ZASEŊƆ 42
YUUNƐ 44 A Prayer of the Lowly One (Tarema Zusega)
Hon Wan Zusa Se’em Ta’an Ana Du’a Du’a La Yehowa
“ Na’ayenɛ, mam kaahere mɛ la n suunre zan’an. Lerege mam.”—YM. 119:145.
YELEKPINE
To wan ta’an bisɛ Baabule la poan zamesɛ Yehowa yamesi n yuun zusɛ se’em.
1-2. (a) To san zusera Yehowa, beni n ni basɛ ti to ka bɔta ti to yele en lan ani to se’em? (b) To eŋɛ la wani baŋɛ ti Yehowa keleseri to zusega?
HON ni yɛta la yele yinɛ ho zusega poan ge ni ka yele Yehowa lan ani ho se’em? La san dɛna bala, mina ti la daɣɛ hon ma’a. Ton ni kãbela la zuo, saŋa zo’e zo’e poan to zusega la ni ana la gi’a. Daanse’ere la ta’an ni kpe’em bo to ti to yele Yehowa lan ani to se’em se’ere n sɔi la to ni bisɛ ti tomam daɣɛ sɛsɛla.
2 Baabule la pa’alɛ tɔ ti daɣɛ ton mi yetɔɣum to zusega poan la yele n pakɛ ge to ni zusɛ ti la ze’ele to suuren. A wuni “sɛba n boe daaŋɔ poan n bote se’em.” (Ym. 10:17) Yehowa keleseri sɛla woo ti to yɛta en la mɛ sɛla n sɔi la a nɔŋɛ la to yele.—Ym. 139:1-3.
3. To wan sɔsɛ la soke ani zaseŋɔ wa poan?
3 To wan ta’an soke tomea yeti: Bem zuo ti la ka nara ti to zɔta dabeem to san zusera Yehowa? To wan zusa la wani ta’an ana du’a du’a la Yehowa? To san ti’isa taɣesa Yehowa yamesi n tabelɛ zusɛ se’em Baabule la poan, la wan soŋɛ to la wani? Ge to wan eŋɛ la wani to suure san ba’ɛ sa’am ti to ka mina to wan yele sɛla? Basɛ ya ti to bisɛ ton wan eŋɛ se’em nyɛ soke ana wa lebesego.
DA ZƆTA DABEEM TI HO ZUSƐ YEHOWA
4. Beni n wan soŋɛ tɔ ti to ta’an yese to suuren zusa Yehowa? (Yooma 119:145)
4 To san bɔkɛ ti Yehowa dela to zɔsonkɔ ge me bɔta sɛla n ani soŋa bɔ’ɔra tɔ, to wan ta’an yese to suuren zusɛ en. Se’em n gulesɛ Yooma 119 la yuun boti la a tara bɔnsoŋa la Yehowa. A yuun tari yeledaaŋɔ mɛ. Nɛreba basɛba yuun parum la yɛla bo en. (Ym. 119:23, 69, 78) Leyɛ’ɛsa, saŋa ase’a a giila ni kɔ’ɔsɛ mɛ la eŋa n ka di mi’a la. (Ym. 119:5) Hali la yele aŋa za’a, dabeem yuun ka tari en ti a yese a suuren zusɛ Yehowa.—Kaalɛ Yooma 119:145.
5. Beni n sɔi ti la ka nara ti to basɛ ti tomea tuure gu to ti to kan zusera Naayinɛ? Bo makerɛ.
5 Yehowa boti la se’em woo n tum be’em la zusa en. (Isa. 55:6, 7) Da basɛ ti putɛbe’ero gu ho ti ho kan zusera Yehowa. Makerɛ, nɛra n tukeri alopele mi ti a nari ti a sɔsera mɛ la sɛba n biseri alopeledoma la, a san ɛɛra soŋerɛ. La nari ti a zɔta valum ti eŋa n tue bii bɔregɛ la zuo, a kan soke ba ti ba soŋɛ en? A kan sakɛ zɔ valum! Bala mea nɔɔ, saŋa ase’a to san tue bii tum be’em, la nari ti to doose zusega poan tɔɣɛ bo Yehowa ti a soŋɛ tɔ.—Ym. 119:25, 176.
HON WAN EŊƐ SE’EM TA’AN BASƐ TI HO ZUSEGA LA KPE’EM
6-7. To san ti’isa taɣesa Yehowa hala la, la wan soŋɛ to la wani ti to nyɛta nɛŋa tɔlega to zusega poan? Bo makerɛ. (Bisɛ tiŋanɔɔrɛ yelesum la.)
6 To san yele Yehowa lan ani to se’em zusega poan, to ni ana la du’a du’a la en. Bala la, to wan eŋɛ la wani ta’an nyɛta nɛŋa tɔlega to zusega poan?
7 Ti’isɛ taɣesɛ Yehowa hala la.a To san tiisa tomea Yehowa hala la, la wan dɛna naana bɔ’ɔra tɔ ti to yele en lan ani to se’em. (Ym. 145:8, 9, 18) To geele mabipɔka Kristine ti a sɔ nɔŋɛ gbiri gbiri la yele bisɛ. A yeti: “La yuun kpe’em bo mam mɛ ti n sakɛ ti Yehowa dela Sɔ n tari nɔŋerɛ ge me tɔɣera bɔ’ɔra en. Mam yuun ti’isɛ ti mam tuure yɛla la ta’an basɛ ti Yehowa zaɣesɛ mam.” Yehowa halɛ deni n soŋɛ en? A yeti: “Yehowa yelemɛŋɛrɛ nɔŋerɛ la basɛ ti dabeem ka tara mam. Mam mi ti a kan malum pisegɛ mam basɛ. N san puɣum tue, a wan tuɣum nɔŋɛ mam ge me soŋɛ mam. Wana wa soŋeri mam mɛ ti n ta’an yɛta en pupeelum la susa’aŋɔ yɛla.”
8-9. To san ni maasum ge nyaa zusɛ, la wan soŋɛ to la wani? Bo makerɛ.
8 Ti’isɛ bisɛ hon wan yele sɛla. Ho san yeti ho zusɛ, ho ta’an soke homea sokere ase’a. Makerɛ: ‘Bem yeledaaŋɔ wana mɔpi n paari mam nananawa? Nɛra eŋɛ mam sɛla ti la nara ti n di sugeri bo en? Yele n paari mam ti la kpe’em bo mam ti la nara ti n zusɛ Yehowa ti a soŋɛ mam?’ (2 Na. 19:15-19) Leyɛ’ɛsa, tɛ̃ra Yezu n pa’alɛ tɔ lan nari ti to zusa se’em la ge ti’isɛ bisɛ hon wan yele sɛla ho zusega poan ti A yu’urɛ la ana zilam ge ti A Na’am la A puti’irɛ la tum.—Mt. 6:9, 10.
9 Mabipɔka Aliska n yuun ta baŋɛ ti a sira tari la ɔberega bã’a a zuo poan ge ti la kan yue ti a wan ki la, la yuun kpe’em bo en mɛ ti a zusa. A yeti: “La yuun gaŋɛ la nu’usi ti la me kpe’em bo mam ti mam ka mina mam n wan yele sɛla n zusega poan.” Bem n yuun soŋɛ en? A yeti: “Mam ni dekɛ la saŋa fii maasum mam n yeti n zusɛ sɛla la. Bala soŋɛ mam mɛ ti mam ka basɛ ti n zusega kɔ’ɔn dɛna mam la n sira ma’a yele. Mam n iti bala la basɛ ti la ana mam la mama ti n ta’an ni zusɛ bo Yehowa.”
10. Beni n sɔi ti la nara ti to ni zusa yuura? (Bisɛ fɔɔra la.)
10 Ma’ɛ homea zusera. La dela yelemɛŋɛrɛ ti to san zusɛ gi’a gi’a la wan basɛ ti to ana du’a du’a la Yehowa ge to san zusa yuura daanse’ere bala wan basɛ ti to yele en lan ani to se’em.b Aliska sira Elijah yeti: “Mam ni tiregera mɛ ti n zusɛ zo’e zo’e dabeserɛ la poan ge mam n ni ma’ɛ n mea zusɛ yue la basɛ ti mam ana la du’a du’a la Yehowa. Yehowa ka kãbeli tɔ ɛɛra ti to zusɛ ba’asɛ kalam. Bala la, n wan ta’an ma’ɛ n mea ge zusa.” Eŋɛ wana: Ɛ sansɛka la zɛsɛka ti sɛla kan daam hɔ. Ho ta’an zusɛ yue ge me tɔɣera ti la yɛsera.
Ɛ saŋa la zɛsɛka ti ho wan ta’an zusɛ yue (Bisɛ kaalegɔ zɛ’an 10)
TI’ISƐ TAƔESƐ BAABULE POAN NƐREBA N TABELƐ ZUSƐ SE’EM
11. La wan soŋɛ to la wani to san ti’isa taɣesa zusega se’a n boi Baabule la poan la? (Bisɛ daka la zuo n de “Hon Bɔŋa La Ani Wuu Bamam?”)
11 La ta’an soŋɛ hɔ, ho san bisɛ Yehowa yamesi n yuun boi Baabule saŋa la n yuun zusɛ ge yuum yuuma se’em pɛ̃ɣɛ Yehowa. Ho san bisɛ Naayinɛ yamesi n yuun tɔɣɛ sɛla n boi ba suuren se’em bo Naayinɛ la, bala me wan soŋɛ hɔ ti ho me tɔɣɛ sɛla n boi ho suuren bo Yehowa. Ho me wan le nyɛ yelebɛa ase’a ti ba dekɛ tɔɣɛ ba zusega la poan, ti hon me ta’an dekɛ pa’asɛ ho zusega poan. Leyɛ’ɛsa, ho wan nyɛ Yehowa yamesi n tabelɛ zusɛ se’em ti la makɛ la ho bɔŋa la.
12. To wan ta’an soke tomea la bem sokere to san ti’isa taɣesa zusega ase’a Baabule la poan?
12 Ho san ti’isa taɣesa zusega ase’a Baabule la poan, ho ta’an soke homea yeti: ‘Ani n zusɛ bala ge a bɔŋa la yuun ani la wani? Eŋa n tɔɣɛ yelese’a la makɛ mɛ la mam bɔŋa la? Mam wan ta’an zamesɛ la bem a zusega la poan?’ Daanse’ere la wan nara ti ho viisɛ yɛla pa’asɛ ta’an nyɛ soke aŋa lebesego. Ho me san eŋɛ bala ho wan nyɛ nyuurɔ. To geele ya ase’a bisɛ.
13. To zamesɛ la bem yele Hana zusega la poan? (1 Samuel 1:10, 11) (Bisɛ foote.)
13 Kaalɛ 1 Samuel 1:10, 11. Yɛla ayi n yuun daani Hana ti a yuun zusɛ bala. A yuun dela kundɔɣerɛ ge ti a yentaa me yuun kɛsera en ti la wuna en. (1 Sa. 1:4-7) Ho wan ta’an zamesɛ la bem Hana zusega la poan, yele san paɛ hɔ ti la daana hɔ? Hana n yuun nyɛ nɛŋa zusɛ Naayinɛ la ge me yele en sɛla woo n boi a suuren la n yuun basɛ ti la ana en mama. (1 Sa. 1:12, 18) La me ta’an ana to mama to san “dekɛ [to] zeero bo Na’ayenɛ” ge me yele en lan ani to se’em.—Ym. 55:22.
Hana n yuun de kundɔɣerɛ ge ti a yentaa me ɛregera en la, a yuun tɔɣɛ lan ani en se’em bo la Yehowa (Bisɛ kaalegɔ zɛ’an 13)
14. (a) To le zamesɛ la bem Hana yele la poan? (b) To san kaala Naayinɛ Yelesum la ge ti’isa taɣesa, la wan soŋɛ to la wani to zusega poan? (Bisɛ tiŋanɔɔrɛ yelesum la.)
14 Yuuma fii pooren ti a yuun dɔɣɛ a bia Samuel la, Hana yuun tari en ta bo la Malema Nɛŋadaana Eli. (1 Sa. 1:24-28) Hana yuun yele a zusega poan ti eŋa tari sakerɛ ti Yehowa wan te’ele en ge me bisera a yelemɛŋɛrɛ yamesi.c (1 Sa. 2:1, 8, 9) La boi bim ti Hana yeledaaŋɔ la yuun ka maalɛ ge a yuun basɛ ti a puti’irɛ bɔna la Yehowa n puɣum kã se’em bo en la. To wan ta’an zamesɛ la bem? To wan nyaŋɛ ŋmibe yeledaaŋɔ woo poan, to san basɛ ti to puti’irɛ bɔna Yehowa n soŋɛ to se’em ta paɛ nananawa.
15. Nɛreba san tum to ŋmɛlema tuuma, to wan ta’an zamesɛ la bem Yeremia yele la poan? (Yeremia 12:1)
15 Kaalɛ Yeremia 12:1. La yuun daani nɔdɛ’ɛsa Yeremia mɛ eŋa n yuun nyɛ putɔpa la ti yɛla kena soŋa soŋa bɔ’ɔra ba la. Israel nɛreba basɛba n yuun ɛregeri en se’em la me, yuun daani en mɛ. (Yer. 20:7, 8) To bɔkɛ lan yuun ani en se’em sɛla n sɔi la, nɛreba me ɛregeri to zina beere wa mɛ. To me le nyɛta putɔpa la n nyɛti nɛŋa tɔlega se’em ti daaŋɔ ka ba’ɛ paara ba. La boi bim ti Yeremia yuun tɔɣɛ pa’alɛ lan ani en se’em ge a yuun ka zɛregɛ Naayinɛ. Eŋa n nyɛ Yehowa n yuun dɔlegɛ a yamesi n yuun giiseri en la tuba la, bala yuun ta’an basɛ ti a tara suure lua zo’e zo’e ti Naayinɛ dela tontɔɔ gãkerɛdaana. (Yer. 32:19) Tomam me ta’an yele Yehowa yelese’a ti nɛreba ita tɔ ti la daana to ge me eŋɛ pa’alɛ ti to dekɛ tomea delum en ti a wan maalɛ ŋmɛlema tuuma sansɛka n nari poan.
16. To bɔŋa la san ka basɛ ti to tara yɔ’ɔ, to wan ta’an zamesɛ la bem Levi nɛra la zɛ’an? (Yooma 42:1-4) (Bisɛ fɔɔra la.)
16 Kaalɛ Yooma 42:1-4. Levi nɛra n yuun ka ta’an laɣum kɛ̃’ɛra pu’usegɔ yire la poan la n yuun gulesɛ yuunɛ wa. A yuunɛ la pa’alɛ la, lan yuun ani en se’em. La ta’an ana to wuu lan yuun ani yoomadaana la se’em la, la san dɛna ti bã’asi zuo ti to kan ta’an yɛsera yire bii ba paɣɛ to mɛ ton pu’useri Yehowa la zuo. Saŋa ase’a to puurɛ ta’an pee bii to suure sa’am ge la ka pakɛ lan ani to se’em, la nari ti to yele Yehowa. Wana wa wan soŋɛ tɔ ti to ta’an bɔkɛ tomea soŋa ge me soŋɛ tɔ ti to malum geele yele la soŋa. Makerɛ, Levi nɛra wa yuun baŋɛ ti a wan ta’an eŋɛ yɛla ase’a pɛ̃ɣɛ Yehowa. (Ym. 42:5) A me yuun le ti’isɛ taɣesɛ la Yehowa n biseri en se’em. (Ym. 42:8) To san kɔ’ɔn zusera Naayinɛ a wan soŋɛ tɔ ti to bɔkɛ lan ani to se’em ti to malum tiresum ze’ele soŋa ta’an ŋmibera.
Levi nɛra la n yuun gulesɛ Yooma 42 la yuun tɔɣɛ sɛla n boi a suuren bo la Naayinɛ. To san tɔɣɛ lan ani to se’em zusega poan, la wan soŋɛ tɔ ti to ta’an bɔkɛ yele la soŋa (Bisɛ kaalegɔ zɛ’an 16)
17. (a) To wan ta’an zamesɛ la bem nɔdɛ’ɛsa Yona zusega la poan? (Yona 2:1, 2) (b) Yelebɛa ase’a n boi Yooma gɔŋɔ la poan la wan ta’an soŋɛ to la wani biɣi biɣi saŋa? (Bisɛ tiŋanɔɔrɛ yelesum la.)
17 Kaalɛ Yona 2:1, 2. Nɔdɛ’ɛsa Yona n yuun zusɛ bala, se’em ma’a ti a yuun bɔna zim kãtɛ la pooren la. La boi bim ti Yona yuun zaɣesɛ la Yehowa nɔɔrɛ ge a yuun tari puti’irɛ ti Naayinɛ wan kelese en. Yona yuun dekɛ la yelebɛa se’a n boi Yooma gɔŋɔ la poan zusɛ Yehowa.d Daanse’ere a yuun mi yelese’a n boi gɔŋɔ wa poan mɛ. Eŋa n yuun ti’isɛ yele ana taɣesɛ la, a yuun tari puti’irɛ ti Yehowa wan soŋɛ en. Bala mea nɔɔ, tomam me san tiregɛ tɛ̃ra Baabule kaalegɔ zɛ’ɛsi ge zusera Yehowa ti a soŋɛ to biɣi biɣi saŋa, to wan nyɛ subuɣelegɔ.
KƆ’ƆN VUREGE DU YEHOWA ZUSEGA POAN
18-19. La san ni kpe’em bo to ti to tɔɣɛ lan ani to se’em zusega poan, Arom 8:26, 27 wan ta’an soŋɛ to la wani? Bo makerɛ.
18 Kaalɛ Arom 8:26, 27. Saŋa ase’a to suure ta’an sa’am ti to ka mina to wan yele Yehowa lan ani to se’em. Ge to ka boi to ma’a. Sankaŋa la, Yehowa zilam vo’osum la n ni “sohora” bɔ’ɔra tɔ. Wani wani? Yehowa doose la a vo’osum la poan basɛ ti ba gulesɛ zusega zo’e zo’e ti la bɔna a Yelesum la poan. To san ka nyaŋɛ tɔɣɛ lan ani to se’em bo Yehowa, tomam me ta’an dekɛ zusega ana taaba zusɛ en. Ge daanse’ere a wan lebese to zusega la.
19 Putɛdena wa n yuun soŋɛ mabipɔka Yelena n ze’ele Russia. Ba yuun nyɔkɛ en ta paɣɛ la eŋa n zuseri ge kaala Baabule la zuo. La yuun daam Yelena ti la kpe’em bo en ti a zusɛ. A yeti: “Mam tɛ̃ri ti, mam suure san ni sa’am ti mam ka mina mam wan zusɛ Yehowa se’em, Yehowa wan sakɛ ti n dekɛ a diimi yamesi zusega la. . . tɔɣɛ bo en ti la dɛna la mam mea n zuseri ɛɛra sɛla la. . . . Yele wa ni buɣelɛ la mam suure la san ni ta ba’ɛ kpe’em bo mam.”
20. To wan eŋɛ la wani ta’an maasum tomea zusɛ yeledaaŋɔ saŋa?
20 Yeledaaŋɔ san paɛ tɔ, la ta’an ni kpe’em bo to ti to puti’irɛ la bɔna bɔbeyinɛ ti to zusa. To san bɔta ti to puti’irɛ la bɔna bɔbeyinɛ, to ta’an kɛlesa Yooma gɔŋɔ la kɔ̃a yetɔɣum. Leyɛ’ɛsa, to me ta’an gulesɛ lan ani to se’em la eŋɛ gɔŋɔ poan wuu Naba David n yuun eŋɛ se’em la. (Ym. 18, 34, 142; saazuo yelesum.) Yelemɛŋɛrɛ, to ka tari lɔɔ n pa’ali ton wan maasena tomea se’em zusa. (Ym. 141:2) Eŋɛ sɛla n makɛ bo ho.
21. Beni n sɔi ti to wan ta’an yese to suuren zusɛ?
21 La dela subuɣelegɔ yele bɔ’ɔra tɔ la ton mi ti Yehowa bɔkɛ lan ani to se’em mɛ ge ti to nyaa zusa en. (Ym. 139:4) Ge a boti la to yele en lan ani to se’em la ton tari sakerɛ se’em bɔ’ɔra en. Bala la, da gu’una ti ho zusɛ ho saazuo Sɔ la. Ho ta’an loe zusega yelebɛa la n boi Baabule la poan la zusɛ. Yese ho suuren zusɛ. Tɔɣɛ ho pupeelum la ho susa’aŋɔ yɛla za’a bo en. Yehowa dela ho zɔsonkɔ, a me wan soŋɛ hɔ saŋa woo!
YUUNƐ 45 The Meditation of My Heart (Mam N Ti’iseri Sɛla N Suuren)
a Consider “Some of Jehovah’s outstanding qualities” mentioned in Scriptures for Christian Living under the topic “Jehovah.”
b Ba san zusera bɔ’ɔra tansugere la, la nari ti la dɛna gi’a.
c Hana zusega la poan a yuun tɔɣɛ la yɛla ase’a ti la wɔ̃na la Moses n yuun gulesɛ sɛla la. A yuun ma’ɛ la amea ge ti’isa taɣesa gulesegɔ la. (Mal. 4:35; 8:18; 32:4, 39; 1 Sa. 2:2, 6, 7) Yuun kɔbesi pooren, Yezu ma Mary me dekɛ la yelebɛa pɛ̃ɣɛ Yehowa ti la wɔ̃na la Hana n yuun tɔɣɛ sɛla la.—Lu. 1:46-55.
d Dekɛ Yona 2:3-9 makɛ la Yooma 69:1; 16:10; 30:3; 142:2, 3; 143:4, 5; 18:6; la 3:8. Yona zusega la makɛ mɛ la kaalegɔ zɛ’ɛsi wa.