Ton Wan Eŋɛ Se’em Ta’an Ka’am Nɛra Soŋa

1. Beni n sɔi ti to ka’ana nɛreba? Tɔɣɛ pa’alɛ.

HON boti ho ka’ana nɛreba? Basɛba boti ba ka’ana nɛreba. Ge basɛba me dabeem n ni tara ba ti ba ka’ana nɛreba. Lan yeen dɛna se’em, saŋa ase’a, la ni nara ti to ka’am nɛra. Beni n sɔi? Se’ere n sɔi la, to nɔŋɛ to mabiisi la mɛ. Yezu me yuun yeti to san wan ta’an dɛna a podɔleba, la nari ti to nɔŋɛ taaba. (Yon 13:35) Leyɛ’ɛsa, Baabule la yeti, to san ka’am nɛra soŋa, la wan basɛ ti tomam la eŋa zɔtɔ nyɔka la kpe’em.—Mag. 27:9.

2. Keendoma nari ti ba eŋɛ la bem ge bem zuo? (Bisɛ daka la zuo n de “Bakwai La Poan Zamesegɔ Ka’aŋɔ.”)

² Keendoma nari ti ba mina ba wan eŋɛ se’em ta’an ka’am nɛra soŋa. Yehowa la Yezu loe la nɛrebana ti ba bisera mabiisi la. (1 Pe. 5:​2, 3) Sore deyima poan ti ba ita bala dela ban bo’ori Baabule yetɔɣum ti la dɛna ka’aŋɔ bɔ’ɔra to la. Ba me san bisɛ ti la nari, ba ni ka’am to mɛ ge me soŋera sɛba n basɛ Yehowa pu’usegɔ la ti ba lebena. Keendoma la tomam za’a wan eŋɛ la wani ta’an ka’ana nɛreba soŋa?

3. (a) To wan eŋɛ la wani ta’an ka’am nɛra soŋa? (Isaiah 9:6; bisɛ daka la zuo n de “Ho San Ka’ana Nɛra, Tɔɣesa Yezu.”) (b) To wan sɔsɛ la bem zaseŋɔ wa poan?

³ To wan baŋɛ ton wan eŋɛ se’em ta’an ka’am nɛra soŋa to san zamesɛ Baabule poan nɛresɛba n yuun ka’am nɛreba soŋa, yele yele wuu Yezu. Yezu na’asegɔ yu’urɛ ayima dela “Kan’an Keregadaana.” (Kaalɛ Isaiah 9:6.) Zaseŋɔ wa poan, to wan sɔsɛ baŋɛ ton wan eŋɛ se’em nɛra san yele to ti to ka’am en, la ton wan eŋɛ se’em la san nara ti to ka’am nɛra. To wan le bisɛ la yele n pakɛ se’em ti to ni ka’am nɛra, sansɛka la sarɔsɛka n nari poan.

NƐRA SAN YELE TO TI TO KA’AM EN

4-5. La nari ti to soke tomea la bem, nɛra san yeti to ka’am en? Bo makerɛ.

⁴ La nari ti to eŋɛ la bem yia, nɛra san yeti to ka’am en? Daanse’ere to inya ta’an kita ti to ka’am en bilam bilam. Ge la nari ti to soke tomea yeti, ‘Mam wan ta’an ka’am en soŋa yele wa poan?’ Saŋa ase’a, la wan nara ti to yele nɛra la ti a tuɣum keŋɛ se’em n wan ta’an ka’am en soŋa zɛ’an.

⁵ Geele yele wa bisɛ. To makɛ yeti ho zɔ n bɛ̃’ɛri paa. A yele ho yeti eŋa pɔsɛ viisa mɛ ti a baŋɛ tibegɔ seko n wan makɛ bo en ge nyaa soke ho ti ho pa’alɛ en tibegɔ seko n ani soŋa. Ho ta’an bɔta tibegɔ kuseko ge ho daɣɛ dɔgeta bii nɛɛsi n wan ta’an pa’alɛ tibegɔ seko n ani soŋa. Bɔnkana poan, la wan ana soŋa ti ho yele ho zɔ la ti a soke se’em n mi tibegɔ ti a soŋɛ en.

6. Beni n sɔi ti la ni nara ti to gu’use fii ge nyaa ka’am nɛra?

⁶ Hali to san bisɛ ti to wan ta’an ka’am nɛra soŋa yelese’ere poan, la wan nara ti to gu’use fii ge nyaa ka’am en. Bem zuo? Magaha 15:28 yeti, “tontɔɔdaana potɛn’ɛrɛ ne maahom la n wan lerege se’em.” To wan eŋɛ la wani, to san mina yele la soŋa? La wan nara ti to kelum viisɛ yele la soŋa, zusɛ ge me ti’isɛ taɣesɛ. Bala n wan basɛ ti to mina ti to ka’aŋɔ la makɛ mɛ la Yehowa puti’irɛ n de se’em yele la poan. To geele ya nɔdɛ’ɛsa Natan yele la bisɛ.

7. Hon zamesɛ la bem nɔdɛ’ɛsa Natan yele la poan?

⁷ Naba David yuun yele nɔdɛ’ɛsa Natan ti eŋa boti la a mɛ pu’usegɔ yire bo Yehowa. Bilam bilam ti Natan yele en ti a ta’an mɛ. Ge la yuun nari ti Natan baŋɛ Yehowa puti’irɛ n de se’em yele la poan yia. Bem zuo? Se’ere n sɔi la, Yehowa yuun ka boti David mɛ pu’usegɔ yire la. (1 Yel. 17:​1-4) Yele wa pa’alɛ ti nɛra san yele to ti to ka’am en, la wan ana soŋa ti to da “zɛɛra yetɔgom . . . kalam.”—Yam. 1:19.

8. Beni n sɔi ti la ni nara ti to ti’isɛ soŋa ge nyaa ka’am nɛra?

⁸ Le geele bisɛ sɛla n sɔi ti la ni nara ti to ti’isɛ soŋa ge nyaa ka’am nɛra: To san ka ka’am nɛra soŋa ti yele paɛ en, a ta’an yeti tomam n ta’asɛ. Bala n sɔi ti la yele pakɛ ti to ni ti’isɛ soŋa ge nyaa ka’am nɛra.

LA SAN NARA TI TO KA’AM NƐRA

9. Keendoma nari ti ba mina la bem soŋa soŋa ge nyaa ka’am nɛra? (Galatia 6:1)

⁹ Tɛm busebo, keendoma mea n ni ti’isɛ bisɛ ti la nari ti ba ka’am mabia n “tue.” (Kaalɛ Galatia 6:1.) Nɛra ta’an ita yɛla ase’a ti la ta basɛ ti a tum be’em. Keendoma la wan bɔta ti ba soŋɛ en ti a kelum bɔna nyɔ̃vore sore la poan. (Yam. 5:​19, 20) Keendoma la nari ti ba mina soŋa soŋa ti a sirum tue mɛ ge nyaa ka’am en. Yehowa bo to za’a waabi la yɔ’ɔ ti to ta’an kɔ’ɛ to puti’irɛ eŋɛ sɛla ti la makɛ la to putɛ̃keeŋa la. (Arom 14:​1-4) Ge keendoma la wan eŋɛ la wani, mabia san tue ti la nara ti ba ka’am en?

10-12. Keendoma nari ti ba eŋɛ la bem ba san yeti ba ka’am nɛra? Bo makerɛ. (Bisɛ fɔɔra la.)

¹⁰ Nɛra san ka yele keema ti a ka’am en, la daɣɛ naana ti keema la eŋɛ bala. Beni n sɔi? Tuntuna Paul yuun yeti nɛra ta’an tue ge ka baŋɛ. Ge ti ba nyaa ka’am en la, keendoma la nari ti ba bisɛ ban wan eŋɛ se’em ti la dɛna naana bo nɛra la ti a sakɛ ka’aŋɔ la.

¹¹ Geele yele wa bisɛ: Kaara san bɔta ti a burɛ daɣelega zɛ’an, la wan nara ti a kɔ ge nyaa burɛ. Bala pooren, a wan basera ko’om ti ba ta’an zo’e. Bala mea nɔɔ ti keema nara ti a eŋɛ yɛla ase’a la wan eŋɛ se’em ti la dɛna naana bo nɛra la ti a sakɛ ka’aŋɔ. Makerɛ, sansɛka n nari poan, keema la wan basɛ ti mabia la baŋɛ ti a fabeli a yele. Se’em n ka’ani la san tara nɔŋerɛ ge me mina guŋerɛ, la kan kpe’em ti nɛreba sakɛ ka’aŋɔ la.

¹² Leyɛ’ɛsa, keema la san basɛ ti a baŋɛ ti nɛra woo tuuri mɛ ti la nara ti ba ka’am tɔ, la kan kpe’em bo nɛra la ti a sakɛ ka’aŋɔ la. (Arom 3:23) Keema la wan dekɛ Baabule la soŋɛ en ti a baŋɛ eŋa n tue se’em. La nari ti a tɔɣera bãla bãla ge me bɔ’ɔra en gilema. Mabia la san sakɛ ti a tue mɛ, keema la nyaa wan basɛ ti a baŋɛ ti la nari ti a tee. Ba san sɔsɛ ba’asɛ, keema la ta’an pɛ̃ɣɛ en la eŋa n muuri se’em la ge me naɛ le en zusɛ.—Yam. 5:15.

13. Keendoma wan eŋɛ la wani baŋɛ ti nɛra la sirum bɔkɛ ka’aŋɔ la?

¹³ Saŋa ase’a, nɛra la ta’an kan bɔkɛ ka’aŋɔ la soŋa. Keendoma wan eŋɛ la wani ti nɛra la ta’an bɔkɛ soŋa? Ba ta’an doose gilema sore poan soke en yɛla. (Pa. 12:11) Nɛra la n lebese se’em la wan soŋɛ keendoma la ti ba baŋɛ nyaa a sirum bɔkɛ ya.

KA’AM NƐRA SANSƐKA LA SARƆSƐKA N NARI POAN

14. Beni n sɔi ti la ka nara ti to ka’am nɛra se’em ma’a ti to sunsɔa nyie?

¹⁴ To za’a dela be’emdoma, bala la to ta’an yele bii eŋɛ sɛla ti la daam nɛreba. (Kol. 3:13) Baabule la yeti saŋa ase’a, to ta’an ni yele bii eŋɛ sɛla ti nɛra sunsɔa nyie. (Ep. 4:26) Ge la ka nari ti to ka’am nɛra se’em ma’a ti to sunsɔa nyie. Beni n sɔi? Se’ere n sɔi la, asaala “sunsunya ka bahɛ te to eta sɛla te Yenɛ bɔta te to eta la.” (Yam. 1:20) To sunsɔa san nyie ti to ka’am nɛra, la ta’an basɛ ti yɛla gaam be’ero. Bala ka pa’alɛ ti to kan ta’an yele se’em n daam to la, lan ani to se’em. Ge la wan ana soŋa ti to basɛ ti to sunsɔa la ma’ɛ ge ti to nyaa yele sɛla. To wan ta’an zamesɛ sɛla, Elihu n yuun ka’am Yob se’em la.

15. To zamesɛ la bem Elihu yele la poan? (Bisɛ foote la.)

¹⁵ Dabesa zo’e zo’e poan ti Yob yuun kɔ’ɔn tiregera ti a tɔɣɛ po’e amea la yelese’a ti a zɔdoma batã la tɔɣɛ giisɛ en la. Elihu yuun kɔ’ɔn ma’ɛ la amea kɛlesa Yob. Elihu yuun tari la Yob giile. Elihu sunsɔa yuun nyie mɛ se’em ma’a ti a wum ti Yob tɔɣera Yehowa yɛla ti la daɣɛ yelemɛŋɛrɛ la. Hali la bala, Elihu yuun ma’ɛ la amea ge nyaa doose gilema sore poan ka’am Yob. (Yob 32:2; 33:​1-7) Elihu yele la pa’alɛ to la ninmu’urɛ yele n de: To san yeti to ka’am nɛra, la nari ti to ka’am en sansɛka n nari poan ge me ni doose gilema la nɔŋerɛ sore poan eŋɛ bala.—Pa. 3:​1, 7.

KƆ’ƆN BƆ’ƆRA KA’AŊƆ GE ME NANA KA’AŊƆ

16. Hon zamesɛ la bem Yooma 32:8 la poan?

¹⁶ Zaseŋɔ wa zuo gulesegɔ yeti ‘Yehowa wan ka’am tɔ ge ti a niho gã’a to zuo.’ (Kaalɛ Yooma 32:8.) Bala pa’alɛ ti Yehowa wan kelum soŋera tɔ. Yehowa ka bo’ori to la ka’aŋɔ ma’a ge a soŋeri to mɛ ti to tara a tuna tuuma. To wan ta’an tɔɣesa Yehowa! To san ka’ana nɛreba, to wan kelum kpɛmesa ba giila ge me soŋera ba ti ba ta’an kɔ’ɛ ba puti’irɛ soŋa.

17. La ni ana to la wani keendoma san dekɛ Baabule la ka’am tɔ? (Isaiah 32:​1, 2)

¹⁷ Sankana wa ti la nara ti to bɔ’ɔra ka’aŋɔ ge me nana ka’aŋɔ. (2 Tim. 3:1) Keendoma san dekɛ Baabule la ka’am tɔ, ka’aŋɔ la wan ana “wo ko’nini la bo teŋkɛ’ɛŋa” ti la ana to mama. (Kaalɛ Isaiah 32:​1, 2.) To puurɛ pee mɛ la ton tari zɔdoma n ni eŋɛ kalam ka’am tɔ sansɛka n nari la. Ba ka’aŋɔ la ani wuu “sanlema kuga te ba maalɛ kɛn’ɛhɛ sanlenpeela poan la.” (Mag. 25:11) Basɛ ya ti to za’a waabi eŋɛ pa’alɛ ti to tari yɛm la ton bo’ori ka’aŋɔ ge me nana ka’aŋɔ la.