Keendoma N Wan Eŋɛ Se’em Ta’an Soŋɛ Sɛba Ti Ba Yese Ba Tansugere La Poan

1-2. (a) La ani Yehowa la wani nɛreba san tuna be’em ge ka bɔta ti ba tee? (b) Yehowa ni bɔta ti sɛba n tum be’em eŋɛ la bem?

YEHOWA ka sakɛ ti nɛra woo ita eŋa n boti se’em. A yaɛ be’em mɛ. (Ym. 5:​4-6) Yehowa boti la to dɔla a nɔya la n boi Baabule la poan la. Yelemɛŋɛrɛ, Yehowa mi ti to ka di mi’a. Bala la, to kan ta’an dɔla a nɔya la ma’a ma’a. (Ym. 130:​3, 4) Ge Naayinɛ ka boti sɛba n ‘basɛ ti Naayinɛ zu’usegɔ la dɛna ya’anɛ nyaa tuna yalumtuuma’ la. (Yude 4) Baabule la pa’alɛ ti Naayinɛ wan sa’am “nɛresɛba n ka zote Yenɛ la,” Armagedon zaberɛ la poan.—2 Pe. 3:7; Lil. 16:16.

² Ge Yehowa ka boti nɛnɛra nyɛ sa’aŋɔ. Wuu ton puɣum zamesɛ sɛla zaseŋɔ seto n tole la poan la, Baabule la pa’alɛ ti Naayinɛ “bote la nɛra woo tee a potɛn’ɛrɛ a be’emtooma poan.” (2 Pe. 3:9) Keendoma la me tɔɣeseri la Yehowa. Ba ni ma’ɛ la bamea soŋera sɛba n tum be’em la ti ba basɛ ba be’em ge ta’an le tara bɔnsoŋa la Yehowa. Ge saŋa ase’a, sɛba n tum be’em la ni ka bɔta ti ba tee. (Isa. 6:9) Keendoma la ta’an ni soŋera sɛba n tum be’em la ti ba basɛ ba be’em ge basɛba ni kelum tuna la be’em. La san ana bala, keendoma nari ti ba eŋɛ la wani?

“FOE YA BE’EM LA”

3. (a) Nɛra san tum be’em ge ka bɔta ti a tee, Baabule la pa’alɛ ti la nari ti ba eŋɛ en la bem? (b) Beni n sɔi ti to wan ta’an yeti la ani wuu be’emdaana la mea n loe ti ba yese en tansugere la poan?

³ Nɛra san tum be’em ge ka bɔta ti a tee, keendoma la nari ti ba doose la pa’alegɔ seko n boi 1 Korint 5:13 la. Bilam yeti: “Foe ya be’em la ya poan.” Be’emdaana la mi ti a san ka tee, ba wan yese en tansugere la poan. Bala la, eŋa mea n loe ti ba yese en tansugere la poan. (Ga. 6:7) Beni n sɔi ti to wan ta’an yele bala? Se’ere n sɔi la, keendoma la tiregɛ mɛ ti ba soŋɛ be’emdaana la ti a tee ge ti a zaɣesɛ. (2 Na. 17:​12-15) Se’em n tum be’em la itigɔ pa’alɛ ti a ka boti a dɔla Yehowa pa’alegɔ.—Tɛɛ. 30:​19, 20.

4. Mabia san tuna be’em ge ka bɔta ti a tee, beni n sɔi ti ba ni mɔɔlɛ bo tansugere la ti, ba yese en mɛ?

⁴ Mabia san tuna be’em ge ka bɔta ti a tee, ba ni yese en tansugere la poan mɛ. Bala pooren, ba nyaa ni mɔɔlɛ bo mabiisi la ti, nɛra la ka le dɛna Yehowa Sɛɛradaana. Ba ni ka bo mɔɔlegɔ la ti vi kɛ̃ se’em n tum be’em la ge la basɛ ti mabiisi la ta’an doose Baabule la n pa’alɛ se’em la. Baabule la yeti, to “da dekɛ [tomea] lagom” la nɛrekaŋa. To “da pon tara se’ere eta la nɛra ena daana.” (1 Ko. 5:​9-11) Yɛm boi bim la Yehowa n pa’alɛ tɔ ti to ita bala la. Tuntuna Paul yuun gulesɛ yeti: “Mi’ihom fiin wa ihegere zom mɛ.” (1 Ko. 5:6) Mabia san kɔ’ɔn tuna be’em, ti ba me ka yese en tansugere la poan, bala ta’an basɛ ti mabiisi basɛba ti’isa ti la yele ka pakɛ ti ba dɔla Yehowa pa’alegɔ.—Mag. 13:20; 1 Ko. 15:33.

5. Ba san yese mabia tansugere la poan, la nari ti to geele en la wani ge bem zuo?

⁵ Ba san yese mabia tansugere la poan, la nari ti to geele en la wani? La boi bim ti to ka le sɔsera la en ge bala ka pa’alɛ ti a kan ta’an lebe na. A ani wuu pesego n bɔregɛ. Bala la, a ta’an lebe na. Tɛ̃ra ti nɛra la mea n yuun kã amea bo Yehowa. Susa’aŋɔ la dela, a ka le ita eŋa n yuun kã amea bo Yehowa ti a ita se’em la. Bala basɛ ti a vom bɔna la dɛŋa poan. (Eze. 18:31) Ge Yehowa n kelum zɔta nɛreba nimbu’ɔ la zuo, to tari puti’irɛ ti nɛra la ta’an basɛ a be’em la ge lebe na. Keendoma wan eŋɛ la wani ta’an soŋɛ nɛra ti ba yese en tansugere la poan?

KEENDOMA LA N SOŊERI SƐBA TI BA NI YESE BA LA SE’EM

6. Keendoma ni eŋɛ la bem ta’an soŋɛ nɛra ti ba yese en tansugere la poan?

⁶ Ba san yese nɛra tansugere la poan, keendoma la ni kɔ’ɔn tamɛ a yele mɛ? Ba ni ka soŋera en ti a lebe na pu’usa Yehowa? La daɣɛ bala la fii me! Keendoma la ni yele be’emdaana la n ka boti a tee la ti, ba wan yese en tansugere la poan. Bala pooren, ba ni pa’alɛ en la eŋa n wan eŋɛ se’em ta’an lebe Yehowa zɛ’an na. Ge keendoma la ni eŋɛ la sɛla pa’asɛ. Saŋa zo’e zo’e, ba ni yele se’em n tum be’em la ti, ŋmaresi fii pooren, ba wan seke en baŋɛ nyaa a tee ya. Ŋmaresi fii pooren, nɛra la san sakɛ ti a seke keendoma la, ba wan kpemese a giila ti a basɛ a be’em la ge lebe Yehowa zɛ’an na. Keendoma la san seke en ge baŋɛ ti a ka tee, ba wan kelum yele en ti ba wan seke en pooren ta’an le soŋɛ en ti a lebe Yehowa zɛ’an na.

7. Ba san yese mabia tansugere la poan, keendoma la ni eŋɛ la bem ti la pa’alɛ ti ba tɔɣeseri la Yehowa? (Yeremia 3:12)

⁷ Keendoma la ni tɔɣesa la Yehowa nimbɔzore la, se’em ma’a ti ba soŋera nɛra ti ba yese en tansugere la poan. Makerɛ, diimi sa la, Yehowa yuun ka guri ti Israeldoma la basɛ ba be’em la ge ti a nyaa soŋɛ ba. La boi bim ti ba yuun kelum tuna la be’em ge Yehowa yuun tum la a nɔdɛ’ɛseba ti ba keŋɛ ba zɛ’an. Zaseŋɔ seko n pa’asɛ buyi la poan, to baŋɛ ti Yehowa yuun yele Hosea ti a di sugeri bo a pɔɣa la n kelum tuna be’em la ge le to’e en ti a dɛna a pɔɣa. (Ho. 3:1; Ma. 3:7) Keendoma kɔ’ɔn bɔta la be’emdaana la tee ge lebe tansugere la poan na. Ba ka iti yelese’a n wan basɛ ti la kpe’em bo be’emdaana ti a lebe na. Keendoma la n iti bala la pa’alɛ ti ba tɔɣeseri la Yehowa.—Kaalɛ Yeremia 3:12.

8. Biyaalega makerɛ la soŋɛ to la wani ti to baŋɛ Yehowa n tari giile se’em bɔ’ɔra sɛba n basɛ a pu’usegɔ la? (Luke 15:7)

⁸ Zaseŋɔ seko n pa’asɛ buyi la poan, to sɔsɛ la Yezu n yuun bo makerɛ pa’alɛ biyaalega la yele se’em. Se’em ma’a ti bia wa yuun lɛbera kula ti a sɔ la nyɛ en la, a sɔ la yuun zɔ “to’ohɛ [en mɛ,] bo en zaarɛ ge kɔkɛ en.” (Lu. 15:20) Tɛ̃ra ti sɔ la yuun ka guri ti a dayua la wa’ana belum en, ti a di sugeri bo en. Sɔ la n yuun tuɣum zɔ tu’usɛ a dayua la, se’ere n sɔi la a nɔŋɛ a dayua la mɛ. Keendoma la me tɔɣeseri la Yehowa, kɔ’ɔn tiregera ti ba soŋɛ sɛba ti ba yese ba tansugere la poan. Ba kɔ’ɔn bɔta la sɛba ti ba yese ba tansugere la poan la lebe Yehowa zɛ’an na. (Lu. 15:​22-24, 32) Nɛra san basɛ a be’em ge lebe tansugere la poan na, Yehowa, Yezu, malesi la, la mabiisi la za’a puurɛ ni pee mɛ!—Kaalɛ Luke 15:7.

9. Yehowa ni bɔta ti sɛba n tum be’em la eŋɛ la bem?

⁹ Ton nan zamesɛ sɛla wa basɛ ti to bɔkɛ ti Yehowa ka boti nɛresɛba n ka basɛ ba be’em la kelum bɔna tansugere la poan. Ge a ni ka tamɛ ba yele. A kelum soŋera ba mɛ ti ba ta’an lebe na. Nɛreba san basɛ ba be’em, tɛ̃ra lan ni ana Yehowa se’em. Hosea 14:4 yeti: “N wan tebɛ ba be’em wa, ge nɔŋɛ ba la n zo’osegɔ. Se’ere n sɔi la, mam suunre la ma’ɛn ya.” Keendoma n mi Yehowa n tari nɛreba giile se’em la zuo, ba ni bisa la yelese’a ti nɛra la ita ti la pa’alɛ ti a tee mɛ. Yetɔɣesebo n boi Hosea gɔŋɔ la poan la nari ti la soŋɛ sɛba n basɛ Yehowa pu’usegɔ la, ti ba baŋɛ ti Yehowa nɔŋɛ ba mɛ ge me bɔta ti ba lebe na.

10-11. Keendoma la ni eŋɛ la wani ta’an soŋɛ nɛresɛba ti ba yese ba tansugere la poan ti la yue la?

¹⁰ Keendoma la ni eŋɛ la wani ta’an soŋɛ nɛresɛba ti ba yese ba tansugere la poan ti la yue la? Nɛrebana wa ta’an ka le tuna be’em sebo ti ba yuun tuna ti ba yese ba tansugere la poan la. Saŋa ase’a, ba ta’an puɣum kan tɛ̃ra sɛla n yuun basɛ ti ba yese ba tansugere la poan la. La ka pakɛ la ban yese nɛra la ti la yue se’em, keendoma la wan tiregɛ ɛ ba zɛ’an ge soŋɛ ba. Keendoma la san keŋɛ ba zɛ’an, ba wan naɛ la ba zusɛ ge kpemese ba giila ti ba lebe Yehowa zɛ’an na. Yelemɛŋɛrɛ, nɛra san ka le bɔna tansugere la poan ti la yue, a ta’an ma’ɛ vo’osum poan paa. Bala la, nɛra san yeti eŋa boti la a lebe Yehowa zɛ’an na, keendoma la ta’an yele mabia ti a kena a zɛ’an zamesa en Baabule la, hali ba san nan ka to’e en. Saŋa woo, keendoma la nari ti ba loe mabia ti a ta’an zamesɛ la nɛrebana.

¹¹ Keendoma la tiregeri mɛ ti ba tɔɣesa Yehowa n nɔŋɛ nɛreba se’em la. Bala la, keendoma la ni ɛ sɛba woo n basɛ Yehowa pu’usegɔ mɛ ge ni kpemese ba giila ti ba lebe Yehowa zɛ’an na. Nɛra san eŋɛ pa’alɛ ti a basɛ a be’em la, ba ni eŋɛ la kalam to’e en lebe tansugere la poan na.—2 Ko. 2:​6-8.

12. (a) Saŋa ase’a, beni n sɔi ti keendoma nara ti ba ni bisɛ yɛla soŋa? (b) Beni n sɔi ti la ka nara ti to tiʼisa ti beʼem aseʼa boi mɛ ti Yehowa kan di sugeri bo? (Bisɛ tiŋanɔɔrɛ yelesum la.)

¹² Saŋa ase’a, keendoma la ni nara ti ba bisɛ yɛla soŋa ge to’e nɛra lebe tansugere la poan na. Nɛra la san tabelɛ sa’am bia, bii a lebege la a yelege n meadaana, bii a doose la nigum nigum sore poan basɛ a pɔɣa bii a sira, keendoma la nari ti ba geele yɛla soŋa soŋa ge ta’an sakɛ ti nɛra la sirum tee ya. (Ma. 2:14; 2 Tim. 3:6) Keendoma la nari ti ba te’ele mabiisi la n boi tansugere la poan la. Ge la nari ti to bɔkɛ ti nɛra san sirum basɛ a be’em ge tee a halɛ, Yehowa wan to’e en. Bala la, la boi bim ti keendoma la nari ti ba ni bisɛ soŋa la nɛresɛba n tum nɛreba putotuuma ge ba da ti’isa ti Yehowa kan makɛ di sugeri bo be’emdoma basɛba.a—1 Pe. 2:10.

MABIISI LA ME WAN TA’AN EŊƐ LA BEM?

13. Ton ani se’em la sɛba ti ba dɔlegɛ ba tuberɛ, la sɛba ti ba yese ba tansugere la poan boi to’ore to’ore la wani?

¹³ Wuu zaseŋɔ seko n tole la n pa’alɛ se’em la, ba san mɔɔlɛ ti ba dɔlegɛ la mabia tuberɛ, to ta’an kelum sɔsera la en, se’ere n sɔi la a basɛ a be’em la ti a tum la mɛ. (1 Tim. 5:20) A kelum dɛna la mabia, ti la nara ti to kpɛmesa a giila ti a nyɛta nɛŋa tɔlega. (Heb. 10:​24, 25) Ge se’em ti ba yese en tansugere la poan boi la a to’ore. To kan le “dekɛ [tomea] lagom” la nɛrekaŋa. To me kan “tara se’ere eta la nɛra ena daana.”—1 Ko. 5:11.

14. Kristakɔma wan ta’an kɔ’ɛ ba puti’irɛ la wani la bamam n wan ana la sɛba ti ba yese ba tansugere la poan se’em? (Bisɛ foote la.)

¹⁴ Ba san yese nɛra tansugere la poan, bala pa’alɛ ti to kan ta’an beem en ti a wa’an zamesegɔ na? Nɛra la me san wa’an zamesegɔ na, to kan ta’an pu’usɛ en? Aayi, la daɣɛ bala. Yelemɛŋɛrɛ, to kan sɔsera la en. Ge ba san yese nɛra tansugere la poan, ti a dɛna to yire nɛra bii a tabelɛ dɛna la to zɔ, to ta’an beem en ti a wa’an zamesegɔ na. Nɛra la san wa’an zamesegɔ na, to wan eŋɛ la wani? Ton yuun mi sɛla dela, la ka nari ti to pu’usɛ nɛra la. Ge nananawa, mabia woo n nari ti a kɔ’ɛ a puti’irɛ yele wa poan. Mabiisi basɛba ta’an kɔ’ɛ ba puti’irɛ ti ba pu’usɛ en bii bo en zaarɛ, a san wa’an zamesegɔ na. Ge to kan naɛ la nɛra la sɔsera yuura bii ita yɛla ase’a.

15. Yi’i Yon 9-11 tɔɣeri la be’emdoma bani yele? (Bisɛ daka la zuo n de “Yon La Paul Yuun Tɔɣeri La Be’em Buyina Yele?”)

¹⁵ Mabiisi basɛba me ta’an ti’isa ti, ‘Ge Baabule la ka yeti, Kristabia san pu’usɛ nɛrakana, a laɣum dɛna la buyina la en tuna be’em?’ (Kaalɛ 2 Yon 9-11.) Sɛla n boi 2 Yon 9-11 pa’alɛ ti nɛresɛba ti ba tɔɣera ba yele kalam dela a yelege n meadoma, la sɛba n tiregeri ti ba basɛ ti nɛreba tuna be’em. (Lil. 2:20) Bala la, nɛra san pa’ala yɛla n de a yelege n meadoma yɛla bii a mu’ɛ la nini tuna tunfɛ̃’ɛsa, keendoma la kan keŋɛ a zɛ’an. La boi bim ti nɛra n ani bala ta’an tee. Ge a san nan ka tee, to kan ta’an pu’usɛ en bii beem en ti a wa’an zamesegɔ na.

TƆƔESA YEHOWA N TARI NƐREBA GIILE LA NIMBU’Ɔ SE’EM LA

16-17. (a) Yehowa boti be’emdoma eŋɛ la bem? (Ezekiel 18:32) (b) Keendoma wan naɛ la Yehowa tuna la wani ta’an soŋɛ sɛba n tum be’em la?

¹⁶ To zamesɛ la bem Pigera Zontua wa poan? Yehowa ka boti nɛnɛra sa’am! (Kaalɛ Ezekiel 18:32.) A boti la be’emdoma lebe a zɛ’an na. (2 Ko. 5:20) Bala n sɔi ti diimi sa ta paɛ zina, Yehowa ni yɛta a yamesi sɛba n basɛ en la ti ba basɛ ba be’em ge lebe a zɛ’an na. Keendoma la tari la yɔ’ɔ ti ba naɛ la Yehowa tuna ta’an soŋɛ sɛba n tum be’em la ti ba basɛ ba be’em la.—Arom 2:4; 1 Ko. 3:9.

¹⁷ Makɛ bisɛ sɛba n boi saazuo la puurɛ n ni pee se’em, be’emdoma san basɛ ba be’em! To saazuo Sɔ Yehowa puurɛ ni pee mɛ sansɛka woo ti be’emdaana ni lebe tansugere la poan na. To san ti’isa taɣesa Yehowa n tari giile, nimbɔzore ge me zu’usa to se’em la, la ni basɛ ti to malum nɔŋɛ en pa’asɛ mɛ.—Lu. 1:78.