Yehowa N Boti Mabiisi Ita Sɛba N Tum Be’em Se’em

1. Yehowa boti nɛra woo eŋɛ la bem?

YEHOWA bo to la yɔ’ɔ ti to ta’an kɔ’ɛ to puti’irɛ. Dabeserɛ woo, to ni kɔ’ɛ to puti’irɛ mɛ yɛla poan. Yelese’ere n de ninmu’urɛ dela nɛra kɔ’ɛ a puti’irɛ ti a wan kã amea bo Yehowa ge naɛ la Yehowa nɛreba pu’usa en. Yehowa boti la nɛra woo ita bala. Beni n sɔi? Se’ere n sɔi la, a nɔŋɛ la nɛreba ge bɔta ti la ana ba soŋa. A boti la ba dɛna a zɔdoma ge ta vɔna daarewoo.—Tɛɛ. 30:​19, 20; Gal. 6:​7, 8.

2. La ani Yehowa la wani la sɛba n tum be’em la? (1 Yon 2:1)

² Yehowa ka pɛ̃regeri tɔ ti to pu’usa en. A boti la nɛra woo loe eŋa n wan eŋɛ se’em. Ge keendoma la wan eŋɛ la wani Kristabia san tum be’em? A san ka basɛ a be’em la, ba wan yese en tansugere la poan. (1 Ko. 5:13) Hali ba san puɣum yese en tansugere la poan, Yehowa kɔ’ɔn bɔta la se’em n tum be’em la tee ge lebe a zɛ’an na. Bala n sɔi ti a yuun basɛ ti Yezu wa’ana ki bo to, ti a ta’an dita sugeri bɔ’ɔra sɛba n basɛ ba be’em la. (Kaalɛ 1 Yon 2:1.) Yehowa tari la nɔŋerɛ. Bala n sɔi ti a kɔ’ɔn yɛta sɛba n tum be’em la ti ba basɛ ba be’em.—Zek. 1:3; Arom 2:4; Yam. 4:8.

3. To wan sɔsɛ la bem zaseŋɔ wa poan?

³ Yehowa basɛ ti to baŋɛ lan ni ana en se’em nɛra san tum be’em. A me boti la, la ana to bala. To wan zamesɛ baŋɛ Paul n yuun yele mabiisi la n boi Korint la ti ba eŋɛ sɛla, nɛra san tum be’em. To wan le bisɛ Paul n yuun yele ba ti ba eŋɛ sɛla, nɛra la san basɛ a be’em la. Leyɛ’ɛsa, to wan baŋɛ lan ni ana Yehowa se’em nɛra san tum be’em.

BEM N YUUN EŊƐ SE’EM MA’A TI MABIA AYIMA YUUN TUM BE’EM LA?

4. Bem n yuun eŋɛ diimi Korint tansugere paalega la poan? (1 Korint 5:​1, 2)

⁴ Kaalɛ 1 Korint 5:​1, 2. Paul n yuun boi a satiŋa na’am yetɔɣum yalegerɛ tuuma n pa’asɛ butã la poan la, a yuun wum la sɛla n iti Korint tansugere paalega la poan, ti la daam en paa. Mabia ayima n yuun boi tansugere la poan naɛ la a sɔ pɔɣa gã. Hali sɛba n ka pu’useri Naayinɛ yuun mi ti yele wa dela gaasa! Mabiisi la yuun ti’iseri ti eŋa n eŋɛ sɛla la daɣɛ be’em, a me ta’an kelum bɔna tansugere la poan. Daanse’ere, mabiisi wa yuun ti’iseri ti ba tɔɣeseri la Yehowa n tari nimbɔzore la. Ge Yehowa yuun ka boti bala. Hali, la yuun eŋɛ sɛba n ka pu’useri Yehowa la liɣebi la nɛrekana n laɣum pa’asɛ Yehowa tansugere la poan la. A itigɔ la me ta’an taɛ mabiisi sɛba n naɛ la en bɔna la. Bala la, Paul yuun yele mabiisi la ti ba eŋɛ la bem?

5. Paul yuun yele mabiisi la ti ba eŋɛ la bem ge bala vuurɛ? (1 Korint 5:13) (Bisɛ foote la.)

⁵ Kaalɛ 1 Korint 5:13. Yehowa yuun basɛ ti Paul gulesɛ la gɔŋɔ ta bo Korint mabiisi la ti nɛra san tuna be’em ge ka bɔta ti a tee, ba yese en tansugere la poan. Mabiisi la yuun nari ti ba ita en la wani? Paul yuun yeti ba “da dekɛ [bamea] lagom la” en. Bala vuurɛ? La pa’alɛ ti ba ‘puɣum da naɛ la nɛrekaŋa dita.’ (1 Ko. 5:11) Ho san naɛ la nɛra dita, hon la eŋa ni sɔsera mɛ. Paul yuun boti a yeti la ka nari ti mabiisi la naɛ la buraa wa bɔna. Bala wan basɛ ti a itigɔ la kan taɛ mabiisi la. (1 Ko. 5:​5-7) Leyɛ’ɛsa, bala wan basɛ ti buraa la baŋɛ a itigɔ la n daam Yehowa se’em ge nyaa bɔta ti a tee.

6. Mabiisi la yuun eŋɛ la wani ban yuun to’e Paul gɔŋɔ la ge buraa la me yuun eŋɛ la bem?

⁶ Paul n yuun gulesɛ gɔŋɔ la ta bo Korint mabiisi la ba’asɛ la, a yuun boti la a baŋɛ mabiisi la n wan eŋɛ sɛla. Titus yuun yele Paul la sɛla ti a puurɛ pee. Mabiisi la yuun doose Paul pa’alegɔ la mɛ ge yese be’emdaana la tansugere la poan. (2 Ko. 7:​6, 7) Hali yelesonɛ la dela, mabiisi la n yuun doose Paul pa’alegɔ la, buraa la yuun basɛ a be’em la mɛ! A yuun tee a itigɔ la mɛ ge nyaa dɔla Yehowa pa’alegɔ. (2 Ko. 7:​8-11) Paul yuun nyaa yele mabiisi la ti ba eŋɛ la bem?

MABIISI LA N YUUN NARI TI BA EŊƐ BE’EMDAANA LA N TEE LA SE’EM

7. Se’em ma’a ti ba yuun yese be’emdaana la tansugere la poan la, a yuun eŋɛ la bem? (2 Korint 2:​5-8)

⁷ Kaalɛ 2 Korint 2:​5-8. Paul yuun yeti, mabiisi la “zo’e zo’e n bo nɛre’enadaana namehe seko taaba la seke ya.” Bala pa’alɛ ti ban yuun yese buraa la tansugere la poan la, a yuun tee mɛ. La yuun ka le nara ti mabiisi la kelum lɔɣesa en.—Heb. 12:11.

8. Paul yuun nyaa yele mabiisi la ti ba eŋɛ la bem?

⁸ Buraa la n yuun tee la zuo, Paul yuun yele keendoma la ti ba to’e en lebe tansugere la poan na. A me yuun yele mabiisi la ti: “Di ya suguru bo ya [buraa la n tum be’em la], ge soŋɛ ya en te a da tara sunsagaŋɔ. . . . Bahɛ te a nya baŋɛ nananawa te ya seren nɔŋɛ en mɛ.” Paul yuun boti la mabiisi la eŋɛ pa’alɛ ti ba sirum di sugeri bo en ge me nɔŋɛ en. Bala wan basɛ ti buraa la baŋɛ ti mabiisi la puurɛ pee mɛ la eŋa n lebe tansugere la poan na la.

9. Daanse’ere beni n sɔi ti la yuun kpe’em bo mabiisi basɛba ti ba di sugeri bo buraa la n tee la?

⁹ Buraa la n yuun lebe tansugere la poan na la, daanse’ere la yuun kpe’em bo mabiisi basɛba mɛ ti ba to’e en soŋa. Beni n sɔi ti to yele bala? Daanse’ere basɛba sunsɔa yuun kelum nyie mɛ la eŋa n basɛ ti daaŋɔ seto paɛ mabiisi la. A itigɔ la me yuun ta’an basɛ ti mabiisi basɛba zuo fakɛ. Mabiisi la n boi tansugere la poan la yuun tiregeri mɛ ti ba nana Yehowa pa’alegɔ. Bala la, basɛba yuun ta’an ti’isa ti la ka nari ti ba le to’e buraa la lebe tansugere la poan na. (Dekɛ makɛ Luke 15:​28-30.) Beni n sɔi ti la yele yuun pakɛ ti mabiisi la eŋɛ pa’alɛ ti ba nɔŋɛ buraa la n tee la?

10-11. Keendoma la yuun san ka di ni sugeri bo buraa la n tee la, bem n wan ta’an eŋɛ?

¹⁰ La wan ana buraa la n tee la, la wani keendoma la san zaɣesɛ ti ba kan to’e en lebe tansugere la poan na? Bii la wan ana en la wani, a san lebe tansugere la poan na ti mabiisi la ka to’e en soŋa? A giila wan kɔ’ɔsɛ ti a ti’isa ti eŋa kan le ta’an pu’usa Yehowa. A me ta’an ti’isa ti Yehowa kan makɛ di sugeri bo en. Bala la, yɛm ka boi bim ti a tee.

¹¹ Bem n wan le eŋɛ, mabiisi la san zaɣesɛ ti ba kan di sugeri bo buraa la n tee la? Bamam la Yehowa zɔtɔ nyɔka la wan sa’am. Beni n sɔi? Se’ere n sɔi la ba ka tɔɣeseri Yehowa n diti sugeri se’em la. Ba tuɣum tɔɣesa la Sitaana n de putɔya ge ka zɔta nɛreba nimbu’ɔ la. Sitaana nyaa wan doose la bamam poan kɔ’ɔsɛ buraa la n tee la giila.—2 Ko. 2:​10, 11; Ep. 4:27.

12. Mabiisi la yuun wan ta’an tɔɣesa Yehowa la wani?

¹² Mabiisi la n boi Korint tansugere la poan la yuun wan ta’an tɔɣesa Yehowa la wani? Ba yuun nari ti ba ita sɛba n tee la wuu Yehowa n iti se’em la. David yuun yeti Yehowa “dela sugurom dita, ge tara som.” (Ym. 86:5) Mikah yuun yeti: “Yenɛ dene n ane wo hom? Bahera be’em, ge dita suguru bɔ’ɔra?” (Mik. 7:18) Isaiah me yuun yeti: “Bahɛ pototooma la potɛn’be’ero la ge ŋmɛregɛ lebe Na’ayenɛ zen’an na, a wan zɔ ho ninbɔ’ɔn. Ŋmɛregɛ lebe Yenɛ zen’an na, a wan di suguru bo ho.”—Isa. 55:7.

13. Beni n sɔi ti la yuun nara ti ba to’e buraa la n tee la ti a le bɔna tansugere la poan? (Bisɛ daka la zuo n de “Sankani Ti Ba Yuun To’e Korint Buraa La Lebe Tansugere La Poan Na?”)

¹³ Mabiisi la n boi Korint tansugere la poan la yuun san wan ta’an tɔɣesa Yehowa, la nari ti ba eŋɛ pa’alɛ ti ba nɔŋɛ buraa la ge ti ba puurɛ me pee la eŋa n lebe na la. Paul yuun yeti mabiisi la san di sugeri bo buraa la n tee la, la pa’alɛ ti ba ‘nani sɛla ti a yele ba ti ba ita la.’ (2 Ko. 2:9) La boi bim ti ban yuun yese buraa la tansugere la poan la, ŋmaresi fii poan ti a tee. Ge bala ka pa’alɛ ti keendoma la gu’una ti ba kan to’e en ti a lebe tansugere la poan.

TON WAN EŊƐ SE’EM TA’AN TƆƔESA YEHOWA TONTƆƆ TUUMA LA A NIMBƆZORE LA

14-15. To wan ta’an zamesɛ la bem la sɛla n yuun eŋɛ diimi Korint tansugere la poan la? (2 Peter 3:9) (Bisɛ foote la.)

¹⁴ Yehowa yuun basɛ ti ba gulesɛ sɛla n eŋɛ diimi Korint tansugere la poan la ti la “pa’ala la tomam.” (Arom 15:4) Sɛla n yuun eŋɛ la basɛ ti to baŋɛ ti Yehowa ka boti sɛba n tum be’em ge ka bɔta ti ba tee la kelum bɔna tansugere la poan. Nɛreba basɛba ta’an ti’isa ti, Yehowa n zoti nɛreba nimbu’ɔ la zuo mabia san tum be’em ge ka bɔta ti a tee, a ta’an kelum bɔna tansugere la poan. Yehowa ka iti a yɛla bala. La boi bim ti Yehowa zoti nɛreba nimbu’ɔ mɛ ge a ka sakɛ itigɔ woo. A pa’alegɔ la me ka teeri. (Yude 4) Yehowa san basɛ ti sɛba n tum be’em ge ka bɔta ti ba tee la kelum bɔna tansugere la poan, la wan dɛna dɛŋa bɔ’ɔra mabiisi la.—Mag. 13:20; 1 Ko. 15:33.

¹⁵ To me zamesɛ baŋɛ ti Yehowa ka boti se’em sa’am. La san wan ta’an, a boti la a faaɛ la nɛra woo basɛ. Nɛra san tee ge bɔta ti a le tara bɔnsoŋa la en, Yehowa ni zɔ a nimbu’ɔ mɛ. (Eze. 33:11; kaalɛ 2 Peter 3:9.) Bala la, se’em ma’a ti Korint buraa la yuun tum be’em ge tee la, Yehowa yuun yele mabiisi la ti ba di sugeri bo en ge to’e en lebe tansugere la poan na.

16. La ani hon la wani la ban yuun maalɛ Korint buraa la yele se’em la?

¹⁶ Sɛla n yuun eŋɛ diimi Korint tansugere la poan la pa’alɛ ti Yehowa dela nɔŋerɛ, ita a yɛla ma’a ma’a ge me dɛna tontɔɔdaana. (Ym. 33:5) Ton zamesɛ baŋɛ Yehowa yele se’em la wan basɛ ti to pɛ̃ɣɛ en pa’asɛ. Ton de be’emdoma la zuo, to boti la Yehowa dita sugeri bɔ’ɔra tɔ. To puurɛ me pee mɛ la Yehowa n basɛ ti Yezu wa’ana ki bo to la. Ton baŋɛ ti Yehowa nɔŋɛ tɔ ge me bɔta ti la ana to soŋa la, buɣeli la to suure!

17. To wan sɔsɛ la bem zaseŋɔ se’a n taɣelɛ la poan?

¹⁷ Zina beere wa, mabia san tum be’em, keendoma la wan eŋɛ la wani ta’an tɔɣesa Yehowa nɔŋerɛ la ge soŋɛ en ti a tee? Keendoma la san kɔ’ɛ ba puti’irɛ ti ba yese mabia bii ba to’e en lebe tansugere la poan na, mabiisi la nari ti ba eŋɛ la bem? To wan sɔsɛ soke ana wa zaseŋɔ se’a n taɣelɛ la poan.