Ni Tɛ̃ra Zusa Bɔ’ɔra Nɛreba

1. To eŋɛ la wani baŋɛ ti to zusega pakɛ Yehowa mɛ?

ZUSEGA dela bo’olum. Ti’isɛ yele wa bisɛ: Yehowa basɛ ti malesi la tuna la tuuma ase’a. (Ym. 91:11) A me basɛ ti a Dayua la tuna la ninmu’urɛ tuuma ase’a me. (Mt. 28:18) Ge a loe nɛra ti a kɛlesa to zusega? Aayi, Yehowa mea ma’a n keleseri to zusega. Yehowa, “se’em n leregere sohoga” la, n ni kelese to zusega.—Ym. 65:2.

2. Tuntuna Paul yuun eŋɛ makesonɛ la wani la eŋa n yuun zuseri bɔ’ɔra nɛreba la?

² La boi bim ti to wan ta’an yele Yehowa sɛla woo n daani tɔ ge la me nari ti to zusa bɔ’ɔra nɛreba. Tuntuna Paul yuun eŋɛ la bala. Makerɛ, a yuun yele Epesus mabiisi la ti: “N tɛnre ya yele la bala n po’ohegɔ poan.” (Ep. 1:16) Paul yuun le zusɛ bo nɛreba ayima ayima mɛ. Makerɛ, a yuun yele Timoti ti: “N bo’ore Yenɛ fara, . . . N po’ohere en wontɛɛŋa la yu’uŋɔ zan’an bɔ’ɔra nɛreba, n kɔ’ɔn tɛnra ho yele la bala me po’oha bɔ’ɔra hɔ.” (2 Tim. 1:3) Paul yuun tari yeledaaŋɔ mɛ ti a ni zusa Yehowa. (2 Ko. 11:23; 12:​7, 8) Hali la bala, a ni kelum zusa bɔ’ɔra nɛreba mɛ.

3. Beni n sɔi ti saŋa ase’a to ni tamɛ ka zusa bɔ’ɔra nɛreba?

³ Saŋa ase’a to ta’an tamɛ kan zusɛ bo nɛreba. Beni n sɔi? Mabipɔka ayima yu’urɛ n de Sabrinaa pa’alɛ sɛla n sɔi. A yeti: “Nɛra woo ka tari nɛŋa. To ni kɔ’ɔn ti’isa la tomea yele ma’a ge tamɛ ti to zusɛ bo nɛreba.” La tabelɛ eŋɛ hon bala? La san ana ho bala, zaseŋɔ wa wan soŋɛ hɔ. La wan (1) tɔɣɛ pa’alɛ sɛla n sɔi ti la yele pakɛ ti ho zusa bɔ’ɔra nɛreba, la (2) hon wan ta’an eŋɛ bala se’em.

BENI N SƆI TI LA NARA TI TO ZUSA BƆ’ƆRA NƐREBA?

4-5. To san zusa bɔ’ɔra nɛreba, la ‘tari tuulum’ la wani? (Yames 5:16)

⁴ To san zusa bɔ’ɔra nɛreba, la “tare la toolom.” (Kaalɛ Yames 5:16.) To zusega wan ta’an tee nɛra bɔŋa? Ɛɛ, la wan ta’an. Yezu n yuun mi ti tuntuna Peter wan ki’isɛ ti eŋa ka mi en la, a yuun yeti: “Mam sohɛ Na’ayenɛ bɔ’ɔra hɔ te ho kan lu zan’an zan’an.” (Lu. 22:32) Paul me yuun mi ti zusega wan ta’an tee nɛra bɔŋa. Se’em ma’a ti ba yuun paɣɛ en Rome la, a yuun gulesɛ yele Filemon ti: “Mam tɛn’ɛhɛ soŋa soŋa te Na’ayenɛ wan wom ya po’ohegɔ la ge bahɛ mam te n le bɔna la ya yɛ’ɛha.” (Flm. 22) Bala n yuun eŋɛ. La yuun ka yue ti ba yese Paul sarega ti a le mɔɔla.

⁵ Yelemɛŋɛrɛ, bala ka pa’alɛ ti to wan ta’an pɛ̃regɛ Yehowa ti a lebese to zusega. Yehowa yamesi san zusa en, a ni ana la kɛli kɛlesa. Hali saŋa ase’a, a ni tum ban zusɛ ɛɛra sɛla la mɛ. Ton mi wana wa la wan soŋɛ tɔ ti to ni yese to suuren zusɛ Yehowa yeledaaŋɔ saŋa ge tara puti’irɛ ti a wan lebese to zusega la.—Ym. 37:5; 2 Korint 1:11

6. To san zusa bɔ’ɔra nɛreba, la ni ana to la wani? (1 Peter 3:8)

⁶ To san zusa bɔ’ɔra nɛreba, la wan soŋɛ tɔ ti to ‘tara nɛreba giile.’ (Kaalɛ 1 Peter 3:8.) Nɛra n tari giile san ni nyɛ nɛreba n nameseri, a ni bɔta la a eŋɛ sɛla soŋɛ ba. (Mr. 1:​40, 41) Keema ayima yu’urɛ n de Michael yeti: “Mam san zusa bɔ’ɔra nɛreba sɛla n pakɛ ba, mam ni bɔkɛ yeledaaŋɔ se’a n paari ba mɛ. Bala ni basɛ ti mam malum nɔŋɛ ba mɛ pa’asɛ. La boi bim ti ba ka mi ge la ni basɛ ti mam ana la du’a du’a la ba.” Keema ayima yu’urɛ n de Richard me tɔɣɛ pa’alɛ nyuurɔ se’a n boi bim. A yeti: “To san zusɛ bo nɛra, to giila wan kpeŋe ti to eŋɛ sɛla soŋɛ en.” A le yeti: “To san soŋera nɛresɛba ti to zusera bɔ’ɔra ba la, la ni ana wuu to soŋeri la Yehowa ti a lɛbesa to zusega la.”

7. To san zusa bɔ’ɔra nɛreba, la wan soŋɛ to la wani ti to kan ba’ɛ ti’isa to daaŋɔ la yele? (Filipi 2:​3, 4) (Bisɛ foote la.)

⁷ To san zusa bɔ’ɔra nɛreba, la wan soŋɛ tɔ ti to kan ba’ɛ ti’isa to daaŋɔ la yele. (Kaalɛ Filipi 2:​3, 4.) Ton boi Sitaana tingɔŋɔ wa poan la zuo, to za’a tari yeledaaŋɔ mɛ. (1 Yo. 5:19; Lil. 12:12) To san tiregɛ zusa bɔ’ɔra nɛreba, to wan tɛ̃ra ti “Yesu dɔlɔba sɛba woo me n boe teŋa wa zuo me nyɛte la namehe seto te [tomam] me nyɛta wa.” (1 Pe. 5:9) Katherine n de sore ŋmɛ’adaana la yeti: “Mam san zusa bɔ’ɔra nɛreba, la ni tĩɛ mam ti daaŋɔ me paari nɛreba mɛ. Bala ni basɛ ti mam ka ba’ɛ ti’isa mam daaŋɔ la yele.”

BA EERI LA TO ZUSA BƆ’ƆRA BA

8. Bo makerɛ pa’alɛ sɛba ti to wan ta’an zusa bɔ’ɔra.

⁸ Bani ti to wan ta’an zusɛ bo? To ta’an zusɛ bo nɛreba zo’e zo’e. Makerɛ, to ta’an zusɛ bo sɛba n bɛ̃’ɛri, bunbilipaalesi ti ba sukuu tadaandoma pɛregera ba, bii sɛba n kuregɛ. To mabiisi zo’e zo’e deodoma giiseri ba mɛ. Gɔmɛtdoma me giiseri ba mɛ. (Mt. 10:​18, 36; Tm. 12:5) Zaberɛ yɛla me ni basɛ ti to mabiisi basɛba zɔ yese la ba yɛa. Yeledi’ima me basɛ ti basɛba namesa mɛ. To ta’an kan mina mabiisi wa ayima ayima. Ge to san zusa bɔ’ɔra ba, to doli la Yezu n yuun yele to ti to “nɔŋɛ taaba” la.—Yon 13:34.

9. Beni n sɔi ti la nara ti to zusera bɔ’ɔra sɛba n boi to nɛŋa Yehowa tigere la poan, la ba pɔɣeba?

⁹ To wan ta’an le zusera bɔ’ɔra sɛba n boi to nɛŋa Yehowa tigere la poan. Basɛba dela Tigere Zuo Bisegadoma la ba soŋereba, Tigere Yile Bisegadoma, bisegadoma n boi tigere yila poan, gingilega kaarɛ bisegadoma, keendoma, la keendoma soŋeredoma. Hali mabiisi wa n ãregeri bamea tuna bɔ’ɔra to la, yeledaaŋɔ paari ba mɛ. (2 Ko. 12:15) Makerɛ, gingilega kaarɛ bisegadaana ayima yu’urɛ n de Mark yeti: “Yele deyima n daani mam paa dela mam n ka boi la n dɔɣereba n kuregɛ la. Ba bɛ̃’ɛri mɛ. La boi bim ti mam tã la a sira n biseri ba ge la kelum daana mam mɛ la mam n ka ta’an bɔna bim soŋera ba la.” To san mina yeledaaŋɔ se’a n paari mabiisi wa bii to ka mi woo, la nari ti to kelum zusera bɔ’ɔra ba. (1 Tes. 5:​12, 13) To me ta’an le zusɛ bo mabiisi wa pɔɣeba, se’ere n sɔi la bamam n soŋeri ba sireba ti ba ta’an tuna ba tuuma.

10-11. To san zusɛ yele yinɛ bo to mabiisi za’a, Yehowa puurɛ wan pee? Tɔɣɛ pa’alɛ.

¹⁰ Wuu ton puɣum sɔsɛ se’em la, saŋa zo’e zo’e to ni zusa bɔ’ɔra la to mabiisi la za’a. Makerɛ, la boi bim ti to kan purɛ mabia ayima yu’urɛ, to ta’an zusɛ Yehowa ti a soŋɛ to mabiisi sɛba n boi sarega bii a buɣelɛ sɛba nɛreba n ki ti ba suure sa’am la. Keema ayima yu’urɛ n de Donald yeti, “Yeledaaŋɔ zo’e zo’e n paari to mabiisi ti saŋa ase’a to ni kɔ’ɔn zusɛ bo ba za’a.”

¹¹ Yehowa puurɛ pee la zusega ana taaba? Ɛɛ! Yelemɛŋɛrɛ, to ka mi to mabiisi la za’a n eeri yelese’a wana mɔpi. Bala la, la ani soŋa ti to ni zusɛ yele yinɛ bo ba za’a. (Yon 17:20; Ep. 6:18) Zusega ana taaba pa’alɛ ti to ‘tari nɔŋerɛ bɔ’ɔra mabinɔɔrɛ la za’a.’—1 Pe. 2:17.

TO SAN ZUSERA BƆ’ƆRA TO MABIISI AYIMA AYIMA

12. To san bisa yɛla soŋa la wan soŋɛ to la wani ti to ta’an zusɛ yele wana mɔpi bo to mabiisi?

¹² Bisa yɛla soŋa. Wuu to ni zusɛ bo to mabiisi za’a se’em la, to me ta’an kelum zusɛ bo ba ayima ayima. Nɛra boi ho tansugere la poan ti bã’asi daana en? Bunbilipaalega boi ho tansugere la poan ti a giila kɔ’ɔsɛ la a sukuu tadaandoma n pã’aseri en ti a eŋɛ sɛla n ka ani soŋa? Dɔɣera ayina ma’a boi ho tansugere la poan tiregera ti a ugura a kɔma ti ba dɔla “Na’ayenɛ sore la ge pa’ala ba sɛla n nare ba eta”? (Ep. 6:4) Ho san bisa yɛla soŋa, ho wan nɔŋɛ mabiisi la ge tara ba giile. Bala wan basɛ ti ho bɔta ti ho zusɛ bo ba.b—Arom 12:15.

13. To wan eŋɛ la wani ta’an zusɛ bo sɛba ti to ka mina la?

¹³ Ho san zusera bɔ’ɔra mabiisi yi ba yu’ura. To wan ta’an eŋɛ bala hali la sɛba ti to ka mina la. Makerɛ, ti’isɛ bisɛ mabiisi sɛba ti ba paɣɛ ba Crimea, Eritrea, Russia, la Singapore tisi poan. Ho ta’an nyɛ mabiisi wa yu’ura jw.org poan.c Gingilega kaarɛ bisegadaana ayima yu’urɛ n de Brian yeti: “Mam baŋɛ ti mam san ni gulesɛ mabiisi sɛba ti ba paɣɛ ba la yu’ura biŋe ge tiregɛ yi ba yu’ura la, la ni soŋɛ mam ti n ta’an tɛ̃ra ba yele ge zusɛ bo ba.”

14-15. To wan eŋɛ la wani ta’an zusɛ yele wana mɔpi?

¹⁴ Loe yele wana mɔpi zusɛ. Michael, ti to puɣum tɔɣɛ a yele la yeti: “Mam san ni keŋɛ jw.org ta kaala mabisɛba ti ba paɣɛ ba la yele, mam ni ti’isa la lan wan ana ni mam se’em n san bɔna bɔnkaŋa taaba poan. Mam mi ti mam wan fabela ni la n pɔɣa yele. Mam me wan boti ni ti nɛreba bisa en soŋa. Mam n ti’iseri yele ana wa la basɛ ti mam ni zusa bɔ’ɔra la mabisɛba n tari pɔɣeba ti ba paɣɛ ba la.”—Heb. 13:3.

¹⁵ To san ti’isa dabeserɛ woo poan yelese’a n paari to mabisɛba n boi sarega la, la wan soŋɛ tɔ ti to ni zusɛ yele wana mɔpi bo ba. Makerɛ, to ta’an zusɛ Yehowa ti a basɛ ti sarega gu’ureba la ita to mabiisi la soŋa. To me ta’an zusɛ ti gɔmɛt kpɛ’ɛndoma bo to mabiisi la yɔ’ɔ ti ba pu’usa Yehowa. (1 Tim. 2:​1, 2) To ta’an le zusɛ Yehowa ti a kpemese to mabisɛba ti ba nyɔɣɛ ba tansugere nɛreba ta paɣɛ la giila ge me basɛ ti nɛresɛba n boi sarega la baŋɛ to mabiisi la n tari halese’a ta’an kelese yelesoma la. (1 Pe. 2:12) Yelemɛŋɛrɛ, yele ana wa me wan soŋɛ tɔ ti to zusa bɔ’ɔra to mabisɛba n ŋmiberi daaŋɔ ase’a poan la. To san bisa yɛla soŋa, yi’ira to mabiisi yu’ura zusega poan ge me ni zusɛ yele wana mɔpi bo ba, la wan pa’alɛ ti to tari “nɔŋerɛ bɔ’ɔra taaba.”—1 Tes. 3:12.

TARA PUTƐSONƐ HO SAN ZUSERA

16. To san zusera, to wan eŋɛ la bem pa’alɛ ti to tari putɛsonɛ? (Matu 6:8)

¹⁶ Wuu ton puɣum sɔsɛ se’em la, to san zusɛ bo nɛra la ta’an tee a bɔŋa la. Ge la nari ti to tara putɛsonɛ. To san zusera, la nari ti to tɛ̃ra ti Yehowa puɣum mina yelese’a ti to zusa ɛɛra mɛ. La me ka nari ti to pa’ala en eŋa n nari ti a maalɛ to yele la se’em. Yehowa puɣum mina a yamesi n eeri yelese’a mɛ ge ti ba nyaa soke en. (Kaalɛ Matu 6:8.) Beni n sɔi ti la yi nara ti to zusera bɔ’ɔra nɛreba? To puɣum sɔsɛ baŋɛ sɛla n sɔi ge yelese’ere n pa’asɛ dela, la pa’alɛ la ton fabeli nɛreba yele se’em. Ton nɔŋɛ nɛreba la zuo to me wan zusera bɔ’ɔra ba. Yehowa puurɛ ni pee mɛ a san nyɛ ti a yamesi iti pa’ala ti ba tari nɔŋerɛ.

17-18. To wan ta’an dekɛ ton zuseri bɔ’ɔra nɛreba makɛ la bem?

¹⁷ To san puɣum zusɛ ti bɔŋa la ka tee, to zusega la pa’alɛ ti to tari la nɔŋerɛ bɔ’ɔra to mabiisi la. Yehowa me nyɛti yele ana mɛ. Ti’isɛ yele wa bisɛ: To makɛ ti nɛra la a pɔɣa n tari kɔma bayi—budibila la pugela. Budibila la bɛ̃’ɛri mɛ paa ti pugela la yele a sɔ la ti: “Soso, basɛ ti ba tibɛ n tã la ge a bɛ̃’ɛri mɛ paa!” La boi bim ti sɔ la puɣum mina ti a bibudibila la bɛ̃’ɛri mɛ, a me nɔŋɛ en mɛ ge bɔta ti a tibɛ en. Ge bisɛ sɔ la puurɛ n wan pee se’em la eŋa n baŋɛ ti a bipugela la fabeli a tã la yele ge bɛlena en ti a soŋɛ a tã la.

¹⁸ Bala mea nɔɔ ti Yehowa kpɛmesa to giila ti to fabela taaba yele ge me zusa bɔ’ɔra taaba. To san ita bala, la wan pa’alɛ ton fabeli nɛreba yele se’em. Yehowa me wan baŋɛ bala. (2 Tes. 1:3; Heb. 6:10) Leyɛ’ɛsa, wuu ton puɣum sɔsɛ baŋɛ se’em la, saŋa ase’a to zusega la ta’an basɛ ti nɛra la bɔŋa tee. Bala la, basɛ ya ti to za’a tɛ̃ra zusa bɔ’ɔra nɛreba.