreba. (Yon 5:22) Yehowa la Yezu mi sɛla n boi asaala woo suuren mɛ. (Mt. 9:4) Bala zuo la, ba wan tum ‘sɛla n de tontɔɔ’!

¹⁹ Basɛ ya ti to lu suure ti to wan dekɛ tomea delum Yehowa ge sakɛ eŋa n ni kɔ’ɛ a puti’irɛ se’em la. To sakɛ ti eŋa ma’a n wan ta’an gãkɛ nɛreba ge daɣɛ tomam. (Kaalɛ Isaiah 55:​8, 9.) Bala n sɔi ti to dekɛ tomea delum Yehowa la a Dayɔa la ti ba gãkɛ nɛreba. Leyɛ’ɛsa, to mi ti Yezu n de to Naba la wan tɔɣesa a Sɔ nimbɔzore la, a san gãkera. (Isa. 11:​3, 4) Ge Yehowa la Yezu wan ta gãkɛ nɛreba la wani mɛlesekãtɛ la poan? Bem ti to ka mina? Bem ti to mina? Zaseŋɔ seko n taɣelɛ la wan lebese soke ana wa.