Yehowa Sɛɛradoma Zaɣeseri Nɛresɛba N Yuun Boi Ba Pu’usegɔ La Poan Mɛ?

To ka zaɣeseri nɛra n muse ko’om dɛna Yehowa Sɛɛradaana ge ka le mɔɔla bɔ’ɔra nɛreba bii to zaɣesɛ nɛra n ka le laɣena la mabiisi la. Yelemɛŋɛrɛ, to ni keŋɛ ba zɛ’an mɛ ti to soŋɛ ba ti ba le malum nɔŋɛ pu’usegɔ yɛla.

Nɛra san tum be’em, to ni kɔ’ɔn ka yese en basɛ. Ge Sɛɛradaana n muse ko’om san zaɣesɛ ti a kan doose Baabule la n pa’alɛ tɔ ti to vɔna to vom se’em ge me ka bɔta ti a eŋɛ teere a vom poan, ba wan zaɣesɛ en bii yese en tansugere la poan. Baablule la kɔ’ɔn yeti: ‘Foe ya be’emdaana la ya poan.’​—1 Korint 5:13.

Ge ba san yese buraa tansugere la poan ge ti a pɔɣa la a kɔma kelum dɛna Yehowa Sɛɛradoma bem n wan eŋɛ? Eŋa la a deodoma n daa naɛ taaba pu’usa se’em la ni tee mɛ ge ba kelum dɛna la nɛra la a deodoma. Buraa la, la a pɔɣa la kelum bɔna mɛ wuu nɛra la a pɔɣa ge ti eŋa la a kɔma la me kelum bɔna wuu nɛra la a deodoma la.

Nɛresɛba ti ba yese ba la ta’an keŋɛ to zamesegɔ. Ba san bɔta, tansugere keendoma la ta’an bo ba vo’osum poan ka’aŋɔ. Keendoma la ni eŋɛ wana mɛ ti ba ta’an soŋɛ nɛra la ti a ta’an le dɛna Yehowa Sɛɛradoma ayima. Sɛba ti ba yese ba la san basɛ halibe’ero ge eŋɛ pa’alɛ ti ba boti ba dɔla Baabule pa’alegɔ mɛ, sarɔɔ kɔ’ɔn yu’ɛ bo ba mɛ ti ba ta’an le dɛna Yehowa Sɛɛradoma leyɛ’ɛsa.